༄༅། །རང་ཅག་རྣམས་ལ་བཀའ་དྲིན་བླ་ལྷག་ཏུ་ཆེ་བ་ཡོངས་ཀྱི་དགེ་བའི་བཤེས་གཉེན་ཆེན་པོ་དོན་གྱི་སླད་དུ་མཚན་ནས་སྨོས་ན་གཙང་ལྗོངས་གདན་ས་ཆེན་པོ་བཀྲ་ཤིས་ལྷུན་པོའི་མཁན་རིན་པོ་ཆེ་ཞལ་སྔ་ནས་༸རྗེ་བཙུན་རྡོ་རྗེ་རྒྱལ་མཚན་དཔལ་བཟང་པོ་མཆོག་གིས་རབ་གནས་ཤིང་སྦྲུག་ལོའི་བོད་ཟླ་ལྔ་པའི་ཚེས་ཉི་ཤུ་བདུན་ཉིན་ནས་སྙེ་ཐང་བདེ་བ་ཅན་སྟག་ཚང་རྭ་སྟོད་དགོན་དུ་རྗེ་རིན་པོ་ཆེའི་ལྟ་བའི་ལེགས་བཤད་ལྔའི་ཡ་གྱལ་དབུ་མ་ལ་འཇུག་པའི་རྒྱ་ཆེར་བཤད་པ་དགོངས་པ་རབ་ཏུ་གསལ་བའི་ལྗགས་ལུང་། འཇམ་དབྱངས་དཀར་པོ་ལ་བརྟེན་ནས་ཤེས་རབ་འཕེལ་བའི་མན་ངག་གི་ལྗགས་ལུང་། དཔལ་རྡོ་རྡོ་འཇིགས་བྱེད་དཔའ་བོ་གཅིག་པའི་བདག་བསྐྱེད་དང་བདག་འཇུག་བསྡུས་པའི་ལྗགས་ལུང་། བཅོམ་ལྡན་འདས་དཔལ་རྡོ་རྗེ་འཇིགས་བྱེད་དཔའ་བོ་གཅིག་པའི་སྔོན་འགྲོའི་དབང་གི་སྟ་གོན། ཕ་རྒྱུད་དང་མ་རྒྱུད་གཉིས་ཀའི་གནད་ཚང་བ་བཅོམ་ལྡན་འདས་དཔལ་རྡོ་རྗེ་འཇིགས་བྱེད་དཔའ་བོ་གཅིག་པའི་དབང་ཆེན། བཅོམ་ལྡན་འདས་རྗེ་བཙུན་རྡོ་རྗེ་རྣལ་འབྱོར་མའི་དབང་བཞི་བྱིན་རླབས། འཕགས་པ་སྤྱན་རས་གཟིགས་ངན་སོང་ཀུན་སྒྲོལ་གྱི་བྱིན་རླབས། སེང་ལྡེང་ནགས་ཀྱི་སྒྲོལ་མའི་རྗེས་གནང་། སྒྲོལ་དཀར་ཡིད་བཞིན་འཁོར་ལོའི་རྗེས་གནང་། འཇམ་དབྱངས་དཀར་པོའི་རྗེས་གནང་། བླ་མེད་ལུགས་ཀྱི་རྡོ་རྗེ་སེམས་པའི་རྗེས་གནང་། བཅོམ་ལྡན་འདས་མ་གཅིག་གྲུབ་རྒྱལ་ལུགས་ཀྱི་ཚེ་དབང་དང་མཇུག་ཏུ་འདུས་པ་རྒྱ་མཚོས་བླ་མཆོད་ཀྱི་སྒོ་ནས་ཚོགས་འབུལ་དང་བཅས་ཆོས་འབྲེལ་ཉིན་ལྔའི་བཀའ་དྲིན་བསྐྱངས་གནང་གྲུབ་པ། །
བསྐུར་ཟིན་པའི་ནང་དོན་འོས་སྦྱོར།
查看更多历史消息
