སྤྱི་ཚེས་17ཉིན་ཚོང་དོན་པུའུ་སོགས་སྡེ་ཁག་བརྒྱད་ཀྱིས་སྤྱི་ལོ་2025ལོའི་རླངས་འཁོར་རྙིང་ཚབ་གསར་བརྗེའི་ལས་དོན་སྐོར་གྱི་བརྡ་ཐོ་ཁྱབ་བསྒྲགས་བྱས་པ་རེད། རླངས་འཁོར་བརྗེ་འདོད་པའི་འཛད་སྤྱོད་པའི་ངོས་ནས་བརྗོད་ན། དེར་འགྱུར་ལྡོག་དང་ཕན་པ་གང་དག་ཡོད་དམ། གཤམ་ལ་ང་ཚོས་མཉམ་དུ་རྒྱུས་ལོན་བྱེད།
སྤྱི་ལོ་2025ལོར་རླངས་འཁོར་རྙིང་ཚབ་གསར་བརྗེའི་སྲིད་ཇུས་ཀྱིས་རླངས་འཁོར་བེད་མེད་དུ་བཏང་བ་དང་གསར་སྒྱུར་ལ་རྒྱབ་སྐྱོར་བྱེད་པའི་ཁྱབ་ཁོངས་རྒྱ་ཆེར་བཏང་བ་དང་། ཆ་རྐྱེན་དང་མཐུན་པའི་རྒྱལ་ཁབ་ཀྱི་དུས་མཚམས་བཞི་པའི་ཕྱིར་འབུད་ཚད་གཞིའི་འབར་སྣུམ་འགྲུལ་སྐྱེལ་རླངས་འཁོར་དེ་རིགས་བེད་མེད་དུ་གཏོང་བ་དང་གསར་སྒྱུར་གྱི་བྱེད་པའི་རླངས་འཁོར་གྱི་ཁ་གསབ་རེ་ཞུ་བྱེད་ཆོག་པའི་རླངས་འཁོར་རྙིང་པའི་ཁྱབ་ཁོངས་ནང་བཅུག་ཡོད།
འདི་ལོའི་སྤྱི་ཟླ་1ཚེས་1ཉིན་ནས་བཟུང་། གལ་ཏེ་འཛད་སྤྱོད་པའི་མིང་འོག་ཏུ་སྤྱི་ལོ་2012ལོའི་ཟླ་6ཚེས་30ཉིན་གྱི་གོང་ཐོ་འགོད་བྱས་པའི་རླངས་སྣུམ་རླངས་འཁོར་དང་། སྤྱི་ལོ་2014ལོའི་ཟླ་6ཚེས་30ཉིན་གྱི་གོང་ཐོ་འགོད་བྱས་པའི་ཁྲའེ་ཡིའུ་སྣུམ་དང་འབར་རྒྱུ་གཞན་པའི་འགྲུལ་སྐྱེལ་རླངས་འཁོར་ཡོད་པ་དང་། ཡང་ན་སྤྱི་ལོ་2018ལོའི་ཟླ་12ཚེས་31ཉིན་གྱི་གོང་ཐོ་འགོད་བྱས་པའི་ནུས་རྒྱུ་གསར་པའི་འགྲུལ་སྐྱེལ་རླངས་འཁོར་བཅས་ཡོད་ཚེ། ད་ཐེངས་ཀྱི་བེད་མེད་དུ་བཏང་ནས་གསར་བརྗེའི་ནང་ཞུགས་ཆོག ལྷག་པར་དུ་དོ་སྣང་བྱེད་དགོས་པ་ཞིག་ལ། བེད་མེད་དུ་བཏང་བའི་རླངས་འཁོར་རྙིང་པ་དེ་སྤྱི་ལོ་2025ལོའི་ཟླ་1པོའི་ཚེས་8ཉིན་གྱི་གོང་རེ་ཞུ་བྱེད་མཁན་གྱི་མིང་འོག་ཐོ་འགོད་བྱེད་དགོས།
རླངས་འཁོར་བེད་མེད་དུ་བཏང་ནས་གསར་བརྗེ་བྱེད་པའི་ཁ་གསབ་ཚད་གཞི་དེ་སྤྱི་ལོ་2024ལོ་དང་གཅིག་མཚུངས་ཡིན་པ་སྟེ། བེད་མེད་དུ་བཏང་ནས་ནུས་རྒྱུ་གསར་པའི་འགྲུལ་སྐྱེལ་རླངས་འཁོར་ཉོས་ཚེ་ཁ་གསབ་སྒོར་ཁྲི་2དང་། ཧྲེང་2.0དང་དེ་མན་གྱི་འབར་སྣུམ་འགྲུལ་སྐྱེལ་རླངས་འཁོར་ཉོ་བའི་ཁ་གསབ་སྒོར་ཁྲི་1.5ཡིན།
