སྲོག་བླུ་ཚེ་ཐར་ལ་སྨོན་ལམ་ཚིགས་བཅད།
༄༅། །སོག་ཙནྡན་དགོན་ཕྱོགས་སུ་ཡོན་བདག་རྣམས་ཀྱི་སྲོག་བླུ་
ཚེ་ཐར་མང་པོ་བྱེད་ཡོང་འདུག་པ་དེའི་དུས་སུ་འདོན་རྒྱུ་
གནང་བའི་སྨོན་ལམ་ཚིགས་བཅད་སོགས། །
ལྔ་པ་ཆེན་པོའི་གསུང་།
ཀུན་ལ་སྲོག་གཅེས་དེ་ཕྱིར་ར་ལུགས་ཕྱུགས། །
འཆི་བདག་ལག་ནས་བླུས་ཏེ་རིང་པོ་རུ། །
འཚོ་ཐབས་མི་འཇིགས་སྐྱབས་ཀྱི་སྦྱིན་པའི་སྒོ། །
རྒྱུ་སྦྱོར་ཡོན་གྱི་བདག་པོས་ཆེ་བའི་དགེ །
རབ་དཀར་ལེགས་བྱས་ཀ་པུ་ར་ཡི་རྡུལ། །
འབུམ་ཕྲག་ལྷག་བསམ་ཟླ་བ་ལས་འཛགས་པས། །
མཁའ་མཉམ་སྐྱེ་རྒུའི་ཚ་གདུང་མ་ལུས་པ། །
ཡོངས་བཅིལ་ཕན་བདེའི་སྣང་བས་ཀུན་ཁྱབ་ཤོག །
ཁྱད་པར་དངོས་ཀྱི་བྱེད་པོ་ཡང་སྲིད་ཀུན། །
མི་ཡི་ལུས་ཐོབ་ཚེ་ཡང་རིང་དུ་འཚོ། །
ལོ་ཏོག་སྨན་རྣམས་མཐུ་ལྡན་རྣམ་སྨིན་དང་། །
རྒྱུ་མཐུན་བདག་པོའི་འབྲས་བུས་ཆེས་དཀར་ཤོག །
དཀོན་ཅོག་གསུམ་གྱི་ཐུགས་རྗེ་ཐོགས་པ་མེད། །
ཆོས་ཉིད་གདོད་ནས་དག་པ་འགྱུར་བ་བྲལ། །
ཆོས་ཅན་རྒྱུ་འབྲས་ནམ་ཡང་སླུ་མེད་ཕྱིར། །
ཇི་ལྟར་སྨོན་པ་ལྷུན་གྱིས་གྲུབ་པར་ཤོག །
གནས་སྐབས་སུ་ཡང་ཡུལ་ཕྱོགས་འདི་དག་ཏུ། །
མི་ནད་ཕྱུགས་ནད་འཐབ་རྩོད་འཁྲུག་སློང་སོགས། །
དུས་ཀྱི་ཆད་པ་མ་ལུས་ཀུན་ཞི་ཞིང་། །
བཀྲ་ཤིས་དགའ་སྟོན་དཔལ་གྱིས་ཁྱབ་པར་ཤོག །
ཅེས་སོག་ཙནྡན་དགོན་ཕྱོགས་སུ་ཡོན་བདག་རྣམས་ཀྱི་སྲོག་བླུ་ཚེ་ཐར་མང་པོ་བྱེད་ཡོང་འདུག་པ་དེའི་དུས་སུ་འདོན་རྒྱུའི་སྨོན་ལམ་ཞིག་དགོས་ཞེས་བླ་མ་བློ་བཟང་ཆོས་དཔལ་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་ཕུན་ཚོགས་དབང་པོའོ།།
