རང་བཞིན་བཀོད་པ་མཛེས་པའི་གངས་རི་བསྐོར།།
དབུས་སུ་པད་འདབ་རྒྱས་འདྲའི་ཐང་ཆེན་འདིར།།
མི་དབང་རྒྱུད་འཛིན་ཐུགས་ཀྱི་མེ་ལོང་ལས།།
ངོ་མཚར་ཆེ་བའི་ལྕགས་མཁར་སློབ་གྲྭ་ཆགས།།
ཕྱི་ནང་ཤེས་བྱའི་གནས་ལ་མཁས་པ་དང་།།
ཐུགས་ལ་བྱམས་བརྩེ་ལྡན་པའི་བཀའ་དྲིན་ཅན།།
སློབ་དཔོན་མང་རབས་མ་བསྐུལ་བཞིན་དུ་ཡང་།།
སློབ་གྲྭ་འདི་རུ་འཛོམས་པ་ཡ་མཚན་ཆེ།།
མཚོ་གཞི་ལེགས་པའི་མེ་ཏོག་ཐག་རིང་ཡང་།།
སྲིབ་སྦྱངམ་བརྒྱ་སྟོང་རང་བཞིན་འཁོར་དོ་བཟུམ།།
ཡོན་ཏན་ཕུན་སུམ་ཚོགས་པའི་སློབ་གྲྭ་འདིར།།
ཤེས་རབ་མིག་ལྡན་སློབ་ཕྲུག་གྲངས་མེད་འཛོམས།།
འོ་མའི་མཚོ་ལས་ནོར་བུ་འབྱུང་བ་བཞིན།།
དཔལ་ལྡན་འབྲུག་པའི་བུ་རྒྱུད་ཡ་རབས་ཅན།།
བློ་རིག་མཁས་པའི་སློབ་ཕྲུག་རྩལ་ཆེ་བ།།
འབྱུང་སའི་གནས་ནི་སློབ་གྲྭ་འདི་རུ་ཨིན།།
བཀའ་དྲིན་འཁོར་མཐའ་བྲལ་བའི་སློབ་གྲྭ་འདིའི།།
མཚན་ཙམ་རྣ་བར་གོ་ཡང་སྤྲོ་སྣང་ཤར།།
རང་དབང་མེད་པའི་མིག་ཆུ་ས་ལ་ཤོར།།
ཆུང་དུས་སྐབས་ཀྱི་དྲན་པ་སེམས་ལ་ཤར།།
རླུང་གིས་མི་གཡོ་གངས་རི་དཀར་པོ་བཞིན།།
བཀའ་དྲིན་འཁོར་མཐའ་བྲལ་བའི་སློབ་གྲྭ་དེ།།
ནམ་ཡང་མི་འགྱུར་བརྟན་དུ་བཞུགས་པ་དང་།།
སློབ་སྦྱོང་མཐུན་རྐྱེན་ཕུན་སུམ་ཚོགས་པར་ཤོག།
ད་རེས་རྟེན་འབྲེལ་བཟང་བའི་ཉིན་མོ་འདིར།།
བསླུ་མེད་དཀོན་མཆོག་གསུམ་པོ་དཔང་བཙུག་ནས།།
རང་ལ་བཀའ་དྲིན་ཆེ་བའི་ལྕགས་ས་མཁར།།
འབྲིང་རིམ་སློབ་གྲྭ་འདི་ནི་བཀྲ་ཤིས་ཤིང་།།
དཔལ་འབྱོར་ཕུན་སུམ་འཛོམས་པའི་སྨོན་ལམ་ཞུ།།
