བསྐྱེད་རྫོགས་གཉིས་ཀྱི་སྐོར།

མཁས་དབང་ཚུལ་ཁྲིམས་བློ་གྲོས།

ཡོན་ཏན་མཛོད་འཆད་ཁྲིད་སྐབས་ཀྱི་གསུང་བཤད་ཁོལ་ཕྱུང་།‍

དེ་རིང་སྟེ༢༠༢༤བོད་ཟླ་༩པའི་ཚེས་༣ནི་སྔ་འགྱུར་བསྟན་པ་སྤྱི་ཡི་བདག་པོ་རྫོགས་པ་ཆེན་པོ་ཀློང་ཆེན་སྙིང་ཐིག་གི་ཤིང་རྟ་ཆེན་པོའི་སྲོལ་འབྱེད་ཀུན་མཁྱེན་གཉིས་པ་༧རིག་འཛིན་འཇིགས་མེད་གླིང་པའམ་རྫོགས་པ་ཆེན་པོ་རང་བྱུང་རྡོ་རྗེ་དགོངས་པ་ཆོས་ཀྱི་དབྱིངས་སུ་ཐིམ་ནས་བགྲང་བྱ་༢༢༦འཁོར་བའི་རྗེས་དྲན་འདས་མཆོད་ཆེན་མོར་ཡིན་པས་དགེ་བར་འབད་པར་འཚལ། །

ཀུན་མཁྱེན་འཇིགས་མེད་གླིང་པའི་རྣམ་ཐར།

‍‍‍‍‍‍‍‍‍

མཁན་པོ་དགེ་དཔལ།

༈ཤེས་བྱ་ཀུན་མཁྱེན་འགྲོ་ལ་རྗེས་བརྩེའི་གཏེར། །

དྲི་མེད་འོད་ཟེར་ཡང་སྤྲུལ་ཐུགས་གཏེར་མཛོད། །

འོད་གསལ་ཀློང་ཆེན་ནམ་མཁའི་རྣལ་འབྱོར་པ། །

འཇིགས་མེད་གླིང་པའི་ཞབས་ལ་གསོལ་བ་འདེབས། །

༄༅། །རིག་འཛིན་འཇིགས་མེད་གླིང་པ་ལ་བརྟེན་པའི་བླ་མའི་རྣལ་འབྱོར།

ཨེ་མ་ཧོ། 

བདག་ལུས་ཕུང་པོ་ཁམས་དང་སྐྱེ་མཆེད་རྣམས། །

གདན་གསུམ་ཡོངས་རྫོགས་ངོ་བོར་ལྷུན་གྲུབ་པའི། །

སྙིང་དབུས་དད་པའི་གེ་སར་རྒྱས་པའི་ཀློང་། །

ཁུ་རྡུལ་རྣམ་པར་བྱང་བ་ཉི་ཟླའི་སྟེང་། །

རྒྱལ་ཀུན་འདུས་ཞལ་རིག་འཛིན་འཇིགས་མེད་གླིང་། །

རྣམ་པ་ཀུན་གྱི་མཆོག་ལྡན་ཞལ་སྐྱིན་ནི། །

གོས་དཀར་མཐོན་མཐིང་ཟུར་ཕུད་ལྡན་པའི་རྩེརཿ

འབུམ་ཕྲག་དྲུག་ཅུའི་ངོ་བོ་གླེགས་བམ་མཛེས། །

དཀར་དམར་མདངས་ལྡན་ཞི་འཛུམ་མཛེས་པའི་སྐུ། །

སྲིད་ལམ་དུབ་པའི་འགྲོན་པོ་དབུགས་འབྱིན་ཞིང་། །

བདེན་པ་དབྱེར་མེད་དོན་ལ་རྟག་གཟིགས་ཕྱིར། །

སེམས་ཉིད་ངལ་བསོའི་བཞུགས་སྟངས་ཕྱག་རྒྱ་ཅན། །

སྣང་ལ་རང་བཞིན་མེད་པར་ལམ་གྱིས་གསལ། །

བདེ་གཤེགས་ཀུན་གྱིས་བགྲོད་པ་གཅིག་པའི་ལམ། །

མོས་གུས་འདུ་འབྲལ་མེད་པར་ཕྱག་འཚལ་ལོ། །

དྲན་པ་ཡེངས་མེད་མཆོད་པའི་ཕྱག་རྒྱར་འབུལ། །

སྟོང་འཛིན་ཤེས་བྱའི་སྒྲིབ་པ་དབྱིངས་སུ་བཤགས། །

མཉམ་པར་མ་བཞག་མེད་ལ་རྗེས་ཡི་རང་། །

ལྷག་མཐོང་ཡེ་ཤེས་གསལ་བའི་ཆོས་འཁོར་བསྐུལ། །

ས་ལམ་གཅིག་ཆོད་ངང་དུ་བཞུགས་གསོལ་འདེབས། །

དགེ་ཚོགས་ཆོས་དབྱིངས་གཞོན་ནུ་བུམ་སྐུར་བསྔོ། །

ཀྱེ་ཀྱེ་བླ་མ་རིན་པོ་ཆེ། །

བདག་གིས་འབད་པ་ཐམས་ཅད་ཀྱང་། །

རེ་དོགས་རྣམ་གཡེངས་འདུ་འཛི་དང་། །

ཆོས་བརྒྱད་ཉོན་མོངས་གྱི་ནར་འཕྱན། །

སྙིགས་མ་ལྔ་ཡི་མཐར་སྐྱེས་ཤིང་། །

བྱིས་དང་སྡིག་གྲོགས་གཞན་དབང་གིས། །

ཟིལ་གྱིས་ནོན་པའི་དུས་འདི་རུ། །

ངེས་འབྱུང་རྒྱུད་ལ་སྐྱེ་བྱིན་རློབས། །

དེ་ཡང་ཞི་བདེའི་དབང་གྱུར་ནས། །

ཐེག་དམན་ལམ་དུ་མི་འཕྱན་པར། །

བྱང་ཆུབ་སྤྱོད་པ་རྒྱ་མཚོ་ཀུན། །

སེམས་ཅན་དོན་དུ་འགྱུར་བར་ཤོག །

བླ་མ་སངས་རྒྱས་འདུས་པའི་སྐུར། །

ཐེ་ཚོམ་ལོག་ལྟ་བྲལ་གྱུར་ནས། །

སློབ་པ་ལམ་གྱི་ཡོན་ཏན་ཀུན། །

ཚེ་འདི་ཉིད་ལ་རྫོགས་པར་ཤོག །

བདག་གིས་འབད་ཀྱང་ཐར་བར་དཀའ། །

བླ་མའི་ཐུགས་རྗེས་གྲོལ་བ་ནི། །

མོས་གུས་ཁོ་ནའི་རྒྱུ་འབྲས་ཕྱིར། །

ཐུགས་ཡིད་གཅིག་ཏུ་འདྲེས་གྱུར་ཅིག །

ཨོཾ་ཨཱཿ གུ་རུ་ཨ་བྷཱ་ཡ་དྭཱི་པ་སིདྡྷི་ཧཱུྃཿ

ཞེས་བཟླ་ཞིང་། མོས་གུས་བསྙེན་པས་བླ་མའི་ཐུགས་རྒྱུད་བསྐུལ། །

གནས་གསུམ་ཨོཾ་དཀར་ཨཱཿདམར་ཧཱུྃ་མཐིང་ལས། །

རང་རང་འོད་བྱུང་བདག་གི་གནས་གསུམ་ཐིམ། །

སྒོ་གསུམ་ཤེས་བྱའི་སྒྲིབ་པར་བཅས་པ་སྦྱངས། །

དབང་བཞི་ཐོབ་ནས་ཐུགས་ཡིད་གཅིག་ཏུ་འདྲེས། །

སྐུ་བཞི་ལྷུན་རྫོགས་ལྷན་སྐྱེས་བདེ་ཆེན་དང་། །

དྲན་པ་རང་སྟོང་བླ་མའི་ཞལ་མཐོང་གྱུར། །

ཅེས་དབང་བཞི་བླང་བར་བྱའོ། །

ཞེས་པའང་མདོ་ཁམས་ནས་རྒྱ་རོང་སྐུ་སྐྱེ་རྣམ་གཉིས་དང་། སྒྲུབ་བརྩོན་ཀརྨ་བསམ་འགྲུབ་ཀྱིས་ནན་ཏན་ཆེན་པོས་བསྐུལ་ངོར་རྫོགས་ཆེན་པ་རང་བྱུང་རྡོ་རྗེས་སྨྲས་པའོ།།

