༄༅།། ངེས་དོན་དགེ་བའི་བཤེས་གཉེན་པདྨ་དབང་རྒྱལ་མཆོག་ལ་ན་མོ།
༈སྡེ་དམག་ཚོས་ལུག་འདི་ཁྱོད་ཀྱིས་གསོད་དགོས་ཟེར།ང་ཡིད་སྐྱོ་ཞིང་ལུག་སྙིང་རྗེ་བ་འདུག་པས་ང་ངུ་ཞོར་དུ་ངས་ལུག་གསོད་མི་ཕོད་འདུག་བསམ་ངེས་ཅན་ཡིན་པས་མི་གསོད་ཁོ་ཐག་ཡིན་ཞེས་ངུ་བཞིན་བཤད་པ་ཡིན།འོ་ན་ཁྱོད་ཀྱི་མ་གསོད་དུས་ཟེར་ནས་བརྡུང་བརྡེག་ལན་མང་བྱས་སོང་།ཡིན་ན་ཡང་ངས་གསོད་མི་ཕོད་ཅེས་བཤད་ནས་བསྡད་པ་ཡིན།དེ་ནས་ཡར་བརྩངས་ཏེ་ཁོ་ཚོས་འོ་ན་སྡིག་མཐུ་བྱེད་དགོས་ཟེར་ནས་ཐག་པའི་སྣེ་ཡ་གཅིག་ངའི་སྐེ་དང་།ཡ་གཅིག་གིས་ལུག་མཆུ་བསྡམས་ནས་ཤེད་ཀྱིས་འཐེན་ཚེ་ངའི་སྐེ་བསྒགས་ནས་དཀར་ལམ་ཤར་བ་དེ་ཙམ་གསལ་བོར་མ་ཤེས་ཀྱང་།དམར་ལམ་གྱི་སྣང་བ་ངོ་ཤེས་བྱུང་བས་ངའི་སེམས་སུ་ད་ཡག་སོང་ང་འཆི་བར་འདུག་ལུག་བསད་དགོས་མ་ཐུག་སྐྱིད་ད་བསམ་པའི་བདེ་ཉམས་ཤིག་ཡིད་ལ་ཤར་འདུག དེ་ནས་ཅི་ཡིན་མ་གོ་དུས་ཡུན་གང་མཚམས་ནས་ང་བརྒྱལ་བ་ལས་སང་དུས།ཁོ་ཚོས་ལུག་བསད་ཚར་འདུགཡང་ང་ལ་ལུག་གི་ཁྲག་ཧྲོག་ཟེར། ངས་ཁྲག་ཧྲོག་མི་ཤེས་པའི་རྒྱུ་མཚན་ནི་ངས་སྡིག་གླ་ལེན་མ་མྱོང་ཞེས་བཤད་པས་ཁོ་ཚོ་ཧ་ཅང་ཁྲོས་ནས་གཅིག་གིས་གྲི་ལྟག་གིས་ངའི་ཐོད་པ་ལ་རི་མོ་བྲིས་ནས་ངའི་སྐེ་ན་ཤིང་ལེབ་རིང་ཐུང་མཐོ་གསུམ་དང་།ཞེང་ན་གོང་མཐོ་གང་ཙམ་ཡོད་པ།དཀྱིལ་གྱི་བུག་པའི་ནང་དུ་རྩིད་སྐུད་དྲང་ཡོད་པ།སྟེང་དུ་ཤི་ན་འགྱོད་བཤགས་མི་བྱེད་མཁན་གསར་བརྗེའི་ངོ་ལོག་པ་པདྨ་དབང་རྒྱལ་ཟེར་ནས་བྲིས་ཡོད་རྒྱུན་དུ་སྐེ་ལ་འདོགས་དགོས་པ་དེ་བླངས་ནས་མགོ་ལ་ཐེངས་འགར་གཞུས། ཡང་ཡར་དེད་ནས་ཐལ་ཕུང་གི་སྟེང་ན་ལྷ་ཁང་གི་གདུང་མ་ཞིག་འཕྲེད་དུ་བཞག་པའི་ཐོག་ཏུ་པུས་མོ་བཙུགས་སུ་བཅུག་ཏེ་གཡས་གཡོན་གྱི་སྡེ་དམག་གཉིས་ཀྱིས་རེས་མོས་བྱས་ནས་གླང་མ་འཁང་པ་སྤུངས་ནས་ཡོད་པ་ཟད་མ་སོང་བར་དུ་བླངས་ནས་མགོ་ལ་གང་ཁེལ་གྱིས་རྡུང་སྟེ་ཉེས་པ་ཁས་ལོང་ཟེར་བཞིན་རྡོག་ཐོ་དང་དབྱུག་པས་རྡེག་དུས་ཤིང་སྡོང་སྟེང་ནས་འགྱེལ་ཏེ་ཐལ་ཕུང་འོག་ཏུ་ལྷུང་།ཡང་སྡེ་དམག་གཉིས་ཀྱིས་ཡར་སོང་ཟེར་ནས་རྡོག་པས་བསྣུན་པ་རེས་མོས་ཀྱིས་ནང་མོ་ནས་དགུང་མོ་ཉི་མ་མ་བྱོན་བར་དུ་གཅར་རྡུང་བྱས་པས་མགོ་བོ་སྐྲང་ནས་ཞྭ་ནང་དུ་མི་ཆུད་པ་བྱུང་དང་།གོན་པ་ཡོངས་རྫོགས་ཐལ་བས་ཁེབ་པ་ཞིག་བཟོས་སོང་བ་སོགས་ལོ་བཅུ་གཉིས་ཀྱི་བར་དུ་འཐབ་རྩོད་སྡུག་བསྔལ་གང་མང་ཞིག་གཏད་མྱོང་། རང་རྣམ་ལས་ཁོལ་དུ་ཕྱུང་བའོ།།
