ཀུན་མཁྱེན་མི་ཕམ་རྒྱ་མཚོ་ལ་བསྟོད་པ་དད་པའི་གསོས་སྨན། | 麦彭仁波切赞美

乐活 2024-12-06 12:08 青海

ཀུན་མཁྱེན་མི་ཕམ་རྒྱ་མཚོ་ལ་བསྟོད་པ་དད་པའི་གསོས་སྨན།

ཆོས་རྗེ་ཡིད་བཞིན་ནོར་བུས་མཛད།

ཀུན་མཁྱེན་མི་ཕམ་སྐུ་འཁྲུངས་ནས་ལོ་འཁོར་179 ལོན་པའི་དུས་ཆེན་བསུ།

(1846-2024)

༡༽

རབ་འབྱམས་ཞིང་བཞུགས་སྲས་བཅས་རྒྱལ་ཀུན་གྱི། །

གསང་གསུམ་ཡོན་ཏན་གཅིག་ཏུ་སྤུངས་བའི་དཔྱིད། །

ཞིང་འདིའི་འགྲོ་ངོར་བཤེས་གཉེན་སྐུར་སྣང་བ། །

མི་ཕམ་རྒྱ་མཚོ་གཏན་གྱི་སྐྱབས་སུ་བསྙེན། །

༢༽

གང་གི་ཡོན་ཏན་ཟབ་ཡངས་ཆུ་གཏེར་ཁྱོན། །

ཚུར་མཐོང་ཀ་རྚའི་འདོམ་གྱིས་གཞལ་དཀའ་ཡང་། །

བདག་བློ་སྐྲ་རྩེའི་ཁྱོན་ལ་མཛའ་བའི་ཆབ། །

དད་གསུམ་ཆུ་སྐྱེས་གསོས་སུ་དེང་འདིར་ལེན། །

༣༽

ཉིད་སྐུ་ཕན་བདེ་བྱེ་བའི་ཟེར་འཕྲེང་ཅན། །

ལེགས་སྨོན་རྟ་བདུན་ཁྱོགས་ཀྱིས་ཉེར་དྲངས་ཚེ། །

འགྲོ་ཀུན་མོས་བློའི་རྫིང་བུ་དང་འཚམ་པར། །

འགོག་མེད་སྣང་ཡང་ཀུན་རྟོག་ཟུག་རྔུས་དབེན། །

༤༽

ནམ་མཁའ་སྲིད་དུ་དཔག་ཡས་ཞིང་རྣམས་སུ། །

འཕགས་དང་སོ་སྐྱེའི་གཟུགས་སུ་ཡོངས་བསྒྱུར་ཏེ། །

འགྲོ་མང་བྱང་ཆུབ་གསུམ་ལ་དཀྲི་མཛད་ཀྱང་། །

མི་ཁེངས་མི་ཞུམ་དམ་པ་སྤྱི་ཡི་ཚུལ། །

༥༽

རྡུལ་ཕྲན་ཁྱོན་ལ་རྡུལ་སྙེད་ཞིང་བཀོད་དེ། །

བསྐལ་མང་མཛད་པ་སྐད་ཅིག་ལ་སྟོན་ཡང་། །

ཞིང་དང་བསྐལ་པ་ཕྲ་བར་འཕོས་མིན་ཏེ། །

དབང་བསྒྱུར་སྟོབས་ལ་དབང་བའི་ཁྱད་ཆོས་ལགས། །

༦༽

མདོ་སྡགས་རིག་གཞུང་རྒྱ་མཚོའི་ཚིག་དོན་ལ། །

སྡུག་འབད་བརྩོན་པའི་ཁུར་གྱིས་ནོན་མིན་པར། །

སྙིང་དབུས་མི་ཤིགས་གཞོན་ནུའི་སྒོ་ཕྱེས་ཚེ། །

སྤོབས་བའི་གཏེར་ཆེན་བརྒྱད་ལ་མངའ་དབང་འབྱོར། །

༧༽

ཆུང་ངུའི་དུས་ནས་མཁྱེན་པའི་རྩལ་རྫོགས་ཏེ། །

རྩོད་འཆད་རྩོམ་པས་ཐུབ་བསྟན་གསལ་ནུས་པ། །

འཕགས་པའི་ཡུལ་ན་ཙཎྚ་གོ་མི་དང་། །

བསིལ་ལྗོངས་ཁྱོན་ན་འཇམ་མགོན་བླ་མ་ཙམ། །

༨༽

ཕས་རྒོལ་ལོག་རྟོག་བྲག་རི་དཔངས་མཐོ་བ། །

ལུང་རིགས་ཐོག་ཟེར་དབལ་གྱི་ཟུར་ཙམ་ཞིག །

ཕོག་པའི་མོད་ལ་འཕྲལ་དུ་གཏོར་མཛད་པ། །

འདྲེན་མཆོག་ཁྱོད་ནི་ཕྱོགས་གླང་ཡབ་སྲས་དངོས། །

༩༽

སྤྲོས་བྲལ་རིག་པའི་གནད་གསང་སྟོན་པ་ལ། །

གཞན་དྲིང་མི་འཇོག་སྨྲ་བའི་མཛད་ཚུལ་འདི། །

སྐྱབས་གཅིག་ཁྱེད་དང་འཕགས་མཆོག་ཀླུ་དབང་ལ། །

མཉམ་པར་དབང་བའི་སྤྱི་ནོར་ཡིན་ནོ་སྙམ། །

༡༠༽

རྒྱས་འབྲིང་བསྡུས་གསུམ་ཡུམ་གྱི་སྦས་དོན་གནད། །

དངོས་དོན་བརྒྱད་དང་བདུན་ཅུས་བཀྲལ་བ་ན། །

དགའ་ལྡན་ཞིང་བཞུགས་བྱམས་པ་མགོན་པོ་དང་། །