འུྃཿ  ཀློང་ཆེན་སྙིང་གི་ཐིག་ལེ་ལས༔ གཞི་ལམ་འབྲས་བུའི་སྨོན་ལམ་བཞུགས༔

 

དཔལ་ཀུན་ཏུ་བཟང་པོ་ལ་ཕྱག་འཚལ་ལོ༔

 

གདོད་མའི་གནས་ལུགས་རང་བཞིན་སྤྲོས་དང་བྲལ༔

ཡོད་པ་མ་ཡིན་རྒྱལ་བས་འདི་མ་གཟིགས༔

མེད་པ་མ་ཡིན་འཁོར་འདས་ཀུན་གྱི་གཞི༔

འགལ་འདུ་མ་ཡིན་བརྗོད་བྱའི་ཡུལ་ལས་འདས༔

རྫོགས་ཆེན་གཞི་ཡི་གནས་ལུགས་རྟོགས་པར་ཤོག༔

 

ངོ་བོ་སྟོང་པས་རྟག་པའི་མཐའ་ལས་གྲོལ༔

རང་བཞིན་གསལ་བས་ཆད་པའི་མུ་དང་བྲལ༔

ཐུགས་རྗེ་འགག་མེད་སྣ་ཚོགས་སྤྲུལ་པའི་གཞི༔

གསུམ་དུ་དབྱེ་ཡང་དོན་ལ་ཐ་མི་དད༔

རྫོགས་ཆེན་གཞི་ཡི་གནས་ལུགས་རྟོགས་པར་ཤོག༔

 

བསམ་གྱིས་མི་ཁྱབ་སྒྲོ་འདོགས་ཀུན་དང་བྲལ༔

ཡོད་དང་མེད་པའི་ཕྱོགས་འཛིན་རྣམ་པར་ཞིག༔

འདི་དོན་བརྗོད་ལ་རྒྱལ་བའི་ལྗགས་ཀྱང་རྡུགས༔

ཐོག་མཐའ་བར་མེད་གཏིང་གསལ་ཆེན་པོའི་དབྱིངས༔

རྫོགས་ཆེན་གཞི་ཡི་གནས་ལུགས་རྟོགས་པར་ཤོག༔

 

རང་ངོ་རྣམ་དག་སྐྱེ་མེད་ཀ་དག་ལ༔

ལྷུན་གྲུབ་འདུས་མ་བྱས་པའི་གདངས་ཤར་བ༔

གུད་དུ་མ་བཟུང་རིག་སྟོང་ཟུང་འཇུག་ཆེར༔

རྟོགས་པས་གཞི་ཡི་དགོངས་པ་ཚད་དུ་ཕྱིན༔

ལམ་གྱི་གནད་ལ་གོལ་ཕྱོགས་མེད་པར་ཤོག༔

 

ཡེ་ནས་དག་པས་ལྟ་བའི་མིང་ཡང་མེད༔

རང་ངོ་རིག་པས་སྒོམ་རྒྱུའི་ཤུབས་ནས་འདོན༔

གཟའ་གཏད་མེད་པས་སྤྱོད་པའི་སྒྲོག་དང་བྲལ༔

རང་བཞིན་ལྷུམས་ཞུགས་སྤྲོས་བྲལ་རྗེན་པའི་ངང༌༔

ལམ་གྱི་གནད་ལ་གོལ་ཕྱོགས་མེད་པར་ཤོག༔

 

བཟང་ངན་རྣམ་རྟོག་ཕྱོགས་སུ་མ་ལྷུང་ཞིང༌༔

བཏང་སྙོམས་ལུང་མ་བསྟན་དུ་མ་འབྱམས་པར༔

ཤར་གྲོལ་རིས་མེད་རྒྱ་ཡན་ལྷུན་འབྱམས་ཀློང༌༔

སྤང་བླང་ཡེ་ཟད་རང་བཞིན་ཡོངས་ཤེས་ངང༌༔

ལམ་གྱི་གནད་ལ་གོལ་ཕྱོགས་མེད་པར་ཤོག༔

 

ཐོག་མའི་སྤྱི་གཞི་ནམ་མཁའ་ལྟ་བུའི་ངང༌༔

གཞི་སྣང་རིག་པ་མཁའ་ལ་སྤྲིན་དེངས་བཞིན༔

ཕྱི་གསལ་ཤེས་པ་ནང་དུ་ལྡོག་པ་ལས༔

ཁྱད་ཆོས་དྲུག་ལྡན་གཞོན་ནུ་བུམ་སྐུའི་སྦུབས༔

འབྲས་བུའི་རྒྱལ་པོ་བཙན་ས་ཟིན་པར་ཤོག༔

 

ཡེ་ནས་རང་རིག་ཀུན་ཏུ་བཟང་པོ་ལ༔

ཐོབ་བྱའི་ཞེ་འདོད་མཐའ་དག་དབྱིངས་སུ་ཡལ༔

བྱ་རྩོལ་བློ་འདས་རྫོགས་པ་ཆེན་པོའི་གཤིས༔

དབྱིངས་རིག་ཀུན་ཏུ་བཟང་མོའི་མཁའ་ཀློང་སྦུབས༔

འབྲས་བུའི་རྒྱལ་པོ་བཙན་ས་ཟིན་པར་ཤོག༔

 

རབ་ཏུ་མི་གནས་དབུ་མ་ཆེན་པོའི་དོན༔

ཁྱབ་གདལ་ལྷུན་འབྱམས་ཕྱག་རྒྱ་ཆེན་པོའི་ངང༌༔

མཐའ་གྲོལ་ཀློང་ཡངས་རྫོགས་པ་ཆེན་པོའི་གནད༔

ས་ལམ་ཡོན་ཏན་གཞིར་རྫོགས་ལྷུན་གྲུབ་སྦུབས༔

འབྲས་བུའི་རྒྱལ་པོ་བཙན་ས་ཟིན་པར་ཤོག༔

ཐུགས་བཅུད་ཀློང་ཆེན་ཟབ་རྒྱ་ཡི༔ 

མཐའ་སྡུད་སྨོན་ལམ་ཟབ་མོ་འདི༔ 

བཀའ་སྲུང་དྲང་སྲོང་རྭ་ཧུ་ལ༔ 

བནྡྷེའི་ཚུལ་གྱིས་བསྐུལ་ནས་བཀོད༔ 

ཟབ་དོན་སྤེལ་བ་དོན་ཡིད་ཅིང༌༔ 

རྟེན་འབྲེལ་སྨོན་ལམ་མཐར་ཕྱིན་ཕྱིར༔ 

ནམ་མཁའི་སྙིང་པོས་བྱིན་རླབས་པའི༔ 

ཀོང་སྨྱོན་སྦས་པའི་རིག་འཛིན་ལ༔ 

ཟབ་རྒྱ་བཀྲོལ་ཏེ་གཏད་རྒྱ་བྱས༔ 

འགྲོ་དོན་ནམ་མཁའ་མཉམ་པར་ཤོག༔ ༔

༄༅། །བདེན་ཚིག་འགྲུབ་པའི་པྲ་ཎི་དྷ་རྣམ་མཁྱེན་གྲོང་འཇུག་ཅེས་བྱ་བ་བཞུགས་སོ། །

དངོས་གྲུབ་རྒྱ་མཚོའི་འབྱུང་གནས་བླ་མ་དང་མཆོག་གསུམ་བྱང་ཆུབ་སེམས་དཔའ་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །

བྱིན་གྱིས་བརླབ་ཏུ་གསོལ།

མི་ངའི་སྐྱེ་བ་ནས་ཚེ་རབས་ཐམས་ཅད་དུ་དལ་འབྱོར་བཅོ་བརྒྱད་ཚང་བའི་མི་ལུས་རིན་པོ་ཆེ་ཐོབ་སྟེ་རྗེ་བཙུན་བླ་མ་མཚན་ཉིད་དང་ལྡན་པའི་གདུལ་བྱར་འགྱུར་བར་ཤོག་ཅིག

མངོན་མཐོ་དང་ངེས་ལེགས་མཐའ་དག་གི་འབྱུང་ཁུངས་ཐོས་བསམ་སྒོམ་གསུམ་གྱིས་རང་རྒྱུད་བཏུལ་ཏེ་རྒྱལ་བའི་བསྟན་པ་རིན་པོ་ཆེའི་རྗེས་སུ་སློབ་པར་ཤོག་ཅིག

ཆོས་ལ་འཇུག་པའི་རྩ་བ་ངེས་འབྱུང་དང་བློ་ལྡོག་རྣམ་པ་བཞི་རྒྱུད་ལ་ངམ་ངམ་ཤུགས་ཀྱིས་སྐྱེས་ནས་འཁོར་བ་མཐའ་མེད་ཀྱི་བྱ་བ་ལ་བཙོན་དོང་དང་མེ་འོབས་ལྟ་བུར་མཐོང་བར་ཤོག་ཅིག

