སོ་ན་བའི་ནད་ཀྱི་རྒྱུ་རྐྱེན་དང་བཅོས་ཐབས།
སྤྱིར་མིའི་སོ་གྲངས་ནི་མདུན་སོ་བརྒྱད་དང་མཆེ་བ་བཞི། འགྲམ་སོ་ཉི་ཤུ་བཅས་བསྡོམས་པས་སོ་གྲངས་སུམ་ཅུ་སོ་གཉིས་ཡོད། རྒྱུ་རྐྱེན་སྣ་ཚོགས་ཀྱི་དབང་གིས་ནད་གང་རུང་ཞིག་ལ་འགྱུར་བ་ནི་རྒྱུན་མཐོང་གི་ནད་ཅིག་རེད།
༡རྒྱུ་རྐྱེན་དང་ནད་རྟགས།
རྒྱུ་རྐྱེན་གཙོ་བོ་ནི་ཟས་སྐོམ་ཚ་སྐྱུར་མངར་བའི་རིགས་བསྟེན་དྲགས་པའི་དབང་གིས་ནད་འདི་བྱུང་བ་ཡིན། དེའི་རྟགས་སུ་ཐོག་མར་སོ་ན་བའི་དུས་ཟས་སྐོམ་ཚ་བ་དང་གྲང་མོ། སྐྱུར་བ། མངར་བའི་རིགས་ཟོས་ན་ལྷག་པར་གནོད་ཅིང་གཟེར་བ་དང་། ཡང་ན་སྐབས་རེར་སློང་རྐྱེན་གསལ་བོ་མེད་པར་སོ་ལ་ན་ཟུག་ཆེན་པོ་སྐྱེ་བ་དང་། སྐབས་རེར་ཉིན་མོར་ན་ཟུག་མེད་ལ་མཚན་མོའི་དུས་སུ་ལྷག་པར་གཟེར་བ་བཅས་དང་། དེ་བཞིན་ནད་གཞི་ཇེ་སྡུག་ལ་འགྲོ་བའི་སྐབས་སོའི་ན་ཟུག་ཆེ་ཞིང་ན་བའི་དུས་ཚོད་རིང་ལ་ཐེངས་མང་དུ་འགྲོ་བ་དང་སྦྲགས་འགྲམ་པ་དང་སོ་གནས་མཉམ་དུ་གཟེར་བ་བཅས་ཀྱི་སྐབས་སུ་ནད་པ་རང་ཉིད་ཀྱིས་ན་བའི་སོ་དེ་གང་ཡིན་མིན་གསོལ་བོ་སྟོན་ཐུབ་ཀྱིན་མེད།
༢གསོ་བཅོས་བྱེད་ཐབས།
སོ་ན་བའི་དུས་སུ་སྔོན་ལ་ཆུ་དྲོ་འཇམ་གྱིས་ཁ་བཀྲུ་བ་དང་། དེ་རྗེས་སྲིང་བལ་དང་བལ་གཙང་མ་གང་རུང་ཞིག་གི་ཐོག་གཡེར་མའི་ཕྱེ་མ་ཏོག་ཙམ་བྱུགས་ཏེ་སོ་སྲིན་གྱིས་ཟོས་པའི་ཁོག་སྟོང་དེའི་ནང་འཇོག་པ་དང་། ཡང་ན་ཕྱི་ལུགས་སོ་སྲིན་གྱི་སྨན་དང་སོ་སྨན་ཡ་ཐུང་ཧྲུའེ།གང་རུང་ཞིག་སྲིང་བལ་སྟེང་བླུགས་ནས་འཇོག་དགོས། ཡང་ན་གླ་རྩི་དང་ཁྱུང་ལྔ་སོགས་གང་རུང་ཏོག་ཙམ་བཞག་ཚེ་དུས་ཡུན་ཐུང་ངུ་ཙམ་ལ་ན་ཟུག་དང་གཉན་ཁ་གཅོག་ཐུབ། སོ་རྙིང་སྐྲངས་པ་དང་རྣག་སོགས་བྱུང་ཚེ་སྨན་པའི་བསླབ་བྱ་ལྟར་གཉན་ཁ་གཅོག་པའི་སྨན་ཁབ་རྒྱག་པའམ་ཡང་ན་སྨན་ཁང་དུ་སོང་ནས་སྨན་བཅོས་བྱེད་དགོས།
