2024ལོའི་ཐེ་བོ་རྫོང་གི་ཞིང་ལྗོངས་ལྔའི་མཐོ་སྒང་ས་ཁུལ་གྱི་གཟེབ་གྲུག་འགྲན་སྡུར་ཆེན་མོ་དངོས་སུ་མགོ་བརྩམས།
ཟླ11པའི་ཚེས5ཉིན་གྱི་སྔ་དྲོར། 2024ལོའི“ཐེ་བོའི་དགུན་ལྗོངས། ཁ་བའི་ལས་སྐལ”ཞེས་པའི་དགུན་དུས་ཀྱི་མུ་འབྲེལ་བྱེད་སྒོ་སྟེ་ཐེ་བོ་རྫོང་གི་ཞིང་ལྗོངས་ལྔའི་མཐོ་སྒང་ས་ཁུལ་གྱི"ལ་གཟར་འགག་འཆམ་མཐུན་རྟགས་མའི"གཟེབ་གྲུག་གདན་ཞུའི་འགྲན་སྡུར་ཆེན་མོ་ཐེ་བོ་རྫོང་ལུས་རྩལ་ལྟེ་གནས་སུ་སྤེལ་མགོ་ཚུགས། ཁུལ་ཨུའི་ཧྲུའུ་ཅི་གཞོན་པའམ་ཁུལ་དཔོན་དབྱང་ཝུའུ་དང་། ཀན་སུའུ་ཞིང་ཆེན་ལུས་རྩལ་ཅུའུ་དགུན་དུས་ལུས་རྩལ་དོ་དམ་ལྟེ་གནས་ཀྱི་ཀྲུའུ་རེན་གཞོན་པ་ཝུའུ་ཅན་ཅུན། ཞིང་ཆེན་ལུས་རྩལ་ཅུའུ་དགུན་དུས་ལུས་རྩལ་དོ་དམ་ལྟེ་གནས་ཕྱོགས་བསྡུས་ཚན་ཁག་གི་མགོ་གཙོ་ཀྲོའུ་ཞིན། ཁུལ་དམངས་ཆེན་རྒྱུན་ཨུ་ཁང་གི་ཏང་ཙུའུ་ཁོངས་མིའམ་ཀྲུའུ་རེན་གཞོན་པའི་འོས་མི་དབྱང་ཞའོ་མཱེ། ཁུལ་སྲིད་གྲོས་ཀྱི་ཏང་ཙུའུ་ཁོངས་མིའམ་ཀྲུའུ་ཞི་གཞོན་པ་ལུའུ་དབྱི། ཁུལ་སྲིད་གཞུང་གི་ཏང་ཙུའུ་ཁོངས་མིའམ་དྲུང་ཡིག་ཆེན་མོ་རྟ་མགྲིན་སྐྱབས་སོགས་ཞིང་ཆེན་དང་ཁུལ། ཐེ་བོ་རྫོང་གི་འབྲེལ་ཡོད་མགོ་ཁྲིད་གཙོ་བོ་དག་དང་། ཀྲུང་གོའི་གཟེབ་གྲུག་མཐུན་ཚོགས་དང་ཀན་སུའུ་ཞིང་ཆེན་གྱི་གཟེབ་གྲུག་མཐུན་ཚོགས། ཀན་ལྷོ་ཁུལ་གཟེབ་གྲུག་མཐུན་ཚོགས་སོགས་ཀྱི་འབྲེལ་ཡོད་མགོ་ཁྲིད་དང་སྐུ་མགྲོན་རྣམས་མགོ་ཚུགས་མཛད་སྒོར་ཞུགས།
དབྱང་ཝུའུ་ཡིས་མཛད་སྒོ་དངོས་སུ་མགོ་བརྩམས་པ་ཁྱབ་བསྒྲགས་བྱས།
ཐེ་བོ་རྫོང་གི་འབྲེལ་ཡོད་མགོ་ཁྲིད་ཀྱིས་ཤིས་ཚིག་ཕུལ་ཅིང་མཛད་སྒོར་མདོ་འཛིན་བྱས།
འོས་སྦྱོར་མི་སྣས“ཐེ་བོའི་དགུན་ལྗོངས། ཁ་བའི་ལས་སྐལ”ཞེས་པའི་དགུན་དུས་ཀྱི་མུ་འབྲེལ་བྱེད་སྒོ་འོས་སྦྱོར་བྱས་ཤིང་བྱེད་སྒོ་མགོ་བརྩམས་པའི་དར་ཆ་སྤྲད།
ཤན་འབྱེད་པའི་འཐུས་མིས་དམ་བཅའ་བཞག
འགྲན་ཞུགས་ལུས་རྩལ་པའི་འཐུས་མིས་དམ་བཅའ་བཞག
གཞན་མཛད་སྒོའི་ཁྲོད་གཞས་པ་གྲགས་ཅན་ཤེར་བསྟན་དང་བནྡེ་སྒོམ། རྟ་མགྲིན་ཚེ་རིང་སོགས་ཀྱིས་མཛད་སྒོར་ཞུགས་པའི་མགོ་ཁྲིད་དང་སྐུ་མགྲོན་ཡོངས་ལ་གླུ་གར་གྱི་ལེགས་སྐྱེས་གྱ་ནོམ་པ་ཕུལ།
རྒྱུས་ལོན་བྱུང་བ་ལྟར་ན། ཐེངས་འདིའི་འགྲན་སྡུར་དུ་མཚོ་སྔོན་དང་ཡུན་ནན། སི་ཁྲོན། ཀན་སུའུ་བཅས་ཞིང་ཆེན་དུ་མའི་མཐོ་སྒང་ས་ཁུལ་གྱི་འཐུས་ཚབ་རུ་ཁག་ཉེར་གཉིས་ཞུགས་ཡོད། བྱ་དགའི་རིམ་པ་ནི། ཨང་དང་པོར་སྒོར་འབུམ་གཉིས་དང་། ཨང་གཉིས་པར་འབུམ་གཅིག ཨང་གསུམ་པར་ཁྲི་དྲུག ཨང་བཞི་བར་ཁྲི་ལྔ། ཨང་ལྔ་པར་ཁྲི་བཞི། ཨང་དྲུག་པར་ཁྲི་གསུམ། ཨང་བདུན་པར་ཁྲི་གཉིས། ཨང་བརྒྱད་པར་ཁྲི་གཅིག་ལྟར་བཀོད་ཡོད་པར་མ་ཟད། སྤྱོད་པ་ཚུལ་མཐུན་ལྟར་འགྲན་རིམ་ཆ་ཚང་མཇུག་རྫོགས་པའི་རུ་ཁག་རྣམས་ལ་རོགས་དངུལ་སྒོར་ལྔ་སྟོང་རེ་གྲ་སྒྲིག་བྱས་ཡོད་པ་རེད།
ཐེངས་འདིའི་འགྲན་སྡུར་གྱི་དམིགས་བྱ་གཙོ་བོ་ནི་མི་རིགས་ས་ཁུལ་གྱི་ཐུན་མོང་མ་ཡིན་པའི་ལུས་རྩལ་འགྲན་ཚོགས་ཀྱི་མཚན་རྟགས་བཞེངས་སྐྲུན་དང་། ཞིང་ལྗོངས་ལྔའི་མཐོ་སྒང་ས་ཁུལ་གྱི་རིག་གནས་སྤེལ་རེས་ཀྱི་ཐེག་གཟུགས་གསར་པ་འཛུགས་པ། རིག་གནས་དང་ཡུལ་སྐོར་མཉམ་འདྲེས་འཕེལ་རྒྱས་ཀྱི་ལས་སྟེགས་གསར་པ་བསྐྲུན་པ། ཀྲུང་ཧྭ་མི་རིགས་ཐུན་མོང་གཞི་གཅིག་གི་འདུ་ཤེས་ཀྱི་ལག་ལེན་གསར་པ་བརྟན་པོར་སྤེལ་བ། ཐོན་ཁུངས་མཉམ་སྤྱོད་དང་། ལེགས་ཆ་གསབ་རེས། ཐུན་མོང་ཐོག་འཕེལ་རྒྱས་བཅས་ཡོང་བ་བྱས་ཏེ་དམངས་ཡོངས་ཀྱི་ལུས་སྦྱོང་འདུ་ཤེས་སེམས་གཏིང་དུ་ཟུག་པར་མཚམས་མེད་ཏུ་སྐུལ་འདེད་གཏོང་བ་དང་ལུས་རྩལ་བྱ་གཞག་འཕེལ་རྒྱས་ཀྱི་གྲུབ་འབྲས་ཀྱིས་དམངས་འཚོར་ཕན་འདོགས་རྒྱུ་དེ་རེད།
འགྲན་ཞུགས་རུ་དཔུང་གི་སྡེ།
གསར་འགོད་པ། དྭངས་གསལ་ལྷ་མོ། ཚེ་རིང་རྣམ་རྒྱལ། མགོན་པོ་ཚེ་བརྟན།
རྩོམ་སྒྲིག་པ། དྭངས་གསལ་ལྷ་མོ།
རྩོམ་སྒྲིག་འགན་འཁུར་པ། སངས་རྒྱས་སྐྱབས།
ཞུ་དག་པ། རྡོ་རྗེ་ཚེ་རིང་།
ལྟ་སྐུལ་བ། ལི་པའེ་ཡུན། གཡུང་དྲུང་སྐྱབས།