ལས་འབྲས་བསླུ་བ་མེད་པ་ལ་ཡིད་ཆེས་རྙེད་ནས་དགེ་སྡིག་གི་ལས་ཕྲ་མོ་ཙམ་ལ་ཡང་འཇུག་ལྡོག་བྱེད་པར་ཤོག་ཅིག

གནས་གྲོགས་འདུ་འཛི་རྐྱེན་ངན་ལ་སོགས་པ་བྱང་ཆུབ་བསྒྲུབ་པའི་བར་ཆད་ཀྱི་དབང་དུ་མི་འགྲོ་བར་དཀོན་མཆོག་གསུམ་གྱི་སྐྱབས་འོག་ཏུ་ཚུད་དེ་སྐྱེས་བུ་གསུམ་གྱི་ལམ་ལ་སློབ་པར་ཤོག་ཅིག

བདེ་གཤེགས་ཀུན་འདུས་ཀྱི་ངོ་བོ་བཀའ་དྲིན་ཅན་གྱི་བླ་མ་དམ་པ་ལ་ཐེ་ཚོམ་དང་མཉམ་འགྲོགས་ཀྱི་མི་རུ་བཟུང་བའི་ལོག་ལྟ་སྤངས་ཏེ་སངས་རྒྱས་དངོས་སུ་མཐོང་བར་ཤོག་ཅིག

དེའི་མཐུ་ལས་མཚོན་བྱེད་དཔེའི་དབང་བཞིས་སྒོ་གསུམ་སྨིན་པར་བྱས་ཏེ་རྨད་བྱུང་རྡོ་རྗེ་ཐེག་པའི་གསེང་ལམ་ལ་འཇུག་པར་ཤོག་ཅིག

གསོལ་འདེབས་དང་མོས་གུས་ཀྱི་མཚམས་སྦྱོར་ལམ་དུ་ལོངས་ནས་མཚོན་བྱ་དོན་གྱི་དགོངས་བརྒྱུད་བདག་ལ་འཕོས་ཏེ་རྟོགས་པ་ནམ་མཁའ་དང་མཉམ་པར་ཤོག་ཅིག

བསྐྱེད་པ་མ་ཧཱ་ཡོ་གའི་ཉམས་ལེན་མཐར་ཕྱིན་ནས་སྣོད་བཅུད་དཀྱིལ་འཁོར་གསུམ་དུ་ཤེས་ཤིང་རིག་འཛིན་རྣམ་པ་བཞིའི་ས་ལ་བགྲོད་པ་རྒྱལ་སྲས་པདྨ་དང་བི་མ་ལ་ལྟ་བུར་འགྱུར་བར་ཤོག་ཅིག

ལུང་ཨ་ནུ་ཡོ་གའི་ཉམས་ལེན་མཐར་ཕྱིན་ནས་འཁོར་འདས་ཀྱི་འཛིན་རྟོག་བདེ་སྟོང་གཉིས་སུ་མེད་པའི་ངོ་བོར་སངས་རྒྱས་ཏེ་འོག་མིན་སྟུག་པོ་བཀོད་པའི་ཞིང་ཁམས་ལ་དབང་སྒྱུར་བར་ཤོག་ཅིག

རྫོགས་ཆེན་ཨ་ཏི་ཡོ་གའི་ཉམས་ལེན་མཐར་ཕྱིན་ནས་ཆོས་ཅན་གྱི་སྣང་བ་ཆོས་ཉིད་ཀྱི་ཀློང་དུ་ཟད་ནས་གཞོན་ནུ་བུམ་སྐུར་གྲོལ་བ་རིག་འཛིན་དགའ་རབ་རྡོ་རྗེ་ལྟ་བུར་འགྱུར་བར་ཤོག་ཅིག

མདོར་ན་བདག་གིས་བྱང་ཆུབ་ཀྱི་སྤྱོད་པ་ལ་བསླབ་པ་ནས་བཟུང་སྟེ་སྒོ་གསུམ་གྱིས་བྱ་བ་ཅི་བགྱིས་པ་ཐམས་ཅད་ཕ་མ་སེམས་ཅན་ཐམས་ཅད་ཀྱི་དོན་དུ་འགྱུར་བར་ཤོག་ཅིག

དུས་དང་རྣམ་པ་ཐམས་ཅད་དུ་དམ་པའི་ཆོས་མ་ཡིན་པའི་འཇིག་རྟེན་མཐུན་འཇུག་གི་བསམ་པ་སྐད་ཅིག་མ་ཙམ་ཡང་སེམས་ལ་མི་སྐྱེ་བར་ཤོག་ཅིག

གལ་ཏེ་ལས་དང་བག་ཆགས་དབང་བཙན་པར་གྱུར་ནས་ཕྱིན་ཅི་ལོག་གི་བློ་སྐྱེས་ནའང་དེ་ཉིད་མི་འགྲུབ་པར་ཤོག་ཅིག

གཞན་དོན་དུ་འགྱུར་ན་ལུས་སྲོག་འདོར་བ་ལ་ཡང་ཉམ་ང་མེད་པར་གཞོན་ནུ་དོན་གྲུབ་ལྟ་བུར་འགྱུར་བར་ཤོག་ཅིག

དོན་གཉིས་ལྷུན་གྲུབ་ཀྱི་ས་ལ་ཕྱིན་ནས་ཁམས་གསུམ་འཁོར་བའི་རྒྱ་མཚོ་དོང་ནས་སྤྲུགས་ནུས་པ་སྟོབས་བཅུ་མི་འཇིགས་རྣམ་བཞིའི་རྩལ་ཅན་དུ་གྱུར་ཅིག

འདོད་པ་དང་བྲལ་བའི་སྨོན་ལམ་དེ་ལྟ་བུ་ཡོངས་སུ་འགྲུབ་པའི་མཐུན་འགྱུར་མཛད་པར་རྒྱལ་བ་སྲས་བཅས་རྣམས་ཀྱིས་ཞལ་གྱིས་བཞེས་པ་ཡིན་ནོ། །

