ཉིན་ཤས་གོང་། ཚོང་རྟགས་གྲགས་ཅན་ཞིག་གི་སྲོལ་འབྱེད་པས་བརྙན་ཐུང་ཞིག་སྤེལ་ནས་གསུངས་དོན། ཁོང་གིས་ཁྱེར་བདེའི་ཐབ་ཀ་སྤྱད་དེ་ཆུ་སྐོལ་སྐབས། ཐབ་ཀར་གློ་བུར་དུ་འབར་གས་བྱུང་ནས། ཁོང་ལ་རྨས་སྐྱོན་བཟོས་པ་རེད། དྲ་གྲོགས་མི་ཉུང་བ་ཞིག་གིས་ཀྱང་རང་ཉིད་ལ་ཁྱེར་བདེའི་ཐབ་ཀ་འབར་གས་ཀྱི་གནས་ཚུལ་འཕྲད་མྱོང་བའི་སྐོར་གླེང་བ་མ་ཟད། ད་དུང་མི་ཁག་གཅིག་གིས་རང་ཉིད་ལ་རྨས་སྐྱོན་ཕོག་མྱོང་ཡོད་ཅེས་གསུངས་པ་རེད།
གཅིག ཁྱེར་བདེའི་ཐབ་ཀ་དེར་ཉེན་ཁ་ཆེན་པོ་ཡོད་དམ།
ཁྱེར་བདེའི་ཐབ་ཀར་རྒྱ་སྐད་དུ་གཱ་ཧྲེ་ལུའུ（卡式炉）ཟེར་ཞིང་། དེ་ནི་ཐད་ཀར་ཚ་སྣོན་བྱེད་པའི་ཁྱེར་བདེ་བའི་གཡོས་སྦྱོར་ཐབ་ཆས་ཤིག་ཡིན།
ཐབ་ཀ་དེ་སྟབས་བདེ་ལ་ཁྱེར་བདེ་བ་དང་། རྒྱ་ཁོག་དང་ཤ་བསྲེགས་སོགས་གཡོས་སྦྱོར་བྱེད་སྐབས་སྤྱོད་ཆོག་ལ། ཕྱི་རོལ་གྱི་སྒར་རྒྱག་ས་དང་གླིང་ག་གཏོང་ས། ཟ་ཁང་སོགས་སུ་རྒྱུན་དུ་མཐོང་ཐུབ། ཡིན་ནའང་གལ་ཏེ་བཀོལ་སྤྱོད་བྱེད་སྟངས་མ་འགྲིག་ན་དེར་ཉེན་ཁ་ཆེན་པོ་ཡོད་པ་རེད།
ཀོང་ཤིས་ཀུའེ་ལིན་དུ་ཡོད་པའི་ཟ་ཁང་ཞིག་གི་སྤྱི་པའི་བརྙན་མཐོང་ལས་མངོན་པར་གཞིགས་ན། འགྲུལ་པས་ཟ་མ་ཟ་བཞིན་པའི་སྐབས། སྒྲོག་ཙེའི་དཀྱིལ་དུ་བཞག་པའི་ཁྱེར་བདེའི་ཐབ་ཀ་གློ་བུར་དུ་འབར་གས་བྱུང་ནས། སྒྲོག་ཙེའི་ཐོག་གི་ཕོར་པ་དང་ཐུར་མ་སོགས་ཅ་དངོས་ཕྱོགས་བཞིར་གཏོར་བ་རེད།
ཀུའེ་ཀྲོའུ་པི་ཅེ་རུ། ཁྱིམ་ཚང་ཞིག་གིས་ཁྱེར་བདེའི་མེ་ཐབ་བཀོལ་ནས་བསྲེགས་ཟས་ཟ་བཞིན་པའི་སྐབས། ཁྱེར་བདེའི་ཐབ་ཀས་གློ་བུར་དུ་འབར་གས་བྱུང་ནས་ལྕགས་ཁོག་སེར་ཁ་གས་པ་དང་། མི་ཚང་མ་ཕྱོགས་བཞིར་བྲོས་སོང་བ་རེད། སྟབས་ལེགས་པ་ཞིག་ལ་རྨས་སྐྱོན་ཕོག་མཁན་བྱུང་མེད།
ཀྲེ་ཅང་ཐའེ་ཀྲོའུ་ཡི་སྲང་ལམ་ཞིག་གི་རྒྱ་ཁོག་ཟ་ཁང་ཞིག་ཏུ་དུ་ནག་ལང་ལོང་འཕྱུར་བ་དང་ཆབས་ཅིག་འབར་གས་ཀྱི་སྒྲ་ཡང་གྲགས་པ་རེད། མེ་ཟོན་མི་སྣས་ཛ་དྲག་ངང་མེ་གསོད་པ་བརྒྱུད་ས་གནས་ས་ཐོག་གི་མེ་བསད་ཡོད་པ་རེད། ཤེས་རྟོགས་བྱུང་བར་གཞིགས་ན། མེ་ཤོར་སའི་ཁང་པའི་ནང་ཁྱེར་བདེའི་ཐབ་ཀའི་རླངས་བླུག་སྣོད་ཆས་ཁ་ཤས་བཞག་ཡོད་པ་རེད།
གཉིས། ཁྱེར་བདེའི་ཐབ་ཀ་ཉེན་ཁ་ཆེ་བས། མུ་མཐུད་བཀོལ་སྤྱོད་བྱས་ན་ཆོག་གམ།
