ཀྲུང་ཧྭ་མི་རིགས་ཀྱི་སྲོལ་རྒྱུན་དུས་ཆེན་དཔྱིད་གསར་དུས་ཆེན་འཆར་ཉེ་བའི་སྐབས་འདིར། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་ཞི་ཅིན་ཕིང་གིས་སྤྱི་ཚེས་24ཉིན་བྱང་རྒྱུད་དམག་ཁུལ་ཁང་གི་ལས་ཁུངས་ལ་གཟིགས་ཞིབ་དང་འཚམས་འདྲི་གནང་བར་ཕེབས་པ་དང་། བརྙན་ལམ་བརྒྱུད་དེ་གཞི་རིམ་གྱི་དཔོན་དམག་ལ་འཚམས་འདྲི་གནང་བ་དང་། དམག་དཔུང་གི་དམག་གྲབས་ལས་རེས་དང་ལས་འགན་ལག་ལེན་བསྟར་ཚུལ་ལ་ཞིབ་བཤེར་གནང་བ། ཏང་ཀྲུང་དབྱང་དང་ཀྲུང་དབྱང་དམག་ཨུད་ཀྱི་ཚབ་ཞུས་ནས་མི་དམངས་བཅིངས་འགྲོལ་དམག་གི་བཀོད་འཐབ་པ་དང་། དྲག་ཆས་ཉེན་རྟོག་དཔུང་སྡེའི་དཔོན་དམག དམག་དཔུང་གི་ཞི་བའི་ལས་དོན་སྒྲུབ་མཁན། གྲ་སྒྲིག་དམག་ཞབས་མི་སྣ་དང་། དེ་བཞིན་ཡུལ་དམག་བཅས་ཡོངས་ལ་ལྷག་བསམ་ཟོལ་མེད་ཀྱི་འཚམས་འདྲི་དང་ལོ་གསར་གྱི་སྨོན་འདུན་བཟང་པོ་ཞུས་གནང་ཡོད།
ལུགས་རྙིང་ལོའི་ལོ་གསར་ཆུང་བ་བཏང་ཚར་བ་དང་། ལིའོ་ཉིང་དང་ཧྲེན་དབྱང་གི་ས་གཞི་ཆེན་མོར་སྤྲོ་སྣང་དོད་པའི་དུས་ཆེན་གྱི་རྣམ་པས་ཡོངས་སུ་ཕྱུག སྔ་དྲོའི་ཆུ་ཚོད་9དང་སྐར་མ་30ཙམ་ལ་ཞི་ཅིན་ཕིང་བྱང་རྒྱུད་དམག་ཁུལ་ཁང་གི་ལས་ཁུངས་སུ་ཕེབས་གནང་ཡོད། སྤྲོ་སེམས་འཁོལ་བའི་ཐལ་མོའི་རྡེབ་སྒྲའི་ཁྲོད། བྱང་རྒྱུད་དམག་ཁུལ་ཁང་གི་དཔོན་དམག་གི་འཐུས་མི་དང་བྱམས་བརྩེའི་ངང་མཇལ་འཛོམས་གནང་བ་དང་། ཚང་མ་དང་ལྷན་དུ་དྲན་རྟེན་སྐུ་པར་བསྐྱོན་གནང་ཡོད།
དེ་རྗེས། ཞི་ཅིན་ཕིང་གིས་དམག་ཡོངས་ཀྱི་འབྲེལ་ཡོད་དཔུང་སྡེ་དང་བརྙན་ལམ་བརྒྱུད་དེ་བཀའ་མོལ་གནང་ཡོད། ལྷོ་རྒྱུད་དམག་ཁུལ་གྱི་སྐམ་དམག་ལུའི་ཤོག་ག་གེ་མོའི་ལས་འགན་ཡན་ལག་རུ་ཁག་དང་། ཤར་རྒྱུད་དམག་ཁུལ་མཚོ་དམག་གི་འགྲམ་ངོགས་འཕུར་མདའི་ཐོན་ཤོག་ག་གེ་མོའི་ལས་རེས་ཡན་ལག་རུ་ཁག