བོད་ཀྱི་གྱེར་འདོན་སྤྱི་སྟེགས་ཆེན་མོ་ནི་གྱེར་འདོན་སྒྱུ་རྩལ་ལ་ཐུགས་མོས་ཆེ་བའི་མི་བུ་རེ་སྙེག་ཅན་རྣམས་ལ་བསྐྲུན་པའི་སྐད་ངག་གི་ཉམས་སྣང་མངོན་སའི་གར་སྟེགས་ ཤིག་དང་། ནང་སེམས་ཀྱི་འགྱུར་བ་བསྙལ་སའི་གནས་མལ་ཞིག་ཡིན་པས། གྱེར་འདོན་སྒྱུ་རྩལ་པ་གང་མང་སྐྱེད་སྲིང་སྒོས་ལོ་རྒྱུས་ཀྱི་ཉམས་སད་ཐེག་ཅིང་དུས་རབས་ཀྱི་སྙིང་སྟོབས་ལྡན་པ་ཞིག་ཏུ་འགྱུར་བར་རེ་བཞག་ཤིན་ཏུ་ཆེ།
བོད་ཀྱི་སྙན་ངག་པ་གྲགས་ཅན་འབྲུག་ལྷ་རྒྱལ་ནས།
藏族朗诵平台是藏区最大的朗诵媒体之一,本公众号主要是分享藏族已出版过的一些诗歌、经典朗诵、朗读，小品、故事等。
ཞི་བདེ་ཉི་མ།
དོ་ནུབ། སྟོན་མཇུག་གི་ཟླ་བ་ངའི་བར་སྣང་དུ་ཤར་བྱུང་།
འཁྱག་སིབ་སིབ་ཀྱི་ཟླ་བ། ངའི་སེམས་ཁོང་བརྒྱུད་ནས།
འཇམ་ཐིང་ཐིང་གི དཀར་གཙང་གཙང་གི
ངའི་ཕ་ཡུལ་གྱི་གྲོང་ཚོར།
ལྷིང་འཇགས་ཀྱིས་འཕྲོས་སོང་།
དོ་ནུབ། ཞི་འཇམ་གྱི་ཟླ་བ།
ཕ་ཡུལ་གྱི་ཟླ་བ།
ངའི་ཁེར་རྐྱང་གི་དྲན་གདུང་ཇི་བཞིན།
ངས་སྟོན་ལྗོངས་སུ་སྡོད་པའི་སྒྲོལ་མ།
ཕ་ཡུལ་དུ་སྡོད་པའི་སྒྲོལ་མ་དྲན་བྱུང་།
སྒྲོལ་མ་ལགས། ངས་དབུལ་ཕོངས་ཀྱི་ཐ་སྙད་ཁ་ཤས་ཁྱེར་ནས།
ཁྱོད་ལ་སེམས་གཏིང་གི་སྙན་ངག་ཅིག་ཕུལ་བ་ལས།
ང་ནི་ཁྱོད་ཀྱི་མཆི་མ་བཞིན་གཉོམ་པའི་བྲན་གཡོག་ལྟར།
ཁྱོད་ཀྱི་རྒྱང་རིང་གི་བཤུལ་ལམ་ལ་སྙིམ་པ་སྦྱོར་དགོས་བྱུང་།
སྒྲོལ་མ་ལགས། སྐྱོ་གདུང་མངའ་ཐང་བཞིན་སྤུངས་པའི་སྒྲོལ་མ།
མེ་ཏོག་དང་འཕྲེད་གླིང་གི་ཡུལ་ལྗོངས་དེ་ནས།
ཁྱོད་ཀྱིས་ཁ་བ་དང་ལུག་ཁྱུའི་བརྩེ་འདང་ཀློག་བཞིན།
རྫི་གླུ་གང་མང་ཞིག་གི་འཁོར་འགྲོས་ལ་ལང་ཚོ་བསྟིམས་དུས།
