ꈍꑋꄙꈎꂾꇰꆐ，ꄜꁮꀕꉼꆘꀕꃅꄜꁍꇩꑿꌋꈤꃅꄷꋦꅷꀃꑍꋍꄮꑟꇁꌠꉪꆈꌠꋋꁯꆹ，ꀃꌋꀊꆨꇰꆏꊨꏦꊿꋅꁱꀕꑠꆏꏃꁍꆿꇤꒉꃅꐥꅸꇁꑠꁯꉬ，ꊨꏦꊿꀹꃅꀹ，ꊨꏦꅇꂷꁱꂷꐥ，ꃢꃅꈚꎔꁱꀕꐥ，ꑱꍹꐞꄜꇮꇐ，ꎭꁻꎭꏿꇮꇐ，ꃢꈪꈚꍣꇮꇐꉬꄷꌦ，ꑳꋉꇤꄉꇮꇐ，ꌩꊨꌩꄵꇮꇐ，ꎸꋩꎸꐷꇮꇐ，ꇓꁶꇓꋖꇮꇐ，ꐎꋩꏂꋩꇮꇐꉬꄷꌦ，ꆅꉃꈻꎴꌧꇐ，ꌠꑊꀘꂾꁱꀕ，ꆀꃅꃤꆦꌧꇐ，ꈎꌋꆪꄏꌧꇐ，ꑟꀱꅺꏮ，ꎆꀱꎆꏮ，ꌧꅓꏮꐕ，ꑙꆅꏓꆅꅓꄷꌦ，ꑮꑟꅪꏷ，ꃶꃅꌱꋠ，ꈎꏅꆪꆷ，ꄔꊒꄔꈩꁱꀕꉬꄸꌦ，ꌦꏸꌦꋩ，ꁍꋩꀿꏦꁱꀕꃅꑠꉉꌐꑘꀋꉬꃅꐥꑠꁯꉬ。
ꊿꋅꊨꏦꁱꀕꋌꈨꈐꏭꆏ，ꑞꑵꉬꄿꂿꉙꇐꑠꈨꄚꈐꏭꐊꅷꇁꌠꉬ，ꅺꌡꇬ，ꑮꑟꅪꏸ，ꃶꃅꌐꋠꄮꇬꆏꉙꇐꊱꐥ，ꌦꋩꆅꏦꁍꃀꀿꃀꀕꐚꄮꇬꑌꉙꇐꈨꐥ，ꆀꃅꃤꆦꊿꀘꊿꂾꄮꇬꑌꉙꇐꈨꐥ，ꈎꏅꄔꊒꉬꄷꌦꃅꇬꑌꄡꉙꇐꑠꈨꐥꇬꎷꌠ，ꉌꇿ，ꉌꌒ，ꉌꐒ，ꉌꎭꉬꄿꂿꉙꇐꋌꈨꆏꊿꌌꀋꂿꑘꃅꉙꅷꇁꌠ，ꄚꀊꃨꊰꑌꀮ，ꑍꀮꐯꀋꌡ，ꃮꁖꊰꑌꊭ，ꑍꊭꐯꀋꌡ，ꉙꇐꊰꑌꑟ，ꑍꑟꐯꀋꌡꄸꄉ，ꁍꃀꀿꃀꀕꐚꅉꇬꆏ，ꌦꍞꆅꏸꃆꂮꉙ，ꋌꆏꊿꌦꀊꈬꉙꄸ（ꇖ）ꄸꌠꑌꐥ，ꌕꅔꁆꏯꆏ，ꑵꈬꉙ（ꇖ）ꄸ，ꏃꎖꃅꄸꆏꀊꉎꉙꄸ，ꒌꆈꃅꄸꆏꉙꇊꄏꄸꌠꑌꐥ，ꉙꌠꆹꀊꄙꒉꆈꏃꎖꌕꅔꐯꇰꀑꐱꆹꐯꐊꌐꌠ，ꈁꄸꑌꌦꅍꆅꈜꉙ，ꎭꐪꅧꑌꉙ，ꌦꂶꌠꏃꎭ，ꈭꂘꈜꂘ，ꁍꐊꉬꃅꁧ，ꀿꐊꎭꁻꁧ，ꃀꐊꑱꍹꁧꄸꋌꈨꉬꌐꌠ。
