يزرايل ارمياسى: ليۆان ءتاڭىر پارتياسىنىڭ سايلاۋىت اسكەري ءبولىمىنىڭ ورىنباسار قولباسشىسىنىڭ اتىپ ولتىرىلگەندىگىن ايتتى، ليۆان ءتاڭىر پارتياسىنىڭ جاڭا باسشىسى: سوعىس تاكتيكاسى جالعاسادى، -دەدى
ءوز حابارىمىز. يزرايل مەملەكەت قورعانىس ارمياسى 10-ايدىڭ 30-كۇنى مالىمدەمە جاريالاپ، بىلاي دەدى: يزرايل ارمياسى ليۆاننىڭ نايبايتيە رايونىندا ليۆان ءتاڭىر پارتياسى سايلاۋىت ءبولىمى رادۋان ءبولىمنىڭ ورىنباسار قولباسشىسى شاحاديدى اتىپ ءولتىردى. شاحادي وسى اسكەري ءبولىمنىڭ 2012-جىلدان 2017-جىلعا دەيىنگى سيريا كەزىندەگى سوعىس ارەكەتىنە جاۋاپتى بولعان.
ليۆان ءتاڭىر پارتياسىنىڭ جاڭادان تاعايىندالعان باسشىسى ناھيم قاسىم 10-ايدىڭ 30-كۇنى بىلاي دەدى: بۇرىنعى باسشى ناسرۋلانىڭ سوعىس تاكتيكاسى جالعاستى اتقارىلىپ، گازاداعى الدىڭعى شەپكە قولداۋ كورسەتىلەدى. قاسىم 10-ايدىڭ 29-كۇنى ءتاڭىر پارتياسىنىڭ جاڭا باسشىسى بولىپ تاعايىندالدى. ول 10-ايدىڭ 30-كۇنى مىندەتكە وتىرعاننان كەيىنگى تۇڭعىش رەتكى تەلەۆيزوردا سويلەگەن سوزىندە: ناسرۋلانىڭ قاستاندىققا ۇشىراۋى ءتاڭىر پارتياسىنا ۇلكەن ىقپال جاساعاندىعىن ايتتى ءبىراق بۇل ۇيىمنىڭ بارلىق بوس ورىندى تولتىرۋعا قابىلەتتى ەكەندىگىن قايتالاي دارىپتەدى.
جەرگىلىكتى ۋاقىت 10-ايدىڭ 30-كۇنى كەشتە، يزرايل مەملەكەت قورعانىس ارمياسى ليۋاننىڭ قىرۋار رايوندارىن بومبىلاپ، عيمارات جانە نەگىزدىك جابدىقتار ويراندالدى. يزرايل قورعانىس ارمياسىنىڭ ايروپلانى ليۆاننىڭ بەكا اڭعارىنداعى كوپتەگەن قالا-قالاشىقتارعا شابۋىل جاساپ، ليۆان جاقتان 27 ادام ءولىپ، نەشە ونداعان ادام جارالاندى. ليۆان ءتاڭىر پارتياسى 10-ايدىڭ 30-كۇنى حابار جاريالاپ، بىلاي دەدى: سول كۇنى يزرايلدىڭ تراۆيۆ رايونىنىڭ شىعىس وڭتۇستىك بولىمىندەگى ەرەكشە بولىم اسكەرلەرىن ماشىقتاندىراتىن اسكەري كازارماعا باسقارىلمالى بومبىمەن شابۋىل جاسالدى. يزرايل جاق قازىرشە بۇعان اڭىس قايتارمادى.
يزرايل پارلامەنتى 10-ايدىڭ 28-كۇنى ەكى زاڭ جوباسىن ماقۇلداپ، ب م ۇ-نىڭ تاياۋ شىعىس پالەستين بوسقىندارىن قۇتقارۋ-كومەكتەسۋ جانە ينجەنەريا باسقارماسىنىڭ قاتىستى ارەكەتتەر ورىستەتۋىنە تيىم سالدى. ب م ۇ-ىنىڭ حاۋىپسىزدىك القالار كەڭەسى 10-ايدىڭ 30-كۇنى مالىمدەمە جاريالاپ، بىلاي دەپ اتاپ كورسەتتى: جاۋلاپ الىنعان پالەستين تەرريتورياسى، يوردانيا، ليۆان جانە سيرياعا شۇعىل كومەك بەرۋ جاعىندا ب م ۇ-نىڭ تاياۋ شىعىس پالەستين بوسقىندارىن قۇتقارۋ-كومەكتەسۋ جانە ينجەنەريا باسقارماسىنىڭ ماڭىزى زور، ونىڭ ورنىن باسقالار باسا المايدى. حاۋىپسىزدىك القالار كەڭەسى ب م ۇ-نىڭ تاياۋ شىعىس پالەستين بوسقىندارىن قۇتقارۋ جانە ينجەنەريا باسقارماسىنىڭ ارەكەتتەرىن كۇشىنەن قالدىرۋعا نەمەسە السىرەتۋگە ۇرىنعان ءارقانداي ارەكەتكە قارسى تۇراتىندىعىن قاتاڭ ەسكەرتتى. حاۋىپسىزدىك القالار كەڭەسىنىڭ مۇشەلەرى يزرايل پارلامەنتى ماقۇلداعان زاڭ شىعارۋ ىسىنە قاتاڭ نازار اۋداردى ءارى يزرايل ۇكىمەتىن حالىقارالىق بورىشىن اتقارىپ، ب م ۇ-نىڭ تاياۋ شىعىس پالەستين بوسقىندارىن قۇتقارۋ جانە ينجەنەريا باسقارماسىنىڭ ەرەكشە ۇقىعى مەن تەكتەلمەۋ ۇقىعىنا قۇرمەت ەتىپ، ادامگەرشىلىك كومەكتىڭ تۇتاس گازا وڭىرىنە جاپپاي، تەز، حاۋىپسىز جانە كەدەرگىسىز كىرۋىنە جول بەرۋگە جانە ونى جەبەۋگە قۋزادى.