ཁྱོད་ནི། ཚོ་ཁག་དེའི་ཆེས་སྔ་བའི་ཁ་གཡང་ཞིག་གི་དགོས་མཁོ་ཡིན་ལ།
ཁ་བཏགས་ཤིག་གི་འགྲོ་སོང་དང་རམ་འདེགས་རེད།
ཨ་མས་དཔྱིད་དཔལ་བཞིན་འཇམ་པའི་བཀའ་ལུང་ཞིག་གིས།
ཁྱོད་ཀྱི་འཚོ་གནས་དུས་ཚིགས་གཞན་ཞིག་གི་བྲང་ངོས་ལ་བཅོལ་བ།
དེ་རིང་ཁྱོད་ཀྱི་ལོངས་སྤྱོད་དང་ཐོབ་ཆ་ཉག་གཅིག་རེད།
དོ་ནུབ། འཇམ་ཐིང་གི་ཟླ་བའི་སྙིང་ཁམས་ནས།
ཁྱོད་ཀྱིས་གཉེན་མིའི་འཛུམ་ཞལ་འཁྱིལ་བའི་སྦྲ་ཁྱིམ་བགྲང་ཞིང་།
མེ་དཔུང་ཁྲོད་ཆེས་འཁྱག་པའི་འཁྲེང་ཞེན་རེ་བོར་བས།
ཁྱོད་ཀྱི་ཚོ་ཁག་གི་བར་སྣང་ནས།
ཉམས་ཞན་གྱི་རྒྱུ་དཀར་དག་ཀྱང་་འདར་དགོས་བྱུང་།
དབུལ་ཕོངས་དང་མཛེས་སྡུག་གི་སྒྲོལ་མ།
རྟ་མཆོག་གི་འཚེར་སྐད་ནི་ཆེས་མཇུག་མཐའི་སེམས་གསོ་དང་འདྲ་བར།
ཁྱོད་ཀྱིས་ཁ་བཏགས་ཤིག་གི་བདེན་ལུགས་སེམས་ཁོང་དུ་མིད་དེ།
ནམ་མཁའ་གཞན་ཞིག་གི་ངོ་གདོང་ལ་རང་ཉིད་ཕུལ་དུས།
སྒྲོལ་མ་ལགས། མེ་ཏོག་དག་ནི་མི་ཡུལ་གྱི་ལང་ཚོ་ཡིན་པ་ག་ལ་ཚོར།
ཟླ་འོད་འོག་རྨི་ལམ་ཉུལ་བའི་སྒྲོལ་མ།
དོ་ནུབ་ཞི་བདེ་འཇམ་ཐིང་གི་གྲོང་ཚོ་དག་ལས།
ཟླ་བའི་གཏིང་མཐའ་ཉུལ་བའི་ཁ་བ་ཁྱུ་ཞིག་གིས
ཁ་བཏགས་ལ་འགྲེལ་སྟངས་གསར་བ་འཚོལ་བཞིན།
ཕ་བོང་ཁ་ཤས་ཀྱི་སྙིང་ཁམས་ལ་རྨ་ཁ་བཟོས་པ།
ཁྱོད་ཀྱི་ཟུངས་ཁྲག་ལ་སྨྲ་བརྗོད་འཚོལ་བའི་བརྒྱུད་རིམ་ཞིག་རེད།
སྒྲོན་མ་ལགས། དོ་ནུབ་ངས་ཁྱོད་དྲན་བྱུང་།
ཁྱོད་ཀྱི་མ་ཡུམ་བཞིན་འཇམ་པའི་མཁས་འཛངས་ད་མས།
ང་ཚོའི་ཟུངས་ཁྲག་ལ་འཚོ་བའུད་བསྩལ་བྱུང་།
དོ་ནུབ། ངས་རྒྱང་རིང་གྲོང་ཚོ་ཞིག་ནས།
ཁྱོད་ཡང་ཡང་དྲན་བྱུང་། ཡང་ཡང་དྲན་བྱུང་།
