![]()
དབྱར་རྩྭ་དགུན་འབུ་འཚོལ་བསྡུ་དང་ཕྱིར་འཚོང་ཉོ་སྒྲུབ་ཀྱི་
དོན་དག་སྔར་བས་ཚད་ལྡན་དུ་གཏོང་རྒྱུའི་སྐོར་གྱི་བརྡ་ཁྱབ།
2021ལོར་རྒྱལ་ཁབ་ནགས་ལས་དང་རྩྭ་ཐང་ཅུས་དང་ཞིང་ལས་གྲོང་གསེབ་པུས་2021ལོའི་སྤྱི་བསྒྲགས་ཨང་15པའི（རྒྱལ་ཁབ་གཙོ་གནད་སྲུང་སྐྱོང་རི་སྐྱེས་རྩི་ཤིང་གི་མིང་ཐོ）ནང་དུ་། ཁྱབ་བསྒྲགས་བྱས་ནས་དབྱར་རྩྭ་དགུན་འབུ་ནི་རྒྱལ་ཁབ་ཀྱི་རིམ་པ་གཉིས་པའི་རི་སྐྱེས་རྩི་ཤིང་སྲུང་སྐྱོང་ཁོངས་སུ་བཅུག་པ་རེད། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རི་སྐྱེས་རྩི་ཤིང་སྲུང་སྐྱོང་སྲོལ་ཡིག》《མཚོ་སྔོན་ཞིང་ཆེན་ནགས་ལས་དང་རྩྭ་ཐང་ཅུས་ཀྱི་དབྱར་རྩྭ་དགུན་འབུ་དོ་དམ་ལ་ཤུགས་སྣོན་རྒྱག་རྒྱུའི་སྐོར་གྱི་བརྡ་ཐོ》སོགས་བཅའ་ཁྲིམས་ཁྲིམས་སྲོལ་དང་སྲིད་ཇུས་ཡིག་ཆ་ལག་ལེན་མཐར་ཕྱིན་བསྟར་ཆེད།རང་རེའི་ཀྲོའུ་ཡི་དབྱར་རྩྭ་དགུན་འབུ་ཐོན་ཁུངས་སྲུང་སྐྱོང་དང་དོ་དམ་ལས་དོན་ལ་སྔར་བས་ཤུགས་སྣོན་བརྒྱབ་སྟེ་དབྱར་རྩྭ་དགུན་འབུ་འཚོལ་བསྡུ་དང་། ཕྱིར་ཚོང་། ཉོ་སྒྲུབ་བཅས་ཀྱི་བྱ་སྤྱོད་ཚད་ལྡན་དུ་བཏང་ནས་ཁྲིམས་ལྟར་སྲུང་སྐྱོང་བེད་སྤྱོད་ཀྱི་རྣམ་པ་ཟབ་མོ་ཞིག་གཏོད་དགོས། ད་ལྟ་《དབྱར་རྩྭ་དགུན་འབུ་འཚོལ་བསྡུ་དང་། ཕྱིར་ཚོང་། ཉོ་སྒྲུབ་བཅས་སྔར་ལས་ཚད་ལྡན་དུ་གཏོང་རྒྱུའི་སྐོར་གྱི་བརྡ་ཁྱབ་》གཤམ་གསལ། གཅིག