«يكەمدى زەينەتكە شىعۋ ءتۇزىمىن اتقارۋدىڭ ۋاقىتتىق ءادىسى» جاريالاندى
ادام كۇشى بايلىعى جانە قوعامدىق قامتاماسىزداندىرۋ مينيسترلىگى، ورتالىق ۇيىمداستىرۋ ءبولىمى، قازىنا مينيسترلىگى قاتارلى 3 تاراۋ «يكەمدى زەينەتكە شىعۋ ءتۇزىمىن اتقارۋدىڭ ۋاقىتتىق ءادىسىن» جاريالادى، بۇل ءادىس 2025-جىلى 1-ايدىڭ 1-كۇنىنەن باستاپ اتقارىلدى.
ادىستە مىنالار ورتاعا قويىلدى:
جۇمىسشى-قىزمەتكەرلەر مەملەكەت بەلگىلەگەن اي سايىن نەگىزگى زەينەتاقى الاتىن ەڭ تومەنگى اقى تاپسىرۋ جىل شەگىنە جەتكەندە، يكەمدى تۇردە الدىن الا زەينەتكە شىعۋدى ءوز ەركىمەن تاڭداۋىنا بولادى، الدىن الا زەينەتكە شىعۋ ۋاقىتى زاڭدا بەلگىلەنگەن زەينەتكە شىعۋ جاسىنان ەڭ ۇزاق بولعاندا 3 جىلدان اسپاۋى كەرەك ارى زەينەتكە شىعۋ جاسى ايەل جۇمىسشى-قىزمەتكەرلەردىڭ 50 جاس، 55 جاس شەگىنەن جانە ەر جۇمىسشى-قىزمەتكەرلەردىڭ 60 جاس شەگىنەن تومەن بولماۋى كەرەك.
جۇمىسشى-قىزمەتكەرلەر يكەمدى تۇردە الدىن الا زەينەتكە شىعۋدى ءوز ەركىمەن تاڭداسا، كەمىندە ءوزى تاڭداعان زەينەتكە شىعۋ ۋاقىتىنان 3 اي بۇرىن قاراستى مەكەمە ورىنىنا جازباشا فورمادا ۇقتىرۋى كەرەك.
جۇمىسشى-قىزمەتكەرلەر زاڭدا بەلگىلەنگەن زەينەتكە شىعۋ جاسىنا جەتكەندە، قاراستى مەكەمە ورنى جۇمىسشى-قىزمەتكەرمەن كەڭەسىپ بىرلىككە كەلسە، زەينەتكە شىعۋ ۋاقىتىن يكەمدى كەشەۋىلدەتۋىنە دە بولادى، ۋاقىتى زاڭدا بەلگىلەنگەن زەينەتكە شىعۋ جاسىنان ەڭ ۇزاق بولعاندا 3 جىلدان اسپاۋى قاجەت، قاراستى مەكەمە ورنى جۇمىسشى-قىزمەتكەرلەرمەن ءبىر اي بۇرىن جازباشا فورمادا زەينەتكە شىعۋ ۋاقىتىن ۇزارتۋ سياقتى ىستەردى ايقىنداۋى كەرەك.
كوڭىل بولۋگە ءتيىستىسى، زەينەتكە شىعۋ ۋاقىتىن يكەمدى كەشەۋىلدەتۋ مەزگىلىندە، قاراستى مەكەمە ورنى جۇمىسشى-قىزمەتكەرلەرمەن كەڭەسىپ بىرلىككە كەلسە، زەينەتكە شىعۋ ۋاقىتىن يكەمدى كەشەۋىلدەتۋدى توقتاتىپ، بەلگىلەمە بويىنشا زەينەتكە شىعۋ رەسمياتىن وتەۋىنە بولادى.
ماماندار بىلاي دەدى: زاڭدا بەلگىلەنگەن بۇرىنعى زەينەتكە شىعۋ جاسى تۇراقتى بولاتىن، ءدال ۋاعىندا، ءسوز جوق، زەينەتكە شىعۋعا تۋرا كەلەتىن. ال رەفورمادان كەيىنگى زاڭدا بەلگىلەنگەن زەينەتكە شىعۋ جاسى ولشەمدى مەزگىلگە تۋرالانىپ، جۇمىسشى-قىزمەتكەرلەردىڭ زەينەتكە شىعۋ ۋاقىتى يكەمدى ارالىققا تەڭشەلدى، وسى كولەمدە ءوزىنىڭ جانە قاراستى مەكەمە ورىننىڭ جاعدايىنا قاراي ەركىن تاڭداۋىنا بولادى.