སྒྲོལ་མ་ལགས། བདག་གི་ཟུངས་ཁྲག་ཁྲོད་བཞད་པའི་མེ་ཏོག
རྨི་ལམ་བཞིན་འཇམ་པའི་ཚོ་ཁག་དེ་ནས།
ཁྱོད་ཀྱིས་ངའི་སྙན་ངག་གི་སེམས་པ་སྒུལ་བྱུང་།
དོ་ནུབ། ང་སྟོན་མཇུག་དང་ཟླ་འོད་ཀྱི་བར་མཚམས་ནས་བསྡད་དེ།
ཁྱོད་ལ་ཡུལ་མིའི་བརྩེ་འདང་གླེང་།
ཀྱོད་ལ་གཡའ་དག་པའི་སྙན་ངག་འབྲི། ཁྱོད་ལ་གསོལ་བ་འདེབས།
སྒྲོལ་མ། ངའི་སེམས་གཏིང་གི་སྒྲོལ་མ།
བདག་གི་ན་ཟུག་ཁྲོད་བཞད་པའི།
བདེ་སྐྱིད་ཀྱི་སྒྲོལ་མ།
དོ་ནུབ། ངས་ཁྱོད་ཡང་ཡང་དྲན་བྱུང་།
ཡང་ཡང་དྲན་བྱུང་།
དབྱངས་ཅན་མ།
འབྲོང་།
ད་ལྟའི་བར། ངས་ཁྱོད་རང་གང་དུ་ཡོད་པ་མི་ཤེས་ལ།
ཁྱོད་ཀྱི་བྱད་བཞིན་ཡང་གཏན་ནས་མཐོང་མ་མྱོང་།
ཡིན་ན་ཡང་། ངས་ཁྱོད་ཀྱི་མཚན་མིང་ཁོ་ན་རུམ་ནས།
མི་ལོ་སོ་ལྔར་དཀའ་ཚེགས་ཀྱིས་བསྡད་པ།
ཇི་འདྲའི་བདེ་སྐྱིད་ཅིག་དང་ཇི་འདྲའི་ཡིད་ཆེས་ཤིག
གོ་ཐོས་ལ། ཁྱོད་ནི་ལང་ཚོ་དང་ནུ་བུམ་ལྷང་ངེར།
མ་ཡུམ་གྱི་བྱམས་སེམས་དང་ཤ་དྲོད་ཇི་བཞིན།
ནེམ་ཞིང་འཇམ་པའི་མེ་ཏོག་གིས་སྡོད་ལ།
རྒྱུད་དྲུག་པི་ཝང་གི་རམ་འདེགས་དང་བཅས་པའི།
སེམས་ཁོང་གི་མཛའ་གླུ་སྙན་མོ། དུང་ལྷང་ལྷང་གི་འཛུམ་ཆུང་དྭངས་མོས།
ང་ལ་ལེན་གྱིན་ཡོད་ཟེར།
ཉིན་དང་མཚན་ལ། ངས་རང་ཉིད་ཁེར་རྐྱང་དུ་ཕུད་ནས།
མཁའ་དབྱིངས་དང་ཉི་ཟླའི་བར་དུ་རྣ་བ་བླགས་ཤིང་།
རི་རབ་དང་གཙང་པོའི་ཀློང་དུ་སེམས་པ་བསྲིངས་དུས།
ཁྱོད་ནི་རླུང་རྟ་བཞིན། ཆེས་མཐོ་བའི་རི་རྩེ་ན།
རེ་ལྟོས་ཁྲི་སྟོང་གི་དབྱངས་སྙན་དང་བཅས།
འཇམ་ལྷོད་ལྷོད་དུ། ཡུན་རིང་གིས་ང་ལ་སྐྱོད་ཀྱིན་པ།
ངས་གཞི་ནས་རྟོགས་ཤིང་རྨང་ནས་ཚོར་བྱུང་།