མགོན་ཁྱོད་སོ་སོར་འབྱེད་པའི་སྤུ་རིས་སྟོར། །

༡༡༽

འདུལ་མངོན་འདབ་སྟོང་གཞོན་ནུའི་སྦྲང་རྩིའི་བཅུད། །

རྣམ་དཔྱོད་རྐང་དྲུག་ཧུབ་ཀྱིས་གཞིབ་མཁས་པ། །

ཐོགས་མེད་སྐུ་མཆེད་ཡོན་ཤཱཀ་རྣམ་གཉིས་ཀྱི། །

གཙང་མའི་རྣམ་ཐར་ཁྱོད་ལ་དུས་གཅིག་དབང་། །

༡༢༽

མིག་མི་འཛུམ་པ་མཐུ་སྟོབས་བདག་པོ་ཟུང་། །

བསམ་བཞིན་ཞིང་འདིར་བྱོན་པའི་མཁས་དབང་གིས། །

ཁྱེད་གསུང་ནོར་བུའི་བྱི་དོར་ཁུར་བཞེས་ཚེ། །

སྙན་པའི་གཏམ་གྱིས་སྲིད་གསུམ་དོག་པོར་བྱས། །

༡༣༽

བཀའ་དང་བསྟན་བཅོས་ཇི་སྙེད་བཞུགས་ཀུན་གྱི། །

དགོངས་པའི་གནད་གསང་ཚང་ལ་མ་ནོར་བ། །

ཉུང་ངུའི་ངག་གིས་བདེ་བླག་སྟོན་པ་འདི། །

རླབས་ཆེན་ཐུགས་བསྐྱེད་སྨོན་པའི་རང་གཟུགས་ལགས། །

༡༤༽

ཟབ་རྒྱས་གསང་ཆེན་རྒྱུད་ལུང་འགྲེལ་བ་ལ། །

རྣམ་འདྲེན་བཞི་བས་བསྔགས་བརྗོད་མེ་ཏོག་འཐོར། །

རྒྱལ་ཀུན་བཀའ་ཡི་སྡུད་པོ་གསང་བའི་བདག །

བཤེས་གཉེན་ཟོལ་དུ་བསྒྱུར་བར་གོར་མ་ཆག །

༡༥༽

རིག་འཛིན་རྣམ་བརྒྱད་དགོངས་པའི་དབྱིག་འཛིན་གཞིར། །

ཟླུམ་པོར་འཁྱིལ་པ་སྨིན་གྲོལ་སྒྲུབ་སྡེའི་མཚོ། །

ཐར་འདོད་བློ་ཡི་ཞིང་སར་འདྲེན་མཁས་པ། །

མགོན་འདིའི་ཡོན་ཏན་བསམ་བཞིན་སྙིང་ནས་དད། །

༡༦༽

ནང་རྒྱུད་སྐོར་གསུམ་ཀཻ་ལ་ཤ་ཡི་མདངས། །

དྲི་བྲལ་ལུང་རིགས་ཉིན་བྱེད་སྣང་བ་ཡིས། །

གསལ་བྱེད་མཛེས་པའི་རྒྱན་གཅིག་འདི་འདྲ་བ། །

ད་སྡོན་ནོར་འཛིན་ཁྱོན་ན་དཀོན་མིན་ནམ། །

༡༧༽

ཟབ་གསལ་གཉིས་མེད་སྟོན་པའི་རྒྱུད་ཀྱི་དོན། །

གྲུབ་བརྒྱའི་སྤྱི་མེས་མཆོག་གི་མན་ངག་བཞིན། །

ཡང་གསང་སྙིང་ཐིག་ལམ་དུ་བཀྲལ་བའི་གཞུང་། །

ཐོས་པ་ཙམ་གྱིས་སྲིད་རྩ་ཧྲུལ་པོར་བྱེད། །

༡༨༽

གཟུངས་མཆོག་བརྒྱད་ལ་དབང་བ་རྗེ་ཁྱེད་ཀྱིས། །

ཚིག་གཅིག་དོན་ཡང་བསྐལ་མང་བརྗོད་བྱས་ཀྱང་། །

མི་བཟློག་ཟད་པ་མེད་པའི་རྣམ་ཐར་སྒོ། །

རིས་མེད་འགྲོ་བའི་མངོན་སུམ་དཔལ་དུ་བཞག །

༡༩༽

འཕགས་བོད་རྒྱ་ནག་ཤམ་བྷ་ལ་སོགས་ཀྱི། །

སྒྲ་རིགས་མཐའ་དག་ཐུགས་དབུས་འཆང་ཁྱེད་ལ། །

ཀ་ཙན་དབྱངས་ཀྱི་རི་མོས་སེམས་ཁེངས་པའི། །

མཁས་རློམ་སྟོང་གི་འགྲན་པའི་ཡུལ་ལས་འདས། །

༢༠༽

ཡན་ལག་བརྒྱད་ཀྱིས་བཅིངས་པའི་གསོ་རིག་མཚོ། །

རྣམ་དཔྱོད་ཧུབ་ཀྱིས་ལྷག་མེད་དྲངས་བའི་མཐར། །

སྡོན་མེད་འཆི་གསོ་རོ་བརྒྱའི་ཞལ་ཆབ་རྒྱུན། །

སྐལ་བཟང་བློ་ཡི་ཡོལ་གོར་ལྷུང་ལྷུང་འབེབས། །

༢༡༽

བཟོ་དང་སྒྱུ་རྩལ་རྩེད་མོའི་ཐབས་ཚུལ་འབུམ། །

ཁྱོད་ཐུགས་རྩལ་ལས་ཤར་བ་འདི་འདྲ་བ། །

མཐའ་བཞིའི་རྒྱལ་ཁམས་གང་ནའང་མེད་ངེས་ཕྱིར། །

ཐབས་མཁས་མཛད་པའི་ཕ་མཐའ་སུ་ཡིས་གཞལ། །