དྲང་སྲོང་བདེན་པར་སྨྲ་བ་རྣམས་ལ་ཕྱག་འཚལ་ལོ། །

ཨོཾ་དྷ་རེ་དྷ་རེ་བྷནྡྷ་རེ་བྷནྡྷ་རེ་སྭཱ་ཧཱ།

དགེ་བ་སྟོབས་ཆེ་བར་གྱུར་ཅིག

སྨོན་ལམ་མཐུ་བཙན་པར་གྱུར་ཅིག

སྡིག་པ་འདག་སྐྱེན་པར་གྱུར་ཅིག

ཛ་ཡ་ཛ་ཡ་སིདྡྷི་སིདྡྷི་ཕ་ལ་ཕ་ལ། འ་ཨ་ཧ་ཤ་ས་མ། མ་མ་ཀོ་ལིང་ས་མནྟ།

ཞེས་མདོ་ཁམས་པ་ཆོས་ལྡན་གྱིས་ངོར་རིག་འཛིན་འཇིགས་མེད་གླིང་པས་སོ། །སརྦ་མངྒ་ལཾ།།  །།

༄༅། །རྫོགས་ཆེན་པ་རང་བྱུང་རྡོ་རྗེའི་རྣམ་ཐར་གསོལ་འདེབས་བཞུགས།

སྲིད་ཞི་ཀུན་གྱི་མགོན་པོ་སྤྱན་རས་གཟིགས། །

བཅོམ་ལྡན་འོད་སྲུང་དྲུང་ན་ཀྲྀ་ཀྲྀའི་སྲས། །

ཤཱཀྱ་ཐུབ་པའི་མཆེད་ཟླ་གཅུང་དགའ་བོ། །

དགྲ་བཅོམ་མཚན་བཟང་ལྡན་ལ་གསོལ་བ་འདེབས། །

ཐེག་མཆོག་སྟོན་པ་དགའ་རབ་ཤྲཱི་སེང་། །

དྲི་མེད་བཤེས་གཉེན་སྲོང་བཙན་ཨ་ཀརྨ། །

རྗེ་འབངས་གྲོགས་གསུམ་རྒྱལ་སྲས་ལྷ་རྗེའི་རྒྱུད། །

རྣམ་འཕྲུལ་དུ་མར་ཤར་ལ་གསོལ་བ་འདེབས། །

གཞོན་ནུ་རོལ་རྩེད་དུས་ནས་སྙིང་རྗེ་དང་། །

ངེས་འབྱུང་སྐྱོ་ཤས་དྲག་པོས་རྒྱུད་བརླན་ཏེ། །

དབེན་པ་ཁོ་ནར་མོས་པའི་ཞེན་ལོག་གིས། །

འདུ་འཛིའི་གཡུལ་ལས་རྒྱལ་ལ་གསོལ་བ་འདེབས། །

ཉི་ཤུ་རྩ་ལྔའི་ལོ་ནས་ཚོགས་སྦྱོར་ལམ། །

མོས་གུས་སྙིང་རྗེ་བསྐྱེད་རྫོགས་ཐབས་ལམ་ལ། །

སྒྲུབ་པའི་དཀའ་ཐུབ་བསྟེན་པས་ཆོས་ཉིད་དོན། །

མ་ནོར་མངོན་སུམ་མཐོང་ལ་གསོལ་བ་འདེབས། །

དཔལ་གྱི་བསམ་ཡས་མཆིམས་ཕུའི་དགེའུ་རུ། །

ཀུན་མཁྱེན་ཞལ་གཟིགས་ལུང་བསྟན་ཐོབ་པའི་མོད། །

ཇི་ལྟ་ཇི་སྙེད་སྤོབས་པའི་གཏེར་གྲོལ་ཏེ། །

མངོན་པའི་ང་རྒྱལ་ཟད་ལ་གསོལ་བ་འདེབས། །

རྙིང་བསྟན་རི་མོའི་མར་མེ་ལྟར་གྱུར་དུས། །

རྒྱུད་འབུམ་གླེགས་བམ་རྫོགས་དང་ཆོས་འབྱུང་བསྐྲུན། །

མདོ་སྒྱུ་སེམས་གསུམ་སྙིང་ཏིག་བཀའ་གཏེར་གྱི། །

བསྟན་པ་མ་ནོར་འཛིན་ལ་གསོལ་བ་འདེབས། །

སྔ་འགྱུར་གྲུབ་མཐའ་ཆོས་ལུགས་སྣ་ཚོགས་ཀྱིས། །

རྙོག་མར་གྱུར་ལ་གཞན་སྡེས་གཤུང་བའི་ཚེ། །

ཡོན་ཏན་རིན་ཆེན་མཛོད་ཀྱི་ཤིང་རྟ་ཆེས། །

རང་སྡེའི་གྲུབ་མཐའ་སློང་ལ་གསོལ་བ་འདེབས། །

ཐོས་པ་ཉུང་དང་བློ་གྲོས་བླུན་པོ་རྣམས། །

ཁྲོན་པའི་ལག་འགྲོ་རྨོངས་པའི་ཕྱོགས་འཛིན་ཡང་། །

མཁས་དང་དམ་པའི་རྒྱུ་སྐར་ཆེན་པོའི་དབུས། །

བསྟན་པའི་ཉིན་བྱེད་འབར་ལ་གསོལ་བ་འདེབས། །

གང་ཞིག་འཕགས་པའི་སྤངས་རྟོགས་བརྙེས་པ་རྣམས། །

རྣམ་རྟོག་རང་རྒྱུད་ལས་འདས་ཆོས་ཉིད་ཕྱིར། །

སྒོམ་བྱུང་ཤེས་རབ་ཟླ་བ་ཉ་གང་ནས། །

ཆོས་ཀྱི་གཏེར་མཛོད་རྙེད་ལ་གསོལ་བ་འདེབས། །

དབེན་པ་ཁོ་ནར་སྦས་ཀྱང་ལས་ཅན་རྣམས། །

མཚོ་ལ་ངང་པ་ཇི་བཞིན་རིང་ནས་འདུ། །

སྐལ་མེད་རྟག་ཏུ་བསྙེན་ཀྱང་མི་ཐུལ་ན། །

མང་པོའི་ཚོགས་དཔོན་སྤངས་ལ་གསོལ་བ་འདེབས། །

མནོག་ཆུང་ཚེ་འདིའི་ཕུན་ཚོགས་ལ་དམིགས་ནས། །

འཇིག་རྟེན་ཆོས་དང་མཐུན་པར་མི་འཇུག་ཀྱང་། །

རྣམ་ཐར་ངོ་ལྐོག་སྤངས་པའི་བརྟུལ་ཞུགས་ལ། །

ས་ར་ཧ་པ་དགྱེས་ལ་གསོལ་བ་འདེབས། །

བློ་སྣ་ཐུང་ཡང་བསྟན་འགྲོའི་དོན་ལ་བརྩོན། །

ཡང་དག་ལམ་འཇུག་ཆོས་ཚུལ་ཙམ་མི་དམོད། །

བསྟོད་བསྔགས་བཀུར་སྟིས་མི་ཁེངས་སྒྲོ་སྐུར་གྱིས། །

འཇིགས་བྲལ་དཔའ་བོ་ཁྱེད་ལ་གསོལ་བ་འདེབས། །

དད་གཤིན་རྫས་ལ་གཟི་བྱིན་མི་བསྒྲུབ་ཅིང་། །

བཀའ་འགྱུར་ལ་སོགས་སྐུ་གསུང་ཐུགས་རྟེན་བསྐྲུན། །

མེས་དབོན་གནས་ལ་ཁྲི་མཆོད་སྲོག་བསླུ་སོགས། །

འབྲེལ་ཚད་དོན་ལྡན་སྦྱོར་ལ་གསོལ་བ་འདེབས། །

མཉམ་རྗེས་ཀུན་ཏུ་ཆགས་སྡང་རེ་དོགས་ཀྱིས། །

ཁྱོད་སེམས་འཁྲུགས་པ་མ་ཡིན་དབང་པོ་ལ། །

སྤྱན་རས་གཟིགས་མགོན་བཞུགས་པའི་བྱིན་རླབས་ཀྱིས། །

འགྲོ་དོན་འཁོར་བ་དོང་སྤྲུགས་ལ་གསོལ་བ་འདེབས། །

ད་དུང་སེམས་ཅན་ཁམས་ནི་མ་རྫོགས་པར། །

གཞན་དོན་འབྱུང་བ་བྱང་ཆུབ་སེམས་གཉིས་ཀྱི། །

ཁྱད་ཆོས་བསླུ་བ་མེད་པ་ཡིན་པའི་ཕྱིར། །

གདུལ་བྱར་མ་གྱུར་སེམས་ཅན་ཡོད་མིན་ཡང་། །

སློབ་མར་གྱུར་ནས་དམ་ཚིག་དག་པ་དང་། །

བཀའ་བཞིན་བསྒྲུབ་ནས་ཐུགས་ཡིད་འདྲེས་པ་རྣམས། །

ཚེ་རབས་ཀུན་ཏུ་འབྲལ་མེད་རྟེན་འབྲེལ་འགྲིག །

རྣམ་པར་རྒྱལ་བ་ཅན་དང་དབྱེར་མེད་ཤོག །

ཅེས་པའང་ལས་ཅན་གྱི་སློབ་མ་མདོ་སྨད་པ་འཇིགས་མེད་ཕྲིན་ལས་འོད་ཟེར་གྱི་ནན་ཏན་ཆེན་པོའི་ངོ་མ་ཟློག་པར་ལེགས་བྱས་ཀྱི་ཕྱོགས་ནས་བསྙད་པའོ། །

