★推送2019年度四川党建期刊集团优秀图书奖彝语散文集《贾巴甲哈作品选》供读者欣赏，敬请继续关注。
ꉠꃅꄷꈜꎴꅉꇬꐛ
ꁱꊿ：ꐞꁠꏧꉐ ｜ ꀘꁊꊿ：ꎭꂵꑪꃖ
Nuosu故事”不止是Nuosu的故事也是你我的故事
ꁍꃀꀿꃀꌋꆀꀁꑳꑌꂵꈧꌠꉗꈌꃅꄷꄉꀠꐷꌊꀈꉙꑗꒉꁨꁦꀀꇁꈭꐨꆏ，ꉢꀉꑌꈎꀱꉠꃅꄷꉡꒆꉡꉘꋺꈚꌠꑟꁧꀋꋻꀐ。ꋋꆹꃅꄷꉂꏣꌋꆀꁡꇤꇬꏣꃀꏣꑟꂿꏾꐛꅹ，ꀋꉊꄹꈎꃅꑌꄮꐰꉢꉌꇿꑓꇿꃅꀱꉠꃅꄷꋍꏮꁧ。
ꀊꄶꉘꁮꑭꊷꆣꀕꀊꋨꄹꉇ，ꉢꄡꇗꒈꀑꏭꉜꄉꁧꌠꀠꍯꀊꋨꇷꑌ。ꈝꃀꈢꐕꍯꇱꀵꌊꀏꀱꄩꆽꄹꄮꈉꊯꎖꂷꀥꇈ，ꍮꊪꇁꍯꍉꄽꂫꑞꅉꈚꌠꇬꑟꇬꆏ，ꉘꁮꑭꐝꇅꅍꂵꆧꊸꐯꊸꇄꌠꇬꉬꅊꇈ。ꉢꍮꊪꇬꄉꐣꁙꀭꎂꂶꌠꄌꌊꀁꋌꇁꇈ，ꀊꄶꇓꈓꀄꊭꀊꋨꈚꇬꄉꀆꐒꁠꆤꂯꅝꀋꂪꃅ，ꈛꎂꇨꆰꇨꊸꃅꐣꁙꂶꌠꉢꎼꇱꄓꇬꀵꌊꉠꃅꄷꉜꄉꈛꎼꁧ。
ꉠꃅꄷꆹꈜꎴꅉꇬꐛ，ꄚꇓꈓꀄꊭꋌꈚꄉꀱꉠꃅꄷꑟꁧꇬꁧꐙꈝꃀꀊꎴꐕꈳꄻꅐꑴꌦ，ꈴꉠꃅꄷꁡꇤꑟꁧꌠꁧꐙꈝꃀꋋꏢꀉꄂꁮ。ꈝꃀꆹꀊꅰꀊꐯꃅꀋꐛ，ꄷꀋꁧꀭꉂꀭꍣꃅꐙꄉꈴꀋꌒꈭꐨ，ꈜꈪꈛꍣꃅꁦꈌꇈꈌꏣꅷꉠꃅꄷꁡꇤꀊꋨꈚꇬꑟ。
ꋍꃢꋑꀋꋒꉢꇁꁧꐙꈝꃀꋋꏢꈴꑲꆏ，ꉠꉌꂵꂶꌠꇁꈝꃀꋋꏢꇱꄉꉂꑟꅑꃅꐙꇬꎷ。ꉢꉜꇬ，ꉢꇓꈓꇬꄉꈍꑋꈎꌤꃅꀐꈭꐨ，ꀋꇊꆏꈎꈤꆪꈤꄉꃅꈎꀉꑌꈎꐳꐯꐳꃅꇧꈴꁧꀐꌠꌡ。ꈍꉗꈍꉗꏢꇬꅑꅸꇁꊂ，ꉢꋍꑍꋑꀋꋒꉈꀱꉠꃅꄷꎔꇂꃨꌠꀊꋨꈚꑟꁧꏾꌠꇁꉚꇈꇁꉚ。ꋋꄮꇬ，ꉢꀱꀁꇬꁧꌠꈝꃀꋋꏢꍬꇈ，ꆲꌺꈺꌋꀕꃅꇁꊿꌶꇬꇭꀧꈯꄿꃅꋌꌌꑾꌙꀕꐛꅹ，ꉌꂵꂶꌠꑌꄚꈿꅐꉈꏭꁖꇁꄉꏽ，ꈜꎴꃅꄷꈭꇂꈛꎭꅉꇬꅂꄉꐙꄏꌍꆜꌠꉬꇮꊿꋌꀋꎺꆘꅝ。