ཕྱི་ཟླ་༧པའི་ཚེས་༥ཉིན་སྔ་དྲོར་ཆོས་རྗེ་ཉིད་ཀྱིས་ཕུར་བ་མགུལ་ཁུག་མའི་དབང་གནང་བའི་སྔོན་དུ་འདི་སྐད་གསུང་།
ཁྱེད་རང་རྣམས་ཀྱིས་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་སྨིན་བྱེད་ཀྱི་དབང་བསྐུར་ཟབ་མོ་ཞུས་ནས། གྲོལ་བྱེད་ལམ་གྱི་རིམ་པ་རྣམས་ཚུལ་བཞིན་ཉམས་སུ་བླང་བར་བགྱིའོ་སྙམ་པའི་བྱང་ཆུབ་མཆོག་ཏུ་ཐུགས་བསྐྱེད་པ་དང་བཅས་ཏེ་གསན་འཚལ།
དེ་ལ་གང་གསན་པར་བྱ་བའི་ཆོས་ཕུར་བ་མགུལ་ཁུག་མ་ཞེས་བྱ་བ་འདི་ཉིད་ནི། ཕྱི་ལོ་༡༩༩༠ལོར་ངེད་ཅག་དཔོན་སློབ་བརྒྱད་ཙམ་རྒྱ་གར་དུ་འགྲོ་བའི་ལམ་ཁར། བལ་བོའི་ས་ཆ་ཨ་སུ་རའི་བྲག་ཕུག་ཅེས་བྱ་བར་གཏན་ལ་ཕབ་པ་ཡིན། ཆོས་འདི་ནི་སྔོན་ཨོ་རྒྱན་སངས་རྒྱས་གཉིས་པ་བོད་ཡུལ་མུན་པའི་གླིང་ལ་སངས་རྒྱས་ཀྱི་བསྟན་པ་དར་ཞིིང་རྒྱས་པར་བྱ་བའི་ཆེད་དུ་ཕེབས་པའི་ལམ་ཁར། ཨ་སུ་རའིི་བྲག་ཕུག་ཏུ་བཞུགས་པའིི་དུས་སུ། བལ་བོའི་རྒྱལ་པོ་ཛི་ན་མི་ཏྲ་ཞེས་བྱ་བས་ཁོང་གི་སྐུའི་བར་ཆད་བསལ་བ་དང་། མཐུན་རྐྱེན་མ་ལུས་པ་བསྒྲུབས་པར་བྱས་པའི་རྐྱེན་གྱིས། ཨོ་རྒྱན་རིན་པོ་ཆེ་ཐུགས་ཤིན་ཏུ་དགྱེས་ནས་བལ་པོ་ཛི་ན་མི་ཏྲ་ལ་གཅེས་ནོར་དུ་གནང་བ་རེད། ཆོས་ཚན་འདི་ནི་ཨོ་རྒྱན་རིན་པོ་ཆེས་བོད་དུ་ཆོས་གང་ཡང་མ་གསུངས་བའི་ཐོག་མར་གསུངས་པ་ཡིན་པས། ཨོ་རྒྱན་རིན་པོ་ཆེའི་རྣམ་ཐར་གཞན་གྱི་ནང་དུ། བལ་ཡུལ་ཡང་ལེ་ཤོད་ཀྱི་བྲག་ཕུག་ཏུ། །བར་ཆད་བགེགས་རྣམས་རྡོ་རྗེ་ཕུར་པས་བསྒྲལ། །ཞེས་འབྱུང་བ་ལྟར་བགེགས་བར་ཆད་རྣམས་སེལ་བར་བྱེད་པའི་འཕྲིན་ལས་ཀྱི་སྣ་འདྲེན་པར་བྱེད་པའི་ཆོས་ཀྱང་འདི་ཉིད་ཡིན། འདི་ནི་ཕུར་བའི་བྷི་ཏོ་ཏ་མའི་རྒྱུད་སྡེ་ཆེས་མང་པོ་ཞིག་གི་གནད་མཐར་ཐུག་གཅིག་ཏུ་བཏུས་ནས་བསྡུས་པ་ཡིན་ཏེ། བོད་ཡུལ་དུ་ཕུར་བའི་ཆོས་ཚན་ཐུན་མོང་བ་དྲུག་ཅུ་རྩ་བཞི་དང་། ཐུན་མོང་མ་ཡིན་པ་སུམ་ཅུ་སོ་གཉིས་གསུངས་པ་ཐམས་ཅད་ཀྱི་འཕྲོ་གཞིའི་ཨ་མ་ལྟ་བུ་ཡང་ཆོས་འདི་ཉིད་ཡིན། བོད་སྐྱོང་བརྟན་མ་བཅུ་གཉིས་ལ་སོགས་པ་བོད་ཀྱི་ལྷ་སྲིན་དྲེགས་པ་ཅན་དམ་ལ་འདོགས་པར་བྱེད་པའི་བསྙེན་སྒྲུབ་ཀྱི་མཐར་ཐུག་པ་ཡང་གཞུང་འདི་ལ་བརྟེན་པ་ཡིན། ཆོས་འདི་ནི་སྔོན་གནས་རྗེས་དྲན་གྱི་ཚུལ་གྱིས་གཏན་ལ་ཕབ་ཅིང་། ཨོ་རྒྱན་རིན་པོ་ཆེས་ཀྱང་གཞན་སུ་ལ་ཡང་སྤེལ་མི་བྲ་བའི་མན་ངག་སྟེ། ཁོང་གི་མགུལ་ན་ཁུག་མ་ཞིག་ཡོད་པ་དེའི་ནང་ན་རྟག་ཏུ་འཆང་ཡོད་པའི་ཟབ་ཆོས་ཁྱད་པར་ཅན་ཡིན་པས་ཕུར་བ་མགུལ་ཁུག་མ་ཞེས་ཡོངས་སུ་གྲགས་པ་ཡིན། ཆོས་འདི་གཏན་ལ་ཕབ་པའི་རྗེས་སུ་རང་གཞུང་དུ་བཤད་པ་ལྟར་རྟེན་འབྲེལ་མ་ཚང་བ་མེད་པར་ཡོངས་རྫོགས་ལེགས་ཕྱོགས་སུ་འགྲིག་པར་གྱུར། འདི་ཉིད་རྩ་བའི་ཆོས་བདག་དག་གི་ཕྱག་ཏུ་འཕྲོད་ཚུལ་ནི། འདིའི་བརྒྱུད་འདེབས་ཀྱི་མཇུག་ན་བསྟན་རྒྱམ་རིན་པོ་ཆེ་ཁོང་གི་ཞལ་སྔ་ནས། ལས་སྨོན་འབྲེལ་བའི་ཤཱཀྱའི་དགེ་སློང་བསྟན་འཛིན་རྒྱ་མཚོོས་བྲིས་ཞེས་གསུངས་པ་བཞིན་དུ། ཁོང་ནི་ཆོས་བདག་ཐམས་ཅད་ཀྱི་རྩ་བ་ཡིན་ཞིང་། ཁོང་གི་ཕྱག་ཏུ་ཡང་གང་ཟག་གཞན་ལ་མ་སྤེལ་བའི་སྔོན་དུ་ངེད་ཅག་གིས་གཏེར་སྒྲུབ་བྱས་པ་དང་མཉམ་དུ་འབྱོར་བ་རེད། དེ་ནས་བསྟན་རྒྱམ་རིན་པོ་ཆེའི་ཕྱག་ཏུ་ཆོས་འདི་འཕྲོད་པ་དང་མཉམ་དུ། ཁོང་གིས་ཀྱང་ཡིད་བཞིན་གྱི་ནོར་བུ་ལྟ་བུའི་ཐུགས་རྩིས་ཚད་མེད་པ་མཛད་པས། ཉིན་དེར་ཁོང་གིས་དེ་མ་ཐག་ཏུ་ཁོ་བོ་ལ་ནན་ཟབ་ཀྱིས་