ཐོབ་ཐང་ལག་ཁྱེར་ལེན་པའི་རེ་ཞུ་ཇི་ལྟར་བྱེད་དགོས།
ད་ལྟ་རྒྱལ་ཡོངས་ཀྱི་ས་ཆ་གང་ས་གང་དུ་གྲོང་མིའི་ཐོབ་ཐང་ལག་ཁྱེར་ལེན་ཆོག་པ་མངོན་འགྱུར་བྱུང་ཡོད་དེ། ཁྱིམ་ཐོ་ཡོད་སར་བསྡད་མེད་པའི་གྲོང་མིས་ཀྱང་ད་ལྟའི་ཐོབ་ཐང་ལག་ཁྱེར་འཁྱེར་ནས་ཐག་ཉེ་སའི་མངགས་གཏོང་ཁང་གི་ཕྱོགས་བསྡུས་སྒེའུ་ཁུང་དུ་གྲོང་མིའི་ཐོང་ཐང་ལག་ཁྱེར་བརྗེ་ལེན་གྱི་རེ་ཞུ་བྱེད་ཆོགགྲོང་མིས་ལག་ཁྱེར་བརྗེ་ལེན་བྱེད་པར་སྟབས་བདེ་བསྐྲུན་ཆེད། ས་ཁུལ་མང་པོའི་སྤྱི་བདེ་ལས་ཁུངས་ཀྱིས་ད་དུང་དྲ་ཐོག་ནས་གཉེར་བ་དང་རང་བརྟེན་ཞབས་ཞུའི་གཉེར་ཐབས་བཏོན་ཡོད། གྲོང་མིས་སྤྱི་བདེ་ཚན་པའི་དྲ་ཐོག་སྔོན་མངག་ལས་སྟེགས་བརྒྱུད་འགྲོ་ལུགས་གཉེར་བའི་དུས་ཚོད་སྔོན་མངག་བྱེད་པའམ་ཡང་ན་ཐད་ཀར་དྲ་ཐོག་ནས་གཉེར་ཆོག་ལ། རང་འདེམས་ཞབས་ཞུའི་མཐའ་སྣེ་བརྒྱུད་ཐོབ་ཐང་ལག་ཁྱེར་བརྗེ་ལེན་གྱི་རེ་ཞུ་དང་གྲོན་འཇལ་སོགས་ཀྱི་འགྲོ་ལུགས་ཀྱང་གཉེར་ཆོག་གི་ཡོད།
གླ་ཡོན་ཇི་ལྟར་བསྡུ་བ།
གོ་ཆོད་ཡུན་ཚད་ལོངས་རྗེས་གྲོང་མིའི་ཐོབ་ཐང་ལག་ཁྱེར་བརྗེ་ལེན་གྱི་གྲོན་དངུལ་ནི་ལག་ཁྱེར་རེར་སྒོར20ཡིན་པ་དང་། གྲོང་མིའི་ཐོབ་ཐང་ལག་ཁྱེར་བོར་བའམ་ཆག་སྐྱོན་བྱུང་རྗེས་བརྗེ་ལེན་བྱེད་པའི་གྲོན་དངུལ་ནི་ལག་ཁྱེར་རེར་སྒོར40ཡིན།
ཐོབ་ཐང་ལག་ཁྱེར་གསར་པ་ཇི་ལྟར་ལེན་དགོས།
སྤྱི་བདེ་ལས་ཁུངས་ཀྱིས་ལག་ཁྱེར་བཟོས་ཚར་རྗེས། དེ་གར་བཞག་པའི་ཁ་པར་ཨང་གྲངས་སུ་དྲན་སྐུལ་འཕྲིན་ཐུང་བསྐུར་གྱི་ཡོད་པས། འཕྲིན་ཐུང་འབྱོར་རྗེས་དེ་མུར་མངགས་གཏོང་ཁང་དུ་ལེན་པར་འགྲོ་ཆོག དེ་མིན། བསྐུར་སྐྱེལ་ཞབས་ཞུ་འདེམས་ཀྱང་ཆོག གྲོང་མིའི་ཐོབ་ཐང་ལག་ཁྱེར་ཁྱིམ་དུ་བསྐུར་སྐྱེལ་བྱེད་པའི་ཞབས་ཞུ་དེ་ངེས་པར་དུ་ལག་ཁྱེར་ལེན་པའི་འགྲོ་ལུགས་གཉེར་བའི་ཉིན་དེའི་ཆུ་ཚོད22:00ཡི་གོང་དུ་རེ་ཞུ་བྱེད་དགོས་པ་དང་། བསྐུར་སྐྱེལ་འགྲོ་གྲོན་རང་ཉིད་ཀྱིས་སྤྲོད་དགོས།
གྲོང་མིའི་ཐོབ་ཐང་ལག་ཁྱེར་གྱི་གོ་ཆོད་ཡུན་ཚད་ལོངས་རྗེས། གནམ་གྲུའི་སྤ་སེ་དང་མེ་འཁོར་སྤ་སེ། འགན་བཅོལ་སོགས་རྒྱུན་ལྡན་ལྟར་ཉོ་མི་ཐུབ་ལ། ད་དུང་མགྲོན་ཁང་ནང་སྡོད་པ་དང་དངུལ་རྩ་གསོག་འཇོག་སོགས་ཀྱི་བྱ་དོན་བསྒྲུབ་པར་ཡང་ཤུགས་རྐྱེན་ཐེབས་སྲིད་པས། ཚང་མས་དེར་མཐོང་ཆེན་གནང་སྟེ་རྒྱུན་ལྡན་གྱི་འཚོ་བ་དང་ལས་ཀར་ཤུགས་རྐྱེན་མི་ཐེབས་པ་གནང་དགོས། ཁྱེད་ཀྱི་ཐོབ་ཐང་ལག་ཁྱེར་གྱི་གོ་ཆོད་ཡུན་ཚད་ག་དུས་ལོང་མིན་ལ་མྱུར་དུ་གཟིགས་དང་། དུས་ལྟར་བརྗེ་ལེན་གནང་རྒྱུ་མ་བརྗེད་རོགས།།
ཡོང་ཁུངས། ཀྲུང་དབྱང་བོད་སྐད་རླུང་འཕྲིན།
རྩོམ་སྒྲིག་འགན་འཁུར་པ། སངས་རྒྱས་སྐྱབས།
ཞུ་དག་པ། རྡོ་རྗེ་ཚེ་རིང་།
ལྟ་སྐུལ་བ། ལི་པའེ་ཡུན། གཡུང་དྲུང་སྐྱབས།
