ལྷུག་རྩོམ་པདྨའི་ཟེའུ་འབྲུ།
ཉིས་སྟོང་ཉེར་གཉིས་ལོའི་དཔྱིད་ཟླ་ར་བ་དེ་ནི་ངེད་ཀྱི་དྲན་པའི་ཡོལ་གོ་རུ་ཆགས་པའི་གཏམ་རྒྱུད་ཀྱི་རེག་ཟིག་ཅིག་ལགས། དེ་ལྟ་ན་ང་ནི་དཔྱིད་ཟླ་དེ་གའི་མགྲོན་པོར་གྱུར་ཡོད་ལ། ཁྱེད་ཀྱང་ང་ཡི་སྙིང་ཁར་འབུས་པའི་གསར་བཞད་ཀྱི་མེ་ཏོག་རྐང་གཅིག་ཅི་ལ་མིན། ཁྱེད་རང་ཁོ་བོའི་ཉེ་འགྲམ་དུ་ལྷགས་ཏེ། སྙིང་གཏམ་ཤབ་ཤུབ་སྨྲ་ཞིང་སེམས་ཁོང་ལ་རི་རབ་ལྟར་ལྕི་བའི་གདུང་སེམས་གྲངས་མེད་སྤུངས་རྗེས། གློ་བུར་དུ་ཤུལ་མེད་རྗེས་མེད་དུ་གྱུར། ཁོ་བོས་ད་དུང་ཅི་ཞིག་དྲན་བཞིན་ཡོད། གཏམ་རྒྱུད་ལ་གཏམ་རྒྱུད་བརྒྱུས་པའི་ཨ་ལོང་བཞིན་གྱི་གཏམ་རྒྱུད་དེ་དག་ཡིན་ནམ། སླར་ཡང་རྒྱུས་ཡོད་ཀྱི་གོམ་སྒྲ་ཡང་མོ་ཞིག་ཉི་འོད་ཀྱི་ཕྱོགས་ནས་ང་ཡི་རྣ་ལམ་དུ་འཁོར་ཡོང་། གཡོ་བ་མེད་ཅིང་འཆོར་བ་མེད་པའི་ཁོ་བོའི་མིག་ཞགས་དམ་པོས་ཁྱེད་ཀྱི་གཟུགས་བརྙན་ལ་དཀྲིས་གསུམ་བརྒྱབ་སྟེ་རང་གི་མདུན་དུ་འཐེན། སྐབས་དེ་དག་ལ་མགོ་བོ་ཡང་དགྱེ་མི་ཐུབ་པའི་རང་ཉིད་ཇི་འདྲའི་ཉམ་ཆུང་ཞིག་རེད་ཨང་། སྐྱེ་བ་སྔོན་མ་ཞིག་ལ་བརྩེ་དུང་གི་བུ་ལོན་ཅི་ཞིག་གིས་ང་རང་མནར་དྲགས་སོང་བ་འདྲ། ཕྲལ་ཡུན་གང་ཞིག་ཡིན་རུང་ངས་ཁྱེད་རང་སྙིམ་པར་འཆིང་ནས་མཐོ་ནས་མཐོ་རུ་གདེག་འདོད་པ། ང་ཡིས་སུ་ལའང་མ་བཤད་པའི་གསང་གཏམ་འབའ་ཞིག་ཏུ་གྱུར་ཡོད།
@ཡོང་ཁུངས། ཟ་མ་ཏོག་འཕྲིན་སྟེགས།
ཕྱིར་མིག
ལྷུག་རྩོམ།
འཕྲིན་སྟེགས་སུ་ཚོགས་པ་དང་མི་སྒེར་གང་རུང་གི་ཁེ་དབང་ལ་གནོད་པའི་ནང་དོན་ཅན་ཡོད་ཚེ་མྱུར་དུ་འབྲེལ་གཏུགས་བྱོས་དང་དྲ་ལམ་ནས་གསུབ་ཆོག
འཕྲིན་སྟེགས་འདིར་བཀོད་པའི་བརྩམས་ཆོས་གང་ཡིན་རྩོམ་པ་པོ་དང་དོ་དམ་པས་ཆོག་མཆན་མ་ཐོབ་པར་ཅི་བསམ་གང་འདོད་དུ་བཤུ་འཁྱེར་དང་ཇི་མ་ཇི་བཞིན་དུ་བརྒྱུད་འགོད་སོགས་བྱེད་མི་ཆོག
རྩོམ་སྒྲིག་པ། རླུང་ནག་འཚུབ་མ།
འཕྲིན་སྟེགས་འདིར་དཔེ་ཀློག་ཟིན་བྲིས་གཙོས་པའི་དོན་ཚན་སྣ་ཚོགས་ཤིག་བཀོད་དང་འགོད་བཞིན་ཡོད་པས་སྐུ་ཉིད་ཕེབས་པར་དགའ་བསུ་ཞུ།
