亂流絮語
2024.4.18
禮拜四
-
由細到大都好鐘意睇訪談節目.以前會睇《康熙來了》《魯豫有約》《今夜不設防》《最佳男/女主角》.我覺得睇(或者聽)訪談節目.可以比較全面地認識到一個人.而我可以透過呢個節目.真正地看到一個人.
喺宜家呢個時代.我覺得越難越真正地看見一個人.一切要追求極致的效率極致的快速.我經常會諗.當我關注某個博主之後.係咪代表我就真係已經"看見了他呢?"我點關注.純粹係為了他給我提供了某段短時間的快樂.
但我實際上看不到這個人.不是這個人吸引我關注他.是他做的事讓我點下那個"按鈕".而絕大多數時候.點完"關注".就刷往下一個視頻.我很快就忘了我曾按過這個按鈕.也很快就忘記了這個人.因為下一秒.又有無數新的人會佔領我的屏幕.試圖讓我點下那個名為「關注」或「訂閱」的按鈕.
而訪談節目.是把人留下來.靜下心.好好了解一下這個人.去聽聽他的故事.去用一段時間.真正地看見一個人.
以下四個是我個人十分推崇的.
基本上每集必看的訪談節目.
如果有興趣 不妨自行搵嚟睇下
未必啱你口味.但偶爾跳出一下舒適圈.
試試其他口味似乎亦未嘗不可
-
導演.門
主持:陳詠燊、趙善恆、
繆浩昌、甄栢榮
外景主持:麥詠楠
viu tv喺2021年出過兩輯《歌手.門》.2022年出過一輯《演員.門》.顧名思義.訪問了很多歌手和演員.
我個人不是特別喜歡.可能因為播放平台是電視.而且身為幕前人員的歌手和演員有一定的包袱.所以很多東西未能很真實的表達.所以我看了幾集就放棄沒有追看下去.
但同是2022年出的《導演.門》則令我十分喜歡.睇幕後人員嘅訪談真係好好睇.毫無包袱.而且viu特登搵咗陳詠燊(《飯戲攻心》導演)做主持.當主持人本身就係導演.再訪問翻其他導演.就可以聽到好多其他訪談節目聽唔到嘅嘢.佢會問好多內幕嘢.而嘉賓見到個主持係識嘢嘅.又會自動交出更多貨.
只有十集.每集訪問一新一舊兩位導演.
每集時長45分鐘左右.
我自己尤其喜歡的集數係
「鄭保瑞、李子俊」
以及
「陳可辛、黃進」
附上每集嘉賓名單
叔叔的愛（番外篇）
主持:金成
主持人金成係雜誌老總以及腕錶達人.曾在多間不同雜誌社任職.是《東Touch》的前總編輯兼《Jet》月刊創辦人.
《叔叔的愛》原本是金成和另一位專欄作家月巴氏的清談節目.主要是兩個人對談分享一些「麻甩佬」的喜好.例如漫畫以及舊電影舊電視劇.後來金成開始訪問各界名人.而這些訪問就是所謂的(番外篇).
至今金成訪問過的包括但不限於以下這些名人:
實在厲害.全部都係勁人.我好喜歡呢個節目係冇開場白.唔使睇嗰啲「你好啊/我好鐘意你啊/我有睇你啲戲/我有聽你啲歌」嘅無謂寒暄.
金成往往一嚟就直入主題.理性沉穩之餘又做足功課.令嘉賓可以講到一啲鮮為人知嘅心底話.同埋留意金成嘅眼神.聽對方講話嘅時候係好認真咁望住對方對眼.呢份真誠真係冇得輸.
唯一我不滿意嘅點就係.時長太短.大部分都係廿幾分鐘.最長都係45分鐘左右.再長啲就過癮啦.
我自己特別喜歡黃子華(強推)、劉松仁(強推)、梁朝偉、莊文強、金燕玲呢幾集.
威哥會館
主持:威哥
前文曾經講過我特別喜歡睇幕後人員嘅採訪.而呢個節目就係專門訪問幕後人員.曾經訪問過導演、監製、編劇、演員等等唔同職位嘅電影人.
最勁嘅係節目主持威哥.佢本身只係一個影迷.由於深愛香港電影直至癡迷的程度.從少年時期就開始研究了解每一部電影的台前幕後.從導演主角到監製編劇電影公司老闆.甚至喺某部電影某個只有兩三分鐘鏡頭畫面嘅演員.佢都可以如數家珍地向人介紹呢個係邊個.
有幾次訪問.連被訪者都唔記得自己同邊個合作過.做過咩作品.都係靠威哥提醒翻嘉賓本人先記得.真係好癲.威哥簡直係名副其實的行走的香港電影百科全書.
因為唔係娛樂圈中人.亦唔係專業主持.威哥喺採訪嘅節奏上會稍稍遜色.但因為佢腦裡嘅電腦資料庫實在太強大.所以睇佢同啲導演逐一細數曾經拍過嘅電影實在係一件十分十分過癮的事情.
我最愛係董瑋、劉鎮偉以及舒琪呢幾集.
24/7 TALK
主持:廿四味(24herbs)
(其實主力都係啊肥同Brian)
廿四味係香港一個hip hop組合.早幾年開始碌人情卡請嘉賓上嚟做訪問.到宜家已經做咗一百幾集.曾訪問過嘅嘉賓包括但不限於:
MC仁
曾國祥
森美
錢嘉樂
Novel Fergus
文念中
林家棟
吳彥祖
謝安琪
陳輝陽
麥浚龍
詹瑞文
張繼聰
24/7 talk我之前都安利過好多次.唔少人俾我安利完睇完返嚟都同我講真係好jeng.可能其中一個咁jeng嘅原因.係好少可以喺其他節目聽到咁多粗口.哈哈哈哈哈.
真係好難好似Brian咁.俾人感覺又有禮貌.又nice.又humble.但係又基本上每三句就一定有一句粗口.聽佢講粗口唔會覺得冒犯.純粹係一種直抒胸臆嘅暢快.
我好鐘意24/7 Talk夠長.一集起碼個幾鐘.亦因為佢足夠長.好少剪輯.我就可以更完整地見到嘉賓嘅真實反應.唔單止係佢答問題時候嘅反應.更多係佢哋聽人地講嘢嘅時候俾出嚟嘅即時反應.聽到好笑嘢嘅時候會點.聽到同自己意見相反嘅觀點會點.呢種即場嘅嘢好珍貴.我覺得好難扮出嚟.從呢啲細微處我可以更完整地看見呢個人.
最近一集訪問詹瑞文就係一個好好嘅例子.睇呢集之前其實我唔係十分喜歡詹瑞文.覺得佢啲戲同埋個人都唔係我杯茶.覺得佢份人有啲恃才傲物.但睇完佢嘅24/7 Talk對佢簡直完全改觀.同我想象中嘅詹瑞文完全唔同.原來佢謙虛好學.原來佢可為自己嘅熱愛不顧一切.從呢個訪問中.我吸取到佢嘅魅力.
除了詹瑞文這集.我尤其喜歡鄭保瑞導演以及大飛陳匡榮這兩集.兩位大情大性的人在節目中完全放開去講述自己的人生故事.餘韻十足.實在過癮.
同埋我要強力推薦比較少人睇嘅一集.Episode 90.佢哋請咗一位情趣用品店店主vera上節目和大家分享性教育的重要性.雖然得一個鐘.但十分十分高質.呢集所帶出嘅價值觀相當值得每一個人去聆聽及了解.
宜家好多觀點好多社交平台都推崇每個人要以「自己」行先.「我」就係最重要.將每一個「自我」都推到好大.咁其實某程度上會令到自己睇少咗好多觀點.學少咗好多嘢.
2015年嘅電影《Creed》入面.一代拳王Rocky擔任Creed的教練.小夥子年少氣盛.看不起訓練對手的時候.Rocky這樣跟他說:
You can't learn anything when you're talking.
想要學習.我們需要閉嘴.靜靜地聽.靜靜地吸收.這是需要耐性的.而睇訪問時呢份沉下心去了解一個人嘅耐性其實真係好緊要.當我哋都係通過新聞媒體或自媒體去接收某個人嘅資訊.好容易會從某件事某個觀點便輕易地定義一個人.但其實每個人都是獨特的.都不能被三言兩語所定義.與其睇第三者報道一件八卦事件.倒不如嘗試去聽他自己聲音.
看這些訪談節目.我經常提醒自己.不止要去看那些自己認識的人.更要去看那些不認識的人.三人行必有我師.別輕視每一個人.這樣才能去拓寬眼界.去認識每一個觀點.未必需要認同每一個人.但不妨嘗試去確切地看見每一個人.
上文提到的24/7TALK: Episode 90.vera喺節目途中她講了一句令我醍醐灌頂的說話.
我作為座右銘一直袋住到今時今日.
佢話.
「你嘅正常係你嘅正常
唔好用你自己嘅正常去定義人哋正唔正常」
世界已經如此荒誕
誰又去決定誰正常
每個人都覺得自己是獨特的.
每個人其實都是怪人.
但每個怪人.其實也很美.
親愛的
不著急.慢慢地.仔細地
去看見
每個人的怪
去感受
每個怪的人
有咩心事 不妨掃碼同我講
night night