ཇི་སྐད་དུ་༧ཀུན་གཟིགས་པཎ་ཆེན་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གི་ཞལ་གྱི་བུམ་བཟང་ལས། འགྲོ་སྤྱིར་སྨན་པའི་དགེ་མཚན་ཡོད་ན་ནི། །དགའ་སྤྲོས་བཞུགས་ཏེ་ལས་དོན་རླབས་ཆེན་དེའི། །གྲུབ་འབྲས་ནམ་ཐོབ་བར་ལ་དཀའ་ངལ་སོགས། །རྐྱེན་ངན་གང་བྱུང་ཕྱི་བཤོལ་མི་བྱེད་པར། །འབད་བརྩོན་དྲག་པོས་དཀའ་ཐུབ་དང་ལེན་གྱིས། །ཞེས་ཚིག་བཅད་ཀྱི་མདུན་བསུས་ནས་གུས་གནས་ཟླ་བ་རང་ཉིད་ནི་སྐྱེས་སྟོབས་ཀྱི་ཤེས་རབ་དང་སྦྱངས་སྟོབས་ཀྱི་ཡོན་ཏན་གྱི་དབེན་པའི་བདག་ཉིད་ཞིག་ཡིན་ཡང་དཔལ་ལྡན་བླ་མ་དམ་པ་གང་ཉིད་ལ་དད་པས་ཉམ་ཆུང་མགོན་པོ་གང་གི་སློབ་བུའི་གྲལ་མཐའ་ནས་མ་འབུད་ཙམ་ཞིག་ཡིན་ཡང་། ཅི་སྐད་དུ ༧འཇམ་མགོན་བླ་མ་ཙོང་ཁ་པ་ཆེན་པོའི་ཞལ་གྱི་བུམ་བཟང་ལས། བསམ་པ་བཟང་ན་ས་དང་ལམ་ཡང་བཟང་། །བསམ་པ་དམན་ན་ས་དང་ལམ་ཡང་དམན། །ཐམས་ཅད་བསམ་པ་དག་ལ་རག་ལས་པས། །ཞེས་གང་གསུངས་པ་ལྟར་གུས་པས་ཀྱང་གཞན་ཕན་གྱི་བསམ་པ་བཅོས་མ་མ་ཡིན་པས་རྒྱུད་བསྐུལ་ནས་ཆོས་མིན་ཕྱོགས་ཀྱི་ཆོས་ལ་རྒོལ་མཁན་དང་དེས་མ་ཟད་ཆོས་པའི་ཕྱོགས་ནས་ཆོས་ལ་རྒོལ་མཁན་ནས་གཙོས་པའི་མ་གྱུར་སེམས་ཅན་ཐམས་ཅད་ཀྱི་རྒྱུད་ལ་ངེས་འབྱུང་བྱང་སེམས་ཡང་དག་པའི་ལྟ་བ་རྒྱུད་ལ་སྐྱེས་པའི་ཆེད་དུ་སྤྱི་སྟེགས་འདི་ནས ༧མཁན་ཆེན་རྡོ་རྗེ་རྒྱལ་མཚན་དཔལ་བཟང་པོ་མཆོག་གི་གསུང་ཆོས་གང་ཐུབ་ཀྱི་འཕུལ་རྒྱུ་ཡིན་པས་དེ་དོན་དགོངས་འཇགས་འཚལ། །
འཕྲིན་སྟེགས་སུ་མི་སྒེར་རམ་ཚོགས་པ་གང་གི་ཁེ་དབང་ལ་གནོད་པའི་ནང་དོན་ཡོད་ཚེ་མྱུར་དུ་ང་ཚོར་འབྲེལ་གཏུག་གནང་དང་དྲྭ་ངོས་ནས་བསུབ་ངེས་ཡིན། །
版权为原著所有，若有侵犯到您的权益，请您与我们联系，我们将立即删除。
གསལ་འདེབས།
འབྲེལ་གཏུག་གནང་ས། གནས་ཟླ་བ།
སྐད་འཕྲིན། ༡༩༣༧༦༠༩༩༦༥
ཡིག་ཟམ། 1937609965@qq.com
