དབེན་པའི་གྲོགས་ངན།།
ཕ་ཡུལ་སྤངས་ནས་མི་ཡུལ་གནས་དགོན་ཤོར།།
གང་དུ་གནས་ཀྱང་རྣམ་གཡེངས་ལམ་ལ་ཤོར།།
ཐོས་བསམ་བསྒོམ་གྱི་བྱ་བ་དགྲ་ལ་ཤོར།།
ཁ་པར་དེ་ནི་དབེན་པའི་གྲོགས་ངན་ཡིན།།
དབེན་པ་བསྟེན་ཀྱང་ཉོན་མོངས་ནང་ནས་འཕེལ།།
གཅིག་པུར་གནས་ཀྱང་དུག་གསུམ་ལག་ནས་འཕེལ།།
ཕྱི་ལ་ཐོ་བཞག་ནང་ནས་རྣམ་རྟོག་འཕེལ།།
ཁ་པར་དེ་ནི་དབེན་པའི་གྲོགས་ངན་ཡིན།།
གྲོགས་ངན་ཕྱི་ནས་བྲལ་ཀྱང་ནང་དུ་གབ།།
ལུས་ངག་དབེན་ཀྱང་སེམས་ནི་མི་དབེན་རྒྱུ།།
རྣམ་རྟོག་མ་སྐྱེ་སྐྱེས་པ་ཆུ་ལྟར་འཁྲུགས།།
ཁ་པར་དེ་ནི་དབེན་པའི་གྲོགས་ངན་ཡིན།།
རང་གི་མཆེད་ལྕམ་གྲོགས་ཀྱི་བཟའ་ཟླ་དང་།།
སྦྱིན་བདག་ཁྱིམ་སོགས་མཛེས་པའི་གཟུགས་སྒྲ་ལ།།
ཆགས་སེམས་སློང་མཁན་ཆོས་མིན་སྟོན་པ་པོ།།
ཁ་པར་དེ་ནི་དབེན་པའི་གྲོགས་ངན་ཡིན།།
དབེན་པར་སྡོད་པ་མི་གཙོ་སྡོད་ཚུལ་གཙོ།།
ཆོས་པའི་གཟུགས་ཀྱི་ཆོས་མིན་བྱ་བར་གཡེངས།།
ལུས་པོ་དགེ་ཡང་བསམ་པ་མི་དགེ་རྒྱུ།།
ཁ་པར་དེ་ནི་དབེན་པའི་གྲོགས་ངནཡིན།།
དགའ་བའི་ཕྱོགས་ལ་འདོད་ཞེན་ཆགས་པ་སྐྱེས།།
མི་དགའི་ཕྱོགས་ལ་ཞེ་སྡང་ཁོང་ཁྲོ་ཟ།།
ཁ་པར་ལམ་ནས་ཉོན་མོངས་ཆགས་སྡང་སློང་།།
ཁ་པར་དེ་ནི་དབེན་པའི་གྲོགས་ངན་ཡིན།།
བསྟན་དགྲ་ཕྱི་ནས་མི་ཡོང་ནང་ནས་འབྱུང་།།
བར་ཆད་ཕྱི་ནས་མི་གཏོང་ནང་ནས་གཏོང་།།
དམ་སྡོམ་གཟུགས་ཅན་མ་ཤོར་གཟུགས་མེད་ཤོར།།
ཁ་པར་དེ་ནི་དབེན་པའི་གྲོགས་ངན་ཡིན།།
དབེན་པའི་སྦུག་ན་གསང་བའི་ཨང་གྲངས་མཚར།།
དབེན་པའི་སྦུག་ན་གསང་གཏམ་ཡིག་ཆུང་མཚར།།
དབེན་པའི་སྦུག་ན་གསང་བའི་བརྙན་དཔར་མཚར།།
ཁ་པར་དེ་ནི་དབེན་པའི་གྲོགས་ངན་ཡིན།།
བསྐྱེད་རྫོགས་ལམ་ནས་ཁ་འདོན་གྲངས་བསོགས་ཀྱང་།།།
གཏན་ཆ་མ་ཐོབ་ཡང་ཡང་ཁ་པར་བསྐྱེད།།
ཞི་གནས་ལྷག་མཐོང་གསལ་སྟོང་གནས་ཆ་ཤོར།།
ཁ་པར་དེ་ནི་དབེན་པའི་གྲོགས་ངན་ཡིན།།
ལྟོས་ཤིག་་ལྟོས་ཤིག་མ་གཡེངས་ཁ་པར་ལྟོས།།
བལྟ་བཞིན་བལྟ་བས་གཟུགས་སྒྲ་སྣང་བའི་གར།།
སྣ་ཚོགས་སྣང་བ་ཟད་མེད་འཁྲུལ་སྣང་དེ།།
ཆུ་ཟླའི་རྫུན་རིས་འདྲ་འམ་མི་འདྲ་སོམས།།
ཞེན་ཅིང་ཆགས་པའི་དགའ་སྡུག་བླང་དོར་དེར།།
སྣང་བཞིན་སྟོང་ལ་སྟོང་བཞིན་སྣང་བའི་ངོ་།།
བལྟ་བྱ་ཁ་པར་བལྟ་མཁན་རང་སེམས་གཉིས།།
གཅིག་གམ་གཉིས་སུ་དེ་གཉིས་བར་ལ་ལྟོས།།
ཅི་ཡང་མ་མཐོང་མ་བསམ་རང་སེམས་ལྟོས།།
གཟུགས་སྒྲའི་འཕྲུལ་སྣང་སེམས་ཀྱི་རང་གདངས་ལས།།
ཁ་པར་ཞེས་བྱ་མཚན་མ་ཡོད་མེད་ལྟོས།།
བལྟས་པས་མ་མཐོང་དྲན་པའི་ངོ་དེ་སྐྱོངས།།
མཐོང་ཐོས་བག་ཆགས་དུག་ལྔའི་རྟོག་ཚོགས་རྣམས།།
སྔོན་བསུ་རྗེས་མེད་རྒྱ་ཡན་ངང་ལ་ཐོངས།།
སླར་ཡང་སྣང་ཡང་བདག་འཛིན་བྲལ་བ་ཡིས།།
སྣང་གྲགས་དྲན་རྟོགས་དབེན་པའི་ཉམས་ལེན་མཛོད།།
ཞེས་གཙང་བཙུན་སྨོན་ལམ་བཟང་པོས་དབེན་པའི་གནས་ནས་རང་གི་རང་ལ་གདམས་པའོ། ༢༠༢༠
ཁྱེད་ཉིད་ནས་དོ་ཁུར་དང་རྒྱབ་སྐྱོར་གནང་བར་བཀའ་དྲིན་ཆེ།།
感谢您的关注和支持
འཕྲིན་སྟེགས་སུ་ནོར་འཁྲུལ་ཤོར་བ་འམ་ཡང་ན་མི་སྒེར་རམ་ཚོགས་པ་གང་གི་ཁེ་དབང་ལ་གནོད་པའི་ནང་དོན་ཡོད་ཚེ་མྱུར་དུ་ང་ཚོར་འབྲེལ་གཏུག་གནང་རོགས།
དམ་ཆོས་སྣང་གསལ་སྒྲོན་མེའི་མཛད་པ་པོའི་ལོ་རྒྱུས་མདོར་བསྡུསཞ ༡
དལ་འབྱོར་རྙེད་པར་དཀའ་བའི་སྐོར། ༧
