བླ་མ་རྣམས་དང་ཡི་དམ་དཀྱིལ་འཁོར་ལྷ། །
ཕྱོགས་དུས་རྒྱལ་བ་སྲས་བཅས་ཐུགས་རྗེ་དང་། །
བདག་གི་ལྷག་བསམ་རྣམ་པར་དག་པའི་མཐུས། །
གསོ་བ་རིག་པའི་བསྟན་པ་རྒྱས་གྱུར་ཅིག །
སྟོན་པ་མཉམ་མེད་ཤཱ་ཀྱའི་རྒྱལ་པོས་ཀྱང་། །
གཞོན་ནུ་སེམས་ཅན་སྨན་དུ་སྐུ་འཁྲུངས་ནས། །
ནད་རྣམས་སེལ་བར་ཐུགས་བསྐྱེད་བདེན་པའི་མཐུས། །
གསོ་བ་རིག་པའི་བསྟན་པ་རྒྱས་གྱུར་ཅིག །
ཡུན་རིང་ཕ་དང་མར་གྱུར་དྲིན་ཅན་འགྲོ། །
མི་བཟོད་སྡུག་བསྔལ་ནད་ཀྱི་འདམ་ཚུད་པ། །
དེ་ལ་ཕན་གདགས་བདེ་གཤེགས་མཆོད་པའི་མཆོག །
གསོ་བ་རིག་པའི་བསྟན་པ་རྒྱས་གྱུར་ཅིག །
རིན་ཆེན་སྨན་མཆོག་སྦྱིན་པའི་ལག་བརྐྱང་ཚེ། །
ཕྱོགས་བཅུའི་ཞིང་ནས་སྲས་བཅས་རྒྱལ་བ་ཡི། །
གསེར་མདོག་ཕྱག་གིས་མེ་ཏོག་ཡང་ཡང་འཐོར། །
གསོ་བ་རིག་པའི་བསྟན་པ་རྒྱས་གྱུར་ཅིག །
དྲི་མེད་བྱམས་པའི་བདུད་རྩིས་རྒྱུད་གཏམས་ཤིང་། །
ནད་རྣམས་ཀུན་སེལ་བདུད་རྩིའི་མཆོད་སྦྱིན་གྱིས། །
རིས་མེད་འགྲོ་ལ་ཕན་པའི་དྲིན་གཟོ་བ། །
གསོ་བ་རིག་པའི་བསྟན་པ་རྒྱས་གྱུར་ཅིག །
བཟོད་མེད་སྙིང་རྗེ་ཆེན་པོས་རྒྱུད་བསྐུལ་ནས། །
རྒྱལ་བའི་སྲས་ཀྱི་ལམ་མཆོག་ཕར་ཕྱིན་དྲུག །
ཉམས་ལེན་སྨན་ལ་ཚང་བའི་ཐབས་མཁས་ཅན། །
གསོ་བ་རིག་པའི་བསྟན་པ་རྒྱས་གྱུར་ཅིག །
ཚེ་འདིར་ལྷ་མིའི་གཙུག་གིས་མངོན་པར་འདུད། །
ཕྱི་མར་བདེ་ཆེན་ཌཱཀྐིའི་ཚོགས་ཀྱིས་མཆོད། །
བདེ་ནས་བདེ་བར་འགྲོ་བའི་ལམ་བཟང་པོ། །
གསོ་བ་རིག་པའི་བསྟན་པ་རྒྱས་གྱུར་ཅིག །
ཁྱད་པར་སྨན་པའི་རྒྱལ་པོ་གཡུ་ཐོག་པར། །
ཕྱོགས་བཅུའི་རྒྱས་བ་སྲས་དང་བཅས་པ་དང་། །
འཇམ་དཔལ་དཔའ་བོས་མངོན་སུམ་ལུང་བསྟན་བཞིན། །
གསོ་བ་རིག་པའི་བསྟན་པ་རྒྱས་གྱུར་ཅིག །
མ་འོངས་རྒྱུད་འདི་འཆད་ཉན་དར་བ་དང་། །
འདི་ཡི་ཚིགས་བཅད་གཅིག་ཙམ་ཐོས་པ་ཡང་། །
དོན་གཉིས་འགྲུབ་ཅེས་ལུང་བསྟན་བདེན་པའི་མཐུས། །
གསོ་བ་རིག་པའི་བསྟན་པ་རྒྱས་གྱུར་ཅིག །
མགོན་པོ་མཆོག་དེས་རྒྱུད་འདི་འཛིན་པ་དང་། །
སྙིགས་མའི་འགྲོ་ལ་ལྷག་པར་བདག་ཉིད་ཀྱི། །
