近排loop緊呢啲歌
2024.8.8
禮拜四
因為我份人一向習慣寫水蛇春咁長嘅一篇文嚟分享一首歌.咁但係講真唔係每首歌都令我有衝動寫長篇推送.而且就算係寫長篇.我呢啲龜速寫作都唔知幾耐先出到一篇.咁但係有好多歌我都好鐘意喔.寫唔切.咁點辦啊.
於是乎就有咗「近排loop緊呢啲歌」呢個欄目.
唔定時 抽起條筋就出一期
每次用極短嘅篇幅分享幾首
近排我鐘意嘅、循環播放緊嘅廣東歌
(未必全部都係新歌嚟㗎)
講完
去歌
Let go
主唱: Nancy Kwai
曲:齊樂平 / 甄敏延
詞:甄敏延
編:Patrick Yip
監：徐浩
開篇梗係要係Nancy啦.十分驚喜.睇歌名以為係首英文歌.點知係一首好入耳嘅廣東失戀情歌.就算撇除粉絲濾鏡.我覺得呢首歌都可以入我嘅年度榜單.但當然啦.因為係Nancy嘅歌.對我嚟講.難免私心加上幾粒星嘅.
Filter
主唱:Ragpickers
曲：Soothe
詞：Soothe, Kmicgor
編：Ragpickers
監:Soothe
Ragpickers中文名叫拾荒者.係成立於2020年.由六人組成嘅一支香港樂隊.宜家暫時可能冇乜人認識佢哋.我都係偶然機會下先聽到呢首歌.但係初聽已經鐘意.所以想借呢個機會推一推呢首歌.
神愛世人
主唱:鄧小巧
曲：林宥嘉
詞：陳銘洋 / 林宥嘉
編：Perry Lau
監：林家謙
小巧今年前兩首派台歌《白髮齊眉》以及《討好式戀愛》都十分出色.今次新歌《神愛世人》更驚喜地在作曲以及作詞一欄見到林宥嘉的名字.加上監製小林.整個就是「瑪莉晚安了」的班底.由小巧的聲音帶出整個故事.更令人倍感暖意.
致陪伴我的
唱:梁釗峰
曲:Kudos Lam
詞:Kudos Lam
編:Kudos Lam/ 蘇道哲
監:蘇道哲
曲詞來自年輕音樂人Kudos Lam.佢自己亦有在社交平台上傳自己唱cover的影片.早在2021年.胡鴻鈞的《今天不營業》便採用了當時年僅17歲的Kudos Lam所編寫的旋律.
聽之前冇乜大期待.因為釗峰近幾年出嘅歌真係冇乜邊首可以令我特別鐘意.但呢首返璞歸真嘅作品反而一聽就鐘意.簡單不過分用力的演繹更令聽者感到溫柔舒適.
五瓣玫瑰
唱:陳蕾
曲:陳蕾
詞:陳蕾
編:Perry Lau / Adrian Chan
監:Adrian Chan
我好鐘意好鐘意好鐘意呢首歌.真係一聽就能置身捷克小鎮之中.
歌名源於捷克小城鎮捷克庫倫洛夫的一個傳統節日-「五瓣玫瑰節」.陳蕾早於2018年歐遊捷克的時候偶然遇上這個節日.不久後已經寫好demo.一直想返回庫倫洛夫當地拍mv.但由於疫症原因未能成行.一等就是五年.終於在這個夏天.等來五瓣玫瑰的盛放.
由於前兩張專輯中豹哥的大部分作品都實在有那麼一點兒沉重.突然推出這麼一首如此歡樂玩味十足的作品.反差感十足.對我個人而言確實相當受落.
信我信你
唱:小肥
曲:方皓玟
詞:Oscar Lee
編:Ariel Lai
監: 許創基 Jeffrey Hui
首歌好聽.由演唱會片段剪輯而成的MV都好好睇.萬語千言不知怎說.在越發收窄的空間內.在難以承受的規條中.還能相信善良的人.還能堅持綻放的個體.那光芒.實在太過美艷.很多東西改變不了.世界更不會變好.但總不能停止相信.總不能停止盼望.只能由衷的盼望人類更好 並感激所有遇見
聆聽世界這分鐘
唱:許廷鏗
曲:吳林峰 詞:許廷鏗
編:黃兆銘 監:周錫漢
忘記了世界這分鐘.用來聆聽世界這分鐘.吳林峰極佳的一份旋律.許廷鏗親自寫上歌詞.形成一幅心靈畫卷.寄語那些分散各地的可愛人兒.面對畏懼與不安.面對困難與挑戰.不管幾多歲 都請堅守你絕對.