སྐར་འོད་ཁྲི་ཕྲག་གི ལྷིང་འཇགས་ཀྱི་མཚན་མོ་འདིར།
ཁྱོད་ང་ཡི་རུམ་ཁོང་དུ་ནེམ་པ་ནེམ་པོར་ཕེབས་དང་།
ངས་མི་ཡུལ་གྱི་ཆེས་མཛེས་པའི་ཐ་སྙད་ཡོད་ཚད།
མུ་ཏིག་བཞིན། ཤག་ཤག་ཏུ་ཕྲེང་བར་བརྒྱུས་ཏེ།
ཁྱོད་ཀྱི་དོ་ཤལ་དུ། གཟི་འོད་ཀྱིས་སྒྲོན་ཆོག
ཉི་འོད། གཟི་བྱིན་ལྷང་ངེར་ས་ཆེན་སྟེང་འཕྲོ་དུས།
ང་ཚོས་ཡབ་ཡུམ་གྱི་སྒམ་བརླིང་དང་བྱམས་བརྩེ་ཆེན་པོས།
ཞི་བདེ་ཡིད་འོང་གི་ཁྱེའུ་གྲངས་མེད་ཅིག
མེ་ཏོག་ལྟར། མཛེས་སྡུག་གིས་པང་ནས།
མིའི་རིགས་ཀྱི་དག་གཙང་ལ་ཕུད་ཆོག་ཨང་།
ཨ་ཨ། དབྱངས་ཅན་མ། དུས་འདི་ནི།
ང་ཚོའི་དུས་རབས་དང་། ལྷ་དང་སྙན་ངག་པའི་དུས་རབས།
མ་ཡུམ་སྒྲ་དབྱངས་ལྷ་མོ།
རྡོ་གྲགས།
ངའི་གྲེ་འགྱུར་གྱི་དབྱངས་རྟ་ལ་རོལ་བའི་ལྷ་མོ་ལགས།
ངའི་པིར་སྨྱུག་གི་ལྗགས་རྩེ་ལ་རྩེན་པའི་ལྷ་མོ་ལགས།
མེ་ཏོག་གི་འདབ་ལོ་མཉེན་མོར་སྦྲང་ཚོགས་འཁོར་ཞིང་།
ཞོ་སྤྲིན་གྱི་རྒྱ་དར་དཀར་པོ་བར་སྣང་ནས་དཔྱང་བྱུང་།
དེ་དུས་ང་མུ་མེད་པའི་རྩྭ་ཐང་ན་གན་རྐྱལ་དུ་ལོག་ཞིང་།
གྱེན་ཏུ་བལྟས་བའི་མིག་འོད་རྣོན་པོས།
སྤྲིན་ཚོགས་ཀྱི་རོལ་རྩེད་ཁྲོད་ན་འཕུར་བའི་ལྷ་མོ་ཁྱེད།
དར་གོས་ཀྱི་འཕྱོར་ལྭ་དང་སྤྲིན་གསར་གྱི་དོ་ཤལ་མནབས་པའི་ལྷ་མོ་ཁྱེད།
སྙན་ངག་གི་བླ་སྲོག་དང་རྒྱུད་མངས་ཀྱི་སྐུད་པ་ཐོགས་པའི་ལྷ་མོ་ཁྱེད།
ལྷ་མོ་ཁྱེད་དལ་གྱིས་སེམས་ལ་བསུས་ཤིང་།
བསུས་ནས་ཀྱང་སྙིང་ཁའི་གུར་ཁང་ལ་གཏན་དུ་བཞུགས་པའི་གྲོས་བཤམས།
ད་ལྟ་མི་ཚོགས་ཀྱི་རྔམས་མཐུག་ནས་མཐུག་ཏུ་སོང་།
ང་གྲོག་མའི་རྒྱུ་ལམ་དངའདྲ་བའི་ལམ་ཀྱོག་ཞིག་ན །
