འབའ་ཐང་རྫོང་གི་ལག་རྩལ་པ་བསྟན་འཛིན་གྱི་གནས་ཚུལ་རགས་བཀོད།
བསྟན་འཛིན་གྱིས་རང་གི་ཐོན་རྫས་བཤམ་སྟོན་བྱེད་བཞིན་པའི་ཚུལ།
སྤྱི་ཟླ10པའི་ཚེས25ཉིན། འབའ་ཐང་རྫོང་ཀྲུང་ཧྲན་ཐང་ཆེན་དུ་སྤེལ་བའི2024ལོའི་གསར་གཏོད་གསུམ་གྱི་འགྲན་སྡུར་ཆེན་མོ་བདེ་བླག་ངང་མཇུག་འགྲིལ་ཞིང་། འགྲན་ཞུགས་བདམས་ཐོན་པ་ཚོས་མཇུག་བསྡུའི་ལས་ཀ་སྒྲུབ་སྒང་ཡིན་ལ། མི་རིགས་ཀྱི་ལག་ཤེས་བཟོ་རྩལ་འདུ་ཚོགས་སུ་ཡུལ་སྐོར་བ་དང་གྲོང་མི་ཚོས་འགྲན་སྡུར་བྱ་ཡུལ་དུ་འཚང་ཁ་ཤིག་ཤིག་གིས་ཐོན་རྫས་ཉོ་བར་བྲེལ་བཞིན་འདུག།
ལག་ཤེས་ཐོན་རྫས་ཀྱི་ཁེངས་པའི་ཐང་ཆེན་སྟེང་བསྟན་འཛིན་གྱིས་བཟོས་བའི་ལུག་ལྤགས་ཁུག་མ་ཞིག་ལ་མི་རྣམས་ཀྱི་དགའ་བསུ་ཆེན་པོ་བྱས་ཤིང་། ཚང་མས་ཁུག་མ་དེར་མི་རིགས་ཀྱི་ཁྱད་ཆོས་ལྡན་ཞིང་སྤྱོད་གོ་ཆོད་ལ་དུས་རབས་ཀྱི་མཛེས་དབྱིབས་དང་མཐུན་འདུག་ཅེས་བསྔགས་བརྗོད་བྱས་པ་དང་། ཁུག་མ་དེ་ཁྲོམ་རའི་ནང་བྲིན་རྒྱུག་ཆེ་བའི་ཚོང་ཟོག་ཅིག་ཏུ་གྱུར། ཁུག་མ་ཆུང་ཆུང་དེ་ནི་དབྱིན་ཇིའི་གོང་མའི་སྒྱུ་རྩལ་སློབ་གླིང་གི་ཕྱི་སྦྱོང་སློབ་མ་སྐལ་བཟང་སྒྲོལ་མ་དང་བསྟན་འཛིན་གཉིས་ཀྱིས་མཉམ་དུ་ཇུས་འགོད་བྱས་པ་ཞིག་ཡིན་ལ། ན་ནིང་ལག་ཤེས་འགྲན་སྡུར་ཆེན་པོ་ནང་བྱ་དགའ་ཨང་དང་པོ་ཐོབ། ད་ལོར་བསྟན་འཛིན་ནི་དམིགས་བསལ་གདན་ཞུ་སྐུ་མགྲོན་ངོས་ནས་བྱེད་སྒོ་ལ་ཞུགས་པ་རེད།
བསྟན་འཛིན་ལ་འབའ་ཐང་དམངས་ཁྲོད་སྒྱུ་རྩལ་མཐུན་ཚོགས་ཀྱི་སྒོ་བྱང་སྟེར་བའི་ཚུལ།
