ཨོཾམཎིཔདྨེཧཱུྃ། ཨོཾམཎིཔདྨེཧཱུྃ།
ཨོཾམཎིཔདྨེཧཱུྃ། ཨོཾམཎིཔདྨེཧཱུྃ།
ཨོཾམཎིཔདྨེཧཱུྃ།
ཚང་མས་བསྔོ་བ་སྨོན་ལམ་དང་མ་ཎི་རེ་འདོན་རོགས་ཞུ།
སངས་རྒྱས་འོད་དཔག་མེད་ཀྱི་མཚན་ནི།
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་འོད་དཔག་ཏུ་མེད་པ་ལ་ཕྱག་འཚལ་ལོ།། མཆོད་དོ་སྐྱབས་སུ་མཆིའོ།།
སངས་རྒྱས་འོད་དཔག་མེད་ལ་གསོལ་བ་འདེབས། །
བདག་གིས་བླ་མེད་བྱང་ཆུབ་སེམས་བསྐྱེད་ནས། །
དགེ་རྩ་མཐའ་དག་བདེ་ཆེན་ཞིང་མཆོག་ཏུ། །
སྐྱེ་ཕྱིར་བསྔོ་ན་འགྲུབ་པར་བྱིན་གྱིས་རློབས། །
མི་རྟག་གསལ་འདེབས་ཀྱི་སྨོན་ལམ།
མཁན་ཆེན་འཆི་མེད་རིག་འཛིན་གྱིས་མཛད།
སྨོན་ལམ་འབུམ་ཕྲག་རྒྱ་མཚོ་ལ། །དབང་འབྱོར་རྒྱལ་སྲས་སེམས་དཔའ་ཆེ། །འཕགས་མཆོག་ཀུན་ཏུ་བཟང་པོ་ལ། །གསོལ་བ་འདེབས་སོ་བྱིན་གྱིས་རློབས། །བཀའ་དྲིན་ཅན་གྱི་བླ་མ་དང་། །བསྙེན་ཅིང་བསྒྲུབས་པའི་ཡི་དམ་ལྷ། །མཁའ་འགྲོ་དམ་ཅན་རྒྱ་མཚོ་ཡིས། །བདག་བློ་ཆོས་ལ་བསྒྱུར་དུ་གསོལ། །ཆོས་ལས་བསྒྲུབ་རྒྱུ་བདག་ལ་མེད། །འདི་འགྲུབ་དཔའ་གདེང་གང་ཡང་མེད། །མི་ཚེའི་ཕྱེད་ཀ་དེ་ལྟར་ཟད། །ལོང་མེད་རྒྱུད་ལ་སྐྱེ་བར་ཤོག །འཆི་བདག་ནུབ་ཁའི་གྲིབ་སོ་འདྲ། །བཀག་པས་མི་ཁེག་ཚུར་ཚུར་ནུད། །ལས་ཉོན་རྒྱ་མཚོ་སྐེམ་ནུས་པའི། །ཟབ་དོན་མྱུར་དུ་བསྒོམ་ནུས་ཤོག །ལོ་ཟླ་འདི་ནི་ཡུན་རེ་ཐུང་། །རྒས་པ་འདི་ནི་བང་རེ་མགྱོགས། །འདི་ལ་བསམ་ནས་ཚེ་འདིའི་ཆེད། །བྱ་བྱེད་ཤོམ་ར་སྐྱུར་ནུས་ཤོག །གཅིག་པུར་ཕྱི་མར་འགྲོ་ཉིན་མོ། །དགེ་སྡིག་ཞེ་རྩིས་བྱེད་ཉིན་མོ། །སེམས་ལ་བཞག་ནས་གང་ཤེས་ཀྱི། །ཆོས་དེ་རྒྱུད་ལ་སྦྱོར་ནུས་ཤོག །འཇིག་རྟེན་འདི་ནི་ཤུལ་དུ་འཇོག །འགྲོག་པའི་གྲོགས་ནི་རྒྱབ་ཏུ་སྐྱུར། །དེ་ལ་བསམས་ནས་དོན་མེད་ཀྱི། །རྣམ་གཡེང་འབྲེལ་འདྲིས་གཅོད་ནུས་ཤོག །བཟློག་མེད་ནད་ཆེན་ཐེབས་པའི་ཉིན། །སྔ་འདང་ཕྱི་འདང་རྒྱག་པའི་ཉིན། །བླ་མ་མ་གཏོགས་སྐྱབས་གཞན་མེད། །རྒྱུན་དུ་གསོལ་བ་འདེབས་ནུས་ཤོག །རང་ཉིད་མལ་དུ་ལྷུང་བའི་ཚེ། །གཞན་ལ་ཡིད་སྨོན་བྱེད་པའི་དུས། །ཆོས་ཀྱི་གདེང་རེ་ཡོད་དགོས་པས། །ཡང་ཡང་གསལ་འདེབས་ནུས་པར་ཤོག །གཟེར་ཆེན་གཟེར་ཆུང་རྒྱུག་པའི་དུས། །གཡས་སྐྱོར་གཡོན་སྐྱོར་དགོས་པའི་དུས། །ཡང་ཡང་དྲན་ཏེ་ད་ལྟ་ནས། །རང་དོན་ཚགས་སུ་ཚུད་པར་ཤོག །སྲོག་གི་ཉག་ཐག་ཆད་པའི་ཉིན། །ལུས་འདི་ས་རྡོར་འགྱུར་བའི་ཉིན། །འདི་སྣང་རང་མཚང་སྟོན་པས་ན། །ཚེ་འདིའི་ཞེན་པ་ཆོད་པར་ཤོག །
ཅེས་པ་འདི་ཡང་ཚེ་མི་རྟག་པ་བསྒོམ་པའི་ཉམས་ལེན་གྱི་ཉེར་མཁོར་དམིགས་ཏེ་འཆི་མེད་རིག་འཛིན་གྱིས་སོ། །
