རོལ་དབྱངས་ངག་གསུམ་གྱི་ལས་སུ་བགྱིད་མཁན། རྡོ་བ་ཆོས་གྲགས།
༄༅། །རིས་མེད་བསྟན་པ་ཡང་དར་རྒྱས་པའི་སྨོན་ལམ་
བཞུགས་སོ། །
རིང་ནས་ཐུགས་བསྐྱེད་བཟང་པོའི་ལྷ་ལམ་ནས། །
གངས་ཅན་བསྟན་འགྲོའི་མགོན་པོ་འོད་སྟོང་ཅན། །
འཆར་བའི་ཕན་བདེའི་མཛད་འཕྲིན་འབུམ་འཕྲོ་བ། །
སྣང་མཐའི་མགོན་པོའི་ཐུགས་བཞེད་རྒྱལ་གྱུར་ཅིག །
སྟོབས་བཅུའི་བདག་ཉིད་རྣམ་འདྲེན་བཞི་པ་ཡི། །
ཕུལ་བྱུང་ཁྱད་པར་བཞི་ལྡན་གསུང་རབ་ཀྱི། །
དགོངས་དོན་ཐེག་གསུམ་ལམ་གྱི་རིམ་པའི་གནད། །
བསྟན་པ་རིན་ཆེན་ཡང་དར་རྒྱས་གྱུར་ཅིག །
ཤིང་རྟ་ཆེན་པོ་ཀླུ་སྒྲུབ་ཐོགས་མེད་ཀྱིས། །
ཚད་མར་གྱུར་པ་ཐུབ་པའི་སླུ་མེད་བཀའི། །
དྲང་ངེས་ལེགས་པར་འབྱེད་པའི་ལམ་སྲོལ་ཆེའི། །
བསྟན་པ་རིན་ཆེན་ཡང་དར་རྒྱས་གྱུར་ཅིག །
ཆེ་བ་བཞི་ལྡན་ལམ་གྱི་སྒྲོན་མའི་དོན། །
རྟག་གུས་སྦྱོར་བས་བསམ་སྒོམ་གཙང་མའི་ཆུས། །
སྐུ་གསུམ་འབྲས་བུ་གོ་འཕང་འཐོབ་པའི་དཔལ། །
བསྟན་པ་རིན་ཆེན་ཡང་དར་རྒྱས་གྱུར་ཅིག །
བཀའ་གདམས་བསྟན་པའི་གསལ་བྱེད་ཨ་ཏི་ཤའི། །
རྒྱུ་འབྲས་བདུན་གྱི་མན་ངག་གོམས་པའི་མཐུས། །
སེམས་མཆོག་བསྐྱེད་པའི་གདམས་པའི་ཞལ་ཀླུང་རྒྱུན། །
བསྟན་པ་རིན་ཆེན་ཡང་དར་རྒྱས་གྱུར་ཅིག །
རྩ་འཇུག་གཉིས་ཀྱི་དགོངས་དོན་ཟབ་རྒྱས་དང་། །
ཐལ་ལུགས་ཐུན་མིན་དཀའ་གནད་ལ་སོགས་པ། །
རྟག་ཆད་མཐའ་བྲལ་དབུ་མའི་ལུགས་བཟང་མཆོག །
བསྟན་པ་རིན་ཆེན་ཡང་དར་རྒྱས་གྱུར་ཅིག །
མཉམ་མེད་སྟོན་པའི་རྗེས་ཞུགས་ས་སྐྱ་བ། །
དགའ་ལྡན་ཀར་རྒྱུད་རྙིང་མ་ལ་སོགས་པའི། །
རང་རང་ས་ལམ་བགྲོད་པའི་ལུགས་བཟང་གི །
བསྟན་པ་རིན་ཆེན་ཡང་དར་རྒྱས་གྱུར་ཅིག །
པད་མའི་སྦུབས་ལྟར་གཙང་བའི་ཁྲིམས་ལྡན་ཞིང་། །