འཚོལ་བསྡུ་ལག་ཁྱེར་“རྒྱལ་ཁབ་གཙོ་གནད་སྲུང་སྐྱོང་རི་སྐྱེས་རྩི་ཤིང་འཚོལ་བསྡུ་ལག་ཁྱེར་（གཤམ་དུ་བསྡུས་མིང་ལ་འཚོལ་བསྡུ་ལག་ཁྱེར་ཟེར།）”རེ་ཞུ་བྱེད་དགོས།རྒྱལ་ཁབ་ནགས་ལས་དང་རྩྭ་ཐང་ཅུས་ཀྱིས་གཅིག་གྱུར་གྱིས་པར་ལེན་བྱ་དགོས། དབྱར་རྩྭ་དགུན་འབུ་ཁྱབ་ཁོངས་ཀྱི་རྫོང་རིམ་པའི་ནགས་རྩྭ་སྡེ་ཁག་གིས་ཞང་（གྲོང་རྡལ）སྲིད་གཞུང་ཁག་སྒྲིག་འཛུགས་བྱས་ཏེ་ཁོངས་གཏོགས་ས་ཁོངས་ནང་གི་སྲིད་འཛིན་གྲོང་ཚོའི་མི་གྲངས་གཞིར་བཟུང་ཞང་（གྲོང་རྡལ）ཚན་པར་བྱས་ནས་རིམ་པ་རེ་རེ་བཞིན་ཞིང་ཆེན་ནགས་རྩྭ་ཅུས་ལ་རྒྱལ་ཁབ་ཀྱི་གཙོ་གནད་སྲུང་སྐྱོང་རི་སྐྱེས་རྩི་ཤིང་འཚོལ་བསྡུ་ལག་ཁྱེར་རེ་ཞུ་བྱེད་དགོས། ཞང་（གྲོང་རྡལ་）ཁག་གི་དབྱར་རྩྭ་དགུན་འབུ་ཁྱབ་པའི་སྲིད་འཛིན་གྲོང་ཚོས་སྡེ་ཚན་དེ་གའི་སྔོག་འདོན་པའི་འབྲེལ་ཡོད་ཆ་འཕྲིན་བསྡོམས་རྩིས་དང་སྙན་སེང་ཞུ་བ་དང་། མིང་རྟགས་བཀོད་ནས་ཐམ་ག་བརྒྱབ་རྗེས་ཞང་（གྲོང་རྡལ་）སྲིད་གཞུང་ལ་སྙན་སེང་ཞུ་བ་དང་། ཞང་（གྲོང་རྡལ་）ཁག་གི་སྲིད་གཞུང་གིས་ཞིབ་བཤེར་ཕྱོགས་བསྡུས་བྱས་རྗེས་མིང་རྟགས་བཀོད་ནས་ཐམ་ག་བརྒྱབ་ནས་རྫོང་རིམ་པའི་ནགས་རྩྭ་སྡེ་ཁག་ལ་གཅིག་གྱུར་གྱིས་འཚོལ་བསྡུ་ལག་ཁྱེར་རེ་ཞུ་བྱེད་དགོས། འཚོལ་བསྡུ་ལག་ཁྱེར་བླངས་རྗེས་གཞི་ནས་དབྱར་རྩྭ་དགུན་འབུ་འཚོལ་བསྡུ་བྱས་ཆོག སྲིད་འཛིན་གྲོང་ཚོ་ཁག་གི་འཚོལ་བསྡུ་བྱེད་མཁན་གྱིས་དབྱར་རྩྭ་དགུན་འབུ་བཙོང་བ་དང་ཉོ་སྒྲུབ་བྱེད་མཁན་ལ་འཚོལ་བསྡུ་ལག་ཁྱེར་གྱི་བསྐྱར་དཔར་གཉིས་པ་མཁོ་འདོན་བྱེད་དགོས་པ་མ་ཟད། རྫོང་རིམ་པའི་ནགས་རྩྭ་སྡེ་ཚན་གྱི་གཞུང་ཐེལ་རྒྱག་དགོས། གཉིས། དབྱར་རྩྭ་དགུན་འབུ་ཕྱིར་འཚོང་ཉོ་སྒྲུབ་བྱེད་པར་སྲིད་འཛིན་ཆོག་མཆན་སྤྲོད་པའི་ཞིབ་མཆན། （གཅིག）ཁྲིམས་མཐུན་ཡོང་ཁུངས་ཀྱི་དཔང་ཡིག་བཅས་ཡིན། དབྱར་རྩྭ་དགུན་འབུ་ཉོ་སྒྲུབ་བྱེད་སྐབས