༄༅། །རིག་འཛིན་འཇིགས་མེད་གླིང་པའི་འཁྲུངས་རབས་གསོལ་འདེབས་བཞུགས། །

མགོན་པོ་སྲིད་ཞིའི་ཁྱབ་བདག་ཀུན་ཏུ་བཟང་། །

གཞི་རྒྱུད་བདེ་གཤེགས་སྙིང་པོའི་ངོ་བོ་ཉིད། །

སྟོང་ཉིད་སྙིང་རྗེར་ཤར་བ་སྤྱན་རས་གཟིགས། །

དགའ་རབ་རྡོ་རྗེའི་ཞབས་ལ་གསོལ་བ་འདེབས། །

བཅོམ་ལྡན་འོད་སྲུང་དྲུང་ན་ཀྲྀ་ཀྲྀའི་སྲས། །

ཉི་མའི་གཉེན་གྱི་མཆེད་གྱུར་གཅུང་མཛེས་དགའ། །

སྲོང་བཙན་སྒམ་པོའི་རྣམ་སྤྲུལ་ཨ་ཀར་མ། །

ཁྲི་སྲོང་ལྡེའུ་བཙན་ཞབས་ལ་གསོལ་བ་འདེབས། །

བིརྺ་པ་དང་ལྷ་ལྕམ་པདྨ་གསལ། །

གཙུག་ལག་འཛིན་དངོས་རྒྱལ་སྲས་ལྷ་རྗེའི་ཞབས། །

དྲི་མེད་ཀུན་ལྡན་ཡར་རྗེ་ཨོ་རྒྱན་གླིང་། །

ཟླ་འོད་གཞོན་ནུ་གྲགས་རྒྱལ་གསོལ་བ་འདེབས། །

པཎ་ཆེན་བི་མའི་དངོས་སྤྲུལ་བསམ་ཡས་པ། །

མངའ་རིས་པཎ་ཆེན་ཆོས་རྒྱལ་ཕུན་ཚོགས་ཞབས། །

བཀྲ་ཤིས་སྟོབས་རྒྱལ་འཛམ་གླིང་རྡོ་རྗེའི་གར། །

འཇིགས་མེད་གླིང་པར་བསྒྱུར་ལ་གསོལ་བ་འདེབས། །

འདི་འོག་ཡེ་ཤེས་རྡོ་རྗེའི་རོལ་པ་ཡིས། །

རྡོ་རྗེ་སྙིང་པོའི་རིང་ལུགས་བསླངས་ནས་སླར། །

གཤེ་ཞིང་སྐུར་པ་འདེབས་པ་རྣམས་ཀྱི་དོན། །

སྤྲུལ་པ་སྣ་ཚོགས་སྟོན་ལ་གསོལ་བ་འདེབས། །

མདོར་ན་འོད་སྲུང་དྲུང་དུ་སེམས་བསྐྱེད་ནས། །

བྱང་ཆུབ་སྤྱོད་པ་རླབས་ཆེན་རྫོགས་པའི་མཐར། །

རྣམ་པར་རྒྱལ་བ་ཅན་དུ་འཚང་རྒྱ་བའི། །

འདུས་པ་དང་པོའི་འཁོར་དུ་སྐྱེ་བར་ཤོག །

ཅི་མཛད་ལེགས་པར་མཐོང་བའི་དད་གུས་ཀྱིས། །

ཁྱོད་ཞལ་ཡིད་ལ་བྱེད་པ་ལ་གོམས་པས། །

བླ་མ་མཆོག་དང་ནམ་ཡང་མི་འབྲལ་ཞིང་། །

ཚོམ་བུ་གཅིག་ཏུ་མངོན་པར་སངས་རྒྱས་ཤོག །

ཅེས་པའང་རྗེ་བཙུན་ཛྙཱ་ནའི་མིང་ཅན་སོགས་དད་ལྡན་འགས་བསྐུལ་བ་ལས་འཁྲུལ་སྣང་ལ་ཤར་ཚོད་ཙམ་སོར་བཞག་ནས་མཁྱེན་བརྩེའི་ལྷས་སོ། །

མངའ་རིས་བུ་མོའི་ཏམ་བུ་རའི་རྒྱུད་ལ་དྲངས་བའི་གླུ།

མཛད་པ་པོ། རིག་འཛིན་འཇིགས་མེད་གླིང་པ།

ན་མོ་གུ་རུ།

ཡར་ལ་བལྟས་པས་ཀ་དག་འོད་གསལ་གྱི་མཁའ་ལ། །

ལྷུན་གྲུབ་ཉི་ཟླའི་ཚོམ་བུ་མེ་ཤེལ་ལས་དྭངས་བ། །

ལྟ་སྒོམ་སྤྱོད་པའི་རྒྱན་དུ་མེད་ཐབས་ནི་མི་འདུག །

ཨོ་ལོའི་སེམས་པ་དགུང་སྔོན་མཐོན་པོ་ལ་ཤོར་སོང་། །

མར་ལ་བལྟས་པས་ཁམས་གསུམ་འཁོར་བ་ཡི་གྲོང་ན། །

མ་རྒན་འགྲོ་དྲུག་སྣ་ཚོགས་སྡུག་བསྔལ་གྱིས་མནར་འདུག །

འདི་འདྲ་མཐོང་བས་སྙིང་རྩ་དབང་མེད་དུ་འདར་ནས། །

ཨོ་ལོའི་སེམས་པ་དམ་པའི་ལྷ་ཆོས་ལ་ཤོར་སོང་། །

འདི་རུ་བལྟས་པས་རྫ་རི་མཐོན་པོ་ཡི་རྩེ་མོར། །

ཁ་ཆར་ན་བུན་རླུང་གིས་རེག་བྱས་དང་གཡོགས་པའི། །

གཡམ་པའི་སྤྱིལ་ཆུང་ཆགས་མེད་ཞེན་བྲལ་གྱི་ཁང་མཛེས། །

ཨོ་ལོའི་སེམས་པ་གངས་ལའི་རྫ་ཁྲོད་ལ་ཤོར་སོང་། །

དགྲ་ལ་སྡང་ཞིང་གཉེན་ལ་རང་ཤུགས་ཀྱིས་ཆགས་པའི། །

སྡེ་དགོན་འདུ་འཛིའི་ཞེན་པ་ཡིད་ཡུལ་ལ་མི་འདུག །

བསླབ་བྱ་བྱིས་པའི་བསླུ་བྲིད་མ་མཛད་དང་ཨེ་གོ །

ཨོ་ལོའི་སེམས་པ་སྣང་ཟོས་གང་བདེ་ལ་ཤོར་སོང་། །

སྡིག་ཟས་ཤ་ལ་མཉེས་ཀྱང་གཞན་སྲོག་ནི་མི་གཅོད། །

རླུང་གཤོག་རྩེ་སྒྲོ་ངར་མའི་བརྟུལ་ཞུགས་དང་འགྲོགས་ནས། །

ལྟ་སྒོམ་ནམ་མཁའི་ཕུ་ཐག་བཙན་ཐབས་སུ་གཅོད་པའི། །

ཨོ་ལོའི་སེམས་པ་ཐང་དཀར་རྒོད་སྨུག་ལ་ཤོར་སོང་། །

བསམ་མེད་དུད་འགྲོར་སྐྱེས་ཀྱང་དགེ་སེམས་དང་ལྡན་པས། །

གཞན་ལ་གནོད་པའི་ཁ་ཟས་དང་ཁ་རུ་མི་འགྲོ། །

རྩྭ་དང་མྱུ་གུས་འཚོ་བའི་སྐད་སྙན་གྱི་འདབ་ཆགས། །

ཨོ་ལོའི་སེམས་པ་ལྷ་བྱ་གོང་མོ་ལ་ཤོར་སོང་། །

རི་དྭགས་སྤང་ལ་བརྩེ་བ་སྔོན་ལས་ཀྱི་སྨོན་པ། །

ཁྲེལ་མེད་ལིངས་པའི་དགྲ་ལ་བྱོལ་ཕྱིན་པས་ལོས་ཆོག །

གང་བྱུང་ཟས་ཀྱི་ཡང་རྩེ་རྩྭ་ཆུ་རུ་འདུག་པས། །

ཨོ་ལོའི་སེམས་པ་ཤ་བ་སྨུག་ཆུང་ལ་ཤོར་སོང་། །

ཁ་སང་བྱ་ལ་ཕུང་པོ་གཏོར་ཤུལ་དེ་མཐོང་བས། །

གཞོན་པའི་སྒྱུ་ལུས་ལ་ཁའི་ན་བུན་དུ་གོ་བྱུང་། །

ལུས་སེམས་བྲལ་ཀྱང་ཚོར་བའི་སྡུག་བསྔལ་ལས་གྲོལ་པའི། །

ཨོ་ལོའི་སེམས་པ་འོད་གསལ་ཆོས་སྐུ་ལ་ཤོར་སོང་། །

དོ་ནུབ་ཙམ་ཡང་མི་འཆིའི་གདེང་ཚད་ནི་མི་འདུག །

བྱ་བྱེད་མང་པོ་ངན་སོང་འཁོར་བ་ཡི་གཏིང་རྡོ། །

བྱར་མེད་ངང་ནས་ས་ལམ་ཆིག་ཆོད་དུ་འགྱུར་བའི། །

ཨོ་ལོའི་སེམས་པ་མ་བཅོས་ལྷུག་པོ་ལ་ཤོར་སོང་། །

གྲངས་མེད་གསུམ་གྱི་སྒུག་ཡུན་བཙོགས་ས་ན་མི་འདུག །

སྡོམ་པ་གསུམ་གྱི་རང་རིག་ངོ་བོ་ལ་རྫོགས་སོང་། །

ད་ལྟའི་ཤེས་པ་སངས་རྒྱས་རློན་པ་རུ་འདུག་པས། །

ཨོ་ལོའི་སེམས་པ་འོད་གསལ་རྫོགས་ཆེན་ལ་ཤོར་སོང་། །

དབེན་པའི་རི་ངོགས་གངས་ལ་རྗེའུ་ཡི་རྫ་ཁྲོད། །

སྐུ་མཚམས་དམ་པོར་ཁ་ཆར་ན་བུན་གྱིས་བསྡམས་ཚེ། །

དགའ་སྐྱོ་འདྲེས་མའི་ཉམས་སྣང་བན་བུན་གྱི་ངང་ནས། །

སྒྱུ་མའི་རྣལ་འབྱོར་མཁྱེན་བརྩེའི་འོད་ཟེར་གྱིས་སྨྲས་སོ། །

༄༅། །འཇིགས་མེད་གླིང་པ་ལ་ཁྱད་འཕགས་བསྟོད་པ་བཞུགས།

 