རིན་ཆེན་བྱང་ཆུབ་སེམས་ཀྱིས་རྟག་མྱོས་པས། །
སྐུ་ཐུགས་ཟུང་འཇུག་ནོར་བུའི་མཆོག་ཐོབ་པ། །
བསྟན་པ་རིན་ཆེན་ཡང་དར་རྒྱས་གྱུར་ཅིག །
མདོར་ན་ཐུབ་པའི་ལུགས་བཟང་གཞན་ཕན་གྱིས། །
འགྲོ་ཀུན་བདེ་ལ་དགོད་དང་སྡུག་བསྔལ་ལས། །
བསྒྲལ་ཕྱིར་རྟག་ཏུ་རྣམ་པར་མི་འཚེ་བའི། །
བསྟན་པ་རིན་ཆེན་ཡང་དར་རྒྱས་གྱུར་ཅིག །
ཁྱད་པར་རྒྱུད་སྡེ་བཞི་ཡི་དགོངས་པའི་དོན། །
མཚན་བཅས་མཚན་མེད་རིམ་གཉིས་རྣལ་འབྱོར་དང་། །
སྒྱུ་འོད་བདེན་གཉིས་ཟུང་འཇུག་མཐར་ཐུག་པའི། །
བསྟན་པ་རིན་ཆེན་ཡང་དར་རྒྱས་གྱུར་ཅིག །
ཉིད་ཀྱི་བཀའ་སྡོད་གཙོ་བོ་དམ་ལྡན་པ། །
དམར་ཟོར་མ་དང་གུར་མགོན་ནེ་སེར་བས། །
བཀའ་སྲུང་ཁས་བླངས་གཡར་དམ་ཞལ་བཞེས་མཐུས། །
བསྟན་པ་རིན་ཆེན་ཡང་དར་རྒྱས་གྱུར་ཅིག །
མདོར་ན་འགྲོ་ལ་བདེ་སྐྱིད་འབྱུང་བའི་གཞི། །
བསྟན་པ་རིན་ཆེན་ཕྱོགས་བཅུར་ཁྱབ་པ་དང་། །
བསྟན་འཛིན་སྐྱེས་ཆེན་དམ་པའི་ལུང་རྟོགས་ཆོས། །
བསྟན་པ་རིན་ཆེན་ཡང་དར་རྒྱས་གྱུར་ཅིག །
ཅེས་པ་འདི་ནི་ཡང་དར་བསྟན་པའི་གསལ་བྱེད་མཚན་བརྗོད་པར་དཀའ་བ་དོན་གྱི་སླད་དུ་མཚན་ནས་སྨོས་ན་པཎ་ཆེན་སྐུ་འཕྲེང་བཅུ་པ་ཆེན་པོ་༸རྗེ་བཙུན་བློ་བཟང་འཕྲིན་ལས་ལྷུན་གྲུབ་ཆོས་ཀྱི་རྒྱལ་མཚན་དཔལ་བཟང་པོའི་སྐུ་མཆེད་ཨ་ལགས་སྒར་བ་ཚང་ངག་དབང་བཟང་པོ་སོགས་ཀྱིས་ཡང་དར་བསྟན་པ་རྒྱས་པའི་སྨོན་ལམ་བློ་བཟང་རྒྱལ་བསྟན་མའི་རྩོམ་ཚུལ་དང་འདྲ་ཞིག་རྩོམ་དགོས་ཞེས་བསྐུལ་ངོར་བཀྲས་ལྷུན་པ་དགེ་སློང་རྡོ་རྗེ་རྒྱལ་མཚན་གྱིས་དུས་ཚོད་དགེ་བར་འཕྲལ་མར་སུག་བྲིས་བགྱིས་པའོ། །
