![]()
མཁར་ཆེན་ཡེ་ཤེས་མཚོ་རྒྱལ་གྱི་རྣམ་རོལ་འབྲི་གུང་མཁའ་འགྲོ་མཆོག་གི་ཞབས་བརྟན་སྨོན་ཚིག་འཆི་མེད་རིག་འཛིན་གྲུབ་པའི་སྒྲ་དབྱངས།མཛད་པ་པོ། མཁན་ཆེན་འཆི་མེད་རིག་འཛིན།མགུར་མཁན། རིན་ཆེན་རྣམ་རྒྱལ།
ངོ་མཚར་ཚེ་ཡི་བདུད་རྩིའི་བུམ་པ་ན།། སྲོག་གི་དྭངས་བཅུད་འཛིན་པ་འོད་མཐའ་ཡས།། འཆི་མེད་རྔ་སྒྲའི་རྒྱལ་པོར་གསོལ་བ་འདེབས།། བསྟན་འཛིན་ཆོས་ཀྱི་སྒྲོན་མེ་ཞབས་བརྟན་ཤོག །ལྷོ་ནུབ་པད་མ་འོད་ཀྱི་ཕོ་བྲང་གི།།ལྔ་ལྡན་འཇའ་ཟེར་འཁྲིགས་པའི་གུར་ཁང་ན།། འཕོ་ཆེན་འོད་ལུས་གྲུབ་པ་ཨོ་རྒྱན་རྗེས།། རིག་འཛིན་མཁའ་འགྲོའ་ིསྐུ་ཚེ་བསྲིང་བར་མཛོད།།སྲས་བཅས་རྒྱལ་བའི་མཁྱེན་པའི་ཡེ་ཤེས་ཀྱིས།། འདི་ཞེས་བརྗོད་པའི་ཐ་སྙད་མ་དམིགས་པའི།། ལྷན་སྐྱེས་དོན་གྱི་མཁའ་འགྲོར་གསོལ་བ་འདེབས།། འབྲལ་མེད་འགྲོག་པའི་ཁྱེད་ཞལ་མཇལ་བར་ཤོག །གཡུ་ལོ་བཀོད་སོགས་མཁའ་སྤྱོད་ཞིང་ཁམས་ན།། རིག་འཛིན་རྣམ་བཞིའི་ས་ལ་དབང་བསྒྱུར་བའི།། སྔགས་སྐྱེས་ལོངས་སྐུའི་མཁའ་འགྲོར་གསོལ་བ་འདེབས།།དམ་ཆོས་སྒྲུབ་པའི་བར་ཆད་དབྱིངས་སུ་སོལ།། མི་དང་མི་མིན་འཇིག་རྟེན་དུ་མ་ན།། གཤིས་འཇམ་ཤེས་རབ་རིག་པའི་རྩལ་ཁ་རྒྱས།། ཞིང་སྐྱེས་རིག་བཟང་མཁའ་འགྲོར་གསོལ་བ་འདེབས།།འཕྲིན་ལས་རྣམ་བཞི་སྒྲུབ་པའི་སྡོང་གྲོགས་མཛོད།། པདྨས་བྱིན་བརླབས་གངས་ཅན་ཡུལ་དབུས་ན།། ཡེ་ཤེས་ཌཱ་ཀིའི་རྣམ་རོལ་འགྲོ་བའི་མགོན།། མཁའ་འགྲོའ་ིགཙོ་མོ་ཁྱེད་ལ་གསོལ་བ་འདེབས།།བྱིན་རླབས་ཉི་མའི་འོད་ཀྱིས་རྟག་ཏུ་སྐྱོངས།། སྲིད་པ་འདི་ལ་མེ་ཡི་འོབས་སུ་མཐོང་།། མཁའ་སྤྱོད་ཞིང་གི་སྐྱེད་ཚལ་ཐུགས་ལ་ཤར།། ཆུང་ནས་བཟུང་སྟེ་དམ་པའི་བག་ཆགས་སད།། བསྟན་འཛིན་ཆོས་ཀྱི་སྒྲོན་མེ་ཞབས་བརྟན་ཤོག ། ལྷ་ཆོས་འདི་ལ་ཡིད་བཞིན་ནོར་བུར་ཤེས།། དམ་པའི་མགོན་ལས་གདམས་ངག་བདུད་རྩི་བླངས།།དབེན་པའི་རི་ལ་སྒྲུབ་པའི་རྒྱལ་མཚན་བཙུགས།། བསྟན་འཛིན་ཆོས་ཀྱི་སྒྲོན་མེ་ཞབས་བརྟན་ཤོག །སྒྱུ་ལུས་འདི་ལ་ཡེ་ཤེས་རྩི་ཡིས་ཐེབས།། ཉི་ཟླའི་རྒྱུ་བ་སྒྲ་གཅན་དབྱིངས་སུ་དག། དགའ་བཞིའི་འགྲོས་ཀྱིས་རིག་འཛིན་ཐེམ་སྐས་བགྲོད།།བསྟན་འཛིན་ཆོས་ཀྱི་སྒྲོན་མེ་ཞབས་བརྟན་ཤོག ། ལྟ་བ་འདི་ལ་གོམས་པ་ཚད་དུ་ཕྱིན།། གནས་ཡུལ་རིག་འཛིན་མཁའ་འགྲོའ་ིཁྲི་ལ་དབང་།།མི་དང་མི་མིན་བར་གྱི་གསང་ལམ་ཤེས།། བསྟན་འཛིན་ཆོས་ཀྱི་སྒྲོན་མེ་ཞབས་བརྟན་ཤོག །བསྐྱེད་རྫོགས་འདི་ལ་བརྟན་པ་མཆོག་ཏུ་ཐོབ།། འབྱུང་འགྱུར་ཤེས་བྱ་གཟིགས་པའི་སྤྱན་གཅིག་རྙེད།།ཡེ་ཤེས་མཁའ་འགྲོའ་ིབརྡ་ཡི་ལུང་ལ་དབང་།། བསྟན་འཛིན་ཆོས་ཀྱི་སྒྲོན་མེ་ཞབས་བརྟན་ཤོག །ཟབ་གཏེར་འདི་ལ་སྨོན་ལམ་གཏད་རྒྱ་སད།། པདྨས་གནང་བའི་རིན་ཆེན་སྒྲོམ་བུ་མང་།། གསང་ཆེན་རྒྱུད་སྡེའི་ཆོས་ཀྱི་མཛོད་ལ་དབང་།། བསྟན་འཛིན་ཆོས་ཀྱི་སྒྲོན་མེ་ཞབས་བརྟན་ཤོག ། རྟེན་འབྲེལ་འདི་ལ་གང་འདོད་ཕྱག་རྒྱས་བཏབ།། སྣོད་བཅུད་དགེ་མཚན་ཡར་ཟླའི་མཆེད་དུ་སྤེལ།། མཁས་གྲུབ་སྐྱེས་ཆེན་དུ་མའི་སྐུ་ཚེ་བསྲིངས།། བསྟན་འཛིན་ཆོས་ཀྱི་སྒྲོན་མེ་ཞབས་བརྟན་ཤོག །དམ་ཆོས་འདི་ལ་ཕྱི་ནང་འགལ་རྐྱེན་མང་།། དད་གུས་གདུང་བས་རྟག་ཏུ་གསོལ་འདེབས་ན།། མཁར་ཆེན་མཁའ་འགྲོའ་ིརྣམ་རོལ་སྤྲུལ་པའི་སྐུ།།བསྟན་འཛིན་ཆོས་ཀྱི་སྒྲོན་མེ་ཞབས་བརྟན་ཤོག །སྐྱེ་འཆི་འདི་ལ་མཆོག་ཁྱེད་རང་དབང་འབྱོར།། དག་པའི་ཞིང་ལ་ཐུགས་འདུན་མི་སྔ་བར།། ང་ཅག་སྐྱེ་འགྲོའ་ིམགོན་དུ་ཡུན་ནས་ཡུན།། བསྟན་འཛིན་ཆོས་ཀྱི་སྒྲོན་མེ་ཞབས་བརྟན་ཤོག །སྐུ་ཚེ་འདི་ལ་མཁའ་འགྲོའ་ིཞིང་མཆོག་ནས།། ཕེབས་པའི་ཐུགས་བཞེད་མཐའ་དག་ཡིད་བཞིན་གྲུབ།།བསྟན་དང་འགྲོ་བའི་དཔལ་མགོན་དམ་པ་རུ།། བསྟན་འཛིན་ཆོས་ཀྱི་སྒྲོན་མེ་ཞབས་བརྟན་ཤོག །སེམས་རྒྱུད་འདི་ལ་བླ་མའི་བྱིན་རླབས་ཞུགས།།གནས་ཡུལ་འདི་ལ་བཀྲ་ཤིས་བྱིན་གཡང་ཆགས།།དཔོན་སློབ་འདི་ལ་ནམ་ཡང་འབྲལ་བ་མེད།། ལུས་རྟེན་འདི་ལ་གདོད་མའི་སར་ཕྱིན་ཤོག །ཅེས་པ་འདི་ཆོས་རྗེ་དམ་པ་ཡིད་བཞིན་ནོར་བུ་སོགས་སྐྱེས་ཆེན་དུ་མས་མཁར་ཆེན་ཡེ་ཤེས་མཚོ་རྒྱལ་གྱི་རྣམ་རོལ་ཏུ་བསྔགས་པའི་རིག་པ་འཛིན་མ་ཆེན་མོ། འབྲི་གུང་མཁའ་འགྲོའ་ིཞབས་བརྟན་སྨོན་ཚིག་ཏུ། རྗེ་གང་གི་ཉེ་བར་གནས་པ་གྲྭ་གཞོན་ནུའི་ཐུགས་བཞེད་དང་། རང་ཉིད་ཀྱིས་ཀྱང་དད་གུས་དང་རྟེན་འབྱུང་དགེ་བའི་སྨོན་ལམ་བཟང་པོས་མཚམས་སྦྱར་ཏེ། ཚེ་ལ་དབང་བའི་གྲུབ་བརྙེས་ཀྱི་རིག་འཛིན་དམ་པ་ཐང་སྟོང་རྒྱལ་པོས་བྱིན་གྱིས་བརླབས་པའི་གནས་མཆོག མདོ་རྡོ་རྗེ་བྲག་ནས་འཆི་མེད་རིག་འཛིན་གྱིས་སྨྲས་པ་གཞན་ལ་ཡི་གེར་ཕབ་ཏུ་བཅུག་སྟེ།བཀྲ་ཤིས་པའི་ལྷ་རེག་བཅས་ཕུལ་བ་རྗེ་བཙུན་མ་གང་ཉིད་སྐུ་ཚེ་ཡུན་དུ་བརྟན་ཞིང་འཕྲིན་ལས་ཕྱོགས་མཐར་རྒྱས་པའི་རྒྱུར་གྱུར་ཅིག། ༢༠༢༡、 ༥、 ༡༠
