阿拉老底子每天呈送精彩文章一组
打开尘封的记忆，寻觅往昔的岁月
叙老底子事 忆老底子人
诉老底子情
来源：魔都白领群
作者： 薛理勇
沪语改写：朱枫
讲述：洪瑛
文字、语音审核：丁迪蒙
编辑：王乙其
桶是盛器，是大家生活当中少勿脱个日用家生。桶个式样、品种造造反反，根据用途可以分为米桶、饭桶、水桶、面桶(揩面用)、脚桶(汏脚用)、浴桶、奶桶(挤奶用)、马桶等几十种。
古代，各种木桶也是女小囡出嫁板定要有个嫁妆，交关场化还按照陪嫁里向桶个多少、来评判嫁妆个多少。桶是木制品，勿容易长期保存，所以，勒早先个古墓里发现个陪葬品大多数是陶、瓷或者金属制成功个坛坛罐罐，难得看到有木头个桶，而文献里个记载又勿大明确，葛咾老难确定中国有木桶个历史。
杉木个防腐性好一眼，所以木桶大多数是用杉木制作个。拿杉木解成功固定形状个木爿，让木爿可以拼成功一只桶，然后用条编成个“桶箍”拿木爿固定成桶，葛咾制作木桶或者修木桶侪叫“箍桶”。
传统个箍桶大多数是上门服务个，东家拿做桶需要个木材准备舒齐之后，请箍桶个人到屋里来制作，而箍桶个人只要准备箍桶所需要个篾条、工具等。
近代以后，上海个木桶大多数是作坊生产以后摆到家具店或者日用器皿商店去卖个，传统个箍也慢慢叫拨铜箍、铁箍替代。木桶大多数用杉木制作，假使长期摆勒海勿用，木爿会得干燥收缩，桶就会得散架而无法使用；杉木个防腐性比较好，但木质嫩，桶底部木槽个地方容易断裂。我小辰光就经常看到走街巷个箍桶担，伊拉个喊声邪气简单——“箍桶!”
不过，上海箍桶已经勿用篾箍，大多数用一种扁铁箍。搿种扁铁大约摸1公分宽，厚0.2公分，拨卷成圈，换箍个辰光根据实际需要个长度、截下来一段，打上铆钉就成为了一只桶箍。废弃个铁质桶箍是废物了，但是，对小囡来讲就是只宝啦，因为伊就是只现成个、可以白相个铁环(又叫“铁圈”)。
老底子小囡白相个物事少，“滚铁圈”是老好白相个。我还记得以前有只《滚铁环》个儿歌:铁环圆，圆似盘。滚环到河边，河边阿有船。船儿开，开到宝盖山。山浪有平台，再来滚铁环。
到了上世纪70年代之后，屋里个木桶大多数拨塑料桶替代。同时，随牢仔上海住房条件个改善搭仔生活水平个提高，屋里向一般侪有了现成个卫浴设备，桶已经勿是家庭个必须品了，箍桶行业已经退出了大城市，大家再也听勿到“箍桶”迭能个喊叫声了。
作者：薛理勇
讲述：洪瑛
丁迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》，少儿出版社。
转自：“海上梦叠”公众号
我知道你在看哟~