ཨོཾ་སྭསྟི།

ཀུན་མཁྱེན་མང་ཡང་ནང་དོན་གཟིགས་པ་དཀོན། །

འཇིགས་མེད་གླིང་པ་ཆོས་ཉིད་བདེན་པ་གཟིགས། །

མཁས་པ་མང་ཡང་གྲུབ་པ་ཐོབ་པ་དཀོན། །

རང་བྱུང་རྡོ་རྗེ་འཕགས་པའི་ས་མཐོར་གཤེགས། །

མཁས་པར་སྦྱངས་ཡང་མ་བསླབ་ཤེས་པ་དཀོན། །

མཁྱེན་བརྩེའི་མྱུ་གུ་ཆོས་རྣམས་རང་གྲོལ་མཁྱེན། །

སྒོམ་ཆེན་མང་ཡང་རིག་པ་མངོན་གྱུར་དཀོན། །

ཀུན་མཁྱེན་ཆེན་པོ་སྣང་བཞི་ཟད་སར་འཁྱོལ། །

འགྲོ་དོན་བྱས་ཀྱང་གཞན་དོན་འབྱུང་བ་དཀོན། །

སློབ་བརྒྱུད་རྣམས་ཀྱིས་བསྟན་པ་མཁའ་མཐར་བརྡལ། །

རྩོམ་པ་མང་ཡང་ལེགས་བཤད་འབྱུང་བ་དཀོན། །

བླ་མའི་གསུང་རབ་རྒྱལ་བའི་བཀའ་དང་མཚུངས། །

དེ་ལྟར་སྙིགས་དུས་བོད་ཁམས་སྐྱོང་བའི་མགོན། །

པདྨ་དབང་ཆེན་ཡེ་ཤེས་རོལ་པ་རྩལ། །

འཇམ་དཔལ་བཤེས་གཉེན་བི་མ་མི་ཏྲ་རྣམས། །

དངོས་སུ་བྱོན་དང་རྣམ་དབྱེར་མ་མཆིས་པའི། །

འཇིགས་བྲལ་གླིང་པའི་ཞབས་ལ་ཕྱག་འཚལ་ལོ། །

སྐྱེ་བ་འདི་དང་ཚེ་རབས་ཐམས་ཅད་དུ། །

ཁྱེད་དང་སྐད་ཅིག་མི་འབྲལ་འགྲོགས་པ་དང་། །

ཐུགས་ཡིད་གཅིག་འདྲེས་རིག་པ་འོད་གསལ་གྱི། །

སྐུ་གསུམ་ལྷུན་གྲུབ་གཞོན་ནུ་བུམ་སྐུ་རུ། །

མངོན་པར་བྱང་ཆུབ་ཐོབ་པའི་བཀྲ་ཤིས་ཤོག །

ཅེས་པའང་འཇིགས་མེད་ནམ་མཁའི་རྡོ་རྗེས་སོ།། །།

༄༅། །ཀུན་མཁྱེན་འཇིགས་མེད་གླིང་པར་གསོལ་འདེབས་མོས་གུས་སྙིང་གི་གཟེར་འདེབས།

ཨོཾ་ཧོ་ཡེ། རྗེ་རིགས་བརྒྱའི་ཁྱབ་བདག་འགྲོ་བའི་མགོན། །

ཕ་དྲན་པས་གདུང་སེལ་འཇིགས་མེད་གླིང་། །

མཚན་ཐོས་པས་སྲིད་པ་ཧྲུལ་པོར་བྱེད། །

རྗེ་ཐོས་གྲོལ་ཆེན་པོར་གསོལ་བ་འདེབས། །

དཔལ་པདྨ་སཾ་བྷས་ལུང་བསྟན་ཅིང་། །

རྗེ་དྲི་མེད་འོད་ཟེར་དགྱེས་ཞལ་མཇལ། །

ཆོས་སྡེ་གསུམ་རྫོགས་ཆེན་བསྟན་པ་གཏད། །

མགོན་རང་བྱུང་རྡོ་རྗེར་གསོལ་བ་འདེབས། །

ཐུགས་མཁྱེན་བརྩེའི་ཡེ་ཤེས་དྲི་མ་མེད། །

གསུང་ཆོས་ཀྱི་སྒྲ་དབྱངས་ཡོངས་ལ་ཁྱབ། །

སྐུ་ངོ་མཚར་མཚན་དཔེས་ཉིན་མོར་བྱེད། །

ཕ་མཁྱེན་བརྩེའི་འོད་ཟེར་གསོལ་བ་འདེབས། །

ལམ་རིམ་གཉིས་རྣལ་འབྱོར་བྱེད་པ་ཡི། །

རྩ་ཐིག་རླུང་མདུད་པ་རང་གྲོལ་བས། །

ཁྱོད་མ་བསླབ་ཤེས་བྱ་མཐའ་དག་མཁྱེན། །

རྗེ་འཇམ་དབྱངས་བླ་མར་གསོལ་བ་འདེབས། །

ཆོས་བྱང་ཆུབ་སེམས་ཀྱི་ཐུགས་རྒྱུད་འབྱོར། །

ཁྱོད་འགྲོ་བ་ཀུན་ལ་བུ་ལྟར་བརྩེ། །

མ་སེམས་ཅན་ཀུན་གྱི་ཉེར་འཚོའི་གཞི། །

མགོན་སྤྱན་རས་གཟིགས་ལ་གསོལ་བ་འདེབས། །

ཕ་ཁྱེད་ཀྱི་མཐུ་སྟོབས་ཟླ་མེད་པས། །

བདུད་སྲིན་པོའི་གྲོང་ཁྱེར་རྨོངས་ནས་གཞོམ། །

ཕྱོགས་ཀུན་ལས་རྣམ་པར་རྒྱལ་བའི་ལྷ། །

མགོན་ལག་ན་རྡོ་རྗེར་གསོལ་བ་འདེབས། །

སྐྱབས་རྩ་གསུམ་ཀུན་འདུས་གུ་རུ་རྗེའི། །

ཐུགས་དགོངས་པའི་གསང་མཛོད་གཏེར་ཆེན་བརྡོལ། །

རྗེ་སྣང་བཞིའི་ལམ་གྱི་རྩེ་མོར་སོན། །

ཕ་གདོད་མའི་མགོན་པོར་གསོལ་བ་འདེབས། །

མགོན་པད་འབྱུང་དྲི་མེད་འོད་ཟེར་གྱི། །

ཐུགས་གཏེར་གྱི་གདམས་པས་འཛམ་གླིང་ཁྱབ། །

རྗེ་འབྲེལ་ཚད་དོན་ལྡན་ཕྲིན་ལས་ཅན། །

དཔལ་པདྨ་དབང་ཆེན་གསོལ་བ་འདེབས། །

བུ་བདག་གི་བློ་སྙིང་བྲང་གསུམ་པོ། །

དུས་དེང་ནས་བྱང་ཆུབ་སྙིང་པོའི་བར། །

ཕ་སྐྱབས་ཀུན་འདུས་ཞལ་ཆེན་པོ་ལ། །

རེ་ལྟོས་ལིང་བསྐྱུར་གྱི་འབུལ་ལགས་ན། །

རྗེ་བླ་མས་ཡེ་ཤེས་སྤྱན་གྱིས་གཟིགས། །

བདག་ཐུགས་རྗེའི་ཕྱག་གིས་མ་འདོར་ཨང་། །

བུ་བདག་ལ་སྐྱིད་སྡུག་ཅི་བྱུང་ཡང་། །

ཕ་དྲན་མཆོག་བླ་མ་ཁྱེད་རང་མཁྱེན། །

བདག་སྙིང་ཁ་འོད་ལྔའི་ཀློང་སྒྲོམ་དུ། །

ཕ་སྐུ་གསུམ་རང་བྱུང་རྡོ་རྗེ་བཞུགས། །

བུ་རིག་སྟོང་དགོངས་པའི་རྩལ་ཆེན་རྫོགས། །

མགོན་ཀུན་བཟང་ཐུགས་དང་དབྱེར་མེད་ཤོག །

ཅེས་པའང་རང་ལོ་སོ་གསུམ་སྣོན་ཟླའི་ཚེས་གཅིག་ལ་རྗེ་བླ་མའི་གདན་ས་མཇལ་བ་ན་དད་སྤྲོ་དང་དགའ་སྐྱོ་འདྲེས་མའི་ངང་དེ་གར་གཡོ་རུ་ཁྲ་འབྲུག་གི་གཙུག་ལག་གི་ཉེ་ལོགས་སུ་པདྨ་ཡེ་ཤེས་རྡོ་རྗེས་མོས་གུས་དྲག་པོས་གསོལ་བ་འདེབས་པ་བླ་མའི་བྱིན་བརླབས་སྙིང་ལ་འཇུག་པར་བྱིན་གྱིས་བརླབ་ཏུ་གསོལ། སརྦ་སིདྡྷི་རསྟུ། ཤུ་བྷཾ།། །།

