ཉེ་ཆར། རྒྱལ་ཁབ་བསྡོམས་རྩིས་ཅུས་ཀྱིས་རྩོམ་སྒྲིག་དཔེ་སྐྲུན་བྱས་པའི《2024ལོའི་ཀྲུང་གོའི་བསྡོམས་རྩིས་ལོ་འཁོར་མེ་ལོང》ནང་2023ལོའི་རང་རྒྱལ་གྱི་ཞིང་ཆེན་31གི་ཕྲུ་གུ་སྐྱེ་ཚད་དང་མི་འཆི་ཚད། རང་ཤུགས་སུ་འཕར་ཚད་བཅས་ཡོངས་བསྒྲགས་བྱས་ཡོད།
གྲངས་གཞི་ལས་མངོན་པར། 2023ལོར་ཞིང་ཆེན་15ཡི་ཕྲུ་གུ་སྐྱེ་ཚད་དེ་རྒྱལ་ཡོངས་ཀྱི་ཆ་སྙོམས་ཆུ་ཚད（6.39‰）ལས་མཐོ་བ་བྱུང་ཡོད། བོད་ལྗོངས་སུ་ཕྲུ་གུ་སྐྱེ་ཚད་13.72‰ཟིན་ནས་རྒྱལ་ཡོངས་ཀྱི་ཨང་དང་པོར་སླེབས་ཡོད། ཕྲུ་གུ་སྐྱེ་ཚད་10‰ལས་བརྒལ་བའི་ཞིང་ཆེན་ནང་ད་དུང་ཀུའེ་ཀྲོའུ་དང་ཉིང་ཞ་ཡོད། སྤྱི་ཡོངས་ནས་བལྟས་ན། ནུབ་རྒྱུད་ས་ཁུལ་དུ་ཕྲུ་གུ་སྐྱེ་ཚད་དེ་ཤར་རྒྱུད་ས་ཁུལ་ལས་མཐོ་བ་དང་། སྐམ་སའི་དབུས་ཁུལ་དུ་མཚོ་རྒྱུད་ས་ཁུལ་ལས་མཐོ་བ་བྱུང་ཡོད།
མི་འབོར་རང་ཤུགས་སུ་འཕར་ཚད་ནས་བལྟས་ན། ཁྱོན་ཞིང་ཆེན་8ཀྱི་2023ལོའི་མི་འབོར་རང་ཤུགས་སུ་འཕར་ཚད་དེ་འཕར་བའི་རྣམ་པ་རྒྱུན་འཁྱོངས་ཐུབ་ཡོད་པ་དང་། གཙོ་བོ་ནུབ་རྒྱུད་ས་ཁུལ་དང་ཧྭ་ནན་དུ་ཡིན། དེའི་ནང་ནས་བོད་ལྗོངས་དང་ཉིང་ཞ། ཀུའེ་ཀྲོའུ། ཧའེ་ནན། ཀོང་ཏུང་བཅས་ནི་མི་འབོར་རང་ཤུགས་སུ་འཕར་ཚད་ཨང་དང་པོ་ནས་ལྔ་པ་བར་ཡིན། ཞིང་ཆེན་23གྱི་མི་འབོར་རང་ཤུགས་སུ་འཕར་ཚད་ཆག་ཡོད་པ་དང་། 2022ལོ་དང་བསྡུར་ན་ཞིང་ཆེན་3མང་དུ་ཕྱིན་ཡོད།
རྒྱུན་སྡོད་མི་འབོར་གྱི་འགྱུར་ལྡོག་ནས་བལྟས་ན། 2023ལོར་ཞིང་ཆེན་31ཁྲོད་ཞིང་ཆེན་11གི་རྒྱུན་སྡོད་མི་འབོར་འཕར་བའི་རྣམ་པ་མངོན་ཞིང་། དེ་དག་ནི་ཁག་སོ་སོར་ཀྲེ་ཅང་དང་ཀོང་ཏུང་། ཧའེ་ནན། ཧྲང་ཧའེ། ཅང་སུའུ། ཤིན་ཅང་། ཀུའེ་ཀྲོའུ། པེ་ཅིང་། ཐེན་ཅིན། ཉིང་ཞ། བོད་ལྗོངས་བཅས་ཡིན། དེའི་ནང་། 2023ལོར་ཀྲེ་ཅང་གི་མི་འབོར་འཕར་ཚད་མི་ཁྲི་50ཟིན་ནས་ཨང་དང་པོར་སླེབས་ཡོད། 