༢༢༽

བཅུ་གཉིས་ཁྱིམ་ལ་རྒྱུ་བ་གཟའ་དགུའི་འགྲོས། །

སྒྱུར་བགོད་རི་མོས་འཇལ་བ་ཙམ་མིན་པར། །

ལས་རླུང་དབུ་མར་སོན་པའི་ཨཱ་དར་ཤར། །

ཞག་གསུམ་ཡུལ་དུས་སྣང་བརྙན་འབུམ་གྱིས་འཁྱུད། །

༢༣༽

སྭོ་རོ་དོ་ཡི་རྒྱུད་གཞུང་གཟའ་སྐར་འབུམ། །

གང་ཐུགས་མཁའ་དབྱིངས་ལྟོ་བར་སྦྲུམ་པ་དང་། །

ཆབ་གཅིག་ཚར་གཅོད་རྗེས་འཛིན་ཟེར་འཕྲེང་ཚོགས། །

མ་འབད་གླིང་བཞི་གསལ་བའི་དཔྱིད་དུ་སྨིན། །

༢༤༽

སྡེབ་སྦྱོར་རྒྱན་གྱིས་སྤུད་པའི་སྙན་འཇེབས་ངག །

བྱ་དཀའ་མཁས་མང་ལོ་ཟླར་བསྒྲིག་དགོས་གནས། །

མཉམ་པར་བཞག་པ་ཁོ་ནའི་ལག་རྗེས་སུ། །

མིག་འཕྲུལ་བཞིན་དུ་སྐད་ཅིག་ཡུན་ལ་བསྐྲུན། །

༢༥༽

སྐད་ཅིག་རེར་ཡང་ཕྱོགས་བཅུའི་ཡིད་ཅན་ལ། །

རང་རང་སྐད་དང་སྤྱོད་པའི་ཆོས་སྟོན་ཕྱིར། །

མངོན་བརྗོད་ཟློས་གར་གཏམ་གྱི་རྣམ་འགྱུར་ཀུན། །

གང་གི་ཞལ་ལས་འོངས་མོད་ངོ་མཚར་ཅི། །

༢༦༽

དཔྱད་གསུམ་དག་པ་ཉིད་ཀྱི་ལེགས་བཤད་ཀུན། །

ཀུན་རྟོག་བློ་ཡིས་ཆེད་དུ་བསྒྲིགས་མིན་པར། །

འཁྲུལ་མེད་དགོངས་པའི་གཏེར་ལ་དབང་བའི་ཚུལ། །

བདེན་གསུང་དྲི་བྲལ་ཕྱི་རབས་དཔལ་དུ་བཞག །

༢༧༽

གང་གི་སྡོམ་གསུམ་གཙང་མའི་སྤྱོད་ཚུལ་གྱིས། །

མཁན་ཆེན་པདྨའི་མཚན་ཡང་ཐུགས་འཕྲོགས་ནས། །

མགོན་འདི་གངས་རིའི་ཁྲོད་ཀྱི་རྟ་ཐུལ་ཞེས། །

བསྔགས་བརྗོད་མེ་ཏོག་སིལ་མ་གཅལ་དུ་བཀྲམ། །

༢༨༽

སྔོན་ཞིག་འཇམ་དཔལ་གཞོན་ནུའི་སྐུར་བཞེངས་དུས། །

གང་གི་མཛད་སྤྱོད་དྲི་བྲལ་ནམ་མཁའི་ཁྱོན། །

བསྟན་པའི་བདག་པོ་འོད་སྲུང་ཆེན་པོས་ཀྱང་། །

གཞལ་དཀའི་གནས་སུ་མཐོང་ནས་ཡིད་སྣང་གཡོས། །

༢༩༽

སྒྲིབ་གཉིས་ཟད་པར་སྤངས་བའི་སེམས་དཔའ་ཁྱོད། །

སྒྲིམ་པོའི་སྤྱོད་ལ་དགྱེས་ཚུལ་མི་དགོས་ཀྱང་། །

དོན་མཐུན་སྤྱོད་པའི་ཚུལ་འདི་བསམས་བྱས་ཚེ། །

ཟ་ཧོར་མཁན་པོ་རྣམ་གཉིས་ཡིད་ལ་འཁོར། །

༣༠༽

གསང་ཆེན་སྔ་འགྱུར་བསྟན་པའི་ཉིན་བྱེད་འོད། །

ལྔ་བདོའི་སྤྲིན་ནག་རུམ་དུ་གཟིམས་པའི་ཚེ། །

གང་གི་ཐུགས་བསྐྱེད་དྲི་བཞོན་ཕོ་ཉ་ཡིས། །

སླར་ཡང་སྣང་བའི་སྒོ་འཕར་བརྒྱ་ཕྲག་ཕྱེས། །

༣༡༽

བཀའ་བབ་བདུན་ལྡན་མདོ་སྡགས་གླིང་པ་ཡིས། །

ཐུབ་བསྟན་ཡོངས་ཀྱི་བདག་པོར་མངའ་གསོལ་ཚེ། །

སྒྲུབ་བརྒྱུད་བརྒྱད་ཀྱི་ཟབ་གནད་མཐའ་དག་ཀུན། །

འཆད་སྤེལ་རྩོམ་པའི་བཀའ་དྲིན་ཕ་མཐའ་ཡས། །

༣༢༽

སྣོད་བཅུད་རྒུད་པའི་གདུང་བ་གཞོམ་པའི་ཕྱིར། །

ཡུལ་ཕྱོགས་ཀུན་ཏུ་གཏེར་གྱིས་ཕྱུར་བུར་གཏམས། །

དགེ་ལེགས་སྲིད་གསུམ་ཁྱབ་པའི་ཐུགས་སྨོན་མཆོག །

པདྨའི་སྲས་མཆོག་ཁྱོད་མིན་སུ་ལ་དབང་། །