བསྐུལ་བས། དབང་ཁྲིད་མན་ངག་དང་བཅས་པ་ཡོངས་རྫོགས་ཕུལ་བ་ཡིན། དེ་ནས་ཆོས་སྐྱོང་གི་ལག་ཏུ་འཕྲོད་ཚུལ་ནི། སྔོན་རྒྱལ་དབང་ཐུབ་བསྟན་རྒྱ་མཚོ་དང་། གཏེར་ཆེན་ལས་རབ་གླིང་པ་གཉིས་ཀྱི་བར་དུ་འཕྲིན་རྡེབ་པ་པོ་དང་། སྔ་ཕྱིའི་ལུང་བསྟན་ཐམས་ཅད་ཀྱང་གནས་ཆུང་རྡོ་རྗེ་གྲགས་ལྡན་ཉིད་ཀྱིས་བསྩལ་ལ། ཆོས་ཀྱང་མང་པོ་ཞིག་ཞུས་པའི་རྟེན་འབྲེལ་གྱི་དབང་གིས་ཆོས་འདི་བྱུང་མ་ཐག་ཏུ། གནས་ཆུང་རྡོ་རྗེ་གྲགས་ལྡན་ཡང་དྲག་འབབ་ཀྱི་ཚུལ་དུ་གློ་བུར་དུ་བབས་ནས། ཁོང་ལྷ་མ་གཤེགས་བཞིན་དུ་ཆོས་འདིའི་དབང་ཞུས་ཤིང་ཁྲིད་ཀྱང་ཉན། དེར་མ་ཟད་བསྟན་རྒྱམ་རིན་པོ་ཆེ་མཆོག་དང་། གནས་ཆུང་རྡོ་རྗེ་གྲགས་ལྡན་གྱིས་དངོས་སུ་བསྐུལ་བ་ལ་བརྟེན་ནས་རྗེས་སུ་བསྒྲལ་ལས་ཀྱང་བརྩམས་པ་ཡིན། དཔེར་ན། འདིའི་སྦྱིན་སྲེག་གི་ཆོོ་ག་རྩོམ་པའི་གནས་སྐབས་སུ་བསྟན་རྒྱམ་རིན་པོ་ཆེའི་སྐུ་མདུན་ན་ཡོད་ཅིང་། གློ་བུར་དུ་ངའི་ཡིད་ངོར་ཤར་བ་དེ། ཁོང་གིས་ཡི་གེ་བ་མཛད་ནས་ཡིག་ཐོག་ཏུ་ཕབ། དེའི་རྗེས་ཐོག་དེ་མ་ཐག་ཏུ་སྔོན་ཆད་གཏེར་ཆེན་ལས་རབ་གླིང་པའི་དུས་བཞིན་དུ། ས་སྐྱ་དང་། བཀའ་བརྒྱུད། རྙིང་མའི་ཆོས་བདག་ཆེན་པོ་གསུམ་གྱི་ཕྱག་ཏུའང་འཕྲོད་པར་གྱུར། རྙིང་མའི་ཕྱོགས་ལ་བསམ་བློ་བཏང་ན། སྔོན་གྱི་དུས་སུ་ཁོང་གི་སྐུ་ཕྲེང་རིམ་བྱོན་རྣམས་ཕུར་བའི་ཆོས་བདག་ཡིན་པའི་གནད་ཀྱིས། ད་ལྟ་གྲུབ་དབང་པདྨ་ནོར་བུའི་ཕྱག་ལའང་འཕྲོད་ནས། ཁོང་ལ་དབང་བསྐུར་བ་དང་། ཁྲིད་ཆ་ཚང་ཡང་བཤད་པ་ཡིན། དེ་ནས་ས་སྐྱའི་ཕྱོགས་ལ་བསམ་བློ་བཏང་ན། འཇམ་དབྱངས་མཁྱེན་བརྩེ་དབང་པོ་ཞེས་བྱ་བ་ནི། སྔོན་གཏེར་ཆེན་ལས་རབ་གླིང་པའི་གསང