འདི་ག་ལས་ཁུངས་ཀྱི་གསར་འགོད་པས་བོད་རང་སྐྱོང་ལྗོངས་མི་དམངས་འཐུས་ཚོགས་སྐབས་བཅུ་གཉིས་པའི་ཚོགས་འདུ་ཐེངས་གསུམ་པའི་ཐོག་ནས་ཤེས་རྟོགས་བྱས་པར་གཞིགས་ན། སྤྱི་ལོ་2025ལོར་བོད་ལྗོངས་ཀྱིས་རྣམ་གྲངས་གལ་ཆེན་འཛུགས་སྐྲུན་བྱེད་པའི་འགག་སྒྲོལ་ལོའི་བྱ་སྤྱོད་ཧུར་ཐག་སྤེལ་ནས་མ་དངུལ་སྒོར་དུང་ཕྱུར་2000ཡན་འཇོག་ཐུབ་པ་བྱ་རྒྱུ་དང་། ཁྲོན་བོད་ལྕགས་ལམ་དང་། རྒྱལ་ལམ་318 རྒྱལ་ལམ་219 རྒྱལ་ལམ་109 དེ་བཞིན་གྲོང་གསེབ་གཞུང་ལམ་སོགས་འགྲིམ་འགྲུལ་གྱི་རྨང་གཞིའི་སྒྲིག་བཀོད་འཛུགས་སྐྲུན་ཇེ་མགྱོགས་སུ་གཏོང་རྒྱུ་དང་། སྤོ་བོ་རྫོང་ནས་ར་འོག་བར་གྱི་ལྕགས་ལམ་བསྐྲུན་འགོ་འཛུགས་རྒྱུ། མཚོ་བོད་ལྕགས་ལམ་གོར་ལྷའི་ལམ་རྒྱུད་གློག་ཤུགས་ཅན་དུ་བསྒྱུར་བཟོ་བྱ་རྒྱུ། བར་རྩེ་སོགས་ཀྱི་ཆུ་བེད་རྣམ་གྲངས་འཛུགས་སྐྲུན་ཇེ་མགྱོགས་སུ་གཏོང་རྒྱུ། འབྲི་ཆུའི་སྟོད་རྒྱུད་ནས་ཧུའུ་པེ་བར་གྱི་ཆེས་མཐོའི་ཐད་རྒྱུག་གློག་གཏོང་ལས་གྲྭ་བསྐྲུན་ནས་འཁོར་སྐྱོད་ཐུབ་པ་བྱ་རྒྱུ། གཞན་ཡང་ད་དུང་བོད་རང་སྐྱོང་ལྗོངས་སྨན་རྩིས་ཁང་ལེགས་སྒྱུར་རིམ་སྤོར་ལས་གྲྭ་དང་། ཧྭ་ཞི་སྨན་ཁང་གཉིས་པའི་བོད་ལྗོངས་སྨན་ཁང་གི་རྒྱལ་ཁོངས་སྨན་བཅོས་ལྟེ་གནས། བོད་ལྗོངས་སློབ་ཆེན་གྱི་སློབ་གསོའི་གྲོང་ཁུལ་སློབ་གྲྭ། ཕུ་མདོ་ཆུ་འདྲེན་ལས་གྲྭ། གྲོང་ཁྱེར་ལམ་གཞུང་གི་རྨང་གཞིའི་སྒྲིག་བཀོད་སོགས་ཀྱི་གཙོ་གནད་རྣམ་གྲངས་བཅས་གང་ལེགས་སྤེལ་ཏེ། བོད་རང་སྐྱོང་ལྗོངས་དབུ་བརྙེས་ནས་ལོ་ངོ་60འཁོར་བར་ཕྱག་རྟགས་གྱ་ནོམ་པ་ཞིག་འབུལ་རྒྱུ་ཡིན་པ་རེད།
ཡོང་ཁུངས། བོད་ལྗོངས་ཉིན་རེའི་ཚགས་པར་བོད་ཡིག་སྨྱན་སྦྱོར་ལྟེ་གནས།
རྩོམ་སྒྲིག་འགན་ཁུར་པ། བསྟན་འཛིན་འཇིགས་མེད།
དོ་དམ་པ། བསམ་གྲུབ་བསྟན་འཛིན།