༣༣༽

རྫས་སྡགས་ཏིང་འཛིན་དམིགས་པའི་འཕྲུལ་འཁོར་གྱིས། །

བཟོད་དཀའི་ནད་གདོན་གཞོམ་པའི་མན་ངག་ཚོགས། །

རིས་མེད་འགྲོ་བའི་མདུན་སར་བརྡལ་བ་ཡི། །

བཀའ་དྲིན་ལན་དེ་བསབ་པར་དཀའ་མིན་ནམ། །

༣༤༽

ཐུབ་པ་མཆོག་དང་ཉེ་སྲས་རྣམ་བརྒྱད་ཀྱི། །

སྐྱེས་རབས་རྟོགས་བརྗོད་གཏམ་གྱི་གླེང་མོ་ཡིས། །

དཔག་ཡས་ལུས་ཅན་ཐར་ལམ་བཀོད་པ་ཡི། །

བཟང་པོའི་རྣམ་ཐར་ཙམ་ཡང་སུ་ཡིས་དཔོག །

༣༥༽

སྡིག་ལྟུང་མེ་དཔུང་མཁའ་ལམ་འགེངས་པ་ལ། །

སྲས་བཅས་རྒྱལ་བའི་མཚན་སྡགས་ཆར་ཟིམ་རྒྱུན། །

བར་མེད་བསྙིལ་བའི་མཛད་ཚུལ་རྨད་བྱུང་འདི། །

ས་མཆོག་སེམས་དཔའ་ཁྱོད་ཀྱི་བཀའ་དྲིན་ལགས། །

༣༦༽

དེང་སང་གངས་རིའི་ཀློང་འདིའི་མཁས་བླུན་ཀུན། །

སྡེ་གསུམ་སྐོར་བཞིའི་མན་ངག་དྲི་མེད་ལ། །

སྡང་ཞུགས་ལོག་ལྟའི་གདོན་ཆེན་སྤངས་བ་འདི། །

དམ་པའི་དབང་པོ་ཁྱེད་ཀྱི་དྲིན་ལས་བྱུང་། །

༣༧༽

དུས་གསུམ་ཀུན་མཁྱེན་པདྨ་སམ་བྷ་ཝས། །

སྤངས་རྟོགས་མཐར་སོན་ཁྱེད་ཀྱི་བསྟོད་བསྔགས་ཚོགས། །

ལན་བརྒྱར་བརྗོད་པའི་དྲི་བྲལ་ལུང་བྱང་རྣམས། །

རྗེ་འབངས་གྲོགས་ལ་གཅེས་ནོར་ཚུལ་དུ་གདམས། །

༣༨༽

སྲན་མ་མ་ཤའི་སྦྱོར་བ་ཉམས་བཞེས་ཚེ། །

སྡོ་ལྗང་མྱུ་གུས་ཞལ་དཀྱིལ་ཁེབས་པ་ཡི། །

ངོ་མཚར་གྲུབ་པའི་རྒྱལ་མཚན་བསྒྲེངས་པ་ན། །

བདུད་སྡེའི་དཔུང་རྣམས་ཞུམ་པའི་གནས་ལ་བཀོད། །

༣༩༽

བོད་འདིར་ཇི་སྙེད་བཞུགས་པའི་རྒྱལ་གསུང་ཀུན། །

ཉིན་ཞག་གསུམ་གྱི་ཁོངས་སུ་ཐུགས་ལ་ཟིན། །

འཇམ་དཔལ་གཞོན་ནུས་ཕྱག་གི་རལ་གྲི་ཡིས། །

མངོན་སུམ་དབང་བསྐུར་བསྟན་པའི་མཛོད་ཀུན་གཏད། །

༤༠༽

འདོད་ཁམས་དབང་ཕྱུག་སྙིང་ལ་ཞུགས་པ་ཡི། །

དགྲ་སྡེ་མང་པོས་མཚོན་ཆར་ཕབ་ཚད་ཀུན། །

མཁྱེན་རབ་བདག་པོའི་སྐུ་གཟུགས་དངོས་སུ་གྱུར། །

སྒྱུ་རྩལ་སྟོབས་ཀྱིས་ཕ་རོལ་ཟིལ་གྱིས་མནན། །

༤༡༽

སྡེ་གསུམ་ཆོས་ཀྱི་སྲུང་མ་ཇི་སྙེད་ཀུན། །

ཁྱི་བཟང་རྗེ་ལ་འདུན་པའི་སྤྱོད་ཚུལ་གྱིས། །

གུས་བཅས་ཕྱག་གིས་བསྙེན་པའི་དེ་མ་ཐག །

གང་བཅོལ་ལས་ཀུན་སྒྲུབ་པ་ཀུན་གྱིས་མཐོང་།།

༤༢༽

ཞེ་སྡང་གཟུགས་སུ་ཤར་བའི་འབྱུང་པོ་ཡང་། །

ཁྱོད་ཞལ་བདུད་རྩིས་བྲན་པའི་དེ་མ་ཐག །

བྱམས་པའི་སེམས་ཀྱིས་རང་གཟུགས་དངོས་བསྟན་ནས། །

མངགས་གཞུག་བྱ་བ་བསྒྲུབས་པ་མཐུན་སྣང་ཡུལ། །

༤༣༽

བསྟན་ཞབས་སྡུད་པ་ཀླ་ཀློའི་གཤེད་པོ་རུ། །

ཁྲོ་ཆེན་ཡ་མན་ཏ་ཀའི་སྐུར་བཞེངས་ཚེ། །

གཟའ་སྐར་ཚོགས་ཀྱིས་རྔམས་ཟིལ་མ་བཟོད་དེ། །

འདར་བཞིན་བྲོས་པ་བསིལ་ལྗོངས་སྤྱི་ལ་སྣང་། །

༤༤༽

ཚེ་མཐའ་ཡས་པའི་དཀྱིལ་འཁོར་ཞལ་ཕྱེས་ཚེ། །