ꄚꇬꆹ，ꉠꃅꄷꉬꀐ。ꑓꏮꈜꎴꃅꄷꉜꄮꇬ，ꈜꎴꃅꄷꑓꐛꇁꌠꆹꁦꌺꇈꌺꄉꉬꀕ，ꒊꃀꒈꌺꒊꊨꎮꀕꂆꃚꌒ。ꁧꋾꇬ，ꁦꀑꉒꐎꏣꄉꉠꃅꄷꎔꇂꋼꒌꄀ；ꁧꐧꇬ，ꁦꀑꃰꊿꈍꑋꀊꄶꀀꄉꆫꃅꂿꏿ。ꊿꊇꅉꀕꊨꏦꌳꉔꈪꑌꌠꃅꐨꌌꄉ，ꀋꆏꃅꐥꐨꌒꌠꇖꂟꄉꐥꐨꊷꆣꀕꌠꋈꄻꐺ。
ꉠꃅꄷ，ꁦꀑꂚꃨꃧꅉꉬꐛꅹ，ꁦꀑꂚꃨꁧꇂꇉꈽꅪ。ꉠꃅꄷ，ꄩꆹꃅꑆꃴꇉꀕ，ꃅꃴꄂꐎꃰ，ꃅꈯꏨꆉꃰꃅꌒ。ꉠꃅꄷ，ꀏꆹꅔꐛꅔꈌꏂꆘꆚ，ꁬꇁꆰꅿꃴꇂꆧꈨꒉ，ꅔꊂꑌꑿꄙꇂꉐꃅꆫ，ꆫꃀꆫꌺꉙꇁꑵꃚꎓꁨꄹꋍꑍꋑꀋꋒꁧꇂꇉꉺꎍ。ꉠꃅꄷ，ꒈꌺꒊꊨꎮꀕꂿꌠꐈꇁꒊꃀꐛ，ꒊꃀꈭꇓꈪꇓꄹꉗꈌꃅꄷꃰꊿꀄꂼꂻꐨꋌꀵꀅꌳꃅꈜꎴꃅꄷꉜꄉꈴꁧꇬꎷ。ꉠꃅꄷ，ꃄꋒꅿꉗꌑꐩꀕ，ꊖꐈꐎꐛꏂꐙ，ꇣꋦꉘꁇꁉ，ꋙꄉꃪꅪꎆ。ꉠꃅꄷ，ꌩꏪꆈꊉꀕ，ꈬꉙꈬꃪꉙꌧꌠꉙꁊ……ꃅꄷꎔꇂꃨꌠꋍꑠꇈꋍꑠ，ꀋꇊꆏꑞꑌꉢꈜꎴꃅꄷꄉꇁꌠꄹꃥꋋꂷꏭꉜꄉꈮꈜꇈꋨꏦꌠꌡ。
ꉠꃅꄷꎔꇂꋽꌠꂿꇐꈨꇐꋋꈨꌌꎧꑱꃅꑱꐺꄮꇬ，ꉌꐡꌊꎺꀋꇬꃅꇓꈓꇬꄉꌷꐛꌠꑵꉙꊱꉢꑵꁖꇁꅊꇈ。ꉠꉌꃀꈏꆹꑠꃅꉪ: ꌞꃅꈁꎔꎗ，ꀀꃅꉂꀋꋌ，ꄡꇗꊽꊨꏦꃅꄷꄈꑌꎔꃨꅊꇈ！ꇓꈓꇬꌄꆣꄉꑞꑌꐥꑴꇬ，ꄡꇗꊽꊨꏦꃅꄷꐥꌠꀉꏮꊽꉌꂵꑘꒃꃅꀋꐛ。ꇓꈓꇬ，ꊾꀑꐮꈷꊾꑭꐯꄔꌊꉌꂵꂅ，ꈜꀕꇈꀊꄶꑍꇀꌋꀋꐥꃅꏄꃚꂆꃚꈧꌠ，ꊿꋌꎼꃅꑍꋋꑍꃅꏈꇁꁧꇌꄑ，ꊿꇬꀋꐕꌦꄉꏽ。ꉢꎺꑴꌦ，ꉘꃀꃢꌠꇁꇓꈓꄯꒉꀗꄮ，ꋍꃢꇬꇓꈓꈊꃀꄆꄑꂷꇭꑵꌠꁤꇉꏁꇉꁏꄉꃴꇁꆧꈨꒉꌠꀊꅰꃅꊿꋌꁭ。ꋌꉬꑴꇬ，ꊁꀊꉗꀋꐛꃅꄡꇗꊿꀱꊽꃅꄷꊿꀋꋧꀂꀋꈿ，ꊽꃅꄷꃅꌗꇓꈓꏭꀋꋌꃅꁦꉘꅍꇈ，ꃅꑆꇯꇓꈓꏭꀋꋌꃅꃴꇉꀕꈧꌠꉂꇁ。ꋋꆹꇓꈓꊾꑌꇓꈓꋧꃅꐛꑲꆏ，ꉗꈌꊾꑌꄡꇗꉗꈌꋧꃅꐛ。
