مەملەكەتتىك دەنساۋلىق ساقتاۋ – سالاماتتىق كوميتەتى: جوتەل باسىلماي قويسا، ەڭ ماڭىزدىسى اۋرۋدىڭ سەبەبىن انىقتاعان ءجون
1 – ايدىڭ 25 – كۇنى، مەملەكەتتىك دەنساۋلىق ساقتاۋ – سالاماتتىق كوميتەتى اقپار جاريالاۋ ءماجىلىسىن اشىپ، ەلىمىزدەگى قىس پەن كوكتەم مەزگىلىندەگى تىنىس جولى اۋرۋلارىنان ساقتانۋ جانە ونى ەمدەۋ، دەنساۋلىققا قاتىستى ەسكەرتۋ بەرۋ جاعدايلارىن تانىستىردى.
قازىرگى تاڭدا ناۋقاستار اراسىندا قايتا – قايتا جوتەلۋ سىندى اۋرۋ بەلگىسىنىڭ ءبىرشاما كوپ بايقالعانىنا باعىتتاي وتىرىپ، بەيجيڭ ەمحاناسى تىنىس جولى جانە حاۋىپتى، سالماقتى اۋرۋلار ءبولىمىنىڭ مەڭگەرۋشىسى لي يانميڭ بىلاي دەپ تانىستىردى: قايتا – قايتا جوتەلە بەرگەن جاعدايدا، ەمحاناعا بارىپ تەكسەرىلىپ، اۋرۋدىڭ سەبەبىن انىقتاعان ءجون. جوتەلدىڭ جالعاسقان ۋاقىتىنا قاراي وتىرىپ، ءۇش تۇرگە بولۋگە بولادى. ءبىرىنشى ءتۇرى، شۇعىل جوتەل، ۋاقىتى ءۇش اپتا كولەمىندە بولادى، باستى سەبەبى تىنىس جولىنىڭ ءتۇرلى اۋرۋ قوزدىرعىشتارمەن جۇعىمدالۋى؛ ەكىنشى ءتۇرى، قوسالقى شۇعىل جوتەل، جالعاساتىن ۋاقىتى ءۇش اپتادان سەگىز اپتاعا دەيىن، ادەتتە تىنىس جولى جۇعىمدالعاننان كەيىن جوتەل باستالادى؛ ءۇشىنشى ءتۇرى، سوزىلمالى جوتەل، جالعاساتىن ۋاقىتى سەگىز اپتادان اسادى، سوزىلمالى جوتەل تىنىس جولى جۇيەسىندەگى دەمىكپە، وكپەنىڭ سوزىلمالى توسىلۋى قاتارلى اۋرۋلار سەبەبىنەن تۋىندايدى، زاپىراننىڭ وڭەشتەن كەرى اعۋى، كەيبىر دارىلەردى پايدالانۋ قاتارلى تىنىس جولى جۇيەسىنە جاتپايتىن اۋرۋلار سەبەبىنەن دە تۋىنداۋى مۇمكىن.
جوتەلدى ەمدەۋدە ەڭ باستىسى اۋرۋدىڭ سەبەبىن انىقتاپ، اۋرۋ سەبەبىنە قاراي ەمدەلۋ كەرەك. كۇندەلىكتى تۇرمىستا اۋا رايىنداعى وزگەرىسكە ءمان بەرۋ، دەر كەزىندە قالىڭ كيىم كيۋ، سۋىق وتۋدەن ساقتانۋ قاجەت، سونىمەن بىرگە، بولمە اۋاسىنىڭ وتە قۇرعاق بولۋىنان ساقتانىپ، ۇيلەسىمدى ىلعالدىقتى ساقتاپ وتىرعان ءجون. ازىقتانۋ جاعىندا اشتى، تىتىركەندىرگىش ازىقتىقتار مەن شەكتەن تىس مايلى ازىقتىقتاردى تۇتىنۋدان ساقتانعان ءجون. (باس ستانسيا ورتالىق تەلەۆيزيا ءتىلشىسى ياڭ ياڭ، شى يىڭچۇن)
监审：库兰别克