རིག་འཛིན་འཇིགས་མེད་གླིང་པའི་མཛད་རྣམ་ཉུང་བསྡུས།

  རིག་འཛིན་འཇིགས་མེད་གླིང་པ་ནི། ཕྱིང་དབར་བང་སོ་དམར་པོའི་ལྷོ་ཕྱོགས་སུ་ཡབ་རྒྱལ་བའི་དབང་པོ་ཀློང་ཆེན་རབ་འབྱམས་ཞབས་དང་ཆོ་འབྲང་གཅིག་པའི་ཆོས་རྗེ་སྨོན་ལམ་བཟང་པོ་དང་།   ཡུམ་གྲི་གུམ་བཙན་མོའི་བློན་པོ་ལོ་ངམ་རྟ་རྫིའི་རྒྱུད་ལས་ཆད་པ་མདོ་སྲིབ་སྟེང་ཁང་པའི་རིགས་ཀྱི་མེ་ཏོག་ཡན་ལག་མཆོག་དང་ལྡན་མ་གཉིས་ཀྱི་སྲས་སུ་སྤྱི་ལོ་1729ལོར་སྐུ་འཁྲུངས།  

  དགུང་ལོ་དྲུག་པར་གསང་མཆོག་དཔལ་གྱི་རི་འོད་གསལ་ཐེག་པ་ཆེན་པོའི་གླིང་དུ་སྤྲུལ་བའི་སྐུ་ངག་དབང་བློ་བཟང་པདྨ་ལས་རབ་ཏུ་བྱུང་ཞིང་།  མཚན་ལ་པདྨ་མཁྱེན་བརྩེ་འོད་ཟེར་ཞེས་གསོལ།   དགུང་ལོ་བཅུ་པའི་དུས་སློབ་དཔོན་བོན་བཙན་པ་ལས་སྒྲ་དང་།     རྩིས།   གསོ་རིག་བཅས་གསན་པས་ཚེགས་མེད་དུ་མཁྱེན།   དྲུང་དམ་ཆོས་བློ་གསལ་དབང་པོ་ལས་སྙན་ངག་མེ་ལོང་མའི་བཤད་ཁྲིད་ཞུས་པས་ལྗགས་རྩོམ་གནང་བ་ལ་སྙན་འགྱུར་ཕུན་སུམ་ཚོགས་པའི་དཔལ་ཐོབ།   །གནས་བརྟན་ཀུན་བཟང་འོས་ཟེར་ལས་གྲོལ་ཏིག་དང་བླ་མ་དགོངས་འདུས་སོགས་ཀྱི་དབང་ལུང་གསན།   དགུང་ལོ་བཅུ་གསུམ་པར་གྲུབ་དབང་རིན་པོ་ཆེ་ཐེག་མཆོག་རྡོ་རྗེ་དང་མཇལ།  །ཕྱག་རྒྱ་ཆེན་པོ་ཡེ་ཤེས་མཐོང་གྲོལ་གྱི་རྩ་དབང་དང་བསམ་པ་ལྷུན་གྲུབ་སོགས་སྨིན་བྱེད་ཀྱི་དབང་དང་གྲོལ་བྱེད་ཀྱི་ཁྲིད་གསན།

  དགུང་ལོ་བཅོ་ལྔ་པ་ངག་དབང་ཀུན་དགའ་ལེགས་པའི་འབྱུང་གནས་ཀྱི་དྲུང་དུ་དགེ་ཚུལ་གྱི་སྡོམ་པ་བཞེས།   གཞན་ཡང་སྔ་ཕྱིར་གཏེར་ཆེན་དྲི་མེད་གླིང་པ།   ཞང་སྟོད་ངྷརྨ་ཀིརྟི།    སྨིན་གླིང་གྲུབ་དབང་ཤྲཱི་ནཱ་ཐ།   བསྟན་འཛིན་ཡེ་ཤེས་ལྷུན་གྲུབ།   འབྲོག་ཐང་དབོན་པདྨ་མཆོག་གྲུབ།   རྨོན་རྫ་དཀར་བླ་མ་དར་རྒྱས་སོགས་ཡོངས་འཛིན་དུ་མ་ལས་སྔ་འགྱུར་བཀའ་མ་དང་གཏེར་ཁ་གོང་འོག་གཙོ་བོར་གྱུར་པའི་བཀའ་གཏེར་འགངས་ཆེ་བ་རྣམས་དང་།  གསར་མའི་རྒྱུད་སྡེ་ཡང་ཅི་རིགས་པ་གསན་བཞེས་མཛད།

  སྐབས་དེ་དག་ཏུ་ཐུགས་ལ་ངེས་འབྱུང་དང་སྐྱོ་ཤས་ཚད་མེད་འཁྲུངས་ནས་ཤྲཱི་པརྦ་ཏའི་གླིང་དང་།  །བསམ་ཡས་མཆིམས་ཕུའི་གེའུ་འོག་ཉང་ཏིང་འཛིན་བཟང་པོའི་སྒྲུབ་ཕུག་ཏུ་གྲགས་པ་སོགས་སུ་ལོ་འཁོར་བསྟུད་མར་སྙིང་པོ་དོན་གྱི་སྒྲུབ་པའི་རྒྱལ་མཚན་འཛུགས་པར་མཛད།   ལོ་བདུན་གྱི་སྒྲུབ་པའི་དམ་བཅའ་གེགས་མེད་དུ་མཐར་ཕྱིན་ཏེ།  ཐུགས་ལ་ཉམས་ལེན་གྱི་རྟོགས་པ་ཁྱད་པར་ཅན་མང་པོ་འཁྲུངས།   དག་པའི་གཟིགས་སྣང་མཐའ་ཡས་པ་བྱུང་ཞིང་།   ལྷག་པར་ཀུན་མཁྱེན་ཆོས་ཀྱི་རྒྱལ་པོ་ཀློང་ཆེན་པའི་ཞལ་ལན་གསུམ་དུ་མཇལ།   །སྐུ་གསུང་ཐུགས་ཀྱི་བྱིན་རླབས་དངོས་སུ་འཕོས་ཤིང་གསུང་གི་གནང་བ་ཆེན་པོ་ཐོབ་པ་ལ་བརྟེན་ནས་འཕགས་ལམ་དོན་གྱི་ཡེ་ཤེས་རྫོགས་པ་ཆེན་པོའི་བདེན་པ་མཐོང་།   ཟབ་གཏེར་མང་པོའི་བསྙེན་སྒྲུབ་མཐར་ཕྱིན་པས་རྣམ་སྨིན་རིག་འཛིན་གྱི་ལྡངས་ཚད་མངོན་དུ་གྱུར།   རྩ་རླུང་ཐིག་ལེའི་རྣམ་འབྱོར་ལ་གནད་དུ་བསྣུན་པས་མགྲིན་པ་ལོངས་སྤྱོད་ཀྱི་འཁོར་ལོའི་རྩ་མདུད་གྲོལ་ཏེ་དགོངས་གཏེར་ནམ་མཁའ་འཛོད་ཀྱི་ཆོས་སྡེ་ལ་མངའ་དབང་འབྱོར་བས་ཟབ་མོའི་གཏེར་ཁ་ཀློང་དུ་བརྡོལ།  །ཕྱིས་ཀྱང་སྐུ་ཚེ་ཧྲིལ་པོར་དགོན་གནས་དབེན་པ་ཁོ་ནར་ཐུགས་དམ་གྱི་མཐིལ་མཛད།

