མཁའ་
དབྱིངས་
ཀྱི་
སྤྲིན་
དཀར།
空丨中丨云丨彩
སློབ་མ་ཁོང་གཉིས་ནི་ཕ་ཡུལ་དར་མདོ་སྐྱ་གད་ནས་ཡིན་པ་དང་། ཆུང་དུས་ནས་གྲོགས་པོ་ཡིན་པ་མ་ཟད། དམའ་འབྲིང་སྐབས་ཀྱི་སློབ་གྲོགས་ཡིན། མཐོ་འབྲིང་ལོ་གསུམ་གྱི་རྗེས་སུ། ཁོང་གཉིས་སླར་ཡང་པེ་ཅིང་སློབ་ཆེན་གྱི་གྲོང་ཁྱེར་དང་ཁོར་ཡུག་སློབ་གླིང་གི་སློབ་གྲོགས་ལ་འགྱུར་རྒྱུ་ཡིན་ཞིང་། ཕ་མས་བཏགས་པའི་མིང་བཞིན་དུ་ཤེས་རབ་ལ་བརྟེན་ནས་བཀྲ་ཤིས་ཤིང་ཕུན་སུམ་ཚོགས་པའི་མི་ཚེ་སྐྱེལ་འགོ་རྩོམ་རྒྱུ་རེད།
ཉིན་དེར་ཁོང་གཉིས་ལ་བརྡ་ཐོ་བསྐྱལ་མཁན་ནི་མང་ཚོགས་ཀྱིས་གངས་འདབས་ཀྱི་འཕྲིན་སྐྱེལ་ཕོ་ཉ་ཞེས་སུ་འབོད་པའི་དུས་རབས་ཀྱི་མིག་དཔེ་འཆི་མེད་རྡོ་རྗེ་རེད།
དེ་ཡང་། ཟླ་7ཚེས་28ཉིན་གྱི་སྔ་དྲོར། འཆི་མེད་རྡོ་རྗེས་ལྗིད་ཏིག་ཏིག་གི་འབོག་སྒྲིལ་དང་ཟོལ་མེད་ཀྱི་སྨོན་འདུན་བཟང་པོ་འཁྱེར་བཞིན་སྦྲག་སྐྱེལ་རླངས་འཁོར་བཏང་ནས་ཕུན་ཚོགས་བཀྲ་ཤིས་ཀྱི་ཞོར་ལས་བྱ་ཡུལ་དང་ཤེས་རབ་ཕུན་ཚོགས་ཀྱི་ཁྱིམ་དུ་འབྱོར་ཡོད། ཁོང་གིས། ངས་གངས་ལྗོངས་ས་མཐོར་སྦྲག་ཟོག་བསྐྱལ་ནས་ལོ་སུམ་བཅུ་ལྷག་འགོར་སོང་། དེ་རིང་ནི་འདི་འདྲ་ཤེས་ཡོན་གྱིས་ཕྱུག་པའི་ཅ་དངོས་སྐྱེལ་ཐེངས་ཐོག་མ་དེ་ཡིན་ཞེས་བརྗོད་ཡོད།
ཤེས་རབ་ཕུན་ཚོགས་ནི་རྩིས་དངོས་རྫས་གསུམ་ལ་ཤིན་ཏུ་དགའ་བའི་སློབ་མ་ཞིག་ཡིན་པ་དང་། མཐོ་རྒྱུགས་སྐར་གྲངས་661གི་གྲུབ་འབྲས་ཐོག་ནས་རྒྱལ་ཁབ་ཀྱི་ཆེད་དམིགས་འཆར་གཞི་བརྒྱུད་པེ་ཅིང་སློབ་ཆེན་གྱི་གྲོང་ཁྱེར་དང་ཁོར་ཡུག་སློབ་གླིང་གི་ཁོར་ཡུག་ཚན་རིག་སློབ་གླིང་དུ་ཚུད་ཡོད།
