ཚིག པདྨ་གཞན་ཕན།
དབྱངས། ཚེ་དབང་ལྷ་མོ།
ལེན་མཁན། ལི་ཐང་འཇམ་དབྱངས། ཚེ་དབང་ལྷ་མོ།
བདུད་འདུལ་དགྲ་ལྷའི་རྒྱལ་པོ་སེང་ཆེན་རྗེ།།ལོ་རྒྱུས་མཚོན་པའི་སྙན་ངག་རིང་མོ་ཡི།།མཚན་སྙན་གོ་ལ་ཧྲིལ་པོའི་ཁྱོན་ཀུན་ཁྱབ།།འདི་ན་གེ་སར་རྒྱལ་པོའི་བླ་སྲོག་ཡོད།།འདི་ནི་བཅུ་ཕྲག་རིག་པའི་སྒོ་ཆེན་ཏེ།།རྒྱལ་བའི་བཀའ་བསྟན་གླེགས་བམ་སྤོ་ལ་མཐོ།།སྨན་རྩིས་རིག་པའི་ལག་ལེན་འདི་ནས་བརྒྱུད།།བོད་ཀྱི་ཡིག་འབུར་གཟུགས་རིས་འདི་ནས་མངོན།།འདི་ནི་འབྲུ་རིགས་ནོར་གྱི་བང་མཛོད་དེ།།ཞིང་པ་རྒན་པོས་འཛུམ་པའི་སོ་ཕྲེང་ངོམ།།ཟས་མཆོག་རྩམ་པའི་བྲོ་ཞིམ་འདི་ནས་ཚོར།།ཨ་འབྲུ་ནས་ཀྱི་ཚོང་ཟོག་འདི་ན་ཡོད།།འདི་ནི་སྲོལ་རྒྱུན་རིག་པའི་གཏེར་གནས་ཏེ།།ཞིང་འབྲོག་འཚོ་བའི་དཔལ་ཡོན་འདི་ནས་རྟོགས།།དམར་པོའི་རིག་གནས་ལོ་རྒྱུས་འདི་ནས་ཤེས།།བཟོ་རྩལ་རིག་པའི་ལག་ཤེས་འདི་ནས་སྤེལ།།
