ཟླ་12པའི་ཚེས་16ཉིན། གཞིས་ཀ་རྩེ་གྲོང་ཁྱེར་ཨར་འདམ་བསྲེག་ཁུང་གིས་འཚོ་བའི་གད་སྙིགས་མཉམ་དུ་ཐག་གཅོད་བྱེད་པའི་རྣམ་གྲངས་ཚོད་ལྟའི་ལས་གཉེར་བྱེད་འགོ་ཚུགས་པའི་མཛད་སྒོ་དེ་ས་སྐྱ་རྫོང་དགེ་སྡིངས་གྲོང་རྡལ་མཐོ་གསར་གངས་ལྷ་ཨར་འདམ་ཚད་ཡོད་ཀུང་སིར་འཚོགས་པའི་ཐོག་ནས། གཞིས་ཀ་རྩེ་གྲོང་ཁྱེར་གྱིས་འཚོ་བའི་གད་སྙིགས་སྣོད་བཅུད་གཙང་སེལ་བྱེད་པའི་ལེའུ་གསར་པ་དངོས་སུ་འགོ་ཚུགས་པ་མཚོན་ཡོད།
ཨར་འདམ་བསྲེག་ཁུང་གིས་འཚོ་བའི་གད་སྙིགས་མཉམ་དུ་ཐག་གཅོད་བྱེད་པའི་རྣམ་གྲངས་ཚོད་ལྟ་གཉེར་སྐྱོང་བྱས་པ་དེ་ནི་སྔོན་ཆད་ས་སྦས་གཏོང་རྒྱུ་གཙོ་བོར་བྱེད་པའི་གད་སྙིགས་ཐག་གཅོད་བྱེད་སྟངས་མཇུག་འགྲིལ་བ་མཚོན་ཞིང་། རྣམ་གྲངས་དེ་ཧྭ་ཤིན་ཨར་འདམ་མ་རྐང་ཚད་ཡོད་ཀུང་སིས་ཁྱོན་མ་དངུལ་སྒོར་དུང་ཕྱུར་1.01བཏང་བ་དང་རྒྱ་ཁྱོན་མུའུ་49.88ཟིན་ཞིང་། སྔོན་དཔག་བྱས་ན་ཉིན་རེར་ཏུན་350ཐག་གཅོད་བྱེད་ཐུབ་ཀྱི་ཡོད་པ་རེད།
རྣམ་གྲངས་དེ་ཁག་གཉིས་སུ་དབྱེ་ཡོད་པ་དང་། ཁག་དང་པོ་ནི་སྔོན་ཚུད་ཐག་གཅོད་བཟོ་གྲྭ་ཡིན་པ་དང་དེ་བསམ་གྲུབ་རྩེ་ཆུས་ཆུ་ཤར་སྡེ་ཁུལ་དུ་གནས་ཡོད། དེའི་ནང་བསམ་གྲུབ་རྩེ་ཆུས་དང་། རྣམ་གླིང་རྫོང་། བཞད་མཐོང་སྨོན་རྫོང་། རྒྱལ་རྩེ་རྫོང་། པ་སྣམ་རྫོང་། རིན་སྤུངས་རྫོང་སོགས་རྫོང་5དང་ཆུས་1གི་འཚོ་བའི་གད་སྙིགས་བསྡུ་རུབ་ཐག་གཅོད་བྱ་རྒྱུ་དང་། ཐག་གཅོད་བྱས་རྗེས་ཀྱི་འཚོ་བའི་གད་སྙིགས་ཆེད་སྤྱོད་བཙིར་སྣོན་རླངས་འཁོར་བརྒྱུད་ས་སྐྱ་རྫོང་དགེ་སྡིངས་གྲོང་རྡལ་མཐོ་གསར་གངས་ལྷ་ཨར་འདམ་བཟོ་གྲྭར་དབོར་ནས་ཨར་འདམ་ཐོན་སྐྱེད་དང་གད་སྙིགས་ཐག་གཅོད་མཉམ་དུ་བྱ་རྒྱུ། ཁག་གཉིས་པ་ནི་སྔོན་ཚུད་ཐག་གཅོད་འཁོར་ཁང་དང་འབར་སླའི་དངོས་རྫས་(CMSW)བསྲེག་ཁང་ནང་བླུགས་པའི་ལེ་ལག་ཚང་བའི་སྒྲིག་བཀོད་ཡིན་པ་དང་། དེ་ས་སྐྱ་རྫོང་དགེ་སྡིངས་གྲོང་རྡལ་མཐོ་གསར་གངས་ལྷ་མེ་ཏོག་ཨར་འདམ་བཟོ་ཁུལ་དུ་གནས་ཡོད། སྔོན་ཚུད་ཐག་གཅོད་འཁོར་ཁང་གི་ཐག་གཅོད་བྱེད་ཁྱོན་ཉིན་རེར་ཏུན་50ཡིན་པ་དང་ལྷ་རྩེ་དང་། ས་སྐྱ། ངམ་རིང་བཅས་རྫོང་གསུམ་གྱི་འཚོ་བའི་གད་སྙིགས་གཙོ་བོ་བསྡུ་རུབ་གཙང་སེལ་བྱེད་ཀྱི་ཡོད་པ་རེད།
ཤེས་རྟོགས་བྱུང་བར་གཞིགས་ན། རྣམ་གྲངས་དེ་ནི་གཞིས་ཀ་རྩེའི་དམིགས་བསལ་གཉེར་སྐྱོང་རྣམ་གྲངས་ཐོག་མ་དེ་ཡིན་པ་མ་ཟད། བོད་རང་སྐྱོང་ལྗོངས་ཀྱིས་སྲིད་གཞུང་དང་སྤྱི་ཚོགས་ཀྱི་མ་རྩ་མཉམ་ལས་བྱེད་པའི་ལམ་སྲོལ་གསར་པ་ལག་བསྟར་བྱས་རྗེས་བསྐྲུན་ནས་འཁོར་རྒྱུག་བྱེད་པའི་དམིགས་བསལ་གཉེར་སྐྱོང་རྣམ་གྲངས་ཐོག་མ་དེའང་ཡིན་པ་རེད།
རྣམ་གྲངས་དེ་ལག་ལེན་བསྟར་འགོ་ཚུགས་པ་དེས་གཞིས་ཀ་རྩེའི་ལྟེ་བའི་གྲོང་ཁུལ་དང་དེ་བཞིན་ཉེ་འཁོར་རྫོང་ཁོངས་ཀྱི་འཚོ་བའི་གད་སྙིགས་ཚན་རིག་དང་མཐུན་པའི་ངང་ཐག་གཅོད་བྱེད་པའི་དཀའ་གནད་བསལ་ནས་གཞིས་ཀ་རྩེའི་ཁོར་ཡུག་རྣམ་པ་ལེགས་སུ་ཕྱིན་ཏེ་མི་དམངས་ཀྱི་བདེ་སྐྱིད་ཚོར་ཤུགས་ཆེ་རུ་འགྲོ་རྒྱུ་མ་ཟད། རྒྱལ་ཁབ་ཀྱིས་དུས་བཀག་ལྟར་ཐཱན་རྩེར་སོན་དང་ཐཱན་སྙོམས་སྒྲིག་གི་དམིགས་ཚད་མངོན་འགྱུར་ཡོང་ཆེད་གཞིས་ཀ་རྩེའི་སྟོབས་ཤུགས་ལེགས་སྐྱེས་འབུལ་རྒྱུ་ཡིན་པ་རེད།
བསྐྱར་ཞུས། རྒྱལ་མཚན།
ཞུ་དག ཚེ་རིང་རྒྱ་མཚོ།
རྩོམ་སྒྲིག་པ། ཚེ་རིང་སྒྲོལ་མ།
ཡིག་སྒྱུར། ཚེ་རིང་སྒྲོལ་མ།
སྒྲ་འཇུག ཚེ་སྒྲོན།
ཡོང་ཁུངས། ཇོ་རིའི་འཕྲིན་སྟེགས།
ཡིག་སྒམ་ཨང་གྲངས།
གལ་སྲིད་ཁྱེད་ལ་ཁུངས་བཙན་གྱི་གསར་འགྱུར་རམ་ཆ་འཕྲིན་ཆོབ་ཚ་པོ་དེ་འདྲ་ཡོད་ཚེ་ང་ཚོར་བསྐུར་རོགས་གནང་།
ང་ཚོའི་ཡིག་སྒམ་ནི་1132875981@qq.comཡིན།
རྩོམ་ཡིག་གཞིས་ཀ་རྩེའི་ཚགས་པར་ལས་ཁུངས་ཀྱི་ཡིག་སྒམ་rkzbszw@163.comལ་བསྐུར་རོགས་གནང་།
ང་ཚོའི་བརྙན་ཐུང་རྟགས་ཅན་日喀则广播电视台ཟེར་བར་དོ་ཁུར་གནང་ནས་ངོ་མཚར་ལྟད་མོར་གཟིགས་དང་།
