ཁྲོམ་ཕུ་དང་ཕུ་སྲན་གཉིས་ཀྱི་གྲོས་མོལ་གསར་བ་དང་ཨུ་ཡུག་དམག་འཁྲུག

    བདུན་ཕྲག་སྔོན་མའི་གཟའ་མིག་དམར་ཉིན། ཨ་རིའི་སྲིད་འཛིན་འོས་བསྡུའི་ཁྲོད། སྒྲོ་ནལ་ ཁྲི་རམ་ཕུ་ལ་ལོ་རྒྱུས་རང་བཞིན་གྱི་རྒྱལ་ཁ་ཆེན་པོ་ཐོབ་ཟིན་པ་ལྟར། ཝ་ཤིན་ཀྲོན་གསར་ཤོག་གིས། གནས་ཚུལ་དངོས་ལ་རྒྱུས་མངའ་ཡོད་པའི་མི་འགའི་སྐད་ཆ་ལུང་འདྲེན་གྱིས་གནས་ཚུལ་བཀོད་ལྟར་ན། བདུན་ཕྲག་སྔོན་མའི་གཟའ་ཕུར་བུའི་ཉིན། ཁྲི་རམ་ཕུ་དང་ཨུ་རུ་སུའི་སྲིད་འཛིན་ཕུ་ཀྲན་གཉིས། ཁ་པར་གྱི་ལམ་ནས་གླེང་མོལ་བྱས་ཟིན་པ་བཤད།

    དམག་འཁྲུག་དང་འབྲེལ་ཕུ་ཀྲན་དང་ལྷན་གླེང་མོལ་བྱེད་སྐབས། ཁྲི་རམ་ཕུས་ཕུ་ཀྲན་ལ། དམག་འཁྲུག་གི་གནས་སྟངས་སྡུག་ཏུ་གཏོང་མི་རུང་བ་དང་། གལ་སྲིད་དམག་འཁྲུག་སྡུག་ཏུ་ཕྱིན་ཚེ་ཡུ་རོབ་ཏུ་ཨ་རིའི་དམག་དཔུང་གྲངས་ངེས་ཅན་ཞིག་ཡོད་པའང་དྲན་དགོས་པའི་བརྡ་བཏང་ཡོད་པ་བཤད། ཉིན་གཅིག་གི་སྔོན་དེ་གཟའ་ལྷག་པའི་ཉིན་ཁྲི་རམ་ཕུ་དང་ཛེ་ལན་སི་ཀེ་བར་ཁ་པར་གྱི་ལམ་ནས་གླེང་མོལ་བྱས། ཡུ་ཁུ་རན་གྱིས།

སྐབས་དེའི་གླེང་མོལ་ཡག་པོ་བྱུང་ཟིན་པ་བཤད། དེ་བཞིན་ཐེངས་འདིར་ཕུ་ཀྲན་དང་ལྷན་གླེང་མོལ་བྱས་ཟིན་པའང་། ཁྲི་རམ་ཕུའི་ཕྱོགས་ནས་ཡུག་རེན་ལ་བརྡ་ལན་བཏང་ཟིན་པའི་གནས་ཚུལ་ཐོན།‍

    འབྲེལ་ཡོད་ཚོས་བཤད་པ་ལྟར་ན། སྒྲོ་ནལ་ ཁྲི་རམ་ཕུའི་དམིགས་ཡུལ་གཙོ་བོ་ནི། ལོ་རྗེས་མའི་ཕྱི་ཟླ་ 1 ནང་སྟེ་ཁོ་སྲིད་སྟེགས་ལ་མ་བསླེབས་བར། དམག་འཁྲུག་གི་གནས་སྟངས་མ་མཐའ་ཡང་ད་ལྟའི་འདི་ལས་སྡུག་ཏུ་མི་འགྲོ་རྒྱུ་དེ་ཡིན་པ་བཤད་ལ། མདོར་ན་ཁོས་དཀའ་ངལ་གསར་བ་ཞིག་མཐོང་འདོད་མེད་པ་བཤད། ཁྲི་རམ་ཕུས། ཁོས་དམག་འཁྲུག་འདི་ཆུ་ཚོད་ 24 ནང་མཇུག་བསྡུ་ཐུབ་ཅེས་ཤོད་ཀྱིན་ཡོད་ཀྱང་། ཐབས་ཤེས་འདི་ཡིན་ཞེས་ད་ལྟ་བར་ཕྱིར་མ་བསྒྲགས། 

