ཞི་ཅིན་ཕིང་གིས་བོད་ལྗོངས་གཞིས་ཀ་རྩེ་གྲོང་ཁྱེར་དིང་རི་རྫོང་གི་རིམ་པ6.8ཀྱི་ས་ཡོམ་ཐད་མཛུབ་སྟོན་གལ་ཆེན་གནང་སྟེ་ནན་གྱིས་བསྟན་དོན།
ནུས་ཤུགས་ཡོད་རྒུས་མི་སྣ་འཚོལ་སྐྱོབ་བྱས་ནས། མི་ཤི་རྨས་འབྱུང་ཚད་ཇེ་ཉུང་དུ་གཏོང་ཅི་ཐུབ་བྱེད་པ་དང་།གནོད་འཚེ་ཕོག་པའི་མང་ཚོགས་འོས་འཚམ་ཀྱིས་བདེ་འགོད་བྱས་ནས་བདེ་འཇགས་དང་དྲོ་སྐྱིད་ལྡན་པའི་ངང་དགུན་བསྐྱལ་བར་འགན་ལེན་བྱེད་དགོས།ལི་ཆང་གིས་མཆན་བཀོད་མཛུབ་སྟོན་གནང་།པེ་ཅིན་གྱི་དུས་ཚོད་ཟླ1པོའི་ཚེས7ཉིན་གྱི་ཆུ་ཚོད9དང་སྐར་མ5ཡི་སྟེང་། བོད་ལྗོངས་གཞིས་ཀ་རྩེ་གྲོང་ཁྱེར་དིང་རི་རྫོང་དུ་རིམ་པ6.8ཀྱི་ས་ཡོམ་བྱུང་ནས་མི་ལ་ཤི་རྨས་ཚབས་ཆེན་བྱུང་བ་དང་ཁང་པ་མང་པོ་བརྡིབས།
ས་ཡོམ་བྱུང་རྗེས། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅིའམ་རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུའི་ཀྲུའུ་ཞི་ཞི་ཅིན་ཕིང་གིས་ཚད་མཐོའི་མཐོང་ཆེན་གནང་བ་མ་ཟད་མཛུབ་སྟོན་གལ་ཆེན་གནང་ནས་བསྟན་དོན། བོད་ལྗོངས་གཞིས་ཀ་རྩེ་གྲོང་ཁྱེར་དིང་རི་རྫོང་དུ་རིམ་པ6.8ཀྱི་ས་ཡོམ་བྱུང་སྟེ། མི་ལ་ཤི་རྨས་ཚབས་ཆེན་བཟོས། ནུས་ཤུགས་ཡོད་རྒུས་མི་འཚོལ་སྐྱོབ་དང་རྨས་སྐྱོན་ཕོག་པའི་མིར་ནུས་ཤུགས་ཡོད་རྒུས་སྐྱོབ་བཅོས་བྱས་ཏེ། མི་ལ་ཤི་རྨས་འབྱུང་བ་ཇེ་ཉུང་དུ་གཏོང་གང་ཐུབ་བྱེད་པ་དང་། ཞོར་ཐོན་གནོད་འཚེ་མི་ཡོང་བའི་སྔོན་འགོག་བྱེད་པ། གནོད་འཚེ་ཕོག་པའི་མང་ཚོགས་འོས་འཚམ་གྱིས་བདེ་འགོད་བྱས་ཏེ། རྗེས་ཕྱོགས་ཀྱི་བྱ་བ་ལེགས་པོར་བསྒྲུབ་དགོས། ས་ཡོམ་གྱི་གནས་ཚུལ་ལྟ་ཞིབ་ཚད་ལེན་དང་སྔོན་བརྡ་གཏོང་བར་ཤུགས་སྣོན་བརྒྱབ་ནས། ཉེན་ཁ་མྱུར་སེལ་དང་རོགས་སྐྱོབ་དངོས་རྫས་དུས་ཐོག་ཏུ་གཏོང་འདྲེན་དང་། རྨང་གཞིའི་སྒྲིག་བཀོད་གང་མགྱོགས་སྒོས་ཞིག་གསོ་བྱེད་པ་དང་མང་ཚོགས་ཀྱི་གཞི་རྩའི་འཚོ་བ་བཀོད་སྒྲིག་ཡག་པོ་བྱས་ཏེ། བདེ་འཇགས་དང་དྲོ་སྐྱིད་ལྡན་པའི་ངང་དགུན་དུས་སྐྱེལ་ཐུབ་པར་འགན་ལེན་བྱེད་དགོས།
ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུའམ་རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་གིས་མཆན་བཀོད་མཛུབ་སྟོན་གནང་ནས་བསྟན་དོན། གནོད་འཚེའི་གནས་ཚུལ་དང་མི་ཤི་རྨས་ཀྱི་གནས་ཚུལ་ལ་ཞིབ་དཔྱད་དམ་འཛིན་བྱེད་པ་དང་། ནུས་ཤུགས་ཡོད་རྒུས་ཉེན་ཁ་མྱུར་སེལ་རོགས་སྐྱོབ་སྒྲིག་འཛུགས་བྱེད་དགོས་པར་མ་ཟད། ས་ཡོམ་གྱི་གནས་ཚུལ་ལ་ལྟ་ཞིབ་ཚད་ལེན་བྱེད་ཤུགས་ཆེ་རུ་གཏོང་བ་དང་། ཞོར་སྐྱོན་སྣ་ཚོགས་འབྱུང་བར་སྔོན་འགོག་བྱས་ཏེ། ནུས་ཤུགས་ཡོད་རྒུས་ཤི་རྨས་འབྱུང་བ་ཇེ་ཉུང་དུ་གཏོང་དགོས། ས་ཡོམ་གྱི་གནོད་འཚེ་ཕོག་ཁུལ་ནི་མཐོ་སྒང་གི་གྲང་ངར་ཆེ་བའི་ས་ཁུལ་དུ་གནས་པས། དགུན་ཁའི་དུས་འདིར། ཐབས་བརྒྱ་ཇུས་སྟོང་གིས་གནོད་ཁུལ་མང་ཚོགས་ཀྱི་གཞི་རྩའི་འཚོ་བ་དང་དྲོད་སྐྱིད་ལྡན་པའི་ངང་ནས་དགུན་དུས་བསྐྱལ་བར་འགན་ལེན་བྱེད་དགོས།ཞི་ཅིན་ཕིང་གི་མཛུབ་སྟོན་གལ་ཆེན་དང་ལི་ཆང་གི་བླང་བྱ་ལྟར། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་ནམ་རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ཀྲང་གོ་ཆིང་གིས་འབྲེལ་ཡོད་སྡེ་ཁག་གི་འགན་ཁུར་བློ་མཐུན་ཁྲིད་དེ་ཡུལ་དངོས་སུ་རོགས་སྐྱོབ་བྱ་བར་མཛུབ་སྟོན་གནང་བ་དང་། རྒྱལ་སྲིད་སྤྱི་ཁྱབ་ཁང་གི་ཡོམ་འགོག་གནོད་སེལ་བཀོད་འདོམས་པའུ་གཞུང་ལས་ཁང་དང་། འཕྲལ་བསྟུན་དོ་དམ་པུའུ་ཡིས་རྒྱལ་ཁབ་ཀྱི་ས་ཡོམ་རིམ་པ་གསུམ་པའི་འཕྲལ་བསྟུན་བྱ་ཐབས་དང་ལེན་བྱེད་མགོ་བརྩམས་ཤིང་། བོད་རང་སྐྱོང་ལྗོངས་ཀྱིས་སྟོབས་ཤུགས་རྩ་འཛུགས་བྱས་ནས་ནུས་ཤུགས་ཡོད་རྒུས་ཉེན་སེལ་གནོད་སྐྱོབ་བྱ་བ་སྤེལ་ཞིང་། གནོད་ཐེབས་མང་ཚོགས་འོས་འཚམ་སྒོས་བདེ་འགོད་བྱས། ཡོམ་འགོག་གནོད་སྐྱོབ་བྱ་བ་སོ་སོ་ཛ་དྲག་དང་གོ་རིམ་ལྡན་པའི་ངང་ནས་སྒྲུབ་བཞིན་པའི་སྒང་ཡིན།ཡོང་ཁུངས། མཚོ་སྔོན་བོད་ཡིག་གསར་འགྱུར།
རྩོམ་སྒྲིག་འགན་ཁུར་བ། དབང་ཆེན་དོན་འགྲུབ།
ལྟ་སྐུལ་བ། གཡང་འབུམ་ཚེ་རིང་། ![]()
责编/项吉当知
监制/杨本才让
投稿邮箱/3068276991@qq.com
བརྩམས་དབང་རྩོམ་མཁན་ལ་དབང་། དབང་གནོད་ཡོད་ཚེ་འཕྲལ་མར་ང་ཚོར་འབྲེལ་བ་གནང་རོགས།
版权归原者所有，如有侵权请立即与我们联系
