གྲོང་ཆོག་ལ་འགྲོ་ཚུལ་གཡུ་ཁོག་བླ་མའི་
ཞལ་རྒྱུན་སྐོར།
དེའང་གཡུ་ཁོག་བླ་མས་ང་ཚོར་འདི་ལྟར་གསུངས་བྱུང་། ཁྱེད་ཅག་གྲོང་ཆོག་ལ་འགྲོ་བའི་སྐབས་སུ། དང་པོ་ཁྱིམ་ཚང་དེའི་ཤི་གསོན་གང་གི་ཆེད་ཡིན་ཡང་།དེ་ཉིད་དམིགས་ཡུལ་གཙོ་བོར་བཟུང་སྟེ། སེམས་ཅན་ཐམས་ཅད་ལ་སྡུག་བསྔལ་བྲལ་འདོད་ཀྱི་སྙིང་རྗེ་དང་། བདེ་བ་ལྡན་འདོད་ཀྱི་བྱམས་པ་རེ་རང་རྒྱུད་ལ་ཨེ་སྐྱེ་ལྟོས་ལ། བསམ་བཟང་དེ་འདྲ་ཞིག་གི་གཞི་ཞོག་ལ་ཆོ་ག་གསུངས།
རབ་ན་བསྐྱེད་རྫོགས་ཤེས་མཁན་ཡང་ཡོད་གྱི་རེད། དེ་མེད་ཀྱང་ཚིག་རྗེས་དོན་དྲན་བྱས་ཏེ། ཆོ་ག་གསུང་མཁན་ཡང་ཡོད་རྒྱུ་རེད། འོན་ཀྱང་། བསྐྱེད་རྫོགས་མ་ཟད། ཚིག་རྗེས་དོན་དྲན་ཤེས་མཁན་ཡང་དཀོན་མོ་ཡིན་ངེས། མདོར་ན། བསམ་པ་བཟང་པོ་ཞིག་གི་ཐོག་ནས་ཆོ་ག་གསུངས་དང་། དེས་འགྲིག་ཡོད་པ་རེད་ཅེས་ཡང་ཡང་གསུངས་བྱུང་།གཞན་ཡང་འདི་ལྟར། སྤྱིར་ན་སྦྱོར་བ་སེམས་བསྐྱེད་དམ་པ་དང་། དངོས་གཞི་དམིགས་མེད་དམ་པ། མཇུག་བསྔོ་བ་དམ་པ་ཞེས་ཟེར་བ་ཡིན་ཡང་། འོན་ཀྱང་། དངོས་གཞི་དམིགས་མེད་དམ་པ་ཟེར་བ་དེ་ཕྱག་རྒྱ་ཆེན་པོ་དང་། རྫོགས་པ་ཆེན་པོ། དབུ་མ་ཆེན་པོ་རྟོགས་ཡོད་མཁན་ཞིག་ཡིན་ན་མ་གཏོགས། དངོས་གཞི་དམིགས་མེད་དམ་པ་ཟེར་བ་དེ་འོང་ཧ་ཅང་དཀའ་མོ་ཡིན་ངེས། དེས་ན་ཁོང་བོས་དེར་དངོས་གཞི་དམིགས་མེད་དམ་པ་ཞེས་མི་ཟེར་བར། དངོས་གཞི་འདུན་པ་བཟང་པོ་ཞེས་ཟེར་གྱིན་ཡོད། གང་ལྟར་ཁྱེད་ཅག་གིས་ཆོ་ག་གསུང་ཚེ། བྱམས་སྙིང་རྗེ་དང་ཆོ་གའི་ལྷ་ཞི་ཁྲོ་གང་ཡིན་པ་དེར། དད་པ་དང་མོས་གུས་མ་བྲལ་བའི་འདུན་པ་བཟང་པོ་ཞིག་གི་ངང་ནས། ཆོ་ག་རང་ཉིད་ཀྱིས་ཤེས་ཚོད་ཅིག་གསུང་རྒྱུ་དང་། ཆོ་ག་ཆེན་པོ་མ་ཤེས་ཀྱང་། མ་ཎི་དང་ལྟུང་བཤགས། བཟང་སྤྱོད་སོགས་གཙང་མ་ཞིག་གསུངས་ལ། ཕྱིར་ཁྱིམ་ལ་འགྲོ་རན་ཁར། ཤི་གསོན་གང་ལ་ཆོ་ག་གསུངས་པ་ཡིན་ན། དེའི་ཐོག་དྲངས་པའི་སེམས་ཅན་ཐམས་ཅད་ཀྱི་དོན་ལ་དགེ་བ་བསྔོས། དེའང་ངེད་ཅག་ལ་དགེ་བ་བསྔོ་བྱེད་ཧ་ཅང་ཡག་པོ་ཡོད་དེ།