སྤྱིར་བཏང་དུ་ཁྱེར་བདེའི་ཐབ་ཀ་ཚང་མར་གནོན་བརྒལ་སྲུང་སྐྱོབ་སྒྲིག་ཆས་ཤིག་ཡོད་པས། དྲོད་ཚད་མཐོ་དྲགས་པ་དང་ཡང་ན་གནོན་ཤུགས་ཆེ་དྲགས་སྐབས། ཐབ་ཀའི་ནང་གི་ལྡེམ་རྩིབ་ཀྱི་འཇུ་སྒོ་ཕྱེ་ནས་འབར་རླངས་བླུག་སྣོད་བཙན་གྱིས་ཕྱིར་འཕར་བ་བྱས། སྒྲིག་ཆས་འདི་ནི་རྒྱལ་ཁབ་ཚད་གཞིའི་བཙན་ཤེད་ཀྱི་བླང་བྱ་ཞིག་ཡིན་པས། ཁྱེར་བདེའི་ཐབ་ཀར་ངེས་པར་དུ་ནང་འཇུག་བྱེད་དགོས།
ཁྱེར་བདེའི་ཐབ་ཀའི་འབར་རླངས་བླུག་སྣོད་ཅུང་སྲབ་པས། སྐྱེལ་འདྲེན་བྱེད་པའི་ལམ་བར་དུ་བཙིར་གནོན་དང་བརྡབ་གསིག་ཐེབས་ནས་བཟོ་ལྟ་འགྱུར་སྲིད། འབར་རླངས་བླུག་སྣོད་མ་སྤྱོད་པའི་སྔོན་ལ་ངེས་པར་དུ་དེའི་ཕྱི་ངོས་ལ་སྐྱོན་ཡོད་མེད་དང་དབུགས་ཤོར་ཡོད་མེད་ལ་བལྟ་དགོས། སྣོད་ཆས་ཡོ་བ་དང་མགོ་རྟིང་བསློགས་ནས་ནང་འཇུག་བྱེད་རིགས་གཏན་འགོག་བྱ་དགོས།
དེ་མིན། ཁྱེར་བདེའི་ཐབ་ཆས་སྤྱོད་སྐབས་འབར་རླངས་བླུག་སྣོད་དེ་ཚ་ཁུངས་དང་རྒྱང་ཐག་རིང་སར་འཇོག་དགོས། ཐབ་ཞབས་ལས་ཆེ་བའི་སླ་ང་བཀོལ་སྤྱོད་བྱ་མི་རུང་། དེ་ལྟར་མ་བྱས་ན་ཚ་ཚད་སླ་ངའི་ཞབས་བརྒྱུད་དེ་འབར་རླངས་བླུག་སྣོད་ཀྱི་ཚ་བ་མཐོ་རུ་བཏང་ནས་འབར་གས་བྱེད་སྲིད།
སྣང་ཚུལ་འདི་རིགས་ལ་ཁྱེར་བདེའི་ཐབ་ཀ་བཀོལ་མི་རུང་།
❌ཁྱེར་བདེའི་ཐབ་ཀ་དེ་དྲོད་ལེན་པའི་ཐབ་ཀ་བྱས་ནས་བཀོལ་མི་རུང་ལ། ཡང་ན་རླུང་མི་རྒྱུ་བའི་གནས་ཚུལ་འོག་བཀོལ་མི་རུང་།
❌རླུང་དྲག་པོ་དང་ཚ་རླུང་གི་འོག་ཏུ་བཀོལ་སྤྱོད་བྱ་མི་རུང་། རླུང་དྲག་པོས་མེ་ལྕེ་གསོད་སྲིད་པ་དང་། ཚ་རླུང་གིས་རླུང་གནོན་མཐོ་རུ་བཏང་ནས་འབར་གས་བྱེད་སྲིད།
❌འབར་སླ་བའི་དངོས་པོའམ་ཤེལ་ཡོལ་དང་ཐག་ཉེ་བའི་གནས་སུ་བཀོལ་མི་རུང་།
❌ཚ་གདུག་ཆེ་བའི་ཉི་ཟེར་འོག་གམ་ཡང་ན་ཉེ་འགྲམ་གྱི་མེ་དང་ཚ་ཁུངས་གཞན་ཡོད་པའི་ས་ཆར་བཀོལ་མི་རུང་།
བསྐྱར་ཞུས། རྒྱལ་མཚན།
ཞུ་དག ཚེ་རིང་རྒྱ་མཚོ།
རྩོམ་སྒྲིག་པ། ཚེ་རིང་སྒྲོལ་མ།
སྒྲ་འཇུག ཚེ་སྒྲོན།
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།
ཡིག་སྒམ་ཨང་གྲངས།
གལ་སྲིད་ཁྱེད་ལ་ཁུངས་བཙན་གྱི་གསར་འགྱུར་རམ་ཆ་འཕྲིན་ཆོབ་ཚ་པོ་དེ་འདྲ་ཡོད་ཚེ་ང་ཚོར་བསྐུར་རོགས་གནང་།
ང་ཚོའི་ཡིག་སྒམ་ནི་1132875981@qq.comཡིན།
རྩོམ་ཡིག་གཞིས་ཀ་རྩེའི་ཚགས་པར་ལས་ཁུངས་ཀྱི་ཡིག་སྒམ་rkzbszw@163.comལ་བསྐུར་རོགས་གནང་།
ང་ཚོའི་བརྙན་ཐུང་རྟགས་ཅན་日喀则广播电视台ཟེར་བར་དོ་ཁུར་གནང་ནས་ངོ་མཚར་ལྟད་མོར་གཟིགས་དང་།
