ཤི་བོའི་རྗེས་ཀྱི་གསོན་པོ་དག་ལ་གདམས་པ།ཞབས་དཀར་ཚོགས་དྲུག་རང་གྲོལ།འགྲོ་བའི་སྡུག་བསྔལ་ཀུན་སེལ་བའི། །བླ་མ་དཀོན་མཆོག་རིན་པོ་ཆེ། །ཁྱིམ་པ་སེམས་སྡུག་ཅན་རྣམས་ཀྱི། །སྡུག་བསྔལ་སངས་པར་བྱིན་གྱིས་རློབས། །རྒྱལ་ཁམས་འགྲིམས་པའི་བན་རྒན་ངས། །བུ་གཅིག་ཤི་བའི་ཕ་མ་སོགས། །སྡུག་བསྔལ་ཅན་ལ་སེམས་གསོ་བྱ། །དད་ཅན་བསམ་ཤེས་ཕོ་མོས་ཉོན། །སྔོན་དུས་སངས་རྒྱས་བཅོམ་ལྡན་འདས། །འཆི་མེད་རྡོ་རྗེའི་སྐུ་བརྙེས་ཀྱང་། །དགུང་ལོ་བརྒྱད་ཅུར་བཞུགས་པའི་ཚེར། །སྐུ་དེ་མྱ་ངན་འདས་ཚུལ་བསྟན། །མཆོག་ཐུན་དངོས་གྲུབ་ཀུན་ཐོབ་པའི། །རྒྱ་གར་གྲུབ་ཆེན་བརྒྱད་ཅུ་དང་། །བོད་ཀྱི་རྗེ་འབངས་ཉེར་ལྔ་དང་། །མི་ལ་བློ་བཟང་ཡབ་སྲས་སོགས། །སྔོན་བྱོན་མཁས་གྲུབ་གནམ་གྱིས་ས། །བཀབ་པ་ལྟ་བུ་ཐམས་ཅད་ཀྱང་། །རྟག་འཛིན་ཅན་རྣམས་ཆོས་བསྐུལ་ཕྱིར། །སྐུ་དེ་གཤེགས་པའི་ཚུལ་བསྟན་ན། །རང་རེ་ལྟ་བུ་སྨོས་ཅི་དགོས། །བོད་ལ་བསྟན་པའི་སྲོལ་བཏོད་པའི། །ཆོས་རྒྱལ་སྲོང་བཙན་སྒམ་པོ་སོགས། །རྒྱལ་པོ་བློན་པོ་མཁས་པ་དང་། །དཔའ་བོ་རི་བྲག་སྟག་འདྲ་བ། །སྐྱེས་པ་ཐམས་ཅད་ད་ལྟ་མེད། །སྔོན་ཆད་སྐྱེས་པ་མ་ཤི་བར། །ཚེ་ཐར་ལུས་པ་གཅིག་ཀྱང་མེད། །ད་ལྟའི་རྒན་གཞོན་ཕོ་མོ་དང་། །ཕྱིན་ཆད་སྐྱེས་པ་ཐམས་ཅད་འཆི། །སྐྱེས་པ་ཡོད་ན་འཆི་བ་ཡོད། །སྐྱེས་ནས་མ་ཤི་སེམས་ཅན་མེད། །འཆི་བ་གཅིག་ལ་བྱུང་བ་མིན། །སྔ་ཕྱི་ཙམ་གྱི་ཁྱད་མ་གཏོགས། །མཆོག་དམན་བར་མ་ཀུན་ལ་འབྱུང་། །མ་སྡུག་མ་ངུ་དགེ་བ་གྱིས། །སྔོན་དུས་སྒྲ་སྒྱུར་མར་པའི་སྲས། །ལ་སོགས་ས་ཐོབ་སྐྱེས་བུ་ཡང་། །གཞོན་དུས་གཤེགས་པའི་ཚུལ་བསྟན་ན། །འོ་སྐལ་རྣམས་ཚོ་སྨོས་ཅི་དགོས། །གཟུགས་མཛེས་སྐད་སྙན་སེམས་བཟང་བའི། །ལྷ་ཕྲུག་འདྲ་བའི་བུ་ཚ་དང་། །ཕྱེ་བ་ལྟ་བུའི་བུ་མོ་ཡང་། །སྔོན་ཆད་གློ་བུར་ཤི་བ་མང་། །འཛམ་གླིང་ཚེ་ལ་ངེས་པ་མེད། །བུ་གཅིག་ཤི་བས་མ་ཡིན་ཀྱང་། །ཆེ་བ་དགེ་བཤེས་རྒྱལ་བློན་དང་། །ཕྱུག་པོ་དབུལ་པོ་ཀུན་གྱི་མགོར། །རྐྱེན་ངན་མི་འོང་གཅིག་ཀྱང་མེད། །སྔ་ཕྱི་བྱས་ནས་ཀུན་ལ་འོང་། །ཁྱིམ་ཚང་གཅིག་ལ་བྱུང་བ་མིན། །ཚེ་ཡི་མཐའ་ལ་བབས་པའི་ཚེར། །སྨན་པའི་རྒྱལ་པོ་འཚོ་བྱེད་དང་། །མཐུ་སྟོབས་བདག་པོ་ཕྱག་རྡོར་དང་། །འཆི་མེད་དཔལ་སྟེར་ཚེ་དཔག་མེད། །དངོས་སུ་བྱོན་ཡང་ཕན་མི་ཐོགས །སྐུ་རིམ་སྲུང་བ་ཀུན་ངན་ནས། །བར་དོའི་སྐབས་ན་གནས་པའི་དུས། །སྟེང་དུ་རྣག་ཁྲག་ཆར་པ་འབབ། །ཞག་པོ་བཞི་བཅུ་ཞེ་དགུའི་བར། །ངུས་ན་ཤི་བོ་ཉིན་རེ་བཞིན། །སྡུག་བསྔལ་དཔག་ཏུ་མེད་པར་མྱོང་། །ངུ་བདག་དེ་ཡི་ལུས་ལ་གནོད། །ཤ་ཞན་མདོག་ཤོར་སྒུར་བོར་འགྱུར། །མིག་ཆུ་མང་པོ་འདོན་མི་རུང་། །མིག་ཆུས་མིག་གི་རྩ་ལ་གནོད། །མིག་ཀྱང་མི་གསལ་རབ་རིབ་འགྱུར། །མྱ་ངན་བྱས་ན་རྒན་རྒོན་རིགས། །ཕལ་ཆེར་ངུས་ནས་ཞར་པ་མང་། །བླ་མ་དགེ་འདུན་བཞུགས་པའི་དུས། །ངུ་འབོད་བྱས་ན་སྙན་ལ་གནོད། །ཤི་བོར་ཕན་པའི་འདོན་རྒྱུ་དང་། །སྒོམ་རྒྱུ་གང་ཡང་འོང་བ་དཀའ། །དེ་ཕྱིར་མ་སྡུག་མ་ངུ་བར། །ཆོས་རྣམས་རྨི་ལམ་སྒྱུ་མ་འདྲ། །བཟའ་ཚང་ཚོང་འདུས་མགྲོན་པོ་འདྲ། །སྐྱེ་འཆི་ཉི་ཟླའི་འཆར་ནུབ་འདྲ། །སྐྱིད་སྡུག་ལམ་ཁའི་མགྲོན་པོ་འདྲ། །ནོར་རྫས་རྩྭ་ཁའི་ཟིལ་བ་འདྲ། །དར་རྒུད་སེམས་ཅན་ཀུན་ལ་འབྱུང་། །ཁྱིམ་ཚང་གཅིག་ལ་འབྱུང་བ་མིན། །འདི་ཕྱིར་ཕན་པའི་དགེ་བ་གྱིས། །འོན་ཀྱང་སྔས་མགོར་མ་འོངས་པ། །གསར་དུ་གློ་བུར་བྱུང་བས་ན། །ཟུངས་མེད་ངུ་རྒྱུ་འོང་བ་ཁག །མེད་རུང་མ་ངུ་སྡུག་བསྲན་གྱིས། །རྟ་ཕོ་ཞག་མ་བརྒྱར་ཞོན་ནས། །རྒྱུག་ཀྱང་མི་ཟིན་ཕ་རོལ་ཏུ། །ཤི་བོ་བཟང་པོ་སོང་ཕྱིན་ཆད། །ཤི་བོས་ཐོས་ན་ངུ་མོད་ཀྱང་། །མི་ཐོས་ཕྱིན་ཆད་ངུས་པས་ཅི། །ཤི་བོར་ཕན་ན་ངུ་མོད་ཀྱང་། །ཕན་པ་ཕར་ཞོག་ཤི་བོར་གནོད། །མི་ཕན་གནོད་པས་ངུས་ནས་ཅི། །རང་ལ་མི་བཟང་ཡུལ་མི་ཚོས། །དེ་ཚོས་དེ་ཉོས་ཟེར་ཡང་ཐང་། །རྐྱེན་ངན་བྱུང་ནས་ཐེག་པ་ལ། །སྐྱིད་ནི་མི་ཐེག་སུ་ཞིག་ཡོད། །སྡུག་བསྔལ་བྱུང་དུས་ཐེག་པ་དགོས། །མ་རྒན་བཞིན་དུ་སྣ་ཚོ་ལུག །གླང་རྒན་བཞིན་དུ་སྡུག་འཁུན་བྱེད། །བོང་རྒན་བཞིན་དུ་ཕས་འདེབས་པ། །སྐྱེ་བོ་གླེན་པའི་ཆོས་ལུགས་ཡིན། །ངུས་ནས་ཤི་བོ་ཕྱིར་མི་འོང་། །དགེ་རྩའི་ཐེབས་སུ་དེ་མི་འགྲོ། །རང་གིས་རང་ལ་སྡུག་སྐུལ་པ། །མ་གཏོགས་དོན་གོ་སྤུ་ཙམ་མེད། །ཕོ་རབ་མོ་རབ་བསམ་ཤེས་ཚོ། །བླུན་པོའི་ལད་མོ་མ་བྱེད་ཨང་། །གཏམ་འདི་ཚོགས་དྲུག་རང་གྲོལ་གྱིས། །ཁྱིམ་པ་སེམས་སྡུག་ཅན་ལ་སྨོས། །ཐོས་ཚད་མྱ་ངན་ཀུན་སངས་ནས། །ཡིད་ལ་དགའ་བདེ་འཆར་བར་ཤོག །