དབུས་རྒྱུད་དམག་ཁུལ་མཁའ་དམག་གི་ས་ནས་གནམ་ལ་འཕེན་པའི་མེ་ཤུགས་འཕུར་མདེལ་ཡིང་ཤོག་ག་གེ་མོ། དམག་དོན་མཁའ་སྐྱོད་དཔུང་སྡེའི་ལྟ་ཞིབ་སྔོན་བརྡའི་ས་ཚིགས་ག་གེ་མོ། ཀྲེང་ཀྲོའུ་མཉམ་འབྲེལ་ཞབས་ཞུའི་འགན་སྲུང་ལྟེ་གནས་ཀྱི་རླངས་འཁོར་སྐྱེལ་འདྲེན་ཐོན་ཤོག་ག་གེ་མོའི་ཡིང་ཤོག་ཡན་ལག་རུ་ཁག་2པ། དྲག་ཆས་ཉེན་རྟོག་དཔུང་སྡེ་བོད་ལྗོངས་སྤྱི་ཁྱབ་རུ་ཁག་གཞིས་རྩེའི་ཡན་ལག་རུ་ཁག་གི་ལས་སྒྲུབ་རུ་ཆེན་3པའི་དཔོན་དམག་བཅས་ཀྱིས་རུ་སྟར་འགྲིག་པོས་ཀྲུའུ་ཞི་ཞི་ཅིན་ཕིང་ལ་དམག་གྲབས་ལས་རེས་དང་ལས་འགན་ལག་ལེན་བསྟར་ཚུལ་སྐོར་རིམ་པས་སྙན་སེང་ཞུས་ཡོད། ཞི་ཅིན་ཕིང་གིས་འབྲེལ་ཡོད་གནས་ཚུལ་ངོ་སྤྲོད་ཞུས་པར་ནན་ཏན་ངང་གསན་པ་དང་། ཁོང་ཚོའི་ལས་དོན་ལ་ཁས་ལེན་གང་ལེགས་གནང་བ་མ་ཟད། ཁོང་ཚོར་བྱམས་བརྩེའི་འཚམས་འདྲི་ཡང་ཞུས་གནང་བ་རེད།
ཞི་ཅིན་ཕིང་གིས། ཉིན་འགའི་རྗེས་སུ་དཔྱིད་གསར་དུས་ཆེན་ཡིན་པས། དམག་ཡོངས་ཀྱི་དམག་དཔུང་གིས་དམག་གྲབས་ལས་རེས་ལ་ཤུགས་སྣོན་བརྒྱབ་སྟེ། ཐོན་བཟོ་ཡོད་པའི་ཐོལ་བྱུང་གི་གནས་ཚུལ་སྣ་ཚོགས་དུས་ཐོག་དང་ནུས་ལྡན་ངང་ཐག་གཅོད་བྱས་ཏེ། རྒྱལ་ཁབ་ཀྱི་བདེ་འཇགས་དང་སྤྱི་ཚོགས་བརྟན་ལྷིང་སྲུང་སྐྱོང་ཡག་པོ་བྱེད་པ་དང་། རྒྱལ་ཡོངས་མི་དམངས་ནས་སྤྲོ་སྣང་དང་། ཞི་བདེ་ལྷིང་འཇགས་ཀྱི་དཔྱིད་གསར་དུས་ཆེན་ཞིག་གཏོང་ཐུབ་པར་འགན་ལེན་བྱ་དགོས། ལས་དོན་གཅིག་གྱུར་འཆར་འགོད་ཡག་པོ་བྱ་རྒྱུར་དོ་སྣང་བྱས་ཏེ། དཔོན་དམག་གི་དུས་ཆེན་རིང་གི་འཚོ་བ་བཀོད་སྒྲིག་ཡག་པོ་བྱ་དགོས་ཞེས་ནན་སྟོན་གནང་ཡོད།
ཀྲང་ཡིའུ་ཞ་སོགས་བྱེད་སྒོར་ཞུགས་ཡོད།
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།
རྩོམ་སྒྲིག་འགན་ཁུར་པ། བསྟན་འཛིན་འཇིགས་མེད།
དོ་དམ་པ། བསམ་གྲུབ་བསྟན་འཛིན།
