གསར་འགོད་པས་ཀྲུང་གོ་མི་དམངས་དངུལ་ཁང་བོད་རང་སྐྱོང་ལྗོངས་ཡན་ལག་དངུལ་ཁང་ནས་ཤེས་རྟོགས་བྱས་པར། ཀྲུང་གོ་མི་དམངས་དངུལ་ཁང་སྡོད་ཁང་གི་དངུལ་བུན་སྐྱེད་ཚད་སྐོར་གྱི་འབྲེལ་ཡོད་བླང་བྱ་གཞིར་བཟུང་། བོད་རང་སྐྱོང་ལྗོངས་ཀྱི་སྐྱེད་ཚད་གཏན་འཁེལ་གྱི་ལམ་སྲོལ་མཐའ་འཁྱོངས་དང་། བོད་ཀྱི་དམིགས་བསལ་གཟིགས་སྐྱོང་དངུལ་རྩའི་སྲིད་ཇུས་ཀྱི་དོན་དངོས་དང་ཟུང་འབྲེལ་གྱིས་དངུལ་བུན་གྱི་སྐྱེད་ཚད་མི་འདྲ་བའི་འབྲེལ་བར་ལྟ་རྟོག་བྱས་ཏེ་ཚན་པ་ཁག་གིས་གྲོས་མོལ་བྱས་ནས། ༢༠༢༤ལོའི་ཟླ་༡༠ཚེས་༣༡ཉིན་གྱི་གོང་དུ་ཆ་རྐྱེན་དང་མཐུན་པའི་གྱི་མི་སྒེར་གྱི་སྡོད་ཁང་གི་དངུལ་བུན་སྐྱེད་ཚད་ལ་ལེགས་སྒྲིག་བྱ་རྩིས་ཡོད་པ་རེད།
ཐོག་མར་སྤྲོད་པའི་བསྡུར་ཚད་ཇི་ལྟར་སྙོམ་སྒྲིག་བྱེད་དགོས་པའི་སྐོར་ལ་མི་དམངས་དངུལ་ཁང་བོད་ལྗོངས་ཡན་ལག་དངུལ་ཁང་སྲིད་ཇུས་ཁྲུའི་ཁྲུའུ་ཀྲང་དབྱང་ཕུའུ་པིན་གྱིས་གསལ་འགྲེལ་འདི་ལྟར་བྱས་འདུག
གྲོང་མིའི་སྡོད་ཁང་གི་དགོས་མཁོར་སྐོང་ཆེད། མི་སྒེར་གྱི་སྡོད་ཁང་དངུལ་བུན་དེ་ཁང་པ་ཉོ་ཐེངས་དང་པོ་དང་ཉོ་ཐེངས་གཉིས་པ་ཡིན་མིན་དབྱེ་བ་མི་འབྱེད་པར་ཐོག་མའི་དངུལ་འཇལ་གྱི་བསྡུར་ཚད་དམའ་ཤོས་དེ་བརྒྱ་ཆ་༡༥གཅིག་གྱུར་ཐོག་གཏན་འཁེལ་བྱ་རྒྱུ་དང་། ཚོང་ལས་དངུལ་ཁང་གིས་དངུལ་འཇལ་མཁན་དང་གྲོས་མོལ་བྱས་ནས་ཞིབ་ཕྲའི་ཐོག་མའི་འཇལ་དངུལ་གཏན་འཁེལ་བྱ་རྒྱུ་ཡིན་པ་རེད། བརྒྱ་ཆ་༡༥ནི་ཆེས་དམའ་བའི་ཐོག་མའི་འཇལ་དངུལ་ཅིག་ཡིན་ལ། ཐོག་མའི་འཇལ་དངུལ་དེ་གནས་ཚུལ་མི་འདྲ་བར་གཞིགས་ནས་འགྱུར་བ་འགྲོ་སྲིད།
སྡོད་ཁང་དངུལ་བུན་གྱི་སྐྱེད་ཀ་ཇེ་དམའ་རུ་གཏོང་དགོས། ཁང་པ་མང་པོ་ཡོད་མཁན་ཚོའི་སྐྱེད་ཀ་དེ་བོད་ཀྱི་གཟིགས་སྐྱོང་དངུལ་བུན་གྱི་སྐྱེད་ཀའི་ཚད་ལ་གཅིག་གྱུར་ལེགས་སྒྲིག་བྱེད་རྒྱུ།
