ཧོ་མོའུ་པའོ་གཙོས་གྲོང་ཁྱེར་དུ་སོང་ནས“མི་བྱེད་པ་བཞི་དང་ཐད་ཀར་གཉིས”ཀྱི་རྣམ་པའི་ཐོག་ནས་སྐྱེ་ཁམས་ཁོར་ཡུག་ལྟ་ཞིབ་གནད་དོན་གྱི་དག་ཐེར་བྱ་བར་ལྟ་སྐུལ་མཛུབ་ཁྲིད་བྱས།
ཟླ11པའི་ཚེས10ཉིན། ཁུལ་ཨུའི་ཧྲུའུ་ཅི་ཧོ་མོའུ་པའོ་གཙོས་གྲོང་ཁྱེར་དུ་སོང་ནས “མི་བྱེད་པ་བཞི་དང་ཐད་ཀར་གཉིས”ཀྱི་རྣམ་པའི་ཐོག་ནས་སྐྱེ་ཁམས་ཁོར་ཡུག་ལྟ་ཞིབ་གནད་དོན་གྱི་དག་ཐེར་བྱ་བར་ལྟ་སྐུལ་མཛུབ་ཁྲིད་བྱེད་སྐབས། གནད་དོན་ལ་དམིགས་ནས་དག་ཐེར་དམ་འཛིན་བྱེད་པ་དང་ཕྱོགས་ཡོངས་ནས་ཕན་འབྲས་ཐོན་པ། འགན་འཁྲི་ཏན་ཏིག་འཁུར་བ་དང་ལྟ་སྐུལ་དོ་དམ་ནན་མོ་བྱས་ཏེ་མཐའ་ཚད་བརྟན་སྲུང་བྱ་དགོས་ཞེས་ནན་གྱིས་བསྟན།
གཙོས་མཁར་ཁུལ་གྱི་མཐའ་འཁོར་དང་ཟི་ལིང་ནས་ཁྲིན་ཏུའུ་བར་གྱི་ལྕགས་ལམ་གྱི་ཚད་ལྡན་དུམ་བུ་ལྔ་བའི་ལས་གཞིའི་ཨར་ལས་བྱ་ཡུལ་དུ། ཧོ་མོའུ་པའོ་ཡིས་རྡོ་སོལ་གྱི་སྦགས་བཙོག་ཕྱོགས་བསྡུས་བཅོས་སྐྱོང་དང་། ཨར་ལས་བྱ་ཡུལ་གྱི་ཐལ་རྡུལ་དོ་དམ་ཚོད་འཛིན། ཐོན་སྐྱེད་བདེ་འཇགས་སོགས་ཀྱི་བྱ་བར་རྒྱུས་ལོན་ཞིབ་མོ་བྱས། ཁོས་རྡོ་སོལ་གྱི་སྦགས་བཙོག་ཕྱོགས་བསྡུས་བཅོས་སྐྱོང་བྱེད་ཤུགས་ཆེ་རུ་བཏང་ནས་གྲོན་ཆུང་དང་ལེགས་བསྡུས་ཞིབ་གཉེར། ལྗང་མདོག་ཐཱན་ཉུང་གི་འཕེལ་རྒྱས་ལ་བསྐུལ་བ། ཐོན་སྐྱེད་བདེ་འཇགས་བྱ་བ་དམ་འཛིན་ནན་མོ་དང་ཞིབ་ཚགས་བྱས་ཏེ་བདེ་འཇགས་ཀྱི་ཆག་སྒོ་སྣ་ཚོགས་སྔོན་འགོག་མཐའ་གཅིག་ཏུ་བྱ་དགོས་ཞེས་ནན་གྱིས་བསྟན།
སྣ་བུག་གྲོང་རྡལ་གཡག་སྙིང་སྡེ་བ་རུ་ཧོ་མོའུ་པའོ་ཡིས་བཅའ་ཁྲིམས་དང་སྒྲིག་སྲོལ་གཞིར་འཛིན་པ་དང་བྱེད་ཐབས་སྣ་མང་སྤྱད་དེ། ཤུགས་ཆེན་པོས་གཏེར་རིའི་ཕྱོགས་བསྡུས་བཅོས་སྒྲིག་དང་སྐྱེ་ཁམས་ཉམས་གསོར་བསྐུལ་བ། ཁོར་ཡུག་སྲུང་སྐྱོང་ལྟ་ཞིབ་ཀྱི་ཚུར་ལན་གནད་དོན་དག་ཐེར་བྱ་རྒྱུར་ཕྱོགས་ཡོངས་ནས་དམ་འཛིན་བྱས་ཏེ་སྐྱེ་ཁམས་ཁོར་ཡུག་ཁྱབ་ཁོངས་ཀྱི་ཁྲིམས་འགལ་སྒྲིག་འགལ་གྱི་བྱ་སྤྱོད་ལ་ཞིབ་བཤེར་ཐག་གཅོད་ནན་མོ་བྱ་དགོས་ཞེས་ནན་གྱིས་བསྟན།
གཙོས་གྲོང་ཁྱེར་གྱི་འཚོ་བའི་གད་སྙིགས་སྦས་ཡུལ་དུ་ཧོ་མོའུ་པའོ་ཡིས་གད་སྙིགས་ཐག་གཅོད་མུ་མཐུད་དུ་ལེགས་སུ་གཏོང་བ་དང་དུས་བཅད་ལྟར་སིམ་ཁུ་ཐག་གཅོད་སྒྲིག་ཆས་ཞིབ་བཤེར་ཉམས་གསོ་བྱེད་པ་དང་འཚོ་བའི་གད་སྙིགས་གནོད་མེད་ཅན་གྱི་ཐག་གཅོད་ཆུ་ཚད་ཁྱོན་ཡོངས་ནས་མཐོ་རུ་བཏང་སྟེ། འཚོ་བའི་གད་སྙིགས་སྦས་ཡུལ་དུ་ཚད་ལྡན་ངང་བྱ་བ་སྤེལ་བ་དང་བདེ་འཇགས་ངང་འཁོར་སྐྱོད་ཐུབ་པར་འགན་ལེན་བྱ་དགོས་ཞེས་ནན་གྱིས་བསྟན།
ལིའུ་ཀྲི་ཅུན་དང་ཝང་གོ་ཅུན་ལྟ་ཞིབ་ཏུ་ཞུགས་ཡོད།
ལོ་ཙཱ་བ། རིན་ཆེན་སྐྱིད།
རྩོམ་སྒྲིག་པ། ཚེ་རིང་རྣམ་རྒྱལ།
རྩོམ་སྒྲིག་འགན་འཁུར་པ། སངས་རྒྱས་སྐྱབས།
ཞུ་དག་པ། རྡོ་རྗེ་ཚེ་རིང་།
ལྟ་སྐུལ་བ། ལི་པའེ་ཡུན། གཡུང་དྲུང་སྐྱབས།