ཐུགས་རྗེ་ཆེན་པོས་སྐྱོབ་ལ་དམ་བཅས་པས། །
གསོ་བ་རིག་པའི་བསྟན་པ་རྒྱས་གྱུར་ཅིག །
དེ་བཞིན་ཕྱོགས་བཅུའི་སྲས་བཅས་རྒྱལ་བས་ཀྱང་། །
སེམས་ཅན་ཕན་འདོགས་དམ་པའི་གང་ཟག་ལ། །
རྟག་ཏུ་ཐུགས་རྗེས་གཟིགས་པར་དམ་བཅས་པས། །
གསོ་བ་རིག་པའི་བསྟན་པ་རྒྱས་གྱུར་ཅིག །
དེ་ཚེ་སྨན་སྲུང་ཞང་བློན་སྡེ་དགུ་སོགས། །
འཇིག་རྟེན་འཇིག་རྟེན་འདས་པའི་སྲུང་མ་ཡིས། །
རྒྱུད་འཛིན་སྲུང་སྐྱོབ་ཞལ་བཞེས་བདེན་པའི་མཐུས། །
གསོ་བ་རིག་པའི་བསྟན་པ་རྒྱས་གྱུར་ཅིག །
གསོ་དཔྱད་མདོ་རྒྱས་ཀུན་ལ་མཁས་པ་དང་། །
ལག་ལེན་མན་ངག་གནད་དུ་ཕེབས་གྱུར་ཅིང་། །
སྙིང་རྗེ་ཆེན་པོའི་གཞན་དབང་སོང་བ་ཡི། །
འཚོ་བྱེད་དམ་པས་ས་འདི་ཡོངས་གང་ཤོག །
ཀུན་ཀྱང་སྤྱོད་ལམ་ཞི་ཞིང་སེམས་ཀྱང་ཞི། །
འགྲོ་བའི་སྡུག་བསྔལ་ཞི་བའི་ཐབས་བརྩོན་པས། །
རང་གཞན་ཀུན་ཀྱང་བླ་མེད་ཞི་བ་ཡི། །
གོ་འཕང་མཆོག་ལ་མྱུར་དུ་རེག་གྱུར་ཅིག །
བདུད་རྩི་མི་གཡོ་རྒྱལ་བའི་ཐུགས་རྗེ་དང་། །
བདུད་རྩི་དང་འདྲ་བྱམས་པའི་སེམས་ཀྱི་མཐུས། །
བདུད་རྩི་སྙིང་པོ་གསོ་བ་རིག་པའི་གཞུང་། །
བདུད་རྩིའི་སྤྲིན་ཆེན་བཞིན་དུ་རྒྱས་གྱུར་ཅིག །
མཚུངས་མེད་སྨན་པའི་རྒྱལ་པོ་གཡུ་ཐོག་པ། །
ཡང་ཡང་དྲན་ཅིང་གསོ་བ་རིག་པའི་གཞུང་། །
ནམ་གཞུག་རྫོགས་པའི་ཆུ་བཞིན་འགྲིབ་མཐོང་བས། །
མི་བཟོད་སྙིང་གི་ཟུག་རྔུ་ཆེས་ཆེར་ལྡང་། །
དེ་ཚེ་གང་དྲན་བཅོས་བཅོས་མེད་པ་རུ། །
བདེན་ཚིག་སྨོན་ལམ་ཁ་ནས་རང་རྡོལ་བ། །
འདི་བཞིན་སྨོན་པར་བྱེད་པའི་གང་ཟག་ལ། །
སྨན་པའི་རྒྱལ་པོའི་བྱིན་རླབས་འཇུག་གྱུར་ཅིག །
བདེ་གཤེགས་བརྒྱད་དང་རིག་པའི་ཡེ་ཤེས་ལྔས། །
བདེན་མཐུས་སྒོ་གསུམ་དྲང་བོར་སྲོང་བའི་ལམ། །
གཞན་རྒྱུད་ཉེས་པ་མ་སྙོམས་སྙོམས་བྱེད་རྒྱུ། །
དྲང་སྲོང་རྒྱལ་བའི་རིང་ལུགས་འཕེལ་གྱུར་གཅིག །
ཡང་དག་གྲུབ་པ་ནམ་མཁའ་སྙིང་པོའི་དཔལ། །
དེ་ཡི་རྣམ་སྤྲུལ་ཐུབ་བསྟན་བསམ་གཏན་བཟང་། །
དཀོན་མཆོག་རྩ་གསུམ་སྲུང་མའི་བྱིན་མཐུ་དང་། །
འཇམ་དཔལ་དབྱངས་དང་ཚེ་ཡི་ལྷ་ཚོགས་རྣམས། །