ꊿꌦꂶꌠꌺꃰꂷꉬꄸꆏ，ꌺꌦꀑꑌꒉꄸꄉꌞꀑꑌꁆꏯꂴꉙꏦꐥ：ꊿꌦꂶꌠꌋꅪꂷꆹꉬꀑꄸꆏ，ꅪꌦꀿꃅꒉꄸꄉꌞꀿꃅꁆꏯꂴꉙꏦꐥ，ꋌꆹꌌꌕꊨꃅꄉꉙꌠ，ꌕꊰꈎꈍꐯꃅꌦꌠꆹꅪꌦꀿꃅꇨꄸꉙꌠ，ꉬꊰꈎꈍꐯꌦꌠꆹ，ꅪꌦꀿꃅꎭꄸꄉꉙꌠ，ꃘꊰꈎꊂꌦꈧꌠꆏ，ꅪꌦꀿꃅꒉꄸꄉꉙꌠ，ꌺꃰꑌꌕꊰꈎꈍꐯꃅꌦꌠꆹ：ꌺꌦꀑꑌꇨꄸꌠ，ꏀꆹꈬꐎꃅꌦꈧꌠꆏꌺꌦꀑꑌꎭꄸꄉꉙꌠ，ꃘꊰꈎꊂꌦꈨꌠꆹꌺꌦꀑꑌꒉꑵꄸꄉꉙꌠ，ꋌꆹꃘꊰꏃꊰꈎꊂꆏꁍꃀꀿꃀꐛꌌꄉꉌꂵꇿꏮꃅꋩꏦꄸꌠꄜ。
ꑮꑟꅪꏸꄮꉙꌠꆹ，ꑮꑟꑘꀕꉙꄸꌠꐥ，ꑮꑟꃆꃀꐧꌺꉙꄸꌠꐥ，ꑮꑟꄡꏈꉙꄸꌠꐥ，ꋌꆹꆈꌠꀀꀽꀋꊨꐭꉙꀋꐊꅉꇬꅑꌠꉬ。ꀊꄙꃅꄷꆏ，ꑮꑟꄡꏈꉙꄷꌠ，ꒌꆈꏃꎖꃅꄸꆏ，ꑮꑟꑘꀕꉙꄸ，ꌕꅔꃅꈋꏭꆏ，ꑮꑟꃆꃀꉙꄷ，ꋋꆹꈁꉬꆏꌒꃆꌒꂮꉙꌐꌠ，ꑮꑟꃆꃀꁦꀑꀿꉙ，ꃝꀿꃝꁧꉙ，ꑘꀕꁧꀿꉙ，ꑮꑟꁧꀿꉙ，ꑳꌺꁧꀿꉙꄸꌦ，ꃝꇤꁧꀿꉬꄸꌦꃅꉉꑘꀋꉬꃅꐥꑠꑵꉬ。
ꄔꊒꄮꇬꄔꉙꌠꆹ，ꊒꃆꊒꂮꉙ，ꄔꃆꄔꂮꉙ，ꈩꇁꀜꌒꃆꂮ，ꋌꆹꒉꆈꌋꆀꏃꎖꃅꄸꀊꆨꃀꆹꀊꅰꄔꀋꊒꑵ，ꀊꄙꌕꅔꃅꈌꀊꄂꉙꌠꉬ，ꄔꊒꌕꑍꊒꄸꄉ，ꋍꑍꄔꊒ，ꑍꀕꄔꈩ，ꌕꑍꄔꎭꄸꄉ，ꄔꈩꄹꉈꌐꌠꉬ，ꅇꇊꉙꄸꌠꐥ：ꊒꑻꉙꄸꌠꐥ，ꈩꇁꉙꄸꌠꑌꐥ。ꅀꇂꉙꄸꌠꐥ，ꉈꆹꉙꄸꌠꐥ：ꉙꅇꋉꄟꐯꀋꌡꃅꉙꌐ，ꄚꀑꐱꉙꅇꆹꈁꉬꃅꄔꊒꄔꈩꃆꂮꌋꆀꌋꅪꐥꐨꐥꄸꑠꉙꌐꌠ。
ꆀꃅꊿꀘꅉꇬꉙꌠꆹ，ꆀꃅꉎꀕꉙꄸ，ꆀꃅꉎꉐꍔꄸꄉ，ꒉꉐꄉꉙꑠꑵ，ꌕꅔꀊꄙꆏ，ꆀꃅꉎꉐꉙꄸ，ꒌꆈꏃꎖꆏ，ꆀꃅꉖꀕꉙ，ꆀꃅꉍꀕꉙꄸꄉ，ꌓꀖꆹꋒꑠꉙꑠꑵ，ꆀꃅꇱꇁꃐꒌꉙ，ꐧꇁꈲꒌꉙꄸꄉ，ꀊꏀꀊꎵꑠꆏ，ꑞꉙꏾꆏꑟꉙꃅꑠꑵꉬ。