ꁦꀮꂷꇬꁏꇈ，ꇁꄿꏢꇬꈴꇀꌦ。ꈛꎼꅷꇁꌠꉬꄉ，ꉢꎼꐙꄏꇁꀐ，ꏸꑭꇬꊵꑵꂷꏣꄀꇬꁋꄉꌠꌡ。ꈛꎼꇬꑌ，ꉉꆹꉇꆹꄹꐰꋍꁘꉎꋍꁘꃅꄔꀋꐽ，ꉢꉜꇬꋋꆹꉠꆭꑆꑬꅮꐱꁵꀊꂥꋓꌠꅑ。ꀃ—ꀊ！ꉠꆭꑆꑬꅮꋋꋓꅑꇓꈓꐺꇬꆹ，ꋽꐯꋽꄷꌠꉬꑴꍰ！ꄻꅑꄚꐺꇬꆏꊾꃚꊾꄜ，ꈁꉬꑊꋌꈝꃀꈭꇓꈪꇓꅍꐛꀋꀨꋋꏢꅑ。ꈍꑋꈎꂾ，ꃄꎖꈛꎖꊿꁥꇫꑟꇁꄉ，ꃅꐎꋍꁮꆪꎕꂷꎖꇈꉉꇬ，ꄚꋌꈚꈝꃀꀊꐯꑠꏢꄻꇁꑴꄷ，ꄚꅑꀋꃋꑟꌠꀑꀋꁖꅇꀋꈨꃅꎍꑴꌦ。
ꋓꉪꀋꁨꃅꈝꃀꈍꎳꐕꈴꇁꀐꅊꇈ！ꁧꎏꄽꂫꂶꌠꁏꇬꆏ，ꉠꃅꄷꁡꇤꋋꂷꃅꊌꂿꉆꀐ。ꋋꄮꇬꆏ，ꉘꁮꂶꌠꑌꎎꁮꐚꏭꅑꒉꀐꑴꇬ，ꈨꑭꄡꇗꏁꌬꅍꃄꅉꇬꃪꎍꑴꌦ，ꉌꋊꑓꁁꏭꃅꐙ。
ꊁꀊꉗꀋꐛꇬꆏ，ꉪꃅꄷꁡꇤꋋꂷꃅꉘꁮꈞꆈꃹꇁꂯꀐꌠꁨꑭꇱꁨꄉꀊꅰꃅꐛꎔ。ꉌꊭꉌꇓꎓꄹꈌꇬꉜꄉꐚꁧꃲ；ꑌꑿꂾꃚꄧꄹꉻꇬꉜꄉꏮꇁꃲ；ꊨꇂꂿꌠꇂꁮꂿꇌꂴꇯꅸ，ꌩꈪꇁꄉꇱꄓꀵꃅꇿꅉꄹꆺꑳꏂꃴꉜꄉꈻꇁꃲ。ꁡꇤꁨꇊꑶꋦꁯꈁꀀꌠꃅ，ꇴꇗꄹꈊꋚꃅꌠꃅꇴꈧꌠꑆꑳꁭꇬꈴꄉ，ꑘꀕꑗꃅꀕꃴꇬꉜꄉꁘꆹꄮꇬ，ꉠꎺꏣꉢꄝꀋꉊꉠꐥꐨꎭꌠꌒꌠꈬꇬꊐꄉꉌꃀꉪꇐꅐꂋꏿ。
ꋌꃀ，ꀉꄉꀉꂿꋍꃢꇈꋍꃢꃅꉢꏁꉡꎭꁧꐙꈝꃀꋋꏢꍬꄉꉈꏭꌧꇐꁱꂷꌷꁧꎻꌠꀋꎺꇁꀋꉆ。ꋌꃀ，ꉪꊇꀁꇬꄚꐛꑴꌦꄮꇬ，ꉂꏣꃅꑍꃅꉖꌌꄉꋍꐕꇈꋍꐕꄹꁌꇐꈤꌠꉂꅇꁊꋺꌠꀋꎺꇁꀋꉆ。ꋌꃀ，ꉠꀉꂿꀉꑳꏃꌊꉠꃅꄷꐝꄮꇬ，ꃅꄷꋌꈚꏣꃀꏣꑟꐋꀨꐥꊈꇁꉪꊇꐞꀋꄚꃅ，ꉌꃀꑓꁴꇉꄉꏃꎭꅷꁧꐙꈝꃀꀊꎴꐕꑟꋺꌠꀋꎺꇁꀋꉆ。ꀊꋨꄮꇬ，ꁡꇤꊿꉪꇬꉪꊇꉂꏣꑲꌺꐆꌊꌞꃅꄷꋉꁧꇬ，ꊂꏭꋍꑍꐥꐨꈍꃅꐙꁧꀋꐚꀐꉂꄉꄹꁆꑓꁴꅐꀐꌠꉢꌋꅜ。
