阿拉老底子每天呈送精彩文章一组
打开尘封的记忆，寻觅往昔的岁月
叙老底子事 忆老底子人
诉老底子情
作者：无为之人
讲述：施扣柱
文字、语音审核：丁迪蒙
编辑：王乙其
（一）
黄河路离新昌路老家勿远，小辰光就比较熟悉。过去伊就是条邪气平常个马路，90年代成为美食街之后，名气一记头响起来了。最近因为王家卫个电视剧《繁花》，迭条马路又重新成为了热点。
黄河路已经存在一百三四十年历史了，南北向个。最早叫东台路，路并勿长，还勿到现在个北京西路。因为路个南面开了第三跑马厅，也就是现在个人民公园、人民广场一圈，外国人欢喜拿跑马厅叫花园，所以就拿正对跑马厅个东台路改做花园路，英文是Park Road。国际饭店个英文名Park Hotel，就来自迭个路名。迭种弄法勒迭个之前也发生过。勒英租界也局限勒今朝个河南中路东面个辰光，迭个地方造了第一只跑马厅，从外滩通向跑马厅个迭条小路就叫花园弄，英文名Park Lane，上海人叫伊派克弄。后来，派克弄发展成大马路，再后来就是南京路了。
1943年，派克路改为黄河路。1949年之后搿搭个卡尔登大戏院、卡尔登公寓分别改为长江剧场、长江公寓，还有稍微北面么有只长江理发店，侪应该是从黄河路搿个名字浪向得到启发个。因为长江黄河、黄河长江，本来就是中华民族勿可分割个起源。
一百多年前头，北京西路两旁边还是一片田园风光。而派克路则向北面拓展，越过现在个北京西路、新闸路，一直到了苏州河个南面。
紧靠勒苏州河个是南苏州路，距离新闸路只有二三十米。老早子路口东北角有一只凤鸣台茶社，可以听评弹个。80年代以后曾经重开过一段辰光，现在搿搭叫长新大楼。
凤鸣台对过有块老小个“三角地”。因为搿搭除脱新闸路、黄河路十字交叉，还有条酱园弄斜插过来，并且同新闸路交汇，形成一块小来西个“三角地”。有意思个是，迭个“三角地”上头造了只公共厕所，勒1939年个地图浪迭个厕所就有了，直到90年代搿搭造地铁车站再拆脱个。否则么，也可能会成为“百年公共厕所”。
之所以叫酱园弄么，是因为勒新闸路靠近黄河路个地方有一爿蛮大个酱园，全名叫“张振新官酱园”。啥叫“官酱园”？就是经过官方批准开业个酱园。虽然酱园弄勒新昌路搭黄河路侪有出口，但是讲伊是新昌路酱园弄并勿十分确切。因为“张振新”勒靠近黄河路个地方，酱园弄主要还应该是黄河路个。搿只酱园，我印象比较模糊，主要是伊后来么变成功黄浦区十六粮店。当时多数米店还卖油酱个，伊应该也勿例外。
米店个东面有长沙路派出所，还有粮管站。粮管站应该搭米店勒一道个。米店个西面有点心店，专门卖汤团，叫做振兴点心店，勿晓得搿个店名是否来自“张振新”？蛮难讲个。
（二）
点心店隔壁有条斜弄堂叫裕庆里，是弹格路。弄堂里向有座“万佛庵”，小辰光阿娘经常带我去烧香拜佛，伊双手合一，默默念经，我勒伊旁边勿响。我看起来佛殿里侪是“女和尚”，伊拉敲鼓，诵经，绕仔佛像转圈，后来再晓得伊拉侪是尼姑。
酱园弄黄河路角子浪，蹲勒个大学老师，女个，瘦来西个，长得蛮长个，伊只比阿拉大五六岁。有年放暑假我经过搿搭，突然看到伊搭男朋友一道走道伊屋里向，我快点走过去，常怕拔伊拉看到。酱园弄发生过詹周氏“杀夫大案”，杀人个地方就勒伊拉隔壁头。最近要拍迭只个电影，只好到乍浦路去搭景。因为廿年前头，酱园弄拨推平了，造了几幢板式高层，叫金色家园，样子邪气平庸。
酱园弄南面角子浪是黄河路小学，乒乓名将张燮林勒迭搭读过书，伊就蹲勒隔壁个温州路。新闸路温州路口有家黄浦缸坛店，门口经常倒放仔勿少腌咸菜个大缸。传说张燮林小辰光就是勒迭眼缸浪，搁块汏衣裳板打球个。
现在个金色家园东南角，青岛路口是邮政储蓄银行搭仔“农工商”，老底子是小有名气个明星大戏院，因为徐玉兰、王文娟勒此地唱过越剧。我老小个辰光看过电影《孙悟空三打白骨精》，后来晓得伊是绍剧。1966年之后，明星大戏院变成功了运输公司会场，后来又改名为交运俱乐部，就像四川路个邮电俱乐部，专门放内部电影或者开大会。1992年辰光，我曾经勒迭搭讲过一趟课，却没想到第二年迭搭个黄河路会得发生“繁花”搭仔“宝总”个故事。
明星大戏院算是邪气幸运个，因为拍电影《舞台姐妹》，当年个样子还留下来了。伊迭只电影是1964年拍个，青岛路封脱，大大拿我举起来，我远远叫看到黄河路伊面有人勒拿扇子扇一只搁勒架子浪个火盆，大概是为了制造烟雾效果伐，现场烟雾腾腾，日里向还用老大个灯打光。
大戏院个对过老早子是爿占路个合作食堂，卖大饼油条豆腐浆，还有粢饭馒头阳春面，后来勿晓得哪能没了，迭个地方有抢做过16路终点站。往南走一直到北京西路，除脱一眼老小个小菜场、米店、烟纸店，就没啥个了。路西是承兴里、苏州里、爱仁里等弄堂。路个东面是福海里，70年代造了市中心蛮少见个工房——福海小区，现在也是动迁范围，老早就人去楼空了。
过脱北京西路，黄河路再稍微闹猛眼。路两旁边零星开勒点饮食店、百货店、棉席店、烟酒店、糖果店，比较像样个有靠近北京西路个长江理发店，协和里对过个黄河文具店。文具店门前还有个64路终点站，从黄河路到南码头。迭个64路搭现在个64路勿一样个。
转自：“海上梦叠”公众号
无为之人先生热文
▶坚守
▶奶奶借书
▶冻疮
我知道你在看哟~