ཕྱོགས་དུས་རྒྱལ་བ་སྲས་བཅས་དགོངས། །
ཚོགས་གཉིས་རྫོགས་ལ་རྗེས་ཡི་རང་། །
ཞེས་པའི་བསྔོ་བ་དེ་གསུངས་དང་། དེ་ལས་ལྷག་པའི་དགེ་བ་བསྔོ་བྱེད་ཡག་པོ་ཞིག་ཡོད་ནི་མ་རེད། དེས་འགྲིག་སོང་པ་རེད། དེ་ནས་ཚང་མ་སྐྱིད་སྐྱིད་གྱིས་སྡོད་ལ། ཏ་ལེན་གྱི་ནང་དུ་ཤ་ཡོད་ན་ཚུར་ལོངས་ལ་ཟོས། སྐྱིད་པོ་གྱིས་སྡོད་དང་གོ་ཆོད་ཟིན་པ་རེད། དེ་ནི་མིའི་སྟན་ཐོག་ནས་རང་གིས་སྒྲིབ་པ་སྦྱོང་བ་རེད་མ་གཏོགས། དེ་རིང་གང་གསུང་གིན་བསྡད་པ་དེ། གཞན་ཞིག་ལ་སྦྱིན་འཇོག་ཅི་ཡང་མི་དགོས། དེ་ལྟར་བྱས་ན་རང་གཞན་གཉིས་ཀྱི་དོན་མཉམ་དུ་འགྲུབ་རྒྱུ་ཡོད་ཅིང་། རང་ཉིད་ལ་དཀོར་གྱི་སྒྲིབ་པས་ཀྱང་མི་གོས་ཞེས་གསུངས།
དེས་ན་གཡུ་ཁོག་བླ་མས་དཀོར་ཟེར་བ་ཧ་ཅང་གི་ངན་པ་ཞིག་ཡིན་ཞེས་དགག་པ་ཅི་ཡང་མི་མཛད་པར། གྲོང་ཆོག་ལ་སོང་སྟེ་ཐུགས་མ་བསྐྱེད་ཅིང་འདོན་པ་མ་གསུངས་ན་ཉེས་པ་ཆེན་པོ་ཡིན་ཞེས་གསུང་གིན་འདུག །
གང་ལྟར་སོ་སོ་མཁས་པ་དང་གྲུབ་ཐོབ་ཅིག་མིན་ཡང་། ཇོ་སེར་དགེ་བསྙེན་ ཡག་པོ་བྱེད་ཚུལ་ཡོད་ལ། མདོར་ན་རང་ཉིད་འཁྱག་མ་དགོས་པ་དང་ལྟོག་མ་དགོས་པ་ཙམ་རེ་བྱུང་ཚེ། འདོད་ཆུང་ཆོག་ཤེས་བྱས་ཏེ་བསམ་པ་བཟང་པོ་རེ་རང་རྒྱུད་ལ་ཨེ་སྐྱེ་བལྟས་ཏེ། བསྡད་ན་དེས་འགྲིག་ཡོད་པ་རེད།
དེའང་ངེད་ཅག་ནང་པ་སངས་རྒྱས་པ་ཚོས་བྱ་བ་ཅི་ཞིག་སྒྲུབ་དགོས་ཀྱིན་འདུག །བྱ་བ་བསྒྲུབས་པ་དེས་སུ་ཞིག་ལ་ཕན་ཐོགས་དགོས་ཞེས་རང་གིས་རང་ལ་དྲི་བ་དྲིས་ཏེ། དེར་བསམ་བློ་བཏང་ན། བསྟན་པ་དང་སེམས་ཅན་ལ་ཕན་ཐོགས་དགོས་པ་ཡིན་པས། ཤི་བོ་སྡིག་ཆེན་དང་ནད་པ་ཚབས་ཆེན་སོགས་གང་ཞིག་ཡིན་ཡང་། དེ་དག་གི་ཐོག་དྲངས་པའི་སེམས་ཅན་རྣམས་ལ། བསམ་པ་བཟང་པོའི་སྒོ་ནས་ཕན་ཅུང་ཟད་རེ་ཐོགས་ནའང་། རྒྱལ་སྲས་བྱང་ཆུབ་སེམས་དཔའི་སྤྱོད་པ་ཡིན་པས། དེ་འདྲ་རེ་སངས་རྒྱས་ཀྱི་བསྟན་པའི་སྒོར་ཞུགས་པ་ཀུན་གྱིས། ཨེ་འོང་ལྟོས་ཞེས་ངས་ཐལ་མོ་སྙིང་ཁར་སྦྱར་ཏེ་ཞུ་བ་ཕུལ་བཞིན་ཡོད།