སྲིད་ཇུས་གསར་པ་དེ་བཏོན་རྗེས། དེ་སྔའི་སྲིད་ཇུས་ནང་གི་མི་སྒེར་གྱི་སྡོད་ཁང་གི་དངུལ་བུན་གྱི་སྐྱེད་ཚད་དམའ་ཤོས་དེ་མེད་པ་བཟོ་རྒྱུ་དང་། བོད་ཀྱིས་སྡོད་ཁང་དངུལ་བུན་དེ་བོད་ཀྱི་གཟིགས་སྐྱོང་དངུལ་བུན་གྱི་སྐྱེད་ཚད་ལྟར་གཅིག་གྱུར་ཐོག་ལག་བསྟར་བྱ་རྒྱུ་ཡིན་པ་རེད། བོད་རང་སྐྱོང་ལྗོངས་ཀྱི་སྐྱེད་ཚད་གཏན་འཁེལ་བྱས་པ་དེ་ཟླ་༡༠ཚེས་༡༤ཉིན་ཁྱབ་བསྒྲགས་བྱས་ནས་སྲིད་ཇུས་གསར་པ་ལྟར་ལས་བསྟར་བྱ་རྒྱུ་ཡིན། དེས་ཉུང་མཐར་ཡང་རང་ལྗོངས་ཀྱི་ཁྱིམ་ཚང་ཁྲི་༡.༧ལ་ཕན་པ་ཐོབ་རྒྱུ་ཡིན་པ་དང་། ལོ་རེར་ཁྱིམ་ཚང་གི་སྐྱེད་ཀའི་གཏོང་སྒོ་ཧ་ལམ་ཆ་སྙོམས་ཐོག་སྒོར་ཁྲི་༡༩༠༥ཉུང་དུ་འགྲོ་རྒྱུ་རེད། ས་ཁང་ཐོན་ལས་དང་དངུལ་ཁང་སོགས་ནས་ཀྱང་སྲིད་ཇུས་གསར་པའི་ནང་བཀོད་པའི་དུས་ཚོད་བཞིན་ལག་བསྟར་བྱ་དགོས། དེ་བཞིན་དངུལ་བུན་གྱི་འབྲེལ་ཡོད་སྲིད་ཇུས་ཀྱི་སྤྱོད་གོ་ཆོད་ཡུན་༢༠༢༦ལོའི་ཟླ་༡༢ཚེས་༣༡ཉིན་བར་ནར་འགྱངས་བྱ་རྒྱུ་ཡིན་པ་རེད།
དབྱང་ཕུའུ་པིན་གྱིས་ཁང་པའི་དངུལ་བུན་གྱི་སྐྱེད་ཀ་མར་ཆག་པ་དེ་ནི་དོན་ངོ་མའི་གཏམ་བཟང་ཞིག་ཡིན་པ་དང་། དེས་ཁང་པ་ཉོ་མཁན་ཚོའི་ཁུར་པོ་ཡང་དུ་གཏོང་ཐུབ་ལ། ཟླ་རེར་མར་ཆག་པའི་སྐྱེད་ཀ་དེ་ཚོ་ཚང་མ་བསྡོམས་ན་མ་མཐར་ཡང་སྒོར་ཁྲི་ཡན་གྲོན་ཆུང་ཐུབ་ཀྱི་ཡོད་པས་དངོས་གནས་སྲིད་ཇུས་བཟང་པོ་ཞིག་རེད།
སྡོད་ཁང་གི་གནད་དོན་ནི་སྔ་ཕྱི་བར་གསུམ་དུ་གནད་དོན་གལ་ཆེན་ཞིག་ཡིན་པ་དང་། སྐྱེད་ཀ་དམའ་རུ་བཏང་བ་དེས་དེ་བས་མང་བའི་གྲོང་མིས་ཁང་པ་ཉོ་བའི་འཆར་གཞིར་ཕན་པ་བསྐྲུན་ཡོད་ལ། ཁང་པ་ཉོས་ན་རིམ་བཞིན་ཁྱིམ་ཆས་དང་ཁྱིམ་སྤྱོད་གློག་ཆས་སོགས་འཛད་སྤྱོད་བྱེད་ཀྱི་ཡོད་པས། འབྲེལ་ཡོད་ཐོན་ལས་འཕེལ་རྒྱས་དང་དཔལ་འབྱོར་འཕེལ་རྒྱས་འགྲོ་རྒྱུར་ཡང་སྐུལ་འདེད་བྱེད་ཀྱི་ཡོད།དངུལ་རྩའི་ཁྲོམ་རའི་ངོས་ནས་བལྟས་ན། སྐྱེད་ཚད་དམའ་རུ་གཏོང་བའི་སྲིད་ཇུས་ཀྱིས་ཕྱོགས་གཅིག་ནས་དངུལ་རྩའི་ཐོན་ཁུངས་བཀོད་སྒྲིག་ལེགས་སུ་གཏོང་བར་ཕན་ཐོགས་ཡོད། གྲོང་ཁྱེར་འཕེལ་རྒྱས་ཐོག་ནས་བལྟས་ན། སྐྱེད་ཀ་དམའ་རུ་གཏོང་བའི་སྲིད་ཇུས་དེས་གྲོང་ཁྱེར་གྱི་མི་འབོར་གྲུབ་ཆ་དང་ཐོན་ཁུངས་བཀོད་སྒྲིག་ལེགས་སུ་གཏོང་རྒྱུར་ཕན་ཐོགས་ཡོད། ཁང་པའི་དངུལ་བུན་གྱི་སྐྱེད་ཀ་དམའ་རུ་གཏོང་བའི་སྲིད་ཇུས་ཀྱིས་བོད་ཀྱི་དཔལ་འབྱོར་འཕེལ་རྒྱས་འགྲོ་བ་དང་། དམངས་འཚོ། ས་ཁང་ཐོན་ལས་ཁྲོམ་ར་བཅས་ལ་ཕན་པ་ཆེན་པོ་སྐྲུན་ཡོད་ལ། སྲིད་ཇུས་ལག་བསྟར་བྱེད་སྐབས་ང་ཚོས་ནུས་པ་འདོན་སྤེལ་གང་ལེགས་བྱས་ཏེ་བོད་ལྗོངས་དར་རྒྱས་གོང་འཕེལ་དང་མི་དམངས་ཀྱི་འཚོ་བ་ཡར་རྒྱས་འགྲོ་རྒྱུར་ནུས་པ་གང་ཡོད་འདོན་རྒྱུ་ཡིན་ཞེས་བརྗོད་ཡོད་པ་རེད།
བསྐྱར་ཞུས། རྒྱལ་མཚན།
ཞུ་དག ཚེ་རིང་རྒྱ་མཚོ།
རྩོམ་སྒྲིག་པ། བཀྲ་ཤིས་ཚེ་རིང་།
ཡིག་སྒྱུར། བཀྲ་ཤིས་ཚེ་རིང་།
སྒྲ་འཇུག སྐལ་བཟང་རྒྱལ་མཚན།
ཡོང་ཁུངས། སེམས་ཀྱི་ཞིང་ཁམས།
ཡིག་སྒམ་ཨང་གྲངས།
གལ་སྲིད་ཁྱེད་ལ་ཁུངས་བཙན་གྱི་གསར་འགྱུར་རམ་ཆ་འཕྲིན་ཆོབ་ཚ་པོ་དེ་འདྲ་ཡོད་ཚེ་ང་ཚོར་བསྐུར་རོགས་གནང་།
ང་ཚོའི་ཡིག་སྒམ་ནི་1132875981@qq.comཡིན།
རྩོམ་ཡིག་གཞིས་ཀ་རྩེའི་ཚགས་པར་ལས་ཁུངས་ཀྱི་ཡིག་སྒམ་rkzbszw@163.comལ་བསྐུར་རོགས་གནང་།
ང་ཚོའི་བརྙན་ཐུང་རྟགས་ཅན་日喀则广播电视台ཟེར་བར་དོ་ཁུར་གནང་ནས་ངོ་མཚར་ལྟད་མོར་གཟིགས་དང་།