ཇི་སྐད་དུ་༧ཀུན་གཟིགས་པཎ་ཆེན་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གི་ཞལ་གྱི་བུམ་བཟང་ལས། འགྲོ་སྤྱིར་སྨན་པའི་དགེ་མཚན་ཡོད་ན་ནི། །དགའ་སྤྲོས་བཞུགས་ཏེ་ལས་དོན་རླབས་ཆེན་དེའི། །གྲུབ་འབྲས་ནམ་ཐོབ་བར་ལ་དཀའ་ངལ་སོགས། །རྐྱེན་ངན་གང་བྱུང་ཕྱི་བཤོལ་མི་བྱེད་པར། །འབད་བརྩོན་དྲག་པོས་དཀའ་ཐུབ་དང་ལེན་གྱིས། །ཞེས་ཚིག་བཅད་ཀྱི་མདུན་བསུས་ནས་གུས་གནས་ཟླ་བ་རང་ཉིད་ནི་སྐྱེས་སྟོབས་ཀྱི་ཤེས་རབ་དང་སྦྱངས་སྟོབས་ཀྱི་ཡོན་ཏན་གྱི་དབེན་པའི་བདག་ཉིད་ཞིག་ཡིན་ཡང་དཔལ་ལྡན་བླ་མ་དམ་པ་གང་ཉིད་ལ་དད་པས་ཉམ་ཆུང་མགོན་པོ་གང་གི་སློབ་བུའི་གྲལ་མཐའ་ནས་མ་འབུད་ཙམ་ཞིག་ཡིན་ཡང་། ཅི་སྐད་དུ་༧འཇམ་མགོན་བླ་མ་ཙོང་ཁ་པ་ཆེན་པོའི་ཞལ་གྱི་བུམ་བཟང་ལས། བསམ་པ་བཟང་ན་ས་དང་ལམ་ཡང་བཟང་། །བསམ་པ་དམན་ན་ས་དང་ལམ་ཡང་དམན། །ཐམས་ཅད་བསམ་པ་དག་ལ་རག་ལས་པས། །ཞེས་གང་གསུངས་པ་ལྟར་གུས་པས་ཀྱང་གཞན་ཕན་གྱི་བསམ་པ་བཅོས་མ་མ་ཡིན་པས་རྒྱུད་བསྐུལ་ནས་ཆོས་མིན་ཕྱོགས་ཀྱི་ཆོས་ལ་རྒོལ་མཁན་དང་དེས་མ་ཟད་ཆོས་པའི་ཕྱོགས་ནས་ཆོས་ལ་རྒོལ་མཁན་ནས་གཙོས་པའི་མ་གྱུར་སེམས་ཅན་ཐམས་ཅད་ཀྱི་རྒྱུད་ལ་ངེས་འབྱུང་བྱང་སེམས་ཡང་དག་པའི་ལྟ་བ་རྒྱུད་ལ་སྐྱེས་པའི་ཆེད་དུ་སྤྱི་སྟེགས་འདི་ནས་༧མཁན་ཆེན་རྡོ་རྗེ་རྒྱལ་མཚན་དཔལ་བཟང་པོ་མཆོག་གི་གསུང་ཆོས་གང་ཐུབ་ཀྱི་འཕུལ་རྒྱུ་ཡིན་པས་དེ་དོན་དགོངས་འཇགས་འཚལ། །
འཕྲིན་སྟེགས་སུ་མི་སྒེར་རམ་ཚོགས་པ་གང་གི་ཁེ་དབང་ལ་གནོད་པའི་ནང་དོན་ཡོད་ཚེ་མྱུར་དུ་ང་ཚོར་འབྲེལ་གཏུག་གནང་དང་དྲྭ་ངོས་ནས་བསུབ་ངེས་ཡིན། །
版权为原著所有，若有侵犯到您的权益，请您与我们联系，我们将立即删除
གསལ་འདེབས།
འབྲེལ་གཏུག་གནང་ས། གནས་ཟླ་བ།
སྐད་འཕྲིན། ༡༩༣༧༦༠༩༩༦༥
ཡིག་ཟམ། 1937609965@qq.com
འོག་གི་“阅读原文”ཞེས་པ་མནན་ན་ནང་དོན་གོང་མ་རྣམས་ལ་གཟིགས་ཐུབ།
