སྨན་བཅོས་འགན་བཅོལ་གཱ་ནི་སྨན་པར་བསྟེན་པའམ་སྨན་ཁང་ནས་སྨན་ཉོ་སྐབས་ཐོབ་ཐང་ངོས་འཛིན་དང་སྨན་བཅོས་འགན་བཅོལ་གྱི་མི་སྒེར་གྱི་ཐོ་ཁུངས་ནས་གཏོང་སྤྲོད་བྱེད་པར་སྤྱོད་ཀྱི་ཡོད། འོན་ཏེ་ཁྲིམས་འགལ་མི་སྣ་ཁ་ཤས་ཀྱིས་རྒན་རྒོན་གྱི་སྨན་བཅོས་འགན་བཅོལ་གཱ་གཡར་ནས་ཁྲིམས་འགལ་བྱ་སྤྱོད་སྤེལ་བཞིན་ཡོད།
ཉེ་ཆར། ཧྲང་ཧའེ་གྲོང་ཁྱེར་པའོ་ཧྲན་ཁུལ་མི་དམངས་ཞིབ་དཔྱོད་ཁང་གིས་སྨན་བཅོས་འགན་བཅོལ་གཱ་མགོ་སྐོར་བཏང་བའི་གྱོད་གཞི་ཞིག་ཁྱབ་བསྒྲགས་བྱས་ཡོད། ཞུ་སྦྱོར་ཕྱི་མས་རྒན་རྒོན་གྱི་སྨན་བཅོས་འགན་བཅོལ་གཱ་གཡར་ནས་རིན་གོང་དམའ་པོས་སྨན་རྫས་ཉོས་རྗེས་ཕྱིར་བཙོངས་ནས་བར་ཁེ་བླངས་ཤིང་། སྒོར་ས་ཡ་ལྷག་གི་སྨན་བཅོས་འགན་བཅོལ་ཐེབས་རྩ་གཡོ་ལེན་བྱས་པས། ཁྲིམས་ལུགས་ཀྱི་ཆད་པ་ནན་པོ་གཅོད་རྒྱུ་མ་ཟད། རྒན་རྒོན་བཅུ་ལྷག་གྱོད་གཞི་དེའི་ཁྲོད་ཚུད་ཡོད།
གྱོད་གཞི་འདི་རིགས་ཀྱི་ཁྲོད་སྨན་བཅོས་འགན་བཅོལ་གཱ་གཞན་པར་གཡར་མཁན་རྒན་རྒོན་དག་གིས་ཁྲིམས་ལུགས་ཀྱི་འགན་གང་འདྲ་འཁུར་དགོས།
སྨན་བཅོས་འགན་བཅོལ་མགོ་སྐོར་གཡོ་ལེན་གྱི་གྱོད་གཞི་ཆེན་པོ་དེ་ཞིབ་དཔྱོད་ལས་ཁུངས་སུ་བསྐྱལ་རྗེས། རྒན་རྒོན་མང་པོས་ཕ་རོལ་པོ་ནི་སྨན་འཚོང་རྒྱག་མཁན་ཡིན་པ་མི་ཤེས་ཚུལ་བསྟན་མོད། ཞིབ་དཔྱོད་དཔོན་གྱིས་འབྲེལ་ཡོད་མི་སྣ་ངོ་ཤེས་པའི་བརྒྱུད་རིམ་སོགས་གཞིར་བཟུང་། གཱ་གཡར་མཁན་གྱིས་ཤེས་བཞིན་དུ་གཡར་བའི་ངོས་འཛིན་བྱས་ཡོད།
ཞིབ་དཔྱོད་དཔོན་གྱིས་ངོ་སྤྲོད་བྱས་པར། འབྲེལ་ཡོད་སྲིད་ཇུས་ནང་ནམ་རྒྱུན་ན་ཚ་ལྟ་སྐབས་ངེས་པར་དུ་རང་ཉིད་ཀྱི་སྨན་བཅོས་འགན་བཅོལ་གཱ་སྤྱོད་དགོས། འགུལ་སྐྱོད་བྱེད་མི་བདེ་བའི་རྒན་རྒོན་ལ་སྨན་ཚབ་ཉོའི་ལམ་སྲོལ་ཡོད་མོད། འོན་ཀྱང་སྨན་བཅོས་སྒྲིག་གཞི་དང་སྨན་ཚོང་ཁང་གིས་ཚབ་ཉོ་བ་དང་གཱ་འཛིན་མཁན་བར་གྱི་གཉེན་ཉེའི་འབྲེལ་བར་ཞིབ་བཤེར་བྱེད་དགོས་པའི་གཏན་འབེབས་བྱས་ཡོད།
ཞུས་ཡུས་ཚའེ་ཡིས་དྲན་སྐུལ་བྱས་དོན། གྲོང་མིས་རང་ཉིད་ཀྱི་སྨན་བཅོས་འགན་བཅོལ་གཱ་ཉར་ཚགས་དང་བེད་སྤྱོད་ཡག་པོ་བྱེད་དགོས། གང་འདོད་དུ་མི་གཞན་པར་གཡར་ནས་འཛད་སྤྱོད་བྱེད་དུ་འཇུག་མི་ཆོག ཕ་རོལ་པོའི་བྱ་སྤྱོད་དེ་སྨན་བཅོས་འགན་བཅོལ་ཐེབས་རྩ་གཡོ་ལེན་བྱས་པར་ངོས་བཟུང་ན། གཱ་གཡར་མཁན་གྱིས་ཀྱང་ཁྲིམས་ལུགས་ཀྱི་མཇུག་འབྲས་ཚབས་ཆེན་མཉམ་དུ་འཁུར་དགོས།
བསྐྱར་ཞུས། རྒྱལ་མཚན།
ཞུ་དག བཀྲ་ཤིས་ཚེ་རིང་།
རྩོམ་སྒྲིག་པ། ཚེ་རིང་སྒྲོལ་མ།
སྒྲ་འཇུག སྐལ་བཟང་རྒྱལ་མཚན།
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།
ཡིག་སྒམ་ཨང་གྲངས།
གལ་སྲིད་ཁྱེད་ལ་ཁུངས་བཙན་གྱི་གསར་འགྱུར་རམ་ཆ་འཕྲིན་ཆོབ་ཚ་པོ་དེ་འདྲ་ཡོད་ཚེ་ང་ཚོར་བསྐུར་རོགས་གནང་།
ང་ཚོའི་ཡིག་སྒམ་ནི་1132875981@qq.comཡིན།
རྩོམ་ཡིག་གཞིས་ཀ་རྩེའི་ཚགས་པར་ལས་ཁུངས་ཀྱི་ཡིག་སྒམ་rkzbszw@163.comལ་བསྐུར་རོགས་གནང་།
ང་ཚོའི་བརྙན་ཐུང་རྟགས་ཅན་日喀则广播电视台ཟེར་བར་དོ་ཁུར་གནང་ནས་ངོ་མཚར་ལྟད་མོར་གཟིགས་དང་།