  འཕྱོང་རྒྱས་སྲོང་བཙན་བང་སོའི་ལྷོ་ཕྱོགས་སུ་དཔལ་ཆེ་རིང་ལྗོངས་པདྨ་འོད་གསལ་ཐེག་མཆོག་གླིང་གི་རི་ཁྲོད་རྟེན་དང་བརྟེན་པར་བཅས་པ་གསར་དུ་བཏབ།   བསམ་ཡས་བར་ཁང་གཡུ་ཞལ་སྟེང་དུ་རྒྱ་དངུལ་སྲང་ལྔ་བརྒྱ་ལས་གྲུབ་པའི་བྱང་ཆུབ་མཆོད་རྟེན་རིན་པོ་ཆེ་སྣ་ཚོགས་ཀྱི་ཕྲ་རྒྱན་གྱིས་བརྒྱན་པ་བཞེངས།    བསམ་ཡས་ཆོས་འཁོར་ཆེན་པོ་ལ་གསེར་སྲང་བརྒྱ་ལས་གྲུབ་པའི་འཁོར་ལོ་ཕུལ་ཅིང་།   དངུལ་གྱི་རྒྱལ་བ་མི་ཕམ་པའི་སྣང་བསྙན་ཆེན་པོ་བཞེངས།   སྲོང་བཙན་བང་སོ།།   །བསམ་ཡས་མཆིམས་ཕུ།   འཕྱོངས་རྒྱས་དཔལ་རི་སོགས་སུ་ཨོ་རྒྱན་པདྨ་འབྱུང་གནས་དང་།   ལོ་པཎ་རྣམས་ཀྱི་སྐུ་བརྙན་མང་པོ་གསར་བཞེངས་དང་།   ཁྱད་པར་རྒྱལ་བའི་འཕྲིན་ལས་ཆུད་མི་འཛའ་བའི་ཆེད་དུ་རྒྱུད་འབུམ་རིན་པོ་ཆེ་ཆ་ཚང་དང་།   རྣམ་ཐར་ཤེལ་བྲག་མ་སོགས་ཀྱི་བྲིས་ཐང་དྲུག་ཅུ་སྐོར་གསར་བཞེངས་གནང་།   དེ་བཞིན་བསྟན་པའི་རྩ་བ་མདོ་སྒྱུ་སེམས་གསུམ་དང་དེ་དག་གི་གཞུང་དོན་མ་ནོར་བ་མཁས་གྲུབ་ཆེན་པོས་སྲོལ་བཏོད་པའི་གྲུབ་མཐའ་ནུབ་ལ་ཉེ་བས་ཤྲཱི་པརྦ་ཏའི་གླིང་དུ་སྒྲུབ་མཆོད་ཀྱི་རྒྱུན་གསར་འཛུགས་སོགས་སྔ་འགྱུར་རྡོ་རྗེ་ཐེག་པའི་བསྟན་པ་སླར་གསོའི་ཕྱག་རྗེས་བླ་ན་མེད་པ་འཇོག་པར་མཛད།

 རྗེ་འདི་པར་གྲུབ་དབང་འཇིགས་མེད་འཕྲིན་ལས་འོད་ཟེར་དང་།   འཇིགས་མེད་རྒྱལ་བའི་མྱུ་གུ།   མོན་མཁས་གྲུབ་འཇིགས་མེད་ཀུན་གྲོལ།   འབྲི་གུང་རིན་པོ་ཆེ་ཉིན་བྱེད་འོད་ཟེར།   ས་སྐྱའི་ཁྲི་ཆེན་ངག་དབང་དཔལ་ལྡན་ཆོས་སྐྱོང་སྐུ་མཆེད།   དགའ་ལྡན་བྱང་ཤར་རྣམ་གཉིས།   འཕྱོངས་རྒྱས་དཔལ་རི་སྤྲུལ་སྐུ།   ལྕགས་ཟམ་སྤྲུལ་སྐུ།   གངས་དཀར་སྤྲུལ་སྐུ།   ཞ་ལུའི་དགེ་བཤེས་བདེ་གཤེགས་སྙིང་པོ།   དྭགས་པོ་སྤྲུལ་སྐུ།   ཀོང་པོ་རྒོད་ཚང་སྤྲུལ་སྐུ་འཇིགས་མེད་བསྟན་པའི་རྒྱལ་མཚན།    ལྷོ་བྲག་ཐུགས་སྲས།   སྡེ་དགེ་རྒྱལ་པོ་དང་བཙུན་མོ་ངང་ཚུལ་མ་སོགས་ཐུགས་རྒྱུད་ཟིན་པའི་སློབ་མ་བསམ་གྱིས་མི་ཁྱབ་པ་མང་པོ་བྱུང་།  

  འཇིགས་གླིང་པོད་དགུ།

     རྗེ་འདི་པའི་བརྩམས་ཆོས་ལ་ཡོན་ཏན་རིན་པོ་ཆེའི་མཛོད་རྩ་འགྲེལ་དང་།    སྔ་འགྱུར་རྒྱུད་འབུམ་རིན་པོ་ཆེའི་རྟོགས་བརྗོད་འཛམ་གླིང་ཐ་གྲུར་ཁྱབ་པའི་རྒྱན།   དགོངས་འདུས་ཆོ་གའི་བསྟན་བཅོས་ལུང་གི་གཏེར་མཛོད།   བཀའ་ཡི་བསྡུ་བ་གསར་དུ་མཛད་པའི་ཕུར་པ་རྒྱུད་གཞུང་།  ཐུགས་གཏེར་ཀློང་ཆེན་སྙིང་ཐིག་གཞུང་རྩ་བ་གསལ་བྱེད་དང་བཅས་པ།དབུ་རུ་ཞྭ་ལྷ་ཁང་གི་གཏམ།  །བཀྲ་ཤིས་སྲོང་བཙན་བང་སོའི་གཏམ་ལོ་རྒྱུས་ཀྱི་མཛད་ཁང་།བཀྲ་ཤིས་སྲོང་བཙན་བང་སོའི་དཀར་ཆག   རི་དྭགས་ཀྱི་གཏམ་ངེས་འབྱུང་གི་ཕོ་ཉ།  །འདབ་ཆགས་ཀྱི་གཏམ་རིག་པ་རང་ཤར།   ནགས་ཚལ་གྱི་གཏམ་ཨུ་དུམ་ཝྭ་རའི་ཆུན་པོ།   བློ་ལྡན་བྷྲ་མ་རའི་གཏམ་ཚིག་ལ་མི་རྟོན་དོན་ལ་རྟོན་པ།   རི་བོང་ཤིན་ཏུ་བརྟན་པའི་གཏམ་བྲག་རིའི་མགུལ་རྒྱན།   རྒྱལ་པོ་དང་དམངས་ལ་སྤྲིངས་པའི་གཏམ་རབ་ཏུ་བྱེད་པ་འཇིག་རྟེན་གསོ་བའི་སྨན།   དམངས་ལ་སྤྲིངས་པའི་གཏམ་དཔེ་དོན་འབྲེལ་བ་སོགས་གསུང་འབུམ་པོད་དགུ་ཡོད་པའི་བར་ཤིང་ཆ་ཚང་བར་སྡེ་དགེ་དཔར་ཁང་ཆེན་མོར་བཞུགས།

  དགུང་ལོ་བདུན་ཅུ་པ་སྟེ། སྤྱི་ལོ་1798ལོར་སྐུ་གཤེགས།

  རྣམ་ཐར་ཞིབ་མོ་ནི་ཁོང་གི་རང་རྣམ་ཡུལ་ལྷོ་རྒྱུད་དུ་བྱུང་བའི་རྫོགས་ཆེན་པ་རང་བྱུང་རྡོ་རྗེ་མཁྱེན་བརྩེའི་འོད་ཟེར་གྱི་རྣམ་པར་ཐར་པ་ལེགས་བྱས་ཡོངས་འདུའི་སྙེ་མ་ཞེས་པ་སི་ཁྲོན་མི་རིགས་དཔེ་སྐྲུན་ཁང་གིས་སྤྱི་ལོ1998ལོར་དཔེ་སྐྲུན་བྱས་པ་དེར་གསལ།

ཐུབ་བསྟན་མཛེས་པའི་རྒྱན་གཅིག་ཀློང་ཆེན་པ།།

བཤད་སྒྲུབ་བསྟན་པའི་མངའ་བདག་འཇིགས་མེད་གླིང་།།

མཚུངས་མེད་བླ་མའི་བསྟན་པ་སྲིད་མཐའི་བར།།

བཤད་སྒྲུབ་ཐོས་བསམ་བསྒོམ་པས་འཛིན་གྱུར་ཅིག།