سېنى كۆرگەن چۈشۈم ياخشىكەن
مۇھەممەتجان راشىدىن
مەنزىلىڭدىن قالدىم بىخەۋەر،
مەلۇم ئەمەس بارار- تۇرارىڭ.
راست گېپىڭنى ئېيتقىنا يارىم،
مەندىن ئۆزگە بارمىدى يارىڭ؟
ئەلدىن سوراش ئۇياتقۇ سېنى،
سورىماسقا قويمىدى كۆڭلۈم.
ئۇچۇرۇڭنى ئالسام ناۋادا،
سەن كەلگەندەك يايرىدى كۆڭلۈم.
يارسىز ئۆتكەن باھاردىن، يازدىن،
يارنى كۆرگەن قىشىم ياخشىكەن.
سەندىن جۇدا يۈرگەن كۈنلەردىن،
سېنى كۆرگەن چۈشۈم ياخشىكەن.
