مەملەكەت ءتوراعاسى شي جينپيڭ 2024 - جىلعى جاڭا جىلدى قۇتتىقتاۋ ءسوزىن سويلەدى
جاڭا جىل قارساڭىندا مەملەكەت ءتوراعاسى شي جينپيڭ ورتالىق راديو - تەلەۆيزيا باس ستانسياسى جانە ينتەرنەت ارقىلى 2024 - جىلعى جاڭا جىلدى قۇتتىقتاۋ ءسوزىن سويلەدى. □ سۋرەتتى شينحۋا اگەنتتىگىنىڭ ءتىلشىسى جۇي پيڭ تۇسىرگەن
شينحۋا اگەنتتىگىنىڭ 12 - ايدىڭ 31 - كۇنى بەيجيڭنەن بەرگەن حابارى. جاڭا جىل قارساڭىندا مەملەكەت ءتوراعاسى شي جينپيڭ ورتالىق راديو - تەلەۆيزيا باس ستانسياسى جانە ينتەرنەت ارقىلى 2024 - جىلعى جاڭا جىلدى قۇتتىقتاۋ ءسوزىن سويلەدى. تولىعى تومەندەگىدەي:
كوپشىلىك سالەمەتسىزدەر مە؟ قىسقى توقىراۋدان كەيىن كۇن جىلىنا باستايدى، ءومىر ءوز زاڭدىلىعى بويىنشا العا تارتادى. كونە جىلدى اتتاندىرىپ، جاڭا جىلدى قارسى الىپ وتىرعان وسىناۋ تاماشا ساتتە، مەن بەيجيڭنەن كوپشىلىككە جاڭا جىلدىق ىزگى تىلەك جولدايمىن.
2023 - جىلى ءبىز تىنباي قايسارلىقپەن كۇرەس جاساپ، ۇدەرە العا تارتىپ، بوران - شاشىن مەن سىن - سايىستاردى باستان كەشىرىپ، نۇرلى بولاشاققا جول اشىپ، قوماقتى تابىستارعا قول جەتكىزدىك. كوپشىلىك وسى ەرەسەن جىلدى ەستەرىندە بەرىك ساقتادى ءارى بولاشاققا تولىق سەنىم ورناتتى.
وسى جىلدا ءبىز قادامىمىزدى نىق باستىق. ىندەتتەن ساقتانۋ - تىزگىندەۋ ورنىقتى تۇردە جاڭا كەزەڭگە ءوتتى، ەلىمىز ەكونوميكاسى ۇزدىكسىز قايتا ورلەپ، جاقسارىپ، جوعارى ساپالى دامۋ تىڭعىلىقتى ىلگەرىلەتىلدى. وسىزاماندانعان كاسىپ سالاسى جۇيەسى اناعۇرلىم كەمەلدەندى، ءبىر توپ جوعارى دەڭگەيلى، زەردەلى، جاسىل جاڭاشا تىرەكتى كاسىپ سالالارى جەدەل كوركەيدى. استىق وندىرىسىندە 20 جىل ءۇرتىس مول ءونىم الىندى، تۇنىق سۋ، جاسىل تاۋ كەلبەتى اناعۇرلىم ايشىقتى بولا ءتۇستى، اۋىل - قىستاقتى گۇلدەندىرۋدە تىڭ بەينە ايگىلەندى. شىعىس سولتۇستىكتى جاپپاي گۇلدەندىرۋدە تىڭ داستان جازىلدى، شيۇڭ - ان جاڭا رايونىندا نەگىز قالانىپ، دامۋ اياق الىسى جەدەلدەدى، چاڭجياڭ ەكونوميكالىق بەلدەۋىنىڭ ومىرشەڭدىك كۇشى تاسقىندادى، گۋاڭدۇڭ − شياڭگاڭ − اۋمىن ۇلكەن شىعاناق رايونى باتىلدىقپەن ءداۋىردىڭ الدىڭعى لەگىندە ءجۇردى. جۇڭگو ەكونوميكاسى اساۋ تولقىندا كۇشەيىپ، نەگىزى بەكەمدەلدى.