ཁེར་རྐྱང་གི་སེམས་པ་ཐན་པས་བཟུང་ཞིང་།
ཁྱར་ཁྱོར་གྱི་རྐང་རྗེས་རླུང་གིས་བསུབ།
ཁོར་ཡུག་འདུ་འཛི་ཟབ་མོསབཟུང་ཞིང་།
མཁའ་དབུགས་རྡུལ་ཕྲན་ཕྲ་མོས་བཅུམ་པས།
ངའི་ཟུངས་ཁྲག་དམར་པོའི་རྒྱུན་ཐག་ཆད་ཅིང་།
ཀེང་རུས་དཀར་པོའིབཀྲག་མདངས་ཉམས།
ལྷ་མོ་ལགས།
ངའི་དུང་སེམས་སྟོང་ཕྲག་གིས་བསྐྲུན་པའི་མཁའ་དབྱིངས་ན།
ངའི་རེ་སྒུག་ཁྲི་ཕྲག་གིས་བསུས་པའི་ལྷ་མོ་ལགས།
ང་ནི་བསམ་བློ་དང་ཐ་སྙད་ཀྱིས་དབུལ་བའི་སློང་མོ་བ་གཞོན་ནུ་ཞིག་སྟེ།
ད་ལྟ་ངའི་སྟོང་ཤིག་ཤིག་གི་སེམས་པ་ཁྱོད་ལ་གཏད་ཅིང་།
གྲང་ཤུར་ཤུར་གྱི་ལག་ཟུང་ཁྱེད་ལ་བསྲིངས་པས།
ང་ལ་སེམས་ཀྱི་གས་ཆག་བསུབས་པའི་འཚོ་བཅུད་རེ་དང་།
འཚོ་བཅུད་ཀྱི་ཉིང་ཁུས་གྲུབ་པའི་དངོས་གྲུབ་རེ་གནང་རོགས།
ང་ལ་གསེར་གྱི་ཐ་སྙད་རེ་དང་།
ཐ་སྙད་ཀྱི་ཚིག་སྦྱོར་རེ་གནང་རོགས།
ང་ས་མཐའི་མུན་ཁམས་འགྲིམས་ནས།
གྲང་རེག་གི་བུ་ཡུག་འཚུབ་མོས་ཡིད་སེམས་བཅོམ་དུས།
ང་ལ་མེ་ལྟར་ཚ་བའི་དྲོད་ཁོལ་རེ་གནང་རོགས་དང་།
ང་ལ་བུ་ལྟར་གཅེས་པའི་མ་ཡུམ་སྒྲ་དབྱངས་ལྷ་མོ།
ད་ལྟ་མི་ཚོགས་ཀྱི་གྲིབ་མ་ནག་པོས་སྙིང་ཁ་བཟུང་ཞིང་།
ཕྱོགས་མེད་ཀྱི་འུར་སྒྲ་དྲག་པོས་རྣ་བ་གཡབ་དུས།
ང་ལ་རྒྱ་ཁབ་ཀྱི་རྩེ་མོ་ལས་ཕྲ་བའི།
བདེ་སྐྱིད་ཀྱི་ཚོར་བ་ཞིག་གནང་རོགས།
ལྷ་མོ་ལགས།
ང་ལ་བརྩེ་ཞེན་ཆེ་བའི་མ་ཡུམ་སྒྲ་དབྱངས་ལྷ་མོ།
ཁྱེད་ཀྱི་དྲན་ཤེས་ཟབ་མོའི་ཆ་ཤས་ཀྱི་ཆ་ཤས་ཙམ་རེ།
ཁྱེད་ཀྱི་མཛེས་སྡུག་ལང་ཚོའི་ཆ་ཤས་ཀྱི་ཆ་ཤས་ཙམ་རེ།
ཆ་ཤས་ཀྱི་ཆ་ཤས་ཙམ་རེ་ཅིས་ཀྱང་ང་ལ་གནང་རོགས།