འཆི་མེད་བདུད་རྩི་ཐུགས་དབུས་སིམ་པའི་མོད། །

ལྷ་དང་སྐལ་བ་མཉམ་པའི་ངོ་མཚར་འབུམ། །

སྐལ་ལྡན་བུ་ལ་མངོན་སུམ་སྣང་བར་མཛད། །

༤༥༽

གང་གི་དགོངས་པ་གཏད་པ་ཙམ་གྱིས་ཀྱང་། །

ཞགས་པས་འཁྱུད་བཞིན་རླུང་ཡང་འགྲོ་དབང་བྲལ། །

འབབ་ཆུའི་ཚོགས་ཀྱང་ཕྱིར་ལ་ལོག་གྱུར་ཅིང་། །

མདའ་དར་མཛེས་པས་ཆུ་དཀྱིལ་བྲོ་གར་འཁྲབ། །

༤༦༽

འཇག་མའི་བསྟར་བའི་སྒྱོགས་རྡོའི་འཕྲུལ་འཁོར་གྱིས། །

མཁའ་ལ་བསྙེགས་པའི་རྡུལ་ཕུང་བརླགས་བྱས་ཏེ། །

མ་འོངས་རིགས་ལྡན་དམག་དཔོན་སྐུར་བཞེངས་དུས། །

མཐུ་སྟོབས་མཁའ་དང་མཉམ་པའི་ཆེ་བ་བསྟན། །

༤༧༽

ཤྭ་རྡེལ་ས་སྟེང་བོར་དང་ཆབས་གཅིག་ཏུ། །

རྒྱང་གནས་ཁང་ཁྱིམ་མང་པོ་གཏོར་བྱས་ཏེ། །

འདི་བཞིན་གླིང་བཞི་དུས་གཅིག་བཤིག་དགོས་ཀྱང་། །

དཀའ་བ་མེད་ཅེས་མི་འཇིགས་གསུང་དབྱངས་བསྒྲགས། །

༤༨༽

རི་དབང་བཤིག་ལའང་ནུས་མཐུ་ཐོགས་མེད་པའི། །

རིགས་སྡགས་འཆང་བ་སྟོང་ཕྲག་ཉེར་གསུམ་གྱིས། །

དུས་གཅིག་དམོད་པའི་འཕྲུལ་འཁོར་བསྐོར་བྱས་ཀྱང་། །

ཁྱེད་ལ་གནོད་མེད་ཕན་པའི་དཔལ་དུ་གྱུར། །

༤༩༽

བསྲེག་པའི་ལས་མཐའ་གང་དང་གང་བྱེད་ཀྱང་། །

ཐ་མལ་མེ་ཡི་སྟོབས་ལ་ལྟོས་མིན་པར། །

གཏུམ་མོའི་ཨ་ཤད་སྦར་བའི་བྱེད་པ་ཡིས། །

བསྲེག་རྫས་ལྷ་ལ་འབུལ་བའི་ཆོ་འཕྲུལ་བསྟན། །

༥༠༽

འཆད་རྩོད་རྩོམ་པའི་དོན་ལ་ཐུགས་གཞོལ་ཚེ། །

མཁས་གྲུབ་མང་པོས་འཇམ་དཔལ་དངོས་སུ་མཐོང་། །

ལ་ལས་སྐུ་གཟུགས་འོད་ཀྱིས་འཁྱུད་སྣང་སོགས། །

སྐལ་བར་འཚམ་པའི་མཐོང་སྣང་མང་དུ་བྱུང་། །

༥༡༽

གཏེར་རིགས་བཅོ་བརྒྱད་འབྱེད་པའི་དན་རྟགས་སུ། །

འཇམ་དཔལ་ཡབ་ཡུམ་ས་བོན་འཕྲུལ་གྱི་གཟུགས། །

མཐོ་བརྗིད་བྲག་རིའི་དབུས་ནས་བཏོན་པ་སོགས། །

འདུས་པའི་འཁོར་ལ་དཔག་མེད་སྣང་བར་བྱས། །

༥༢༽

འཁོར་དུ་འདུས་པའི་སྐྱེ་བོ་མཐའ་དག་གི །

ཡིད་ལ་ཇི་ལྟར་ཤར་བའི་བྱེ་བྲག་རྣམས། །

མ་འདྲེས་གསལ་བར་གསུང་ཚུལ་དྲང་པོའི་གཏམ། །

ཞལ་སློབ་དུ་མའི་མགྲིན་པའི་རྒྱན་དུ་བྱས། །

༥༣༽

སྒྲིབ་མེད་དུས་གསུམ་མཁྱེན་པའི་ལུང་བྱང་རྣམས། །

མཁས་དབང་སྲས་ཀྱི་དཔལ་དུ་བསྩལ་བ་ལས། །

ཇི་ལྟར་དཔྱད་ཀྱང་ནོར་བའི་སྐབས་མེད་ཕྱིར། །

བསམ་ཞིང་བསམས་ཚེ་ཐམས་ཅད་མཁྱེན་པར་ངེས། །

༥༤༽

མཛད་པ་ཐ་མའི་ཚུལ་ལ་དགྱེས་དགོངས་ཚེ། །

དབང་བཅུ་མཐའ་རུ་ཕྱིན་པའི་འབྲས་རྟགས་འབུམ། །

དད་ལྡན་འགྲོ་ལ་སྣང་བའི་རྣམ་ཐར་འདི། །

ཇི་ལྟར་བསམས་ཀྱང་སངས་རྒྱས་དངོས་དང་མཉམ། །

༥༥༽

རང་སྣང་མངོན་པར་དགའ་བའི་ཞིང་ཁམས་སུ། །

རྫོགས་སྨིན་སྦྱངས་བ་རྒྱ་མཚོ་མངོན་བྱས་ནས། །