མདོ་མང་མཁན་པོ་ལེགས་བཤད་ཀྱི་རང་རྣམ་དཀའ་སྡུག་བརྒྱུད་པའི་ཆོས་པ་ཞེས་པ་ལས་བཏུས།
༈ སྔོན་འགྲོ་ཀུན་བཟང་བླ་མའི་ཞལ་ལུང་ལས། ད་ལྟའི་དུས་གྲོང་ཆོག་པ་རྣམས་ཀྱང་ཚོགས་གྲལ་སོགས་སུ་འདོན་པ་དང་བཟླས་བརྗོད་ཀྱི་དུས་སྨྲ་བཅད་བྱེད་པ་ནི་ཅི་ནས་ཀྱང་གལ་ཆེ། ཐ་མལ་པའི་ངག་འཁྱལ་དང་འདྲེས་པའི་འདོན་ཟླས་སོགས་ལ་སྙིང་པོ་ཅི་ཡང་མེད་པ་དང་།ཁྱད་པར་གཤིན་པོ་སོགས་ཀྱི་དོན་ཡིན་ན། བར་དོ་ན་གནས་པའི་སེམས་ཅན་དེ།འཇིགས་སྐྲག་དང་སྡུག་བསྔལ་ལ་སོགས་པས་གདུང་བའི་ཚེ་ཕན་དུ་རེ་ནས་ཡོན་གནས་དང་བླ་མཆོད་ལ་སོགས་པའི་དྲུང་དུ་རྒྱུག། དེའི་ཚེ་དེ་དག་གི་ཏིང་ངེ་འཛིན་མི་གསལ་བ་དང་། སྡོམ་པ་དང་དམ་ཚིག་མི་དག་པ་དང་། ཆགས་སྡང་གི་གཏམ་དང་རྟོག་པ་ལ་སོགས་པ་འཆར་གྱིན་ཡོད་ན།བར་དོའི་འགྲོ་བ་དེ་མངོན་ཤེས་དང་ལྡན་པ་ཡིན་པས།དེ་དག་ཤེས་ནས་བླ་མཆོད་ལ་ལོག་ལྟའམ་ཞེ་སྡང་སྐྱེས་ནས་རྐྱེན་དེས་ངན་སོང་དུ་འགྲོ་བར་བཤད་པས།དེ་ལྟ་བུའི་བླ་མཆོད་ནི། ཡོད་པ་ལས་ཀྱང་མེད་པ་དགའ། ཁྱད་པར་གསང་སྔགས་རྡོ་རྗེ་ཐེག་པའི་ཆོ་ག་རྣམས་ནི།བསྐྱེད་རིམ་གསལ་འདེབས་བརྗོད་པ་ཚིག་གི་སྒོ།། ཞེས་བསྐྱེད་རིམ་གྱི་གནད་དེ་དག་གསལ་འདེབས་པའི་ཚིག་ཙམ་ཡིན་པ་ལ།གསལ་འདེབས་རྒྱུའི་བསྐྱེད་རྫོགས་ཀྱི་དོན་ལ་བློ་ཁ་ཙམ་ཡང་མི་ཕྱོགས་པར་ཁ་ཚིག་སྟོང་པ་ཞིག་གིས་གསལ་གསལ་བསྒོམ་བསྒོམ་དམིགས་དམིགས་ལ་སོགས་པ་ཆོ་གའི་ཚིག་རིགས་མང་པོ་ཞིག་གྱར་མ་གྱེར་ཁུག་འུར་འུར་ཆེམ་ཆེམ་དུ་གྱེར་ཏེ། དོན་གྱི་སྙིང་པོ་ངག་གི་བཟླས་བརྗོད་བསྙེན་པ་དངོས་ལ་ཐུག་ཙ་ན། བློ་བག་གིས་ལྷོད་ཐ་ན་ལུས་ཚུགས་དྲང་པོ་ཞིག་ཡོད་པ་ཡན་ཆད་ཤིག་གིས་བཤིག། མི་དགེ་བ་བརྒྱ་ཕྲག་གི་འབྱུང་ཁུངས་ཐ་མ་ཁ་ལ་སོགས་པ་གཞིབ།ཕུ་མདའ་ལ་ཤོད་ཀྱི་གཏམ་འབྲལ་བ་མེད་པའི