وسى جىلدا ءبىزدىڭ قادامىمىز اسا پارمەندى بولدى. ۇزدىكسىز قاجىماي كۇش سالىپ، شىنىعىپ - شىڭدالۋ بارىسىندا، جۇڭگونىڭ جاڭالىق اشۋ قوزعاۋشى كۇشى، دامۋ ومىرشەڭدىك كۇشى ارىنداي ارتتى. C919 ءىرى تۇرپاتتى ۇشاعىنىڭ ساۋدالىق تاسىمالعا ىستەتىلۋى ىسكە استى، ەلىمىزدە وندىرىلگەن ءىرى تۇرپاتتى جولاۋشىلار كەمەسىنىڭ سىناق رەتىندە قاتىناۋى ءساتتى بولدى، شىنجوۋ الەم كەمەلەرى كەڭىستىككە بىرىنەن سوڭ ءبىرى ۇشىرىلدى، ”كۇرەسكەر“ اتتى سۇڭگۋىر كەمە اسا تەرەڭ تەڭىز تۇبىنە سۇڭگىدى. ەلىمىزدە وندىرىلگەن ايتۋلى ماركالى ونىمدەرى كەڭ كولەمدى قارسى الۋعا بولەندى، ەلىمىزدىڭ جاڭا تۇردەگى قولفوندارىنا سۇرانىس ەرەسەن كۇشەيدى، جاڭا ەنەرگيالى اۆتوكولىك، ليتي باتارەياسى، فوتوۆولتتىق ونىمدەر جۇڭگو جاساۋ كاسىبىنە جاڭا اجار قوستى. جۇڭگو تالىقپاي تالپىنۋ رۋحى ارقىلى بيىك بەلەسكە ۇمتىلدى، بارلىق جەردە كۇن سايىن تۇلەجىپ، اي سايىن جاڭارعان جاسامپاز جالىندى بەينە جارىققا شىقتى.
وسى جىلدا ءبىزدىڭ قادامىمىز ايبىندى بولدى. چىڭدۋ جوعارى مەكتەپ وقۋشىلارى جازعى سپورت جارىسى، حاڭجوۋ ازيا سپورت جارىسى ىركەس - تىركەس تارتىمدى وتكىزىلىپ، دەنە تاربيە ساڭلاقتارى ەرلىكپەن ۇمتىلىپ، ۇزدىك ناتيجەلەر جاراتتى. دەمالىس كۇندەرىندەگى ساياحات ەرەكشە جاندانىپ، كينو بازارى قاباعات كۇسەتتەندى، ”قىستاق ەرەن دوپ جارىسى“، ”قىستاق ادەبيەت - كوركەمونەر ساۋىق كەشى“ جالىندى ومىرشەڭدىك بايقاتتى، تومەن كومىر قىشقىل گازدى تۇرمىس داعدىسى بىرتىندەپ سالتقا اينالدى، مەيىرگە تولى تىرشىلىك تىنىسى، قالپىنا كەلگەن قاربالاستىق ارىن ادامداردىڭ تاماشا باقىتتى ومىرگە تالپىنىسىن بەينەلەۋمەن بىرگە، ومىرشەڭدىككە تولى، جاندى دا جالىندى جۇڭگو وبرازىن ايگىلەدى.
وسى جىلدا ءبىزدىڭ قادامىمىز مىعىم سەنىمگە تولى بولدى. جۇڭگو − ۇلى مەملەكەت، ۇلى وركەنيەتكە مۇراگەرلىك ەتكەن. وسىناۋ كەڭ - بايتاق توپىراقتا، ۇلان - قايىر قۇمدى القاپتاعى تىرشىلىك تىنىسى، چاڭجياڭنىڭ وڭتۇستىگىندەگى سەبەزگىلەگەن مايدا جاڭبىر تالاي جىلعى تاريحتى ەسكە ءتۇسىرىپ، قيالدى قيىر بولاشاققا سامعاتادى؛ توعىز يرەك حۋاڭحى وزەنى، اقجال تولقىندى اساۋ چاڭجياڭ دارياسى كوڭىل تولقىنىن تاسىتىپ، اسقاق جىگەردى جاني تۇسەدى. لياڭجۋداعى، ارليتوۋداعى وركەنيەت شۇعىلاسى، يىنشۇيداعى ساۋىت - سۇيەك جازۋى بۇگىنگى كۇنگە ۇزىلمەي جەتتى، سانشيڭدۇي مادەنيەت جاۋھارى، مەملەكەتتىك باسىلىم سارايى وركەنيەت تامىرىن جالعاستىرا ءتۇستى... بايتاق جۇڭحۋانىڭ تاريحى قانشاما ۇزاق، وركەنيەتى قانشاما ۇشان تەڭىز، بۇل ءبىزدىڭ سەنىمىمىزدىڭ نەگىزى، كۇش قايراتىمىزدىڭ سارقىلماس قاينارى.