ཤེས་རབ་ཕུན་ཚོགས་ནི་2005ལོར་དར་མདོ་གྲོང་ཁྱེར་དུ་སྐྱེས་པ་དང་། ཁོང་གི་ཨ་ཕ་ནི་སི་ཁྲོན་ཞིང་ཆེན་བོད་ཡིག་སློབ་གྲྭའི་བོད་ཡིག་དགེ་རྒན་ཞིག་དང་། ཨ་མ་ནི་དར་མདོ་སློབ་འབྲིང་གི་ལུས་རྩལ་དགེ་རྒན་ཞིག་ཡིན། ཁོང་ནི་དར་མདོ་སློབ་འབྲིང་གི་ཁོངས་གཏོགས་སློབ་ཆུང་དང་དམའ་འབྲིང་དུ་སློབ་སྦྱོང་བྱས་པ་དང་། ག་དུས་ཡིན་ཡང་དགེ་སློབ་ཚོའི་མིག་ནང་གི་སློབ་བུ་བཟང་པོ་དེ་ཡིན། རང་གི་ཆེད་ལས་སྐོར་གླེང་སྐབས། ཤེས་རབ་ཕུན་ཚོགས་ཀྱིས་འདི་ནི་ངའི་བསམ་འདུན་དང་ཡོངས་སུ་མཐུན་སོང་། ང་ནི་མཚོ་བོད་ས་མཐོའི་ཐུན་མོང་མ་ཡིན་པའི་རང་བྱུང་ཁམས་ཀྱི་མཛེས་སྡུག་ལ་ཤིན་ཏུ་དགའ་པོ་ཡོད་ལ། ཁོར་ཡུག་སྲུང་སྐྱོབ་ཀྱི་འབྱུང་ཁམས་འདུ་ཤེས་ཀྱང་ཆུང་དུས་ནས་སེམས་གཏིང་དུ་ཡོད། མ་འོངས་པར་ཚན་ཞིབ་རིག་གཞུང་གི་ཁྱབ་ཁོངས་སུ་སློབ་སྦྱོང་ཧུར་ཐག་བྱས་ནས་དཀར་མཛེས་ཀྱི་སྔོ་ལྗང་རི་ཆུར་སྲུང་སྐྱོང་བྱ་རྒྱུ་ཡིན་ཞེས་བརྗོད་ཡོད།
ཕུན་ཚོགས་བཀྲ་ཤིས་ནི་རྩོམ་རིག་དང་ལོ་རྒྱུས་གཏན་ཚིགས་ལ་ཤིན་ཏུ་དུངས་པའི་རིག་ཚན་སློབ་མ་ཞིག་ཡིན། མཐོ་རྒྱུགས་སྐར་གྲངས་620ཡི་གྲུབ་འབྲས་ཐོག་ནས་པེ་ཅིང་སློབ་ཆེན་གྱི་གྲོང་ཁྱེར་དང་ཁོར་ཡུག་སློབ་གླིང་གི་གྲོང་ཁྱེར་དང་གྲོང་གསེབ་འཆར་འགོད་ཆེད་ལས་སུ་ཚུད་ཡོད། 2006ལོར་སྐྱེས་པའི་ཁོང་གི་ཕ་མ་གཉིས་ནི་དཀར་མཛེས་ཁུལ་གྱི་གཞུང་ཞབས་པ་ཡིན། སློབ་ཆུང་དུས་ནས་བཟུང་། ཁོང་ནི་ལོ་རྒྱུས་དང་ཆབ་སྲིད་རིགས་ཀྱི་དཔེ་དེབ་ལྟ་རྒྱུར་སྤྲོ་བ་ཆེན་པོ་ཡོད་ཟེར། རང་གི་ཆེད་ལས་སྐོར་གླེང་སྐབས། ཁོང་གིས། གྲོང་ཁྱེར་དང་གྲོང་གསེབ་འཆར་འགོད་དེ་ངའི་རེ་འདུན་ཆེ་ཤོས་དེ་མིན་མོད། འོན་ཀྱང་ང་རང་ལ་སྦྱོང་འདོད་ཆེན་པོ་ཡོད། ཆེད་ལས་སློབ་སྦྱོང་ཡག་པོ་བྱེད་པའི་ཞོར་དུ་ད་དུང་མཚན་ཉིད་རིག་པའི་འབྲེལ་ཡོད་སློབ་ཚན་འདེམས་སྦྱོང་ངམ་ཡང་ན་མཚན་ཉིད་རིག་པའི་བསླབ་གནས་ཟུར་སྦྱོང་བྱ་རྒྱུ་ཡིན་ཞེས་བརྗོད་ཡོད།
