བརྙན་ལམ་ལེ་ཚན། གཏམ་དཔེའི་དོ་ར།
✦གཏམ་གྱི་སྒོ་མོ་འབྱེད་པའི་གསེར་གྱི་ལྡེ་མིག །✦
✦དཔེ་ཡི་ལུང་ལ་བརྒྱུས་པའི་ཚིག་གི་ཕྲེང་བ།།✦
✦དོ་ཤལ་རིན་ཆེན་རྒྱན་ལས་འགྲན་ཟླ་བྲལ་བའི།།✦
✦ར་བ་འདི་ནི་རིག་པའི་གཏེར་མཛོད་འདྲའོ།།✦
སྲིད་པའི་ཞལ་རྒྱུན། འདོན་ཐེངས་ཉིས་བརྒྱ་དང་སོ་དྲུག
བླུན་པོ་བརྒྱ་ཡི་གྲོས་འགོ་ལས། མཁས་པའི་སྐད་ཆ་ཚིག་གཅིག་དགའ།
གཏམ་འགྲེལ། མཁས་པས་བཤད་པའི་གཏམ་ལ་ཉན་རིན་ཡོད་པའི་དོན།
ཚིག་ངན་པ་བཤད་ན་མི་ལ་གནོད། ཆུ་རྙོག་མ་བཏུང་ན་ཕོ་བར་གནོད།
གཏམ་འགྲེལ། དུས་དང་རྣམ་པ་ཀུན་དུ་མི་གཞན་ལ་ཚིག་ངན་བཤད་མི་རུང་བའི་དོན།
རྫུན་བཤད་ནས་མི་ཚེ་མི་འཁྱོལ། རྐུ་རྐུས་ནས་བཟའ་ཚང་མི་གསོས།
གཏམ་འགྲེལ། དྲང་པོ་དྲང་གཞག་བྱེད་དགོས་པ་ལས་མགོ་བདེ་དྲན་འཕྲུལ་བྱེད་མི་རུང་བའི་དོན།
མི་ལ་དབང་མེད་ན། གཏམ་ལ་གྲོས་མེད།
གཏམ་འགྲེལ། མི་ལ་དབང་ཆ་མེད་ན་བཤད་པའི་གཏམ་ལ་ཉན་མཁན་མེད་པའི་དོན།
ས་ཟད་དེ་རྡོ་ལ་ཐུག ལག་ཟད་དེ་དཔུང་པར་ཐུག
གཏམ་འགྲེལ། འ་ཆད་འུ་ཐུག་པའི་དོན།
མི་ལ་སྐྱིད་རེས་སྡུག་རེས། ས་ལ་སྐྱ་རེས་སྔོ་རེས།
གཏམ་འགྲེལ། མི་ཚེ་རིང་པོར་སྐྱིད་སྡུག་གཉིས་ཀ་ཡོང་བའི་དོན།
བཟའ་རྒྱུ་མང་ན་ནད་ཡིན། བཤད་རྒྱུ་མང་ན་གྱོད་ཡིན།
གཏམ་འགྲེལ། བྱ་བ་གང་བྱེད་རུང་ཚད་དང་རན་པ་དགོས་པའི་དོན།
སྤྱི་ཁྱབ་ལྟ་ཞིབ། བསྟན་འཛིན་འཇིགས་མེད།
རྩོམ་སྒྲིག་པ། ལྷ་མོ། བསམ་གྲུབ་བསྟན་འཛིན།
རྩོམ་ཁུངས། སྒར་བརྙན་འཕྲིན་ལས་ཁུངས་བོད་ཡིག་རྩོམ་སྒྲིག་ཁང་།