ནམ་མཁའ་སྲིད་དུ་དཔག་ཡས་སྤྲུལ་བ་ཡིས། །

འགྲོ་རྣམས་འདྲེན་པའི་ཞལ་ཆེམས་དགྱེས་བཞིན་བསྩལ། །

༥༦༽

ཉིད་ལ་འབྲེལ་བ་ཐོགས་པ་ཇི་སྙེད་ཀུན། །

མི་རིང་འཇམ་དཔལ་དཔའ་བོའི་ངོ་བོ་རུ། །

མངོན་འཚང་རྒྱ་ཞེས་དྲི་མེད་སེངྒེའི་སྒྲ། །

སྐལ་བཟང་ཡིད་ཀྱི་དཔལ་དུ་ཡང་ཡང་གནང་། །

༥༧༽

དམག་དཔོན་སེངྒེ་འབུམ་པའི་སྐུར་བཞེངས་ཏེ། །

རིགས་ལྡན་ཕྲིན་ལས་སྤེལ་བའི་དུས་སྐབས་སུ། །

ཉིད་ཀྱི་ཆོས་བརྒྱུད་འཛིན་པ་མཐའ་དག་ཀུན། །

ཚོམ་བུ་གཅིག་ཏུ་འདུ་བར་བསླུ་མེད་གསུངས། །

༥༨༽

གཟུགས་སྐུའི་བཀོད་པ་དབྱིངས་སུ་བསྡུས་པའི་ཚེ། །

སྐུ་གདུང་འཇའ་འོད་རིང་བསྲེལ་ལ་སོགས་པ། །

གསང་ཆེན་གཞུང་ལས་བཤད་པའི་གྲོལ་རྟགས་ཀུན། །

མ་ཚང་མེད་པ་འགྲོ་ཀུན་དཔལ་དུ་ཤར། །

༥༩༽

རྩོད་མེད་རིག་འཛིན་རྣམ་བཞིའི་རྣམ་ཐར་བཞིན། །

འཕོ་མེད་འཇའ་ལུས་མཆོག་གི་སྐུར་བཟུང་སྟེ། །

འདས་རྗེས་གདམས་པ་རྒྱུད་ལུང་མན་ངག་གནད། །

ཐུགས་སྲས་མཆོག་གི་ཕྱག་ཏུ་མངོན་སུམ་གནང་། །

༦༠༽

དགྱེས་ཞལ་འཛུམ་པའི་དཀྱིལ་འཁོར་ངོམ་བཞིན་དུ། །

ཟབ་རྒྱས་གདམས་པ་དངོས་སུ་གནང་བྱས་ཏེ། །

དོན་བརྒྱུད་ཕ་ཕོག་ཐུགས་ལ་སོན་གྱུར་པའི། །

རིག་འཛིན་མཁས་དབང་བར་མ་ཆད་དུ་བྱུང་། །

༦༡༽

དེ་སྐད་ལེགས་བཤད་སྤྲིན་གྱི་ཆར་ཟིམ་རྒྱུན། །

རིས་མེད་འགྲོ་བློའི་ཞིང་སར་ཉེར་སོན་ཏེ། །

དད་པའི་འདབ་སྟོང་འཛུམ་པའི་གེ་སར་ཁྱོན། །

ཡོན་ཏན་སྦྲང་རྩིའི་བཅུད་ཀྱིས་འགེངས་བར་ཤོག །

༦༢༽

སངས་རྒྱས་བསྟན་པའི་ཉི་འོད་ཕྱོགས་བཅུར་གསལ། །

ཕན་བདེའི་སྣང་བ་འགོག་མེད་འགྲོ་ལ་སྣང་། །

ཀུན་ཀྱང་རྒྱལ་སྲས་སྤྱོད་པ་མཐར་སོན་ཏེ། །

བྲལ་སྨིན་དྲུག་ཅུའི་དཔལ་ལ་སྤྱོད་གྱུར་ཅིག །

༦༣༽

བདག་ནི་འདི་ནས་སྐྱེ་བ་ཇི་སྲིད་དུ། །

མཐའ་ཀླས་ཞིང་དུ་འཇམ་མགོན་བླ་མ་ཡིས། །

སྣ་ཚོགས་གཟུགས་ཀྱིས་འགྲོ་བའི་དོན་མཛད་པའི། །

བྲན་དུ་གྱུར་ནས་དད་པས་བསྟེན་པར་ཤོག །

༦༤༽

བཀྲ་ཤིས་གང་ཞིག་མཁྱེན་བརྩེ་ནུས་པའི་གཏེར། །

འཕགས་པ་རིགས་གསུམ་མགོན་གྱི་དཔལ་ཡོན་ཀུན། །

ས་གསུམ་སྐྱེ་དགུའི་སྙིང་ལ་རབ་ཞུགས་ནས། །

ཕུན་ཚོགས་དགེ་ལེགས་ངང་གིས་རྒྱས་གྱུར་ཅིག །

ཅེས་ཚིགས་སུ་བཅད་པ་བྲལ་སྨིན་གྱི་ཡོན་ཏན་དྲུག་ཅུ་རྩ་བཞིའི་གྲངས་ལྡན་འདི་ནི། རབ་རྒྱལ་ཤིང་འབྲུག་ཟླ་ཚེས་ལ་ངག་དབང་བློ་གྲོས་མཚུངས་མེད་ཀྱིས་སྤེལ་བ་དགེ་ལེགས་འཕེལ་མངྒ་ལཾ།། །།

阿妈的绿松石

འཕྲིན་སྟེགས་འདི་ནི་ཆོས་རིག་གཉིས་ཀྱི་ཤེས་བྱ་ལ་དགའ་བའི་གྲོགས་པོ་རྣམས་ལ་ལེགས་སྐྱེས་འབུལ་བྱེད་ཀྱི་སྐྱེད་ཚལ་ཞིག་ཡིན།