ꉗꈌꊿꉌꐡꅑꈭꐨꉌꃀꑌꐒꑲꌧ。ꋋꆹꊿꊇꉪꇬ，ꋌꉈꆏꁡꇤꋋꂷꇬꉪꊇꒈꃚꌋꆀꁮꅉꇬꀋꐥꀐꉂꌠꉬꐛꅹ，ꑠꃅꉌꐡꌠꉫꎂꀕ。
ꉘꁮꈞꆈꃹꀐ。ꉠꎺꏣꏡꌠꋋꇅꃅꉢꈻꌊꉈꑴꇁꄉꄡꇗꁡꇤꀊꋨꈚꉜꄉꆹ，ꉌꃀꐓꂿꀕꃅꐙꈭꐨ，ꑭꁘꑌꐕꐳꀐ。
ꄽꂫꆏ，ꉢꇁꌊꏣꃀꏣꑟꅍꈿꄉ，ꉡꈯꉡꈜꌠꒈꃚꌋꆀꌧꈿꃚꈍꉗꈍꉗꏢꇬꆏꇁꀋꉆꃅꎍ。
ꀊꋨꄹꉖ，ꉢꇁꉠꃅꄷꋌꈚꂣꈓꇬꄉꀀꑌꇴꒉꀋꅲꆘꅝꐛꅹ，ꉠꉪꏣꏡꌠꄿꐨꃅꉢꃑꃅꄷꉂꏣꇱꄉꐙꃰꏿꅷꃅꄜꄮꇬꑟ。
贾巴甲哈，男，彝族，凉山彝族自治州喜德县人；毕业于西南民族大学彝语言文学专业，文学学士学位；曾授予四川省特级教师、四川省教书育人名师、凉山州优秀教师、凉山州学术和技术带头人后备人选、凉山州彝语言文字先进工作者等荣誉称号；主要从事英语和彝语文教学工作，现为四川省彝文学校高级讲师；系中国少数民族作家学会、中国散文学会、四川省作家协会、凉山州作家协会等会员。
公开出版《贾巴甲哈作品选》《情满家园》（合著）《彝族童谣精选》（合著）等著作；先后在省、州级刊物上发表390多篇文学原创及翻译的作品，多篇散文作品入编初、高中彝语文教材；待出版汉语散文集《流过故乡的河》、彝语小说集《流泪雨季》、彝语散文集《山路弯弯，情路漫漫》、长篇小说集和长篇散文集翻译作品《猎人谷》与《游牧凉山》等多部著作。
微信：LEWS0834
邮箱：1874863578@qq.com
民族公益平台·民族自媒体平台
声明：图片来源网络
若有侵权，请联系删除