བསྟན་འཛིན་གྱིས་ད་ལོ་ནི་ངས་ལག་ཤེས་ཐོན་རྫས་བཟོས་ནས་ལོ26འགོར་བ་ཡིན། ད་ཐེངས་འགྲན་སྡུར་ཆེན་པོའི་རྒྱབ་ལྗོངས་སྦྲ་གུར་དེ་ནི་ངས་སྣེ་ཁྲིད་ནས་ཟླ་བ་གཉིས་ལྷག་གི་དུས་ཚོད་སྤྱད་ནས་བཟོས་པའི་ལག་ཤེས་ཐོན་རྫས་ཤིག་ཡིན། སྦྲ་གུར་དེ་དང་སྦྲ་གུར་གཞན་གྱི་ཁྱད་པར་ཆེ་ཤོས་ནི་ཤིང་གི་སྒྲོམ་གཞིའི་གྲུབ་ཆ་དེ་ཡིན་ཞིང་སྦྲ་གུར་དེ་གང་བྱུང་དུ་གནས་སྤོ་བྱེད་ཆོག་ལ། གནས་སྤོ་བྱེད་སྐབས་བཤིག་མི་དགོས་པར་སྟབས་བདེ་མོ་ཡོད་ཅེས་རང་ཉིད་ཀྱི་ལག་ཤེས་བཟོ་རྩལ་སྐོར་གླེང་སྐབས་བསྟན་འཛིན་ལ་བློ་སྤོབས་དང་ཡིད་ཆེས་ཀྱིས་ཁེངས།
བསྟན་འཛིན་ནི་འབའ་ཐང་རྫོང་སྤོ་ཁུག་ཡུལ་ཤོག་གེ་མོ་གྲོང་སྡེའི་ཁྱིམ་ཚང་དཀྱུས་མ་ཞིག་ཏུ་སྐྱེས་ཤིང་། ཆུང་དུས་ནས་ལག་ཤེས་ཐོན་རྫས་བཟོ་བར་ཧ་ཅང་དགའ་པོ་ཡོད། ཁོ་རང་ལོ་བཅུ་ལ་སོན་པའི་སྐབས་སུ་འཚེམ་བཟོ་པ་ཞིག་གིས་བོད་གོས་བཟོས་པ་མཐོང་སྟེ། ཐོག་མར་རས་ཀྱི་རྒྱུ་ཆ་འདེམས་པ་དང་། མིའི་གཟུགས་ལ་ཚད་པ། དེ་ནས་རིམ་བཞིན་འཚེམ་དྲུབ་རྒྱག་པ་དང་། རས་ཀྱི་རྒྱུ་ཆ་སྣ་ཚོགས་ཀྱི་གྱོན་གོས་མཛེས་པོ་རེ་ཐོན་སྐབས། ཁོ་ལ་རང་དབང་མེད་པ་འཚེམ་བཟོ་པ་ཞིག་བྱེད་འདོད་པའི་སྣང་བ་སྐྱེས་ཤིང་། དེ་ནས་བཟུང་ཁོས་ལག་ཤེས་བཟོ་རྩལ་སྦྱོང་འགོ་ཚུགས་པ་ཡིན་ཟེར།
བྱ་དགའ་ཐོབ་མཁན་ཚོའི་མཉམ་སྒྲོན།
བསྟན་འཛིན་ལ་ལོ20ལྷག་གི་ལག་ཤེས་བཟོ་རྩལ་གྱི་ཉམས་མྱོང་ལྡན་ཞིང་། རྒྱུ་ཆ་ཅི་འདྲ་ཞིག་ཡིན་རུང་ཁོའི་ཞིབ་ཚགས་ཀྱི་ལག་རྩལ་ལ་བརྟེན་ནས་བྱུང་བའི་ཐོན་རྫས་དག་ནི་སྤུས་ལེགས་ཤིང་ཡིད་དུ་འོང་བ་ཤ་སྟག་ཡིན། བེད་སྤྱོད་ཆེ་བའི་ལག་ཁུག་དང་སྤུས་དག་གི་གྱོན་གོས། སྟབས་བདེ་བའི་རྐུབ་སྟེགས་སོགས་ནི་ཁོའི་ལག་ཤེས་བཟོ་རྩལ་ལ་འགྱུར་མེད་ཀྱི་དགའ་ཞེན་དང་རྒྱུན་འཁྱོངས་པའི་གྲུབ་འབྲས་དངོས་ཤིག་རེད།