2023ལོར་ཀོང་ཏུང་གི་མི་འབོར་འཕར་ཚད་མི་ཁྲི་49ཟིན་པ་དང་། ཧའེ་ནན་གྱི་མི་འབོར་འཕར་ཚད་ཁྲི་16.19ཟིན་ནས་ཨང་གསུམ་པར་སླེབས་པ། ཧྲང་ཧའེ་ལ་མི་ཁྲི་11.56འཕར་བ། ཅང་སུའུ་དང་ཤིན་ཅང་གཉིས་ལ་མི་ཁྲི་11འཕར་བ། ཀུའེ་ཀྲོའུ་ལ་མི་ཁྲི་9འཕར་བ། པེ་ཅིང་དུ་མི་ཁྲི་1.5འཕར་བ། ཐེན་ཅིན་དང་བོད་ལྗོངས། ཉིང་ཞ་བཅས་སུ་2023ལོར་མི་འབོར་འཕར་ཚད་མི་ཁྲི་1ཟིན་ཡོད།
《2024ལོའི་ཀྲུང་གོའི་བསྡོམས་རྩིས་ལོ་འཁོར་མེ་ལོང》ནང་ཡོངས་བསྒྲགས་བྱས་པའི་གྲངས་གཞིར་གཞིགས་ན། 2023ལོར་ཀྲུང་གོར་ལོ་65དང་དེ་ཡན་གྱི་མི་འབོར་ཁྲི་21676ཟིན་པ་དང་། ཞབས་ཏོག་སྒྲུབ་དགོས་པའི་རྒན་རྒོན་གྱི་བསྡུར་ཚད་22.5%ཟིན་ཡོད། བཤད་སྟངས་གཞན་ཞིག་གི་ཐོག་ནས་བཤད་ན། ངལ་རྩོལ་ལོ་ཚད་ནང་གི་མི་4.4རེས་རྒན་རྒོན་1རེ་ཞབས་ཏོག་སྒྲུབ་པའི་འགན་འཁུར་དགོས་ཀྱི་ཡོད།
གྲངས་གཞི་ནས་མངོན་པར་གཞིགས་ན། བོད་ལྗོངས་དང་ཤིན་ཅང་། ཀོང་ཏུང་། ཉིང་ཞ་སོགས་ཞིང་ཆེན་དུ་རྒན་རྒོན་ཅན་དུ་འགྱུར་ཚད་ཅུང་དམའ་བ་ཡོད། དེའི་ནང་ཉེ་བའི་ལོ་20ཡི་རིང་། ཞབས་ཏོག་སྒྲུབ་དགོས་པའི་རྒན་རྒོན་མི་གྲངས་ཀྱི་བསྡུར་ཚད་དམའ་རུ་ཕྱིན་པ་ནི་བོད་ལྗོངས་ཁོ་ན་ཡིན་ཏེ། 2005ལོའི་9.26%ནས་2023ལོའི་8.77%བར་ཆག་ཡོད།
བོད་ལྗོངས་སུ་རྒན་རྒོན་ཅན་དུ་འགྱུར་ཚད་དམའ་དོན་གང་ཡིན་ནམ་ཞེ་ན། མི་འབོར་རིག་པ་མཁས་ཅན་ཧོ་ཡ་ཧྥུའུ་ཡིས་དེ་སྔ་རྩོམ་ཡིག་ཅིག་སྤེལ་བའི་ནང་། བོད་ལྗོངས་ནི་ཀྲུང་གོའི་མི་འབོར་གྲུབ་ཆའི་ནང་ཆེས་གཞོན་ཤོས་ཀྱི་ཞིང་ཆེན་གྲས་ཡིན། དེའི་རྒྱུ་མཚན་གཙོ་བོ་ནི་བོད་ལྗོངས་སུ་ཕྲུ་གུ་སྐྱེ་ཚད་ཅུང་མཐོ་བའི་རྐྱེན་གྱིས་རེད། “རྒྱལ་ཡོངས་ཀྱི་མི་འབོར་ཡོངས་བཤེར་ཐེངས་བདུན་པའི”གྲངས་གཞིར་གཞིགས་ན། 2020ལོར་རྒྱལ་ཡོངས་སུ་ཕྲུ་གུ་སྐྱེ་ཚད་བསྡོམས་འབོར་1.3ཡིན་པ་དང་། བོད་ལྗོངས་སུ་ཕྲུ་གུ་སྐྱེ་ཚད་བསྡོམས་འབོར་1.93ཟིན་ཡོད་ཅིང་། རྒྱལ་ཡོངས་ཀྱི་ཆ་སྙོམས་གྲངས་ཐང་ལས་ཤུགས་ཆེན་པོས་མཐོ་བ་ཡོད་ཅེས་བྲིས་ཡོད།
来源：中央广播电视总台藏语
编辑：华尔让
校对：华尔让
二审：梅朵
三审：白玛曲吉
监制：彭刚