ꈎꏅꀊꉱꇖ（ꉙ）ꄸꌠꑌꐥ，ꋌꆹꆈꌠꈎꏅꃆꂮꉙ，ꈎꋩꈎꏦ，ꈎꆹꏃꎭꇬꎭ，ꈎꏀꋩꏦꌋꇁꃅꑠꑵ，ꈎꏅꌠꆹꉪꆈꌠꋩꑍꈐꏭꀉꒉꐘꌠꉬ，
ꈎꈤꇁꆏꏅ，ꆪꈤꇁꆏꊒꄸꄉꆈꌠꌺꇖꆹ，ꈎꄏꃮꉘ，ꆪꄏꄉꎧꏬꃅꋍꈓꌠꊿꁯꌠꄰꃮꂷꆹꅉꀕꏅꌐꌠ，ꈎꏅꌠꆹꌕꑍꅑꇖꑍꏅꏦꐥ，ꂴꈎꏅꀒꄹꉖꌠꆹ，ꀉꁌꀊꂵꌵꄸ，ꋍꊂꄹꉇꆏꈎꏅꃮꌉ，ꊂꄹꉈꆏ，ꅫꃀꌱꃀꈨꌠꆏ，ꃮꃶꋴ，ꌺꃰꈨꌠꆹꃷꇎꋍꁯꅍꃅꈩꄉꎧꐱꀧꅝꄸꄉꎧꅝꇉꄚꄉꈩꌒꃅꃅꎧꅝꎸꋠꈎꏅꀊꉱꑌꄚꄉꇖ。
ꈎꏅꀊꉱꇖ（ꉙ）ꄸꌠꑌꐥ，ꈩꇁꌒꌠꉙ，ꋠꃆꅝꂮꉙ，ꉌꇿꉌꌒꉙ，ꂴꆏꁍꃀꀿꃀꉙꀉꁌꀊꂵꉙ，ꊂꆏꀊꉘꌠꏀꑮꆜꈨꌠꉙ，ꀊꉱꇊꀊꉱ，ꑘꀕꇊꑘꀕ，ꈎꆹꆏꋍꈓ，ꑠꃅꎭꃤꄸꌠꅠꌠ，ꎭꌠꐒꌠꑞꑌꆏꏃꈢꋒꁧꌐꃲ。ꑘꀕꇊꑘꀕ，ꀊꉱꇊꀊꉱ，ꈎꏀꋍꈓꇬ，ꆫꌠꑌꑿꀻꎆꇁꂿꄷ，ꂿꌠꆿꍯꂷꈯꇁꂿꄷ，ꆀꃅꌠꑊꀘꂾꑌ，ꍞꉃꍞꑳꇁꂿꄷ，ꆅꉃꆅꌒꇁꂿꄷ，ꉈꅐꊋꃅꎆꎹꁧꌠꑌ，ꎆꎹꎆꊌꂿꄷ。ꌶꌺꁱꂷꌷꌠꑌ，ꌧꇐꉀꎆꆹꂿꄷ，ꀊꉱꇊ！ꀊꉱ，ꑘꀕꇊꑘꀕ，ꆀꃅꈎꏅꑠꂷꑌ，ꆿꆪꏮꁧꏂꆏꈭꇁꃹꈴꆪ，ꀏꆹꆀꇁꌱꈴꆪ，ꎹꄃꆹꁍꇁꀿꅍꏓ，ꃮꇇꏦꏪꆹꊈꇁꌐꅍꏓ，ꃮꐧꃮꅿꆹꏣꇁꑟꅍꏓ，ꀒꈓꑠꃅꏅ，ꊂꈎꈜꀕꑠꃅꏅꃅꄉꉙꇎꉙꅗꄮꀋꐥꃅꉙꑠꑵ，ꉙꅸꅫꃀꌱꃀꈎꏅꎭꇁꄮꑌꄡꉙꑟꃅ，ꋌꈨꒉꄸꃅꆀꃅꈎꏅꐩꋊꑠꆹꎵꑳꀕꃅꆈꌠꌺꇖꐊꄉꀋꑍꀋꈤꃅꇬꄉꏅꅸꀋꃅꀃꑍꋍꄮꑟꇁꀐ。
Nuosu故事
民族文学自媒体平台
邮箱：1874863578@qq.com
Nuosu故事”不止是Nuosu的故事也是你我的故事