جۇڭگو ءوزىن دامىتىپ قانا قويماي، دۇنيە جۇزىمەن بەلسەنە قاۋىشىپ، ءىرى ەلدىك جاۋاپكەرشىلىگىن ارقالادى. ءبىز جۇڭگو − ورتا ازيا ەلدەرى باسشىلار باس قوسۋىن، 3 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلىلەر تالقى مىنبەرىن ءساتتى وتكىزدىك، ءبىرسىپىرا نەگىزگى الاڭداعى ديپلوماتيالىق قيمىلدارعا دۇنيەنىڭ جەر - جەرىنەن سيلى قوناقتار كەلدى. مەن دە ءبىرسىپىرا مەملەكەتتەرگە ساپارلاپ، ءبىرسىپىرا حالىقارالىق ماجىلىستەرگە قاتىناسىپ، كوپتەگەن كونە دوستارمەن، جاڭا سەرىكتەرمەن ديدارلاسىپ، جۇڭگو قۋاتتاماسىن ءبولىسىپ، ءوزارا ورتاق تانىمدى تەرەڭدەتتىك. دۇنيە وزگەرىپ، جاڭالانىپ وتىرادى، بەيبىتشىلىك پەن دامۋ باستان - اياق نەگىزگى اۋەن بولا بەرەدى، سەلبەسىپ تەڭ يگىلىكتەنۋ باستان - اياق بۇلجىماس اقيقات بولماق.
العا باسۋ جولىندا داۋىل جانە بوران - شاشىننىڭ بولۋى قالىپتى قۇبىلىس. كەيبىر كاسىپورىندار تيجارات قىسىمىنا ءدوپ كەلدى، ءىشىنارا بۇقارا جۇمىستانۋ، تۇرمىس جاقتارىندا قيىنشىلىقتارعا ۇشىرادى، ءىشىنارا جەرلەردە تاسقىن اپاتى، تايفىڭ داۋىلى، جەر سىلكىنىسى سياقتى جاراتىلىستىق اپاتتار تۋىلدى، مەن بۇلاردىڭ بارلىعىن ەستەن شىعارعان ەمەسپىن. كوپشىلىكتىڭ داۋىلدان، جاۋىن - شاشىننان قورىقپاي، ءوزارا قارايلاسىپ، كومەكتەسىپ، سىن - سايىستارعا تايسالماي قارسى بەتتەپ، قامال الىپ، قيىنشىلىقتاردى جەڭۋى مەنى ايرىقشا اسەرلەندىردى. قاجىرلىلىقپەن ەڭبەك ەتكەن ديقاندار، مۇقالماس تاباندى جۇمىسشىلار، ەرلىكپەن اتويلاعان شارۋاشىلىق قۇرۋشىلار، وتباسى - وتانىن قورعاعان پەرزەنت اسكەرلەر، ءار سالا، ءار كاسىپتەگى ادامداردىڭ ءبار - ءبارى تەر توگىپ جاپالى ىستەۋدە، ءاربىر قاراپايىم جاندار تۇگەل ەرەكشە ۇلەس قوستى! حالىق ماڭگى ءبىزدىڭ بارلىق قيىنشىلىقتار مەن سىن - سايىستاردى جەڭۋدەگى ەڭ زور سۇيەنىشىمىز.
