སྤྱི་ཚེས་23ཉིན། ཚོང་དོན་པུའུ་སོགས་ཚན་པ་ལྔ་ཡིས༼སྤྱི་ལོ་2025ལོའི་གློག་སྒུལ་རྐང་འཁོར་རྙིང་ཚབ་གསར་བརྗེས་ཀྱི་ལས་དོན་ཡག་པོ་བསྒྲུབ་རྒྱུའི་སྐོར་གྱི་བརྡ་ཐོ༽ཡོངས་བསྒྲགས་བྱས་པ་དང་། བརྡ་ཐོའི་ནང་། སྤྱི་ལོ་2025ལོའི་ཟླ་བ་1ཚེས་1ཉིན་ནས་བཟུང་། གློག་སྒུལ་རྐང་འཁོར་རྙིང་ཚབ་གསར་བརྗེས་ཀྱི་ལས་དོན་མུ་མཐུད་བསྒྲུབ་དགོས་ཞེས་བསྟན་ཡོད། ཞིབ་ཕྲའི་ནང་དོན་གཤམ་གསལ་ལྟར་རེད་འདུག
བརྡ་ཐོའི་ནང་། འཛད་སྤྱོད་པ་མི་སྒེར་ནས་ཟོག་རོར་གཏོང་རན་པ་དང་རྙིང་པ་ཆགས་པའི་གློག་སྒུལ་རྐང་འཁོར་བཙོངས་ནས་གསར་པ་ཉོ་སྒྲུབ་བྱེད་པར་རྙིང་ཚབ་གསར་བརྗེས་ཀྱི་ཁ་གསབ་སྤྲོད་དགོས་པའི་བླང་བྱ་བཏོན་ཡོད། ཁ་གསབ་ཚད་གཞི་ནི་ཚོང་དོན་པུས་ས་གནས་ཁག་གིས་དོན་དངོས་དང་ཟུང་སྦྲེལ་བྱ་རྒྱུར་མཛུབ་ཁྲིད་བྱས་ནས་གཏན་འཁེལ་བྱ་རྒྱུ་མ་ཟད་ལོ་གོང་མའི་ཁ་གསབ་ཚད་གཞི་དང་སྦྲེལ་མཐུད་ཐུབ་པ་བྱས་ཏེ་ལས་དོན་དེ་བརྟན་པོའི་ངང་བར་བརྒལ་ཐུབ་པ་བྱ་རྒྱུ་རེད།
བརྡ་ཐོའི་ནང་། ཁ་གསབ་སྤྲོད་ཡུལ་དང་ཁ་གསབ་སྤྲོད་ཐབས་སྔར་བས་ཁ་གསལ་བཟོ་རྒྱུ་དང་། ཕྱིར་ཚོང་ལས་དོན་ཚད་ལྡན་བཟོ་བ་དང་རྙིང་པ་ཚུར་བསྡུའི་ལས་དོན་ལེགས་སུ་གཏོང་རྒྱུ། སྲིད་ཇུས་དྲིལ་བསྒྲགས་བྱེད་ཤུགས་ཆེ་རུ་གཏོང་རྒྱུ་སོགས་ཀྱི་བླང་བྱ་བཏོན་ཡོད། ས་གནས་ཁག་གིས་ཁ་གསབ་རེ་ཞུ་དང་ཞིབ་དཔྱད། མ་དངུལ་གཏོང་སྤྲོད་སོགས་བྱེད་པའི་འགྲོ་ལུགས་སྟབས་བདེ་རུ་གཏོང་རྒྱུར་མཛུབ་ཁྲིད་བྱེད་པ་དང་། ཁེ་ལས་ཀྱི་ཁས་ལེན་ལམ་སྲོལ་དོན་འཁྱོལ་བྱེད་པ། བྲིན་འཚོང་བྱེད་མཁན་ཚོང་པས་རྙིང་པ་ཚུར་བསྡུ་བ་དང་གསར་པ་ཉོ་བ། འཁོར་བྱང་བཟོ་རོགས་བྱེད་པ་སོགས་ཀྱི་ཞབས་ཞུ་མཁོ་འདོན་བྱ་རྒྱུར་སྐུལ་མ་གཏོང་བ་བཅས་བྱས་ཏེ་འཛད་སྤྱོད་པར་སྟབས་བདེ་གང་ལེགས་བསྐྲུན་རྒྱུ་རེད། རྙིང་ཚབ་གསར་བརྗེས་ཀྱི་བྱེད་སྒོ་སྡེ་ཁུལ་དུ་སྤེལ་བ་དང་ཚོང་ཁང་དུ་སྲིད་ཇུས་གསལ་འགྲེལ་པར་རིས་སྦྱོར་བ། དྲན་སྐུལ་འཕྲིན་ཐུང་བསྐུར་བ། གསར་འགྱུར་སྨྱན་སྦྱོར་སོགས་ཀྱི་བྱ་ཐབས་སྤྱད་དེ་དྲིལ་བསྒྲགས་བྱེད་ཤུགས་ཆེ་རུ་གཏོང་བ་བཅས་བྱས་ནས་འཛད་སྤྱོད་པ་ཚང་མས་ཤེས་གང་ཐུབ་བྱེད་དགོས་ཀྱི་ཡོད།
གོམ་སྟབས་རྗེས་མར། ས་གནས་ཁག་གི་ཚོང་དོན་གཙོ་འགན་སྡེ་ཚན་གྱིས་ད་དུང་ས་གནས་མི་དམངས་སྲིད་གཞུང་དང་གློག་སྒུལ་རྐང་འཁོར་གྱི་བདེ་འཇགས་ཉེན་ཁ་བཅོས་སྒྲིག་ལས་དོན་ཚན་པའི་གཅིག་གྱུར་འགོ་ཁྲིད་འོག ས་ཁོངས་དེ་གའི་གློག་སྒུལ་རྐང་འཁོར་རྙིང་ཚབ་གསར་བརྗེས་ལས་དོན་ཡག་པོ་བསྒྲུབ་དགོས་ཞེས་བསྟན་ཡོད་པ་རེད།
ཡོང་ཁུངས། བོད་ལྗོངས་ཉིན་རེའི་ཚགས་པར་བོད་ཡིག་སྨྱན་སྦྱོར་ལྟེ་གནས།
རྩོམ་སྒྲིག་འགན་ཁུར་པ། བསྟན་འཛིན་འཇིགས་མེད།
དོ་དམ་པ། བསམ་གྲུབ་བསྟན་འཛིན།