   བདུན་ཕྲག་སྔོན་མར་ཁྲི་རམ་ཕུའི་སློབ་སྟོན་པ་ཞིག་གིས། ཡུག་རེན་གྱི་ངོས་ནས། ཁུ་རཱ་མེ་ཡ་གླིང་ཕྲན་ཨུ་རུ་སུར་ཡོངས་སུ་ཤོར་ཟིན་པ་དང་། དེ་ནི་ཕྱིར་ཡོང་མེད་པ་ཞིག་ཡིན་པ་ཁས་ལེན་དགོས་ཞེས་བཤད།

    ཁི་རཱ་མེ་ཡ་གླིང་ཕྲན་(Crimean Peninsula) ནི། ཕྱི་ལོ་ 2014 ལོར་ཨུ་རུ་སུའི་དམག་གིས་ཡུག་རེན་གྱི་ལག་ནས་འཕྲོག རྒྱལ་སྤྱིའི་སྤྱི་ཚོགས་ཀྱིས། ཁི་རཱ་མེ་ཡ་ཨུ་རུ་སུའི་ཁྲིམས་མཐུན་མངའ་ཁོངས་ཡིན་པ་ངོས་མི་ལེན། ཨུ་རུ་སུའི་དམག་འཁྲུག་གི་འགོ་ངོ་མ་སྐབས་དེ་དུས་བཙུག་ཟིན། ཡུག་རེན་གྱིས་ད་ལྟ་བར། ཁི་རཱ་མེ་ཡ་ཚུད་པའི་ཕུ་ཀྲན་གྱིས་འཕྲོག་ཟིན་པའི་ས་ཆ་ཚང་མ་ཕྱིར་བསློག་དགོས་ཞེས་སྒྲོག་བཞིན་ཡོད། 

    སྒྲོ་ནལ•ཁྲི་རམ་ཕུ་ལ་རྒྱལ་ཁ་ཐོབ་རྗེས། ཨུ་རུ་སུའི་སྲིད་འཛིན་ལས་ཁུངས་ཀྱི་མགྲིན་ཚབ་པ་པེ་སི་ཀོ་ཝི་ཡིས། ཨ་རི་ནི་ཨུ་རུ་སུའི་གྲོགས་ཕྱོགས་སུ་འཛིན་མཁན་གྱི་རྒྱལ་ཁབ་ཅིག་མིན་པས། ཕུ་ཀྲན་གྱིས་ཨ་རིའི་བདམས་ཐོན་སྲིད་འཛིན་ལ་འཚམས་འཕྲིན་སྐུར་རྒྱུའི་འཆར་གཞི་མི་འདུག་ཅེས་བཤད། ཡིན་ན་ཡང་། ལྐོག་ནས་ཨུ་རུ་སུའི་ཆེས་མཐོའི་དཔོན་རིགས་ཚོས་འཚམས་འཕྲིན་བསྐུར་ཟིན་པ། ཨུ་རུ་སུའི་རང་དབང་གསར་ཁང་ཞིག་གིས་གནས་ཚུལ་བཀོད། དེའི་རྗེས་སུ་པེ་སི་ཀོ་ཝི་ཡིས། གནས་ཚུལ་དེ་བདེན་པ་མ་རེད་ཟེར། 