كەلەر جىلى − جاڭا جۇڭگو قۇرىلعاندىعىنىڭ 75 جىلدىعى. ءبىز جۇڭگو ۇلگىسىندەگى وسىزامانداندىرۋدى بۇلجىماي ىلگەرىلەتىپ، جاڭا دامۋ ۇستانىمىن تولىق، دالمە - ءدال، جاپپاي دايەكتىلەندىرىپ، جاڭا دامۋ ارناسىن جەدەل قالىپتاستىرىپ، جوعارى ساپالى دامۋدى ىلگەرىلەتىپ، دامۋ مەن حاۋىپسىزدىكتى ويداعىداي ءبىر تۇتاس جوسپارلاۋىمىز كەرەك. ورنىقتىلىق بارىسىندا ىلگەرىلەۋگە، ىلگەرىلەۋ ارقىلى ورنىقتىلىقتى جەبەۋگە، الدىمەن قۇرىپ، ونان سوڭ كۇشىنەن قالدىرۋعا تاباندى بولىپ، ەكونوميكانىڭ قايتا ورلەۋ جانە جاقسارۋ جاعدايىن بەكەمدەپ جانە كۇشەيتىپ، ەكونوميكانىڭ ورنىقتى قاداممەن الىسقا جەتۋىن جۇزەگە اسىرۋىمىز كەرەك. رەفورما جاساۋدى، ەسىك اشۋدى جاپپاي تەرەڭدەتىپ، دامۋ سەنىمىن اناعۇرلىم سەرپىلتىپ، ەكونوميكانىڭ ومىرشەڭدىك كۇشىن ارتتىرىپ، اناعۇرلىم زور تەبىنمەن وقۋ - اعارتۋدى جۇرگىزىپ، عىلىم - تەحنيكانى گۇلدەندىرىپ، دارىندىلاردى جەتىلدىرۋ كەرەك. شياڭگاڭنىڭ، اۋمىننىڭ ءوز ابزالدىلىقتارىن ساۋلەلەندىرۋىن ۇزدىكسىز قولداپ، مەملەكەتتىڭ دامۋ كەلەلى جاعدايىمەن اناعۇرلىم ويداعىداي توعىسۋ بارىسىندا، ۇزاق ۋاقىت كوركەيۋىن، ورنىقتى بولۋىن ساقتاۋىمىز كەرەك. وتاننىڭ بىرلىككە كەلۋى تاريحي سوزسىزدىك، ەكى جاعالاۋداعى باۋىرلاستار قول ۇستاسا تىلەكتەس بولىپ، ۇلتتىڭ كوركەيۋ ۇلى داڭقىنان ورتاق يگىلىكتەنۋى كەرەك.
ءبىزدىڭ نىسانامىز وتە ايبىندى ءارى وتە قاراپايىم، سايىپ كەلگەندە، بۇقارانى ءتىپتى دە تاماشا تۇرمىسقا كەنەلتۋ بولىپ تابىلادى. بالالاردى باۋلۋ - وقىتۋ، جاستاردى جۇمىستاندىرۋ، دارىندىعا اينالدىرۋ، قارتتاردى ەمدەۋ - كۇتىمدەۋ ءارى وتباسى ءىسى، ءارى مەملەكەت ءىسى. كوپشىلىك بىرگە قۇلشىنىپ، بۇل ىستەردى ويداعىداي ىستەۋىمىز كەرەك. قازىر قوعامنىڭ ريتىمى وتە تەز، كوپشىلىكتىڭ بارلىعى قاربالاس، قىزمەت جانە تۇرمىس باسىمى وتە اۋىر. ءبىز مەيىرگە تولى، جاراسىمدى قوعامدىق راي جاراتىپ، سيىسىمدى ءارى جالىندى جاڭالىق اشۋ كەڭىستىگىن كەڭەيتىپ، قولايلى دا جايلى تۇرمىس شارت - جاعدايىن ازىرلەپ، كوپشىلىكتىڭ كوڭىل كۇيى شات - شادىمان، ءومىرىنىڭ ءماندى دە ءساندى بولۋىنا، ويلاعان تىلەكتەرىنە جەتە الۋىنا مۇمكىندىك جاساۋىمىز كەرەك.
كەزەكتە، دۇنيە جۇزىندەگى كەيبىر جەرلەردى سوعىس ءورتى شارپىپ تۇر. جۇڭگو حالقى بەيبىتشىلىكتىڭ قادىرىن اسا تەرەڭ تۇسىنەدى، ءبىز حالىقارالىق قوعاممەن بىرگە، ادامزاتتىڭ بولاشاعىن كوكەيدە ءتۇيىپ، حالىقتىڭ قۇت - ىرىسىن ەستە ساقتاپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتىپ، ءتىپتى دە تاماشا دۇنيە ءجۇزىن قۇرۋدى قالايمىز.
ءدال وسى ساتتە، ماقپال ءتۇن پەردەسى تارتىلىپ، بارلىق ۇيدە شىراقتار جارقىراي ساۋلە شاشۋدا. ءبىز بىرگە وتانىمىزدىڭ كوركەيىپ، قۇدىرەتتەنۋىنە، دۇنيە ءجۇزىنىڭ بەيبىت، تىنىش بولۋىنا ىزگى تىلەك تىلەيىك. كوپشىلىكتىڭ قاي - قاشان دا بايلىققا، باقىتقا كەنەلىپ، ىستەرىنىڭ ءساتتى، ساۋ - سالامات بولۋىن تىلەيمىن!
كوپشىلىككە راقىمەت!
قاينارى: شينجياڭ گازەتى
رەداكتورى: ريزا كامالبەك قىزى
جاۋاپتى رەداكتورى: ەرلان نۇقا ۇلى
