དགྱེས་གླུ།
ཚིག བུདྡྷ།
དབྱངས། བློ་གསལ།
ལེན་མཁན། ཤེར་བསྟན། ཤེས་མཚོ།
བཀྲ་ཤིས་ཕུན་ཚོགས་གཟའ་ཚེས་ཉིན་བཟང་ལ། །
དགྱེས་པའི་གླུ་ཞིག་མཆོད་པའི་རྟེན་དུ་འབུལ། །
ཁྲོམ་པ་གཞིས་ལ་འཛོམས་པས་སྐྱིད་པ་ལ། །
འཛོམས་སྐལ་ཡང་ཡང་བྱུང་བའི་རྟེན་འབྲེལ་ཡག །
ཁང་བཟང་ཀ་བརྒྱ་གྲུ་བཞིའི་ནང་རོལ་དུ། །
དབང་ཐང་སྐུ་བསོད་ཅན་གྱི་ཕ་ཁུ་བཞུགས། །
མཛེས་པའི་ན་ཆུང་དར་མའི་ཚོགས་ཀྱང་འཛོམས། །
མི་ངོ་ལྷ་ཞལ་མཇལ་བའི་བསོད་ནམས་ལེགས། །
ཆང་ཕོར་འབྲུག་རིས་གཡས་སུ་འཁྱིལ་བའི་ནང་། །
འབྲུ་ལྔའི་ཉིང་ཁུ་ནས་ཆང་སྔོན་མོ་ལྟེམས། །
དྲི་མེད་ལྷ་དར་དཀར་བོའི་ལྕིབ་དང་བཅས། །
འདུ་ཚོགས་ཁྲོམ་པ་དགྱེས་པའི་མཆོད་ཅིག་འཕེན། །
རི་མཐོ་ས་གཙང་སྨན་ལྗོངས་ཕྱུག་མོ་ལ། །
བྱིན་ཆེན་གཡང་གི་རུ་མ་བརྟན་པར་སྨོན། །
སྨོན་ལམ་བཟང་བོ་དཀར་བོའི་དགེ་འབྲས་ལས། །
འགྲོ་ཀུན་རླུང་རྟའི་བ་དན་ཡར་ལ་བསྐྱེད། །
སྙན་པའི་དབྱངས་ཀྱི་འགྱུར་ཁུགས་རེ་རེ་ན། །
བཀྲ་ཤིས་དགེ་མཚན་རྒྱས་པའི་སེམས་འདུན་ཡོད། །
ཟོལ་མེད་སྙིང་ལས་བརྡོལ་བའི་དགྱེས་པའི་གླུ། །
བདག་གི་མགྲིན་པའི་ཁབ་ནས་དབང་མེད་ཤོར། །