གཞན་ཡང་ད་ཐེངས་ཀྱི་སྲིད་ཇུས་གསར་པའི་ནང་། ད་དུང་རླངས་འཁོར་བེད་མེད་དུ་བཏང་ནས་གསར་བརྗེ་བྱེད་པའི་ལོ་འཁོར་བརྒལ་བའི་སྲིད་ཇུས་སྦྲེལ་མཐུད་ཡག་པོ་བྱེད་དགོས་པའི་སྐོར་དམིགས་སུ་བཀར་ནས་བཏོན་ཡོད། གལ་ཏེ་འཛད་སྤྱོད་པས་སྤྱི་ལོ་2024ལོའི་ཟླ་7ཚེས་25ཉིན་ནས་ཟླ་12ཚེས་31ཉིན་བར་ཁ་གསབ་ལ་མཁོ་བའི་དཔང་ཡིག་ཚང་མ་བླངས་ཐུབ་མེད་པ་མ་ཟད། སྤྱི་ལོ་2025ལོའི་ཟླ་2ཚེས་28ཉིན་གོང་འབྲེལ་ཡོད་དཔང་ཡིག་ཚང་མ་བླངས་ཚེ། སྤྱི་ལོ་2025ལོའི་རླངས་འཁོར་བེད་མེད་དུ་བཏང་ནས་གསར་བརྗེ་བྱེད་པའི་སྲིད་ཇུས་ཀྱི་རྒྱབ་སྐྱོར་ཁྱབ་ཁོངས་ནང་འཇུག་རྒྱུ།
རླངས་འཁོར་བརྗེ་རེས་གསར་བསྒྱུར་གྱི་ཐད། ད་ལོའི་སྲིད་ཇུས་གསར་པའི་ནང་རྒྱལ་ཡོངས་ཀྱི་རླངས་འཁོར་བརྗེ་རེས་གསར་བསྒྱུར་གྱི་ཁ་གསབ་ཚད་གཞི་མཐོ་ཤོས་གཅིག་གྱུར་གྱིས་གཏན་འཁེལ་བྱས་ཡོད། འཛད་སྤྱོད་པས་རླངས་འཁོར་རྙིང་པ་བཙོང་བ་མ་ཟད། ནུས་རྒྱུ་གསར་པའི་རླངས་འཁོར་ཉོ་བའི་ཁ་གསབ་མཐོ་ཤོས་སྒོར་ཁྲི་1.5དང་འབར་སྣུམ་རླངས་འཁོར་ཉོ་བའི་ཁ་གསབ་མཐོ་ཤོས་སྒོར་ཁྲི་1.3ཡིན།
གཞན་ཡང་། ད་ཐེངས་ཀྱི་སྲིད་ཇུས་ནང་འཛད་སྤྱོད་པ་ཚང་མས་རང་བྱུང་ལོ་འཁོར་གཅིག་གི་ནང་རླངས་འཁོར་བེད་མེད་དུ་བཏང་ནས་གསར་བརྗེ་བྱེད་པའི་ཁ་གསབ་ཐེངས་གཅིག་དང་རླངས་འཁོར་བརྗེ་རེས་གསར་བསྒྱུར་བྱེད་པའི་ཁ་གསབ་ཐེངས་གཅིག་ལོངས་སུ་སྤྱོད་ཆོག་པ་མ་ཟད། རླངས་འཁོར་གསར་པ་གཅིག་ལ་རླངས་འཁོར་བེད་མེད་དུ་བཏང་ནས་གསར་བརྗེ་བྱེད་པའི་ཁ་གསབ་བམ་ཡང་ན་བརྗེ་རེས་གསར་བསྒྱུར་བྱེད་པའི་ཁ་གསབ་གཉིས་ལས་གཅིག་ཁོ་ན་འདེམས་དགོས་པ་གསལ་པོ་བཟོས་ཡོད།
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།
རྩོམ་སྒྲིག་འགན་ཁུར་པ། བསྟན་འཛིན་འཇིགས་མེད།
དོ་དམ་པ། བསམ་གྲུབ་བསྟན་འཛིན།