་ངག་འཁྱལ་མང་པོའི་གཏེར་སྒོ་ཕྱེ། ཕྲེང་བ་སྟོང་བགྲང་རྒྱུ་ནག་བདའ་བདའ་བྱེད་པས་དུས་འདའ།ཕྱི་འཕྲེད་ཙ་ན་གནམ་ལ་གཅིག་བལྟས་ནས།བཛྲ་པུཥྤེ་དྷཱུ་པེ་ཟེར་ཞིང་རོལ་མོ་འུར་ཆེམས་སེ་གཏོང་བ་ནི། ཆོ་གའི་གཟུགས་བརྙན་ལས་ཀྱང་ཡང་བརྙན་ཐ་ཆད་པ་ཡིན་པས།དེ་ལྟ་བུ་ལས་ནི་བསམ་པ་རྣམ་པར་དག་པའི་སྒོ་ནས་ལྟུང་བཤགས་སམ་བཟང་སྤྱོད་ཚར་རེ་ཙམ་བཏོན་ན་དེ་དགའ་ངེས་སོ།། དེ་ལྟར་མ་དག་པའི་བཟླས་བརྗོད་དང་ཆོ་གའི་གཟུགས་བརྙན་ལ་བརྟེན་ནས་གཤིན་པོ་ངན་སོང་དུ་འཕེན་པའི་བླ་མཆོད་དེས་ནི།གསོན་པའི་སྐུ་རིམ་བྱས་ཀྱང་ཕན་ལས་གནོད་པ་ཆེ་བ་དེ་དང་འདྲ།དེ་ལྟ་བུ་དེས་དཀོར་ཟོས་པ་ཡང་ལྕགས་ཀྱི་ཐོ་ལུམ་མེ་འབར་བ་ཟོས་པ་དང་འདྲ་ངེས་པ་དེ་ཡིན་ནོ།།
དེས་ན་དད་ཟས་དང་གཤིན་དཀོར་ཟ་བ་རྣམས་ནི་བླ་མའམ་གྲྭ་བ་སུ་ཡིན་ཀྱང་འདྲ་སྟེ།ཤ་ཆེ་ཆུང་ཐུད་སྲབ་འཐུག་འབུལ་བ་བཟང་ངན་ཁོ་ན་ལ་ཐུགས་དམ་གྱི་མཐིལ་དུ་མི་བྱ་བར།ནད་པའམ་ཤི་པོ་སུ་ཡིན་ཀྱང་འདྲ་སྟེ་གལ་འགགས་ལ་བབ་སྟེ་སྡུག་ཐུག་པའི་སེམས་ཅན་སྐྱབས་དང་བྲལ་བ་དེ་ལ་ཕན་འདོད་ཀྱི་བྱམས་པ་དང་སྙིང་རྗེ་བྱང་ཆུབ་ཀྱི་སེམས་ཀྱིས་ཟིན་པར་བྱས་ནས།བསྐྱེད་རྫོགས་རང་གིས་ག ང་ཤེས་སྙིང་ཐག་པ་ནས་མ་ཡེངས་པར་འབད།དེ་ལྟར་མི་ཤེས་པ་རྣམས་ཀྱང་ཚིག་རྗེས་དོན་དྲན་ཙམ་མམ།ཐ་ན་ཡང་ཉམ་ཐག་པའི་སེམས་ཅན་ལ་བྱམས་པ་དང་སྙིང་རྗེ་དཀོན་མཆོག་གསུམ་གྱི་བདེན་མཐུ་བསླུ་བ་མེད་པ་ལ་དད་པ་ངེས་ཤེས་སོགས་ལུས་ངག་ཡིད་གསུམ་ཚུན་གཅིག་དྲིལ་གྱིས་འབད་དེ།ཆོ་ག་དང་བཟླས་བརྗོད་སོགས་སྒྲ་དག་སྒྲོས་གཙང་བ་རེ་འགྲུབ་ངེས་བྱས་ན།སྐྱབས་གནས་དཀོན་མཆོག་གསུམ་གྱི་ཐུགས་རྗེ་རྒྱུ་འབྲས་བསླུ་བ་མེད་པའི་ནུས་མཐུ་བྱང་ཆུབ་སེམས་ཀྱི་ཕན་ཡོན་ཚད་མེད་པ་རྣམས་ལ་བརྟེན་ནས།ནད་པ་དང་ཤི་པོ་གང་ཡིན་དེ་ལ་ཕན་ཐོགས་ངེས་ཤིང་།མིའི་སྟན་ཐོག་ནས་རང་གི་སྒྲིབ་པ་སྦྱོང་ཟེར་བ་ལྟར།རང་གཞན་གྱི་ཚོགས་གཉིས་མཉམ་དུ་རྫོགས།འབྲེལ་ཚད་ཐར་པའི་ལམ་ལ་འགོད་པ་ཡིན་པས་དེ་ལྟ་བུ་རེ་ལ་ཅི་ནས་ཀྱང་འབད་དགོས་སོ།། ཞེས་དང་ཡང་།