ང་ལ་བརྩེ་ཞེན་ཆེ་བའི་མ་ཡུམ་སྒྲ་དབྱངས་ལྷ་མོ།
ཉིན་རེའི་ཐོ་རེངས་ཀྱི་སྐྱེ་རེངས་དཀར་པོ་ལུས་ལ་ཕོག་ཐེངས་རེར།
དགོང་རེའི་ཨ་སྔོན་གྱི་ཁྲི་གདུགས་གཞོན་ནུ་ནུབ་མཚོར་ལྷུང་ཐེངས་རེར།
ངས་ནམ་ཡང་མིག་ཟུང་རྒྱང་ལ་ཅེར་ཞིང་།
ལག་ཟུང་མདུན་ལ་བསྲིངས་ནས།
ཁྱེད་ལ་སྒུག་ཡོད།
ངའི་མ་ཡུམ་སྒྲ་དབྱངས་ལྷ་མོ།
ཞོ་སྤྲིན་ལྟར་གཡོ་ཞིང་།
རྒྱ་དར་ལྟར་འཇམ་པའི་ལྷ་མོ།
ངས་གཏན་ནས་གཏན་དུ་ཁྱེད་ལ་སྒུག་ཡོད།
ང་མི་གཅིག་གི་གཡོག་པོ་བྱེད་འདོད།
གཅན་མེ་སྟག
མི་ཚེ་འདིར
ང་མི་གཅིག་གི་གཡོག་པོ་བྱེད་འདོད
ཞོགས་པ་རེ་རེར
ངས་ཁོ་མོ་གཉིད་ལས་བསླངས་ཏེ
ཆུ་དྲོན་མོ་དང་རས་འཇམ་པོ་ལག་ཏུ་སྤྲོད་ངེས
དེ་ནས་ངས་འབྲི་ཞོ་བསྐོལ་ཅིང
མར་རྩམ་བསྐྱལ་རྗེས
ངས་ཁོ་མོའི་པགས་ཚར་དང་ལྷམ་དང
ཚར་ཞྭ་དང་ཕྲེང་བ་དག་མོ་ལ་སྤྲོད་ངེས
ང་མི་གཅིག་གི་གཡོག་པོ་བྱས་རྗེས
ངས་ཁོ་མོའི་ཁང་བ་སྲུང་ཞིངསྒོ་ར་སྲུང་བ་དང
ཁོ་མོས་རི་མགོ་ནས་བཏོགས་འོང་བའི
རྩྭ་དང་མེ་ཏོག་དེ་དག་ཀྱང་སྲུང་ངེས་ལ
ངས་ལྕགས་སླང་གཅིག་དངཐུར་མ་ཆ་གཅིག
ཕོར་བ་གཅིག་སྲུང་སྟེ
ཁོ་མོ་ནམ་ལོག་ལ་སྒུག་ངེས
མུན་རུབ་འོང་དུས
ངས་འཇམ་གཉེན་གྱི་མལ་སྟན་བཏིངས་སྟེ
སྔས་འབོལ་འཇོག་པ་དང་མལ་ཐུལ་བཀབ་སྟེ
ཁོ་མོའི་རྨི་ལམ་སྐྱིད་པོ་འོང་བའི་སྨོན་ལམ་འདེབས་ངེས
མི་ཚེ་འདིར
ང་གང་ལའང་མི་འགྲོ
ང་ཁོ་མོ་གཅིག་པའི་རྗེས་སུ་འགྲོ་རྒྱུ
ཆེས་མཐའ་མཇུག་གི་མིག་བཙུམས་དུས་ཀྱང
ངས་ཁོ་མོའི་སྐ་རགས་ནས་བཟུང་སྟེ
ལྷ་ཀླུ་མི་གསུམ་གྱི་གནས་གང་རུང་དུ་འགྲོ་རྒྱུ
---བོད་ཀྱི་གྱེར་འདོན་སྤྱི་སྟེགས་ཆེན་མོ།