། དུས་ཐོག་ཏུ་ཕྱིར་འཚོང་མཁན་ལ་དབྱར་རྩྭ་དགུན་འབུ་འཚོལ་བསྡུ་ལག་ཁྱེར་གྱི་པར་ལོག་ལེན་དགོས་པ་དང་འབྲེལ་ཉོ་སྒྲུབ་གན་རྒྱ་འཇོག་དགོས། (གཉིས།)2024ལོའི་ཟླ་1ཚེས་23ཉིན་ནས་བཟུང་དབྱར་རྩྭ་དགུན་འབུ་ཉོ་སྒྲུབ་བྱེད་མཁན་ཚན་པས་རེ་ཞུའི་ཡིག་ཆ་དང་། རྒྱལ་ཁབ་གཙོ་གནད་སྲུང་སྐྱོང་རི་སྐྱེས་རྩི་ཤིང་སྲིད་འཛིན་ཆོག་འཐུས་རེ་ཞུའི་རེའུ་མིག་འཚོལ་བསྡུ་ལག་ཁྱེར་གྱི་པར་ལོག（རྫོང་རིམ་པའི་ནགས་རྩྭ་སྡེ་ཚན་གྱི་གཞུང་ཐམ་རྒྱག་པ）ཉོ་སྒྲུབ་གན་རྒྱའི་པར་ལོགདང་། ཕྱིར་འཚོང་གན་རྒྱའི་པར་ལོག་དང་ལས་གཉེར་ལག་ཁྱེར་གྱི་པར་ལོག་དང་ཁྲིམས་མིའི་ཐོབ་ཐང་ལག་ཁྱེར་གྱི་པར་ལོག་བཅས་འཁྱེར་ནས་ས་གནས་རྫོང་རིམ་པའི་ནགས་རྩྭ་སྡེ་ཚན་ལ་ཞིབ་བཤེར་བསམ་འཆར་འདོན་དུ་བསྐྱོད་དེ་ཁུལ་ནགས་རྩྭ་ཅུས་ཀྱི་བསྐྱར་ཞིབ་བསམ་འཆར་འདོན་རྗེས་ཞིང་ཆེན་ནགས་རྩྭ་ཅུས་ལ་ཞིབ་བཤེར་ཆོག་མཆན་སྤྲོད་དགོས། དྲ་ཐོག་ནས་དབྱར་རྩྭ་དགུན་འབུ་འཚོང་མཁན་གྱིས་གོང་གསལ་གྱི་རྒྱུ་ཆ་མཁོ་འདོན་བྱེད་པ་ཕུད། ད་དུང་དྲ་ཐོག་ཚོང་ཁང་གི་ཨང་གྲངས་དང་། དྲ་ཐོག་ཚོང་ཁང་གི་མིང་། ཐུམ་སྒྲིལ་ཚད་གཞི་བཅས་མཁོ་འདོན་བྱེད་དགོས། （གསུམ།）ཁུལ་ཡོངས་ཀྱི་རིམ་པ་ཁག་གི་ནགས་རྩྭ་སྡེ་ཁག་གིས་མིས་བཟོས་དབྱར་རྩྭ་གསོ་སྐྱོང་བྱེད་པའི་འབྲེལ་ཡོད་སྡེ་ཚན་ལ་འཚོལ་བསྡུ་ལག་ཁྱེར་རེ་ཞུ་བྱས་མི་ཆོག་པ་དང་། མིས་བཟོས་དབྱར་རྩྭ་གསོ་སྐྱོང་བྱེད་པའི་འབྲེལ་ཡོད་རེ་ཞུའི་འགྲོ་ལུགས་བདག་སྤྲོད་བྱས་མི་ཆོག