མི་རྟག་གསལ་འདེབས་ཀྱི་སྨོན་ལམ།མཁན་ཆེན་འཆི་མེད་རིག་འཛིན་གྱིས་མཛད། སྨོན་ལམ་འབུམ་ཕྲག་རྒྱ་མཚོ་ལ། ། དབང་འབྱོར་རྒྱལ་སྲས་སེམས་དཔའ་ཆེ། ། འཕགས་མཆོག་ཀུན་ཏུ་བཟང་པོ་ལ། ། གསོལ་བ་འདེབས་སོ་བྱིན་གྱིས་རློབས། ། བཀའ་དྲིན་ཅན་གྱི་བླ་མ་དང་། ། བསྙེན་ཅིང་བསྒྲུབས་པའི་ཡི་དམ་ལྷ། ། མཁའ་འགྲོ་དམ་ཅན་རྒྱ་མཚོ་ཡིས། ། བདག་བློ་ཆོས་ལ་བསྒྱུར་དུ་གསོལ། ། ཆོས་ལས་བསྒྲུབ་རྒྱུ་བདག་ལ་མེད། ། འདི་འགྲུབ་དཔའ་གདེང་གང་ཡང་མེད། ། མི་ཚེའི་ཕྱེད་ཀ་དེ་ལྟར་ཟད། ། ལོང་མེད་རྒྱུད་ལ་སྐྱེ་བར་ཤོག ། འཆི་བདག་ནུབ་ཁའི་གྲིབ་སོ་འདྲ། ། བཀག་པས་མི་ཁེག་ཚུར་ཚུར་ནུད། ། ལས་ཉོན་རྒྱ་མཚོ་སྐེམ་ནུས་པའི། ། ཟབ་དོན་མྱུར་དུ་བསྒོམ་ནུས་ཤོག ། ལོ་ཟླ་འདི་ནི་ཡུན་རེ་ཐུང་། ། རྒས་པ་འདི་ནི་བང་རེ་མགྱོགས། ། འདི་ལ་བསམ་ནས་ཚེ་འདིའི་ཆེད། ། བྱ་བྱེད་ཤོམ་ར་སྐྱུར་ནུས་ཤོག ། གཅིག་པུར་ཕྱི་མར་འགྲོ་ཉིན་མོ། ། དགེ་སྡིག་ཞེ་རྩིས་བྱེད་ཉིན་མོ། ། སེམས་ལ་བཞག་ནས་གང་ཤེས་ཀྱི། ། ཆོས་དེ་རྒྱུད་ལ་སྦྱོར་ནུས་ཤོག ། འཇིག་རྟེན་འདི་ནི་ཤུལ་དུ་འཇོག ། འགྲོག་པའི་གྲོགས་ནི་རྒྱབ་ཏུ་སྐྱུར། ། དེ་ལ་བསམས་ནས་དོན་མེད་ཀྱི། ། རྣམ་གཡེང་འབྲེལ་འདྲིས་གཅོད་ནུས་ཤོག ། བཟློག་མེད་ནད་ཆེན་ཐེབས་པའི་ཉིན། ། སྔ་འདང་ཕྱི་འདང་རྒྱག་པའི་ཉིན། ། བླ་མ་མ་གཏོགས་སྐྱབས་གཞན་མེད། ། རྒྱུན་དུ་གསོལ་བ་འདེབས་ནུས་ཤོག ། རང་ཉིད་མལ་དུ་ལྷུང་བའི་ཚེ། ། གཞན་ལ་ཡིད་སྨོན་བྱེད་པའི་དུས། ། ཆོས་ཀྱི་གདེང་རེ་ཡོད་དགོས་པས། ། ཡང་ཡང་གསལ་འདེབས་ནུས་པར་ཤོག ། གཟེར་ཆེན་གཟེར་ཆུང་རྒྱུག་པའི་དུས། ། གཡས་སྐྱོར་གཡོན་སྐྱོར་དགོས་པའི་དུས། ། རང་དོན་ཚགས་སུ་ཚུད་པར་ཤོག ། སྲོག་གི་ཉག་ཐག་ཆད་པའི་ཉིན། ། ལུས་འདི་ས་རྡོར་འགྱུར་བའི་ཉིན། ། འདི་སྣང་རང་མཚང་སྟོན་པས་ན། ། ཚེ་འདིའི་ཞེན་པ་ཆོད་པར་ཤོག །ཅེས་པ་འདི་ཡང་ཚེ་མི་རྟག་པ་བསྒོམ་པའི་ཉམས་ལེན་གྱི་ཉེར་མཁོར་དམིགས་ཏེ་འཆི་མེད་རིག་འཛིན་གྱིས་སོ། །