ཤེས་ལྡན་མི་སྣ་འབེལ་ན་ཡུལ་སྡེ་དར་ཞིང་རྒྱས་ཞེས་པ་ལྟར2024ལོར་འབའ་ཐང་རྫོང་སྤོ་ཁུག་ཡུལ་ཤོག་གེ་མོ་གྲོང་སྡེའི་ཞིང་འབྲོག་ཡུལ་སྐོར་མཉམ་འདྲེས་ཐོན་ལས་འཕེལ་རྒྱས་ལས་གཞི་དོན་ཐོག་འཁྱོལ་ཞིང་ལག་ལེན་བསྟར། ཁྱོན་མ་དངུལ་སྒོར་དུང་ཕྱུར3.0246བཏང་བ་དང་ས་ཁྱོན་སྨི་གྲུ་བཞི་མ19000ལྷག་ཟིན་པ་དང་། ཞིང་པའི་སྡོད་ཁང213ལ་སྒྱུར་བཀོད་རྒྱས་སྐྲུན་བྱས་ཡོད། དེ་མིན་ཡུལ་སྐོར་ལྟེ་གནས་དང་སྒེར་འཁོར་བཏང་ནས་ཡུལ་སྐོར་བྱེད་ས། གླུ་གར་འཁྲབ་སྟོན་བྱེད་སའི་གུར། ལྗོངས་གཟིགས་སྟེགས་བུ། ལྗང་འགྱུར་སོགས་ཀྱི་རྨང་གཞི་སྒྲིག་བཀོད་ལེ་ལག་ཆ་ཚང་གི་ལས་གྲྭ་འཐུས་ཚང་དུ་བཏང་ཡོད།
བསྟན་འཛིན་གྱི་ལག་ཤེས་བཟོ་ཁང་དེ་ཡུལ་སྡེ་ནང་ཡུལ་སྐོར་བས་ལྟ་སྐོར་བྱེད་ས་གཙོ་གནས་སུ་གྱུར་པ་དང་། ཁོའི་ཐོན་རྫས་ཉོ་མཁན་ཡང་ཇེ་མང་ནས་ཇེ་མང་རེད། ཁོས་ད་དུང་གྲོང་མི་སྣེ་ཁྲིད་ནས་ལག་ཤེས་བཟོ་རྩལ་དང་ཡུལ་སྐོར་སྣེ་ལེན་བྱེད་བཞིན་ཡོད་དེ། ད་ལོར་རིམ་རྩིས་བྱས་ན་གེ་མོ་གྲོང་སྡེས་ཡུལ་སྐོར་བ་ཁྲི14སྣེ་ལེན་བྱས་པ་དང་རིག་གནས་ཡུལ་སྐོར་གྱི་འབབ་འཕར་སྒོར་ཁྲི40ལྷག་བྱུང་ཡོད།
ཐེངས་འདིའི་འབའ་ཐང་རྫོང་གི་ལག་རྩལ་འགྲན་སྡུར་ནང་བསྟན་འཛིན་གྱིས་དཔེ་སྟོན་སྣེ་ཁྲིད་འོག་གེ་མོ་གྲོང་སྡེར་གྲུབ་འབྲས་བཟང་པོ་ཐོབ་ཡོད། ཁོས་མ་འོངས་པར་རང་ཉིད་ལ་དབང་བ་དང་གེ་མོ་ལ་དབང་བ། འབའ་ཐང་ལ་དབང་བའི་སྤུས་རྟགས་ཤིག་བཏོད་རྒྱུ་ཡིན་པའི་ཆོད་སེམས་ལྡན་ལ། འབའ་ཐང་གི་སྲོལ་རྒྱུན་ལག་རྩལ་དུས་རབས་འཕེལ་རྒྱས་ཀྱི་མདུན་གྲལ་དུ་སླེབས་པར་སྐུལ་འདེད་གཏང་རྒྱུ་ཡིན་ཞེས་བཤད་པ་རེད།།
来源：康巴传媒藏文
编辑：华尔让
校对：华尔让
二审：梅朵
三审：白玛曲吉
监制：彭刚