    ཇི་ལྟར་ཡང་། གཟའ་ཕུར་བུའི་ཉིན་ཕུ་ཀྲན་གྱིས་གར་སྟེགས་ཤིག་གི་སྟེང་སྐད་ཆ་ཤོད་སྐབས། ཁོས། ཁྲི་རམ་ཕུ་ལ་མེ་མདའ་བརྒྱབས་པའི་དོན་རྐྱེན་དེ་བྱུང་སྐབས། ཁྲི་རམ་ཕུའི་རྣམ་འགྱུར་དང་བྱེད་སྟངས་དེ་སྐྱེས་པ་ཕོ་ཞིག་བྱེད་སྟངས་དང་། ཁྲི་རམ་ཕུ་ནི་བློ་སྟོབས་ཅན་ཞིག་ཡིན་ཚུལ་སོགས་བཤད། དེ་དང་ལྷན་ཁོས། ཁྲི་རམ་ཕུ་ལ་རྒྱལ་ཁ་ཐོབ་པར་ངག་ཐོག་ནས་འཚམས་འཕྲིན་བསྐུར་ཅིང་། ང་ཚོས་སྔར་ནས་བཤད་ཟིན་པ་ལྟར། ཨ་རིའི་སྲིད་འཛིན་སུ་ཞིག་བསླེབས་ཀྱང་། དེ་དང་ལྷན་སྐད་ཆ་ཤོད་འདོད་ཡོད་པ་དང་། སྒྲོ་ནལ•ཁྲི་རམ་ཕུ་དང་ལྷན་ལས་ཀ་བྱ་རྒྱུའི་གྲ་སྒྲིག་ཡོད་ཅེས་བཤད། 

    གནས་ཚུལ་གཞན་པ་ཞིག་ལ། ཁ་སང་ཡུག་རེན་དམག་གིས། ཨུ་རུ་སུའི་རྒྱལ་ས་མོ་སི་ཁོ་ལ་སྒྲི་རོན་གྱིས་ཕར་རྒོལ་བྱས། མོ་སི་ཁོའི་གནམ་ཐང་ 3 རེ་ཞིག་སྒོ་རྒྱག་དགོས་བྱུང་། གཞན་ཨུ་རུ་སུའི་བདེ་སྲུང་ལས་ཁུངས་ཀྱིས། བྷུར་ཡན་སི་ཀི་མངའ་སྡེ་དང་ཀ་ལུ་གྷ་མངའ་སྡེ།  ཁར་སི་ཀི་མངའ་སྡེ། ཏུ་ལ། ཨོར་ཡོལ་ Oryol བཅས་ཀྱི་མཁའ་དབྱིངས་ནས་ཡུག་རེན་དམག་གི་སྒྲི་རོན་ 80 བཀག་ཟིན་ཟེར། 

དེ་བཞིན་ཁ་སང་དབྱིན་ཇིའི་ཆེས་མཐོའི་དམག་དོན་ལས་བྱེད་ཅིག་གིས་སྦི་སྦི་སི་གསར་ཁང་ལ་བཤད་པ་ལྟར་ན། ད་ལོའི་ཕྱི་ཟླ་ 10 ནང་ཉིན་རེར་ཨུ་རུ་སུའི་དམག་ 1,500 ཡས་མས་ཤི་རྨས་ཐེབས་བཞིན་པ་དང་།  འདི་ནི་དམག་འཁྲུག་འགོ་བཙུག་པ་ནས་ཤི་རྨས་ཐེབས་ཚད་མང་ཤོས་ཀྱི་ཟླ་བ་ཞིག་ཡིན་པ་བཤད། 

གཞན་ཡང་ཨུ་རུ་སུའི་ཁྲི་དམག་ལྔ་ཡིས། ཡུག་རེན་གྱི་དམག་མི་ཨུ་རུ་སུའི་ཁར་སི་ཀི་མངའ་སྡེ་ནས་ཕྱིར་འདེད་ཐབས་བྱས་ཀྱང་། རེ་ཞིག་འདེད་མ་ཐུབ་པར་ལྷག་ཡོད་པ་ལྟར། ད་ལྟ་བྱང་ཁོ་རེ་ཡའི་དམག་མི་ 10,000 ཡས་མས་ཁར་སི་ཀི་ས་ཁུལ་དུ་དམག་རོགས་སུ་བསླེབས་ཡོད་པ་དང་། ཁར་སི་ཀི་མངའ་སྡེའི་ཁྱིམ་མཚེས་བྷེལ་གྷོ་རོ་ཀྲི་མངའ་སྡེ་རུའང་བྱང་ཁོ་རེ་ཡའི་དམག་མི་བསླེབས་ཡོད་པའི་གནས་ཚུལ་ཐོན།