མཐོ་རྒྱུགས་མཇུག་འགྲིལ་རྗེས། ཕུན་ཚོགས་གཉིས་མ་གྲོས་གཅིག་མཐུན་ངང་ཕ་ཡུལ་དར་མདོ་གྲོང་ཁྱེར་དུ་བསྡད་ཡོད། ཕྱོགས་གཅིག་ནས་ཕུན་སུམ་ཚོགས་པའི་གུང་གསེང་འཚོ་བར་རོལ་བ་དང་། ཕྱོགས་གཞན་ཞིག་ནས་སློབ་ཆེན་འཚོ་བར་རེ་སྒུག་དང་གྲ་སྒྲིག་བྱེད་བཞིན་ཡོད། ཤེས་རབ་ཕུན་ཚོགས་ཀྱིས་དཀར་མཛེས་ཁུལ་གྱི་སྐབས་དྲུག་པའི་སློབ་གྲྭ་འབྲིང་ཆུང་གི་སློབ་མའི་ལུས་རྩལ་འགྲན་ཚོགས་དང་སྒྱུ་རྩལ་དུས་ཆེན་གྱི་དང་བླངས་པ་བྱས་པ་མ་ཟད། དཔྱད་འདེམས་ནང་ཞུགས་པ་བརྒྱུད་སི་ཁྲོན་ཞིང་ཆེན་སྤུས་ལེགས་སློབ་གསོ་སྐུལ་འདེད་ལྷན་ཚོགས་སྐབས་དྲུག་པའི་སི་ཁྲོན་གྱི་དཔེ་བཟང་སློབ་ཕྲུག་ཅེས་པའི་རོགས་སྐྱོར་བྱ་དགའ་ཡང་ཐོབ་ཡོད། ཕུན་ཚོགས་བཀྲ་ཤིས་ནི་ཀྲུང་གོ་སྦྲག་སྲིད་ཚོགས་པ་ཚད་ཡོད་ཀུང་སི་དཀར་མཛེས་ཁུལ་ཡན་ལག་ཀུང་སིར་སློབ་ཞོར་ལས་ཀ་བྱེད་བཞིན་ཡོད། ཁོང་གིས་རིག་གཏོད་ཐོན་རྫས་འགྲེམ་འཚོང་དང་ལུགས་རྙིང་ལོའི་བདུན་པའི་ཚེས་བདུན་གྱི་མཛའ་གྲོགས་དུས་ཆེན་གྱི་ཚོང་འགུག་ཁྱབ་གདལ་བྱེད་སྒོ་རབ་དང་རིམ་པ་ཇུས་འགོད་དང་སྐུལ་འདེད་གཏོང་རོགས་བྱས་པ་དང་། ད་དུང་ཁ་ལོ་བའི་སློབ་གྲྭར་མིང་ཐོ་བཀོད་ནས་རླངས་འཁོར་སྦྱོང་བ། ཉིན་ལྟར་དལ་རྒྱུག་སྦྱོང་བརྡར་བྱེད་པ། དཔེ་དེབ་སྣ་ཚོགས་ལ་བལྟས་ནས་མ་འོངས་པའི་འཚོ་བར་རེ་སྙེག་བྱེད་བཞིན་ཡོད།
སློབ་གྲོགས་ཤེས་རབ་ཕུན་ཚོགས་ལ་རྟེན་འབྲེལ་ཞུ། སློབ་གྲོགས་ཕུན་ཚོགས་བཀྲ་ཤིས་ལ་རྟེན་འབྲེལ་ཞུ། པེ་ཅིང་སློབ་ཆེན་གྱི་ཞིང་ས་གཤིན་པོར་ཁྱེད་གཉིས་ཀྱི་རེ་བའི་ལས་ལ་འབྲས་བཟང་སྨིན་པའི་སྨོན་འདུན་ཞུ།
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།