༼ཟས་རིགས་རྒྱུན་ཤེས། ༽སྤྲི་དཀར་འཚོ་བཅུད་སྐོར་གྱི་རྒྱུན་ཤེས།

འཆི་བའི་སྡུག་བསྔལ། 人到了临终之时的痛苦

མཁས་དབང་དགེ་འདུན་ཆོས་འཕེལ་གྱི་སྐོར།

བདེ་བར་གཤེགས་པའི་མཆོད་རྟེན་བརྒྱད་ཀྱི་ངོ་སྤྲོད་མདོར་བསྡུས།

དེང་རབས་དངོས་ཁམས་རིག་པའི་ལམ་ནས་སྟོང་རྟེན་འབྱུང་ལ་འཇུག་ཚུལ་བཤད་པ།

༄༅། །བདུད་འཇོམས་འཇིགས་བྲལ་ཡེ་ཤེས་རྡོ་རྗེའི་རྣམ་ཐར།

ཚད་མེད་བཞི་བསྒོམ་སྟངས། 如何修持四无量心

དགའ་ལྡན་ལྔ་མཆོད་ཡིན་པས་དགེ་ལས་ལ་འབད་རོགས། 燃灯节，纪念宗喀巴大师

རྒྱལ་སྤྱིའི་བསམ་གཏན་སྒོམ་པའི་ཉི་མ།

དགེ་སྡིག་དུང་ཕྱུར་འགྱུར་བའི་ས་སྙིང་དུས་ཆེན།

དགུན་ཉི་ལྡོག་གི་ངོ་སྤྲོད་དང་ཀུན་བཟང་སྨོན་ལམ།

ཀུན་བཟང་བླ་མའི་ཞལ་ལུང་ལས་རྡོར་སེམས་སྒོམ་བཟླས་ཀྱི་ཁྲིད་ཆ་ཚང་།

ལོ་ཙཱ་བ་རིན་ཆེན་བཟང་པོའི་རྣམ་ཐར་མདོར་བསྡུས།

འཇིག་རྟེན་ཆོས་བརྒྱད་སྤོང་བའི་གདམས་པ། ཉག་བླ་པདྨ་བདུད་འདུལ།

གཟུངས་འདི་མཐོང་ན་བསྐལ་པ་དུང་ཕྱུར་གསུམ་གྱི་སྡིག་པ་འདག

སྐྱབས་སྡོམ་འབོག་ཆོག་མཐོ་རིས་འཁྲི་ཤིང་། འཇིགས་གླིང་།

ནཱ་རོ་པཎ་ཆེན་གྱིས་ཏེ་ལོ་པ་བསྟེན་ཚུལ།大智者那若巴依止帝洛巴尊者的情节

རྨི་ལམ་མི་ལེགས་པ་རྨིས་ན་སྔགས་འདི་ལན་གཅིག་གསུངས།

ཀུན་བཟང་བླ་མའི་ཞལ་ལུང་། འཆད་ཁྲིད་པ་ཨརྱ་དེ་བ། 159

སྐྱབས་སུ་འགྲོ་བ་སྦྱིན་པའི་ཆོ་ག་ཤིན་ཏུ་བསྡུས་པ།

གལ་ཏེ་ཚུལ་ཁྲིམས་བློ་གྲོས་མ་བྱུང་ན། རྩོམ་པ་པོ། ཀུན་ཁྱབ་ཡེ་ཤེས།

ཀུན་བཟང་བླ་མའི་ཞལ་ལུང་། འཆད་ཁྲིད་པ་ཨརྱ་དེ་བ། 158

སང་ཉིན་དཔལ་ལྷའི་དུས་ཆེན་གྱི་ངོ་སྤྲོད་དབྱངས་དང་བཅས་པ། 介绍吉祥天母节音频栏目

དཀོན་མཆོག་གསུམ་གྱི་བཀྲ་ཤིས་ཀྱི་ཚིགས་སུ་བཅད་པ།

སྐྱབས་མགོན་མཐར་ཐུག་རང་ཉིད་ཡིན་པར་གསུངས།

࿑ཕུང་པོ་དུ་མས་རང་བཞིན་དང་མི་རྟག་པར་བསྒོམ་ཚུལ།

ཀུན་བཟང་བླ་མའི་ཞལ་ལུང་། འཆད་ཁྲིད་པ་ཨརྱ་དེ་བ། 157

སོ་ན་བའི་ནད་ཀྱི་རྒྱུ་རྐྱེན་དང་བཅོས་ཐབས།

ཀུན་བཟང་བླ་མའི་ཞལ་ལུང་། འཆད་ཁྲིད་པ་ཨརྱ་དེ་བ། 156

༄༅།།རྗེ་ཙོང་ཁ་བའི་གསོལ་འདེབས་ཤར་གངས་རི་མ། 聖宗喀巴大師贊 · 東方雪山頌