གསུམ། དབྱར་རྩྭ་དགུན་འབུ་ཕྱིར་གཏོང་སྲིད་འཛིན་ཆོག་འཐུས་རེ་ཞུ་སྡེ་ཚན་གྱིས་རི་སྐྱེས་རྩི་ཤིང་ཕྱིར་གཏོང་ནང་འདྲེན་དོ་དམ་སྲིད་འཛིན་ཆོག་འཐུས་དོན་ཚན་རེ་ཞུའི་རེའུ་མིག་དང་། འཚོལ་བསྡུ་ལག་ཁྱེར་གྱི་པར་ལོག（རྫོང་རིམ་པའི་ནགས་རྩྭ་སྡེ་ཁག་གི་གཞུང་ཐམ་རྒྱག་པ）འགག་སྒོའི་ཕྱིར་གཏོང་ནང་འདྲེན་དངོས་ཟོག་རྩིས་སྤྲོད་བྱེད་མཁན་གྱི་ཐོ་འགོད་འཛིན་ཡིག་དང་། ཕྱིར་གཏོང་གན་རྒྱ། ཁྲིམས་མིའི་ཐོབ་ཐང་ལག་ཁྱེར་གྱི་པར་ལོག། ལས་གཉེར་ལག་ཁྱེར་གྱི་པར་ལོག ས་གནས་རྫོང་རིམ་པའི་ནགས་རྩྭ་སྡེ་ཁག་གི་ཞིབ་བཤེར་བསམ་འཆར། ཁུལ་ནགས་རྩྭ་ཅུས་ཀྱི་བསྐྱར་ཞིབ་བསམ་འཆར་བཅས་ཁྱེར་ནས་ཞིང་ཆེན་ནགས་རྩྭ་ཅུས་ལ་ཞིབ་བཤེར་ཆོག་མཆན་སྤྲོད་དགོས། བཞི། འབྲེལ་ཡོད་ཆོག་འཐུས་འགྲོ་ལུགས་མ་བསྒྲུབས་པའི་མཇུག་འབྲས་ནི་འབྲེལ་ཡོད་ཁྲོམ་ར་དང་དྲ་ཐོག་ནས་དབྱར་རྩྭ་དགུན་འབུ་བཙོང་བའི་སྲིད་འཛིན་ཆོག་འཐུས་ཀྱི་ཆོད་དོན་ཡི་གེ་མ་བསྒྲུབས་ན།《རི་སྐྱེས་རྩི་ཤིང་སྲུང་སྐྱོང་བྱེད་ཕྱོགས་སྐོར་གྱི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་སྲོལ་ཡིག་》གི་འབྲེལ་ཡོད་གཏན་འབེབས་གཞིར་བཟུང་ཁྲིམས་ལྟར་ཞིབ་བཤེར་ཐག་གཅོད་བྱ་དགོས། ལྔ།《རི་སྐྱེས་རྩི་ཤིང་སྲུང་སྐྱོང་བྱེད་ཕྱོགས་སྐོར་གྱི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་སྲོལ་ཡིག་》གི་འབྲེལ་ཡོད་དོན་ཚན་། དོན་ཚན་བདུན་པ། སྡེ་ཚན་དང་མི་སྒེར་གང་ཞིག་ཡིན་རུང་ཚང་མར་རི་སྐྱེས་རྩི་ཤིང་གི་ཐོན་ཁུངས་སྲུང་སྐྱོང་བྱེད་པའི་འོས་འགན་ཡོད་ལ། རི་སྐྱེས་རྩི་ཤིང་དང་དེའི་སྐྱེ་འཚར་ཁོར་ཡུག་བཙན་བཟུང་ངམ་གཏོར་བཤིག་བཏང་བའི་བྱ་སྤྱོད་ལ་ཐེར་འདོན་དང་ཞུ་གཏུག་བྱེད་དབང་ཡོད། དོན་ཚན་བཅུ་བདུན་པ། རྒྱལ་ཁབ་ཀྱིས་གཙོ་གནད་སྲུང་སྐྱོང་བྱེད་པའི་རི་སྐྱེས་རྩི་ཤིང་འཚོལ་བསྡུ་བྱེད་མཁན་སྡེ་ཚན་དང་མི་སྒེར་གྱིས་ངེས་པར་དུ་འཚོལ་བསྡུ་ལག་ཁྱེར་ནང་གཏན་འབེབས་བྱས་པའི་རིགས་དང་། གྲངས་ཀ། ས་གནས། དུས་ཚོད། བྱེད་ཐབས་བཅས་ལྟར་འཚོལ་བསྡུ་བྱ་དགོས། རྫོང་རིམ་པའི་མི་དམངས་སྲིད་གཞུང་གི་རི་སྐྱེས་རྩི་ཤིང་སྲིད་འཛིན་གཙོ་སྐྱོང་སྡེ་ཁག་གིས་སྲིད་འཛིན་ས་ཁོངས་དེ་ནང་རྒྱལ་ཁབ་ཀྱིས་གཙོ་གནད་སྲུང་སྐྱོང་བྱེད་པའི་རི་སྐྱེས་རྩི་ཤིང་འཚོལ་བསྡུ་བྱེད་པའི་བྱེད་སྐོར་ལྟ་སྐུལ་ཞིབ་བཤེར་བྱེད་དགོས་པ་མ་ཟད། འཚོལ་བསྡུ་བྱེད་པར་ཆོག་མཆན་བཀོད་པའི་རི་སྐྱེས་རྩི་ཤིང་སྲིད་འཛིན་གཙོ་སྐྱོང་སྡེ་ཁག་གམ་དེས་དབང་ཆ་སྤྲད་པའི་ལས་ཁུངས་ལ་དུས་ཐོག་ཏུ་སྙན་སེང་ཞུ་དགོས། དོན་ཚན་བཅོ་བརྒྱད་པ། རྒྱལ་ཁབ་ཀྱི་རིམ་པ་དང་པོའི་སྲུང་སྐྱོང་རི་སྐྱེས་རྩི་ཤིང་བཙོང་རྒྱུ་དང་ཉོ་སྒྲུབ་བྱེད་མི་ཆོག རྒྱལ་ཁབ་ཀྱི་རིམ་པ་གཉིས་པའི་སྲུང་སྐྱོང་རི་སྐྱེས་རྩི་ཤིང་ཕྱིར་འཚོང་དང་ཉོ་སྒྲུབ་བྱེད་པར་ངེས་པར་དུ་ཞིང་ཆེན་དང་། རང་སྐྱོང་ལྗོངས། ཐད་སྐྱོང་གྲོང་ཁྱེར་བཅས་ཀྱི་མི་དམངས་སྲིད་གཞུང་གི་རི་སྐྱེས་རྩི་ཤིང་སྲིད་འཛིན་གཙོ་སྐྱོང་སྡེ་ཁག་གམ་ཡང་ན་དེས་དབང་བསྐུར་བའི་ལས་ཁུངས་ཀྱི་ཆོག་མཆན་ཐོབ་དགོས། དོན་ཚན་བཅུ་དགུ་པ། རི་སྐྱེས་རྩི་ཤིང་སྲིད་འཛིན་གཙོ་སྐྱོང་སྡེ་ཁག་གིས་རྒྱལ་ཁབ་ཀྱི་རིམ་པ་གཉིས་པའི་སྲུང་སྐྱོང་རི་སྐྱེས་རྩི་ཤིང་གཉེར་སྐྱོང་དང་བེད་སྤྱོད་བྱེད་པའི་བྱེད་སྐོར་ལྟ་སྐུལ་ཞིབ་བཤེར་བྱ་དགོས། དོན་ཚན་ཉེར་གསུམ་པ། འཚོལ་བསྡུ་ལག་ཁྱེར་མ་ཐོབ་པའམ་འཚོལ་བསྡུ་ལག་ཁྱེར་གྱི་གཏན་འབེབས་ལྟར་རྒྱལ་ཁབ་ཀྱིས་གཙོ་གནད་སྲུང་སྐྱོང་བྱེད་པའི་རི་སྐྱེས་རྩི་ཤིང་འཚོལ་བསྡུ་མ་བྱས་ན། རི་སྐྱེས་རྩི་ཤིང་སྲིད་འཛིན་གཙོ་སྐྱོང་སྡེ་ཁག་གིས་འཚོལ་བསྡུ་བྱས་པའི་རི་སྐྱེས་རྩི་ཤིང་དང་ཁྲིམས་འགལ་གྱི་ཐོབ་ཆ་གཞུང་བཞེས་གཏོང་རྒྱུ་དང་། ཁྲིམས་འགལ་གྱི་ཐོབ་ཆ་ལྡབ་10མན་གྱི་དངུལ་ཆད་བཅད་ཆོག འཚོལ་བསྡུ་ལག་ཁྱེར་ཡོད་ན་འཚོལ་བསྡུ་ལག་ཁྱེར་ཕྱིར་འཐེན་བྱས་ཆོག དོན་ཚན་ཉེར་བཞི་པ། སྲོལ་ཡིག་འདིའི་གཏན་འབེབས་དང་འགལ་ནས་རྒྱལ་ཁབ་ཀྱིས་གཙོ་གནད་སྲུང་སྐྱོང་བྱེད་པའི་རི་སྐྱེས་རྩི་ཤིང་ཕྱིར་བཙོང་དང་ཉོ་སྒྲུབ་བྱས་ན། བཟོ་ཚོང་སྲིད་འཛིན་དོ་དམ་སྡེ་ཁག་གམ་རི་སྐྱེས་རྩི་ཤིང་སྲིད་འཛིན་གཙོ་སྐྱོང་སྡེ་ཁག་གིས་འགན་འཁྲི་ལས་བགོས་ལྟར་རི་སྐྱེས་རྩི་ཤིང་དང་ཁྲིམས་འགལ་གྱི་ཐོབ་ཆ་གཞུང་བཞེས་གཏོང་རྒྱུ་དང་། ཁྲིམས་འགལ་གྱི་ཐོབ་ཆ་ལྡབ་10མན་གྱི་དངུལ་ཆད་བཅད་ཆོག དོན་ཚན་ཉེར་དྲུག་པ། འཚོལ་བསྡུ་ལག་ཁྱེར་དང་ཕྱིར་གཏོང་ནང་འདྲེན་བྱེད་ཆོག་པའི་དཔང་ཡིག་གམ་འབྲེལ་ཡོད་ཆོག་མཆན་འགོད་པའི་ཡིག་ཆ་དང་ཤོག་བྱང་རྫུན་བཟོ་དང་། ལོག་འཚོང་། བཤུག་སྤྲོད་བཅས་བྱས་རིགས་ལ་རི་སྐྱེས་རྩི་ཤིང་སྲིད་འཛིན་གཙོ་སྐྱོང་སྡེ་ཁག་གམ་བཟོ་ཚོང་སྲིད་འཛིན་དོ་དམ་སྡེ་ཁག་གིས་འགན་འཁྲི་ལས་བགོས་ལྟར་རྩིས་ལེན་དང་ཁྲིམས་འགལ་གྱི་ཐོབ་ཆ་གཞུང་བཞེས་གཏོང་རྒྱུ་དང་། དངུལ་ཆད་སྒོར་ཁྲི་5མན་ཆད་ཀྱི་ཆད་པ་བཅད་ཆོག ཡུས་ཧྲུའུ་བོད་རིགས་རང་སྐྱོང་ཁུལ་ནགས་ལས་དང་རྩྭ་ཐང་ཅུས་ནས། 2024ལོའི་ཟླ་4ཚེས་3ཉིན་ཆེད་དུ་བརྡ་ཁྱབ་བཏང་།
