སྤྱི་ཚེས་8ཉིན་སི་རི་ཡའི་ངོ་རྒོལ་ཤོག་ཁག་གི་དྲག་ཆས་པ་རྒྱལ་ས་ཏ་མ་སི་ཁུར་འཛུལ་བ་དང་། ཏ་མ་སི་ཁུ་བཅིངས་འགྲོལ་བཏང་བ་མ་ཟད་ཨ་ས་ཏེ་སྲིད་དབང་མགོ་རྟིང་བསློགས་ཡོད་ཅེས་ཁྱབ་བསྒྲགས་བྱས་འདུག ངོ་རྒོལ་ཤོག་ཁག་ཧྲ་མུ་བཅིངས་འགྲོལ་སྒྲིག་འཛུགས་ཀྱི་འགོ་ཁྲིད་ཨབ•མུ་ཧན་མུ་ཏེ•ཀྲུའུ་ལ་ཉི་ཡིས་ཚེས་8ཉིན་གྱི་དགོང་མོ་ཏ་མ་སི་ཁུའི་དབྱི་སེ་ལན་ཆོས་ཁང་ཞིག་ནང་གཏམ་བཤད་སྤེལ་ཡོད། ཨུ་རུ་སུའི་ཕྱི་འབྲེལ་པུས་ཉིན་དེར་གསལ་བསྒྲགས་སྤེལ་ནས། པ་ཧྲར་ཨ་ས་ཏེས་སི་རི་ཡའི་མངའ་ཁོངས་ནང་གི་དྲག་པོའི་གདོང་ཐུག་ཕྱོགས་ཁག་དང་དབྱེན་འབྱེད་གྲོས་མོལ་བྱས་པ་མ་ཟད་དབང་ཆ་ཞི་བའི་ངང་རྩིས་སྤྲོད་བྱེད་པའི་མཛུབ་སྟོན་བྱས་རྗེས། པ་ཧྲར་ཨ་ས་ཏེ་ཡིས་སི་རི་ཡའི་ཙུང་ཐུང་གི་འགན་གནས་ནས་དགོངས་ཞུ་བྱ་རྒྱུ་མ་ཟད་སི་རི་ཡ་ནས་ཁ་བྲལ་རྒྱུའི་ཐག་བཅད་ཡོད་ཅེས་བརྗོད་འདུག ཐ་སེ་གསར་འགྱུར་ཁང་གིས་ཚེས་8ཉིན་གྱི་དགོང་མོ་གསར་འགྱུར་སྤེལ་ནས། ཨ་ས་ཏེ་དང་ཁོང་གི་ཁྱིམ་མི་ཨུ་རུ་སུའི་རྒྱལ་ས་མོ་སེ་ཁོར་འབྱོར་ཟིན་པ་དང་། མི་ཆོས་རིང་ལུགས་ཐོག་ནས་བསམ་གཞིགས་བྱས་ཏེ། ཨུ་རུ་སུས་ཁོང་ལ་སྲུང་སྐྱོབ་བྱ་རྒྱུ་ཡིན་ཞེས་བརྗོད་འདུག
སྤྱི་ཁྱབ་ལས་ཁུངས་ཀྱི་གསར་འགོད་པར་སྤྱི་ཚེས་8ཉིན་ཤེས་རྟོགས་བྱུང་བར། དབྱི་སི་རལ་མཁའ་དམག་གིས་ཉིན་དེར་སི་རི་ཡར་འཇབ་རྒོལ་ཐེངས་མང་བྱས་པ་དང་། དེ་ནི་གཙོ་བོ་ནི་ཨ་ས་ཏེ་སྲིད་དབང་མགོ་རྟིང་བསློགས་རྗེས་དབྱི་སི་རལ་གྱི་དགྲ་བོར་རགས་བཟོ་ཡོད་པའི་འཐབ་ཇུས་གོ་མཚོན་མེད་པ་བཟོ་ཆེད་ཡིན་པ་རེད།
ཚེས་8ཉིན་དབྱི་རན་གྱི་ཕྱི་འབྲེལ་པུས། སི་རི་ཡའི་འབྱུང་འགྱུར་ནི་ཡོངས་སུ་རྒྱལ་ཁབ་དེའི་མི་དམངས་ནས་འགན་འཁུར་དགོས་པ་ཞིག་ཡིན་པས། ཕྱི་ཕྱོགས་སྟོབས་ཤུགས་ནས་གཏོར་བཤིག་གཏོང་བ་དང་ཐེ་ཇུས་བྱེད་དགོས་དོན་མེད་ཅེས་ནན་བཤད་བྱས་འདུག ཐུར་ཁེའི་ཕྱི་འབྲེལ་པུའུ་ཀྲང་ཧྥེ་ཏན་གྱིས། ཐུར་ཁེས་འབྲེལ་ཡོད་ཕྱོགས་ཁག་དང་མཉམ་ལས་བྱས་ནས་སི་རི་ཡ་བསྐྱར་འཛུགས་བྱ་རྒྱུར་རོགས་རམ་བྱ་རྒྱུ་དང་། འཇིགས་སྐུལ་སྒྲིག་འཛུགས་ལ་མིག་སྔའི་གནས་བབ་བེད་སྤྱོད་བྱེད་དུ་གཏན་ནས་འཇུག་མི་རུང་ཅེས་བརྗོད་འདུག ཨ་རིའི་རྒྱལ་སྲུང་པུའི་དཔོན་རིགས་ཀྱིས། ཨ་རིས་སི་རི་ཡའི་ཤར་རྒྱུད་དུ་དམག་དོན་བཀོད་སྒྲིག་བྱས་པ་དེ་མུ་མཐུད་རྒྱུན་འཁྱོངས་བྱ་རྒྱུ་ཡིན་ཞེས་བརྗོད་འདུག
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།