༈ ལར་ད་ལྟའི་དུས་ན་བླ་མའམ་སེར་མོ་ཅུང་ཟད་བཟང་དུ་རེ་བ་རྒྱུ་འབྲས་ཤེས་པ་རྣམས་ནི།དཀོར་གྱི་ཉེས་དམིགས་ཙམ་ལ་འཇིགས་ནས་ནད་པ་དང་ཤི་བོ་སྡུག་ཐུག་པའི་སེམས་ཅན་དེ་ལ། བྱིན་རླབས་དང་བསྔོ་སྨོན་ཙམ་ཡང་མི་བྱེད་པར་བྱམས་སྙིང་རྗེ་བྱང་ཆུབ་སེམས་ཀྱི་རྩ་བ་གཅོད།ཕལ་ཆེར་ནི་ཧ་ཅང་རང་འདོད་ཆེ་ཆེས་པས་སྦྱིན་བདག་གི་ཚོགས་གྲལ་དུ་འོང་།དེ་ཚང་ལ་དགོས་རྒྱུའི་འདོན་པ་དེ་མི་འདོན་པར།རང་གི་ཁ་ཏོན་ནག་ལྕིབས་ལྕིབས་ཤིག་བླངས་ཏེ་དེ་ཆགས་མི་ཉན་པའི་ཁུར་གྱིས་འདོན་ཚུལ་བྱེད། དེ་དག་སུ་ཡིན་ཀྱང་འདྲ་སྟེ་རང་དོན་གྱི་འདོན་པ་དང་བཟླས་བརྗོད་སོགས་ཅུང་ཟད་རེ་བྱེད་པ་དེ་ལ་གཟབ་གཟབ་ལྟ་བུ་རེ་བྱེད་ཅིང་།དེ་རང་གི་སྒྲིབ་སྦྱོང་ངམ་དཀོར་སྦྱོང་ཡིན་ཁུལ་བྱེད།སྦྱིན་བདག་གི་འདོན་པ་མང་ཚོགས་ཀྱི་གྲལ་དུ་བྱེད་པ་དེ་ལ་ནི་ཁ་ཡེངས་མིག་ཡེངས་ཁྲལ་རྒྱུག་མ་བྱེད། གང་བསྐྱབ་པར་བྱ་རྒྱུའི་སེམས་ཅན་ཤི་གསོན་སུ་ཡིན་ཀྱང་།དེའི་དོན་ནི་བློ་ལ་མི་འཆར་བ་དེ་རྣམས་ནི་བྱམས་སྙིང་རྗེ་བྱང་ཆུབ་སེམས་ཀྱི་རྩ་བ་ཆད་པ་ཡིན་པས།རྗེས་ནས་དཀོར་སྦྱོང་བྱས་ཀྱང་རང་འདོད་ཡིད་བྱེད་ཀྱི་བློ་ངན་དེས་དཀོར་སྒྲིབ་སྦྱོང་བ་ཡང་དཀའ།དང་པོ་ཉིད་ནས་བྱམས་སྙིང་རྗེ་བྱང་ཆུབ་ཀྱི་སེམས་ལ་གཞི་བཅོལ།བསྐྱེད་རྫོགས་སོགས་ཅི་ཤེས་ཅི་ནུས་ལ་སྙིང་ཐག་པ་ནས་འབད།སེམས་ཅན་ལ་ཕན་འདོད་ཀྱི་ཀུན་སློང་དང་མ་བྲལ་བ་བྱས་ན།རང་གི་ཁྱིམ་ནས་བསྐྱེད་རྫོགས་བསྒོམས་ཏེ་བཟླས་བརྗོད་བྱས་པ་དང་།གཞན་གྱི་ཁྱིམ་ནས་བསྐྱེད་རྫོགས་བསྒོམས་ཏེ་བཟླས་བརྗོད་བྱས་པ་ལ་ནི་ཁྱད་པར་སྤུ་ཙམ་ཡང་མེད་ཅིང་།གང་ལྟར་ཡང་རང་འདོད་ཀྱི་བློ་དང་བྲལ་ཏེ།གཞན་དོན་ལ་དམིགས་དགོས་པ་ནི་འདྲ་འདྲ་ཡིན་པས་དེ་ལྟ་བུ་རེ་ངེས་པར་དགོས་སོ།། ཞེས་གསུངས་འདུག