༧ཁོང་རྣམས་ཀྱིས་གླེང་བའི་མཁན་ཆེན་ཚུལ་ཁྲིམས་བློ་གྲོས་མཆོག

ཀུན་བཟང་བླ་མའི་ཞལ་ལུང་། འཆད་ཁྲིད་པ་ཨརྱ་དེ་བ། 155

བླ་མའི་འཁྲུངས་སྐར་བསུ། 喜迎上师诞辰

མི་དགེ་བ་བཅུ་དང་འབྲེལ་བའི་ལས་འབྲས་ཀྱི་སྐོར།

ཀུན་བཟང་བླ་མའི་ཞལ་ལུང་། འཆད་ཁྲིད་པ་ཨརྱ་དེ་བ། 154

སེམས་ཅན་གྱི་སྲོག་བསྐྱབས་པའི་བསོད་ནམས་ཀྱི་འབྲས་བུ་བསྟན་པ།

དིལ་མགོ་མཁྱེན་བརྩེས། ཞི་གནས་དང་ལྷག་མཐོང་སྐོར། བརྙན་དང་སྒྲ་ཆ་ཚང་།

ཀུན་བཟང་བླ་མའི་ཞལ་ལུང་། འཆད་ཁྲིད་པ་ཨརྱ་དེ་བ། 153

ཀུན་བཟང་བླ་མའི་ཞལ་ལུང་། འཆད་ཁྲིད་པ་ཨརྱ་དེ་བ། 152

ཀུན་མཁྱེན་མི་ཕམ་རྒྱ་མཚོ་ལ་བསྟོད་པ་དད་པའི་གསོས་སྨན། | 麦彭仁波切赞美

ཀུན་བཟང་བླ་མའི་ཞལ་ལུང་། འཆད་ཁྲིད་པ་ཨརྱ་དེ་བ། 151

ངེས་ཤེས་རིན་པོ་ཆེའི་སྒྲོན་མེའི་ཆོས་ཁྲིད་ཆ་ཚང་། ༼མཁན་ཨརྱ་དེ་བ།༽

࿅དབུ་མ་རྒྱན་གྱི་སྤྱི་དོན་ཆོས་ཁྲིད་ཆ་ཚང་།࿄

གསོ་རིག་བསྟན་རྒྱས་སྨོན་ལམ་བཞུགས་སོ།

ཀུན་བཟང་བླ་མའི་ཞལ་ལུང་། འཆད་ཁྲིད་པ་ཨརྱ་དེ་བ། 150

ས་དགེ་བཀའ་རྙིང་ཀུན་ལ་གདམས་པ། ཀུན་མཁྱེན་མི་ཕམ་རྣམ་རྒྱལ་རྒྱ་མཚོ།

࿑བོད་དུ་དགེ་བསྙེན་ལ་བཙུན་ཆས་བྱེད་སྲོལ་ཡོད། ཆགས་མེད།

འཛམ་གླིང་ཨེ་ཛི་ཉིན་མོའི་བྱེད་སྒོ་དང་མཁན་ཆེན་མཆོག་གི་གསུང་གསར།

སྙིང་ཐིག་ཡ་བཞིའི་བཀའ་དབང་ཆེན་མོ། དུམ༌བུ་དགུ་པའི་དང་པོ།

分类

时事

民生

政务

教育

文化

科技

财富

体娱

健康

情感

旅行

百科

职场

楼市

企业

乐活

学术

汽车

时尚

创业

美食

幽默

美体

文摘

原创标签

时事社会财经军事教育体育科技汽车科学房产搞笑综艺明星音乐动漫游戏时尚健康旅游美食生活摄影宠物职场育儿情感小说曲艺文化历史三农文学娱乐电影视频图片新闻宗教电视剧纪录片广告创意壁纸头像心灵鸡汤星座命理教育培训艺术文化金融财经健康医疗美妆时尚餐饮美食母婴育儿社会新闻工业农业时事政治星座占卜幽默笑话独立短篇连载作品文化历史科技互联网

发布位置

广东北京山东江苏河南浙江山西福建河北上海四川陕西湖南安徽湖北内蒙古江西云南广西甘肃辽宁黑龙江贵州新疆重庆吉林天津海南青海宁夏西藏香港澳门台湾美国加拿大澳大利亚日本新加坡英国西班牙新西兰韩国泰国法国德国意大利缅甸菲律宾马来西亚越南荷兰柬埔寨俄罗斯巴西智利卢森堡芬兰瑞典比利时瑞士土耳其斐济挪威朝鲜尼日利亚阿根廷匈牙利爱尔兰印度老挝葡萄牙乌克兰印度尼西亚哈萨克斯坦塔吉克斯坦希腊南非蒙古奥地利肯尼亚加纳丹麦津巴布韦埃及坦桑尼亚捷克阿联酋安哥拉