DRUNK DIAL
唱:AGA 江海迦
曲：AGA 江海迦
詞：許弘毅
編：Johnny Yim
監：AGA / 舒文@Zoo Music
前排那邊廂Zpecial出咗首「Drunk Call」.這邊廂AGA就整首「DRUNK DIAL」.兩首雖然唔同風格.但都係講飲醉酒打俾心上人胡亂說出心底話的境況.同埋都係勁好聽嘅.
夜闌人靜.孤身一人.醉意漸濃.鼓起勇氣撥通那個永遠不能忘懷的號碼.接通一次.哪怕一次.聽你的聲音.最後一次.便心息了.
拜託
唱: 洪嘉豪
曲：Larry Wong
詞：陳詠謙
編：Johnny Yim
監：AGA / 舒文@Zoo Music
紅館演唱會後第一首派台歌.據嘉豪自己話.呢首歌嘅旋律曲風感覺係介乎喺台灣與韓國之間.而作為一首失戀情歌.這首歌也足夠入耳.歌詞講述分手後混亂迷惘的階段.陳詠謙的詞夠寫實.傷痛時就是會有那麼一段時候.渴望.渴望放縱.渴望拋開一切.置身半夢半醉之間.
新牌仔
主唱:Gin Lee
曲:Gin Lee/馮允謙/陳考威/黃兆銘
詞:黃偉文
編:黃兆銘
監:Gin Lee/陳考威
戀愛需要實踐.需要從一次又一次經驗中累積教訓.用更好的自己來面對下一段關係.這可能需要很漫長很漫長的時光.戀愛某程度上如同學車.即便考到車牌.貼上新手標誌開上路面.無論多麼小心翼翼.亦難免遇上大大小小的碰撞.只要還能重新上路.那麼前面的皆是釀酒的過程.終有一天.經驗豐富的司機.能在愛人的懷抱裡.品嘗最美妙的那杯酒.
p.s.唔知人有冇同我一樣.聽呢首歌頭三個字之後係會自動自覺哼出「神情確威武」?如果係嘅話你嘅年紀應該都有翻咁上下.
一人之下
主唱:雷深如 J.Arie
曲:雷深如 J.Arie
詞:梁栢堅
編:Perry Lau
監:Perry Lau / 雷深如 J.Arie
好甜啊呢首歌!!!又係一聽就鐘意嘅歌啊!!梁栢堅嘅歌詞塑造了一個萬人之上一人之下嘅女皇形象.只要我愛你.我願意退後一步.無條件為你洗手作羹湯.從初見便愛上你.一直互相守護.直至彩蛋亮起.
解咒說明書
主唱:麗英
曲:Matt Chow
詞:Oscar
編:Dick Wong
監:周錫漢
你喜歡食牛肉.
你喜歡玩模型.
你喜歡夜瞓
你喜歡打機
你喜歡著牛仔褲
就算今日你離開了這麼久.那些你喜歡的.如今也圍繞在我的四周.我習慣去迎合你的習慣.跟你在一起這些年.我逐漸變成了另一個你.所以當你離開之後.我猶如中了毒咒.無法解脫.即管你留下陳年風褸.我亦不懂如何解咒.這一次.有了這說明書.試試.能否將這份愛.專注在自己身上.
外星少女失語症
主唱:sica
曲:周錫漢
詞:Oscar
編:Ariel Lai
監:周錫漢
我個人十分睇好sica.可愛聲甜.性格仲癲癲喪喪.出咗五首歌.首首都係水准以上嘅作品.呢次oscar為性格行為出名怪誕嘅sica度身定做新歌.寫出這位「外星少女」的心聲.大癲大肺的外表下.其實是一顆敏感的心.正如歌詞所言.不用理解我.只是我很寂寞 要取暖
不理痛
主唱:Zpecial
曲:康聰@Zpecial /
Waiyin@Zpecial
詞:陳詠謙
編:Zpecial / 賴映彤
監:賴映彤
近排身邊人入坑Zpecial.還特地搶購了八月尾的音樂會門票.因而近段時間也要好好惡補一下Zpecial.新歌舊歌都要loop.
歌名食字著名止痛藥「必理痛」.同上文中提及的《拜託》一樣.歌詞同樣來自陳詠謙.同樣又是一首失戀情歌.又是講述沉溺痛楚時的自然反應.
分手的痛沒有一種特效藥能止痛.只能任由心繼續被刀割破.讓疼痛繼續在腦內翻騰.讓你的幻象.一再重現眼前.
有咩心事 不妨掃碼同我講
night night