་མི་དགོས་པའི་ཆོས་བདག་རྣམ་གཉིས་ཞེས་རྒྱལ་བ་ཐུབ་བསྟན་རྒྱ་མཚོོ་དང་། འཇམ་དབྱངས་མཁྱེན་རྩེ་དབང་པོ་གཉིས་ཡིན་ཞིང་། དེའི་ཡང་སྲིད་དིལ་མགོ་མཁྱེན་རྩེ་རིན་པོ་ཆེའི་སྐུ་མདུན་དུ་ཡང་ཆོས་འདི་ཉིད་འཕྲོད་ནས། ཁོང་ལ་ཡང་དབང་དང་ལུང་། ཁྲིད་ཀྱི་རིམ་པ་ཐམས་ཅད་ཕུལ་བ་ཡིན། བཀའ་བརྒྱུད་པའི་དབང་དུ་བྱས་ན། སྔོན་གཏེར་ཆེན་ལས་རབ་གླིང་པའི་དུས་སུ་ཆོས་བདག་གི་རྩ་བ་ཀརྨ་པ་སྐུ་ཕྲེང་བཅོ་ལྔ་པ་མཁའ་ཁྱབ་རྡོ་རྗེ་རེད། སྐུ་ཕྲེང་བཅུ་དྲུག་པ་རིག་པའི་རྡོ་རྗེ་ཞིང་ལ་གཤེགས་ཟིན་པས། ཆོས་འདི་ཉིད་ཕབ་པའི་རྗེས་དེ་ཐག་ཏུ་ཁོང་གི་ཕྱག་ཏུ་མ་འབྱོར་ཡང་། ད་རིང་པོར་མི་ཐོགས་པར་ཀརྨ་པ་རིག་པའི་རྡོ་རྗེའི་སྤྲུལ་པའི་སྐུ་འཁྲུལ་བ་མེད་པ་དེ་གང་ན་ཡོད་ན། དེའི་ཕྱག་ཏུ་ཡང་དཀའ་ཚེགས་མེད་པར་ངེས་པར་དུ་འཕྲོད་རྒྱུ་རེད་སྙམ་པའི་ང་ལ་ཡིད་ཆེས་ཡོད། ཆོས་འདི་ནི་ཕྱི་ནང་གསང་གསུམ་གང་ནས་བསམ་ན་ཡང་། རྟེན་འབྲེལ་མ་འགྲིག་པ་སྣ་གཅིག་ཀྱང་མེད་པར་ཐམས་ཅད་ལེགས་པའི་ཕྱོགས་སུ་འགྲིག་པ་ཞིག་ཡིན་པས། ཆོས་འདི་སུ་ཞིག་གིས་ཉམས་སུ་བླངས་ན་ཡང་། ཁ་དགེ་ཞིང་བཀྲ་ཤིས། འགལ་རྐྱེན་བར་ཆད་ཐམས་ཅད་ཡོངས་སུ་ཞི་བར་འགྱུར་བའི་ཟབ་ཆོས་ཁྱད་པར་ཅན། སྔ་ན་མེད་པ། བླ་ན་མེད་པ། མཆོག་ཏུ་གྱུར་པ་ཞིག་ཡིན་པར་ཡིད་ཆེས་ཡོད། མང་པོ་བཤད་མི་དགོས་ཏེ། ཟབ་ཆོོས་འདི་ཉིད་ཀྱི་སྒོ་ཕྱེས་ནས་བཟུང་། བོད་གངས་རིའི་ལྗོངས་སུའང་སེམས་ཅན་ལ་བདེ་སྐྱིད་བླ་ན་མེད་པ་བྱུང་ཞིང་། སངས་རྒྱས་ཀྱི་བསྟན་པ་ཡང་དར་ཞིང་རྒྱས་པར་གྱུར་པ་ཡིན། མ་ཟད་ཕྱི་ཕྱོགས་ན་ཡོད་པའི་མི་རྣམས་ཐུགས་ནང་མཐུན་ལ་ཁ་དགེ་ཞིང་བཀྲ་ཤིས་པར་གྱུར་པ་ནི་དངོས་ཡོད་གནས་ཚུལ་ཡིན། ཁྱད་པར་དུ། ཆོས་འདི་ཉིད་དང་འཕྲད་པའི་བསྟན་འཛིན་རྣམས་ཀྱི་མཛད་འཕྲིན་ཐམས་ཅད་ཡར་ངོའི་ཟླ་བ་བཞིན་དུ་ལེགས་ཕྱོགས་སུ་འཕེལ་བཞིན་ཡོད་པ་ཁོ་ན་ལ་བསམ་བློ་བཏང་ན་ཡང་། ཆོས་འདི་ཐམས་ཅད་ལ་ཁ་དགེ་བ་དང་། བཀྲ་ཤིས་པ་ཞིག་ཡིན་པར་ཚང་མས་དཔོག་ཐུབ་རྒྱུ་རེད། དེ་དག་ནི་ཁྱེད་རྣམས་ལ་ཕུར་བ་མགུལ་ཁུག་མའི་ལོ་རྒྱུས་དང་ཆེ་བ་མདོ་ཙམ་ཞིག་བཤད་པ་ཡིན། ད་ནི་ཆོས་ཚན་འདིའི་དབང་བསྐུར་བའི་སྐབས་སུ་བབས་ལགས།
མཁན་བསོད་དར་རྒྱས་ཀྱིས་མཛད་པའི་དྲན་ངོགས་ཀྱི་ནུབ་བསྐྱོད་ལས་བཏུས།
སྤྱི་སྟེགས་གསལ་བཤད།
འཕྲིན་སྟེགས་འདི་རུ་སྔ་འགྱུར་རྙིང་མའི་མཁས་གྲུབ་སྐྱེས་ཆེན་གསེར་རིའི་ཕྲེང་བ་ལྟ་བུ་རྣམས་ཀྱིས་གསུངས་པའི་ཆོས་ཚན་ཁག་དང་། སྔ་འགྱུར་ཞབས་ཞུ་ཚན་ཆུང་གི་ལས་རིམ། དེ་བཞིན་ཚན་ཆུང་གིས་ཆེད་ཞུས་མཁས་དབང་གང་མང་གི་གསུང་བཤད། སྔ་འགྱུར་རང་ལུགས་ཀྱི་གཞུང་ཆེན་ཁག་དང་ལྟ་གྲུབ་འཛིན་མཚམས་སོགས་ལས་འཕྲོས་པའི་དཔྱད་རྩོམ་དང་། དེ་བཞིན་རིག་འཛིན་གོང་མ་རྣམས་ཀྱི་རྣམ་ཐར་རྗེས་དྲན་སོགས་ཆེད་སྤེལ་བྱེད་སྤེལ་ཞུས་ཡོད་པས་གསན་གཟིགས་གནང་བར་མཆོག་ཏུ་དགེའོ་ཞུ། གཞན་ཡང་འདིར་བཀོད་པའི་གསུང་བཤད་དང་དཔྱད་རྩོམ་སོགས་ཀྱི་ནང་དོན་རྣམས། རྩོམ་པ་པོ་དང་གསུང་བཤད་གནང་མཁན་མི་སྒེར་གྱི་ལྟ་བ་ཡིན་པ་ལས། ངེད་སྔ་འགྱུར་ཞབས་ཞུ་ཚན་ཆུང་གི་ལྟ་བ་ཡིན་པའི་ངེས་པ་མེད་ཞུ།
བདེན་གསུང་བཀའ་ཡི་རྒྱ་མཚོ་ཆེན་པོ་ལ།།
ཟབ་མོའི་ཆོས་གཏེར་ནོར་བུས་མངོན་པར་མཛེས།།
མདོ་དང་སྔགས་ཀྱི་ལམ་བཟང་ཟུང་དུ་འབྲེལ།།
